>المتفرج وبطل القصة

>

فى الماضى وأثناء طفولتى..حينما كنت أتابع أحداث مُسلسل تليفزيونى مثلاً كنت أكاد يصيبنى الجنون من غباء البطل الذى لا يشك لحظة فى سكرتيرته الحسناء والتى تعطى أسرار شركته لمنافسه الوحيد وكنت أتعجب كيف لا يلاحظ تلجلجها فى بعض المواقف أو يقبل أن يدخل مكتبه ليجدها تعبث فى أوراقه وحينما يسألها وتقول له أى سبب واهى يصدقها على الفور ويبدأ فى العمل وكأن شيئاً لم يحدث وكنت أتسائل كيف يصدقها بهذه السهولة!!.
ومازلت أذكر أحداث الفيلم العربى القديم الذى كان البطل طفل صغير وكان اللص يريد سرقته وكيف لم ينتبه إلى أنه يختبأ فى أسهل مكان ممكن أن يراه فيه اللص.. وكيف لم يلاحظ أن اللص أصبح خلفه ليسرع فى الجرى!!.
ومازلت أتذكر برنامج عن الحيوان وكان يتكلم فيه عن الأفاعى وكيف لا يستمع هذا الشخص الواقف بالقرب منها الموسيقى التصويرية وهى ترتفع منذرة بحدوث كارثة قبل أن تلدغه الأفعى.
وحينما كبرت قليلاً وأصبحت أدرك الأمور بصورة أكثر واقعية وجدت أن إجابة تساؤلاتى هى أن البطل لا يرى مايراه المُشاهد لسبب بسيط وهو أنه داخل الصورة. فهو لا يسمع المؤثرات الصوتية التى تنذره بقرب شيئاً خطيراً.
ولا يوجد له عين خلفية ليرى اللص من خلفه وهو يمشى على أطراف أصابعه حتى لا يسمعه فيفر منه.
ولا يترك أذنه فى المكتب لتستمع لخيانة سكرتيرته له عبر هاتفه ليعلم حقيقتها.
كل هذه الأشياء يتمتع بها المُشاهد فقط الذى يجلس فى أمان ويعلم بأن هذه الأشياء لا تحدث له مهما بدا تأثره ومتابعته الصادقة فهذه المشاعر ستنتهى سريعاً فور إغلاق التلفاز.

وأيضاً حينما كنت مُدمنة تصوير وأهوى تصوير نفسى دائماً وفى مختلف الأماكن وأغربها كنت أرى فى الصور ما لم أكن آراه فى مرآتى ..فالصورة توضح لى ما إذا كانت الملابس مثلا ألوانها متناسقة أم لا.. أو هل كانت ابتسامتى طبيعية أم مصطنعة.. أو جمال المكان رغم عدم اقتناعى بالتصوير فيه وقتها وهكذا.
بالإضافة لملاحظتى مثلاً عدد الإيشاربات التى كانت ترتديها صديقتى أثناء الصورة والتى لو كانت سألتنى وأنا بجوارها ماكانت إجابتى ستكون دقيقة.

علمنى أحد الأصدقاء الذى أثق فى نضجه العقلى بأنه إذا أردت أن تحكم على موقف جيداً لازم تطلع بره الصورة وتشوف نفسك من بره.
ولذلك أردت أن أكتبها هنا لأذكر نفسى والآخرين بهذا الحل السريع لأى مشكلة.
“اطلع بره الصورة وسترى الآخرين بوضوح”.

21 Comments »

  1. ومين يملك القوة إنه يطلع برّة الصورة يا موني؟؟؟؟؟؟؟؟؟؟
    لما تكوني في عز الأزمات أصلاً مش بتشوفي حدود الصورة علشان تقدري تطلعي منها
    ربنا يهونها عليكي يا رب
    ويفرجها عليكي من واسعه
    كن جميلاً ترى الوجود جميلاً🙂

  2. eng_semsem Said:

    كلامك صح جدا بس صعب جدا ان الواحد يطلع من جوه الصوره بس انا بعتمد على صاحبي اللي اثق فيه وفي رايه لان ساعتها هيبقى هو بره الصوره وممكن يكون شايف احسن مني
    تحياتي

  3. كلاعبوا الشطرنج

    تجلس متفرجا وتتمني ان يحرك احدهم هذه

    الخطوة كي يربح نقطة او ينهي الدور

    ولكنك تري الاثنان دون توتر منك ولاتحسب

    لخطوة مفاجئة لانك لو هزم ايهما

    فلن تخسر انت شيئا

    مثل احد اصدقائك جميل نظريا

    ولكنك علي ارض الواقع لاتستطيعين كليا

    تنفيذه لان لكي مشاعر تريد شيئا

    ولكي توقعات

    وقد يبدوا لكي من خارج الصورة

    عكس الامنية والتوقعات

    فلااحد يستطيع تنحية مشاعره جانبا

    والا لما كان هناك

    ولكن انصحك انظري في احسن مرأه (مراية

    وانقاها صورة

    واقصد بالمراة هنا صديقة تثقي جدا في رايها

    ونقاؤها هنا هي مصارحتك دون زيف

  4. السلام عليكم

    جميلة جدا… وحقيقة لا جدال فيها..

    وربما يفسر هذا قدرة الآخرين على طرح حلول بسيطة لمشاكلنا نتعجب كيف لم ننتبه إليها!!! طبعا لأننا غارقين في المشكلة من الداخل وغير قادرين على رؤيتها من الزوايا الأخرى..!

    دمتِ سالمة أختي الكريمة.

  5. تعرفي يا مونا الحكاية دي لسه كنت بفكر فيها…يمكن عشان بلاقي نفسي ساعات بتصرف تصرفات كنت أنكرها على الغير لما كنت برّه الصورة.
    بوست جميل و حقيقي أوي

    أرق تحية ليكي🙂

  6. HSendbad Said:

    كلام رائع وحقيقي ولكن ليس من السهل الخروج خارج الصورة ولو للحظات فمن يحيا في مشكلة يصعب عليه حينها النظر من الخارج
    تحياتي لك اختاه
    ودمتي في حفظ الرحمن

  7. زمان وانا طالب كنت لما اذاكر اقول لنفسي لازم تبص ن فوق علشان تعرف المقرر كله شكله ازاي
    بعدين انزل بقى اخده دور دور كأنه عمارة
    دايما لما تكون معايا مشكلة اقول بصلها من فوق علشان تعرف تفاصيلها وبدايتها ونهايتها بعدين اتعمق فيها

    كلامك فعلا هو اللي بحاول اطبقه
    شكرا يا موناليزا بوست كالعادة متميز

  8. EMA Said:

    أكيد طبعا صح لازم عشان تحكمي تخرجي نفسك بره المشكلة و تبصي على الموضوع من بره ..عشان كدة بتسألى حد تانى لأنه بيكون شايف زوايا انتى مابتكونيش شايفاها لأنك -جوا الصورة-

    عجبني اوى الموضوع و حقيقي جدا

    تسلمي اختى على الطرح الطيب

    تحياتي لك و متابعة معك

  9. Carmen Said:

    اذا اردت ان تشاهد صورة ما بدقة يجب عليك مشاهدتها من خارج الاطار
    رائعة تسلم ايدك

  10. الخروج بره الصورة مش صعب من وجهى نظري
    انا خرجت بره الصورة وشوفت الطرفين
    بس المشكلة اني مش عارفة احكم في شوية غموض

    لولا

  11. مساء الغاردينيا موناليزا
    رائعة أنتِ وأكثر دائماً يبهرني تفكير وروائع نثرك حقاً نحتاج للخروج برا الصورة لنراها بشكل أوضح “
    ؛؛
    ؛
    لروحك عبق الغاردينيا
    كانت هنا
    reemaas

  12. جميلة جدااا بارك الله فيكي موناليزا

  13. فعلا كل واحد محتاج يطلع خارج إطار صورته لكن هذا الإطار لا يزول لانه مرتبط بالنفس كام أنك عندما تسأل أحد عن صورتك ففى هذا لاأيام فإنه قد يجاملك فى وصف صورتك هذه لكن قد نعرف صورتنا إذا كان الصورة والنفس واحد

  14. لو المشكلة شخصية ، لا يستطيع أي حكيم النظر إليها من خارجها و إلا فهو طرف غير موجود أصلاً فيها، لذلك نستشير من نثق فيه دائماً لأن زاوية رؤيته أفضل منا أصحاب الموضوع

  15. re7ab.sale7 Said:

    مساء الورد موناليزا
    معاك حق جدا طبعا
    انا مدمنة تصوير انا كمان
    وكنت دايما اشوف نافسي بشكل غير اللي الناس بتشوفه
    غير مثلا تشبيهي بممثلة ما او مطربة ما
    لاء
    ابتسامتي
    تشكيرتي
    تعبي
    ارهاقي
    فاكرة اني اول سنة ف الكلية كنت سعيدة جدااااااا
    بس كانت سعادتي علي الظاهر فقط
    لاني لما عملت صورة الكارنية كل اللي كان يشوفها يقوللي ….علي فكرة يا رحاب انت عندك انيميا حادة….
    احيانا كنت بخللي المصور يسيبني اسرح شوية عشان الصورة تطلع طبيعية وافضل ابص فيها اشوف اية اللي انا كنت فيه …؟
    كل شخص كان بيشوف الصورة كان بيلاقي فيها اللي انا مش بشوفه
    او اللي انا كنت بدارية

  16. فى مثل بلدى بيقول اللى على الشط عويم
    يعنى زى ما قلتى اللى بره الصوره بيعرف يحكم على اللى جوه الصوره
    وده لأن اللى بره الصوره مش عايش التفاصيل والمشاعر والاحداث اللى جوه

    انا رأيى ان الموضوع نسبى امتى اشوف من بره الصوره وامتى اتصرف من جوا الصوره

    تحياتى

  17. السلام عليكم
    كل واحد فينا مش بيشوف نفسه كويس
    لانه مش بيحس بتصرفاته
    او لانه معتقد انه دايما صح
    لكن ربنا بيسخر لينا ناس نعرف منهم حقيقتنا
    خالص تحياتي

  18. صح جدا

    الطلوع خارج الصورة بيغير كتير من وجهات النظر

    و الإنسان علشان يعرف ليه صاحبه زعلان منه لازم يحط نفسه مكانه و ينظر للموضوع من وجهة تانية هيعرف بسرعة فين المشكلة

    صح

    تحياتى

  19. بس المشكلة انه مش دايما بيكون عندك قدرة انك تطلع بره الصورة و تبص على الموقف من بره بتبقى يا اما مش عاوز او مش عارف تطلع بره ازاي
    هحاول اذك نفسي بكده دايما
    بوست رائع
    تحياتي ليكي

  20. اخر سطر هو الحل .. اطلع بره الصورة علشان تشوف صح وبشكل واضح ..

    لانه اللي جوا الصورة لا يستطيع ان يعرف الصح من الخطأ .. فهي تحتوي على الكثير من الضبابية ..

    ذكرتيني بمشهد سابق من الحياة .. عندما يغطي الطفل عينه ظنا منه ان غيره لن يراه بهذه الصورة ..!!

    بوست رائع وفيه فكرة حلوة ..

  21. أهلا وسهلا بجميع السادة الحضور
    وواضح إننا جميعا متفقين على إن الإنسان وهو جوه الصورة فعلا مش بيبقى شايف كل الزوايا
    أشكركم جدا على تعليقاتكم
    ومشاركتكم
    وأعتذر جدا لعدم الرد مفصلاً على كل تعليق على حدة نظراً لضيق وقتى

    نورتونى جميعا
    وأسعدنى وجودكم
    وفى انتظاركم دائما


{ RSS feed for comments on this post} · { TrackBack URI }

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: