>عن التغيير أتحدث

>

قامت دعوات كثيرة بعد الثورة تطالب الشعب بالتغيير وتدعوا لها بكل ما أوتيت من قوة سواء بحملات على الإنترنت أو برسايل على الموبايلات.. ولا أنكر سعادتى بهذا الحماس وبحب الوطن الظاهر من خلال الكلمات وربما الأفعال إذا ما سنحت الظروف.
ولكن هذه الحملات المتنوعة غفلت على أن الإصلاح يبدأ من الداخل أولاً.
فعلى كل إنسان أن يبدأ بنفسه قبل أن يقود أى حملة لأنه سيصبح رمزاً أو قدوة فإذا كان هذا الرمز لايصلح لأن يكون قدوة صالحة فكيف له أن يتوقع نجاح حملته!.
على سبيل المثال:
كيف لمن لا يستطيع كتابة الكلمات وتهجئتها بشكل صحيح أن يكون مسئولاً عن كتابة الشعارات!!.
ابدأ بنفسك وتعلم كيفية الكتابة الصحيحة فهذا لن ينقص من قدرك شيئاً فهذه الشعارات أو المواضيع التى تكتبها لصالح حملة التغيير سيقرأها العالم ومن غير المستحب أن تكون مليئة بالأخطاء الإملائية.
كمن يكتب ديموقراطية ” بالتاء” أو عايزين” بالذال” أو رد “بالضاض ” أو “هى ” ضمير الغائب تكتب خطأ “هيا
وغيرها من الأخطاء التى تحتاج حقاً إلى وقفة فليس كل من لدية قلم ومساحة فارغة يستطيع الكتابة.. تعلم أولاً ثم اكتب كما تشاء.

* كيف لمن لا يقبل النقد ويهوى أن يسمع تصفيق الجمهور على مايقوله حتى وإن لم يسمعوا ما قال أن يساهم فى نهضة البلاد!!.

* كيف لمن لا يجيد فن الحوار ويعتبر أى اختلاف معه بمثابة عداء شخصى أن يتكلم باسم الثورة!!.

* كيف لمن لا يسمع سوى صوت نفسه أن ينجح!!.

* كيف لمن يسرق أفكار الغير وكلماتهم وينسبها لنفسه أن يكون صاحب تغيير بناء فى البلد!!.

أتذكر مواقف أثارت دهشتى منها:
– كانت تتحدث معى فتاة جامعية فى احدى الجمعيات الخيرية وأصبح بيننا ألفة فقالت لى بأنها تريد أن تفعل شئ للإسلام حتى تلقى الله وهى فخورة.. فإزاء هذا القول نبهتها بأن ملابسها شديدة الضيق والتجسيم وهذا يتنافى مع ما تريده فضحكت قائلة : ده كويس انى اتحجبت أصلاً وده بصراحة آخر ماعندى!!!.
تعليقى: انه إذا كان جواكِ حلو وفيه خير وحب لله يبقى إيه المانع لما بره يبقى زى جوه لأن عشان الناس تعرف اللى جواكِ لازم هتعدى على براكِ اللى فى الغالب مش هيكون فى صالحك.
عاوزة تغيرى البلد ومش عارفة تغيرى طريقة لبسك؟.

– حينما وقعت حادثة الكنيسة ووجدت بعضاً من المسلمين يرفعوا شعار الهلال والصليب فبينت اعتراضى على هذه الصورة لأن إذا كان الصليب هو رمز المسيحيين فالهلال ليس رمزاً للمسلمين وأن هذا الشعار كان له سبب أيام ثورة 19 لكن دلؤتى مالوش غير معنى اننا رافعين صورة للصليب وبس وهذا يتنافى مع عقيدتنا.. طبعاً اتهمت وقتها بأننى ضد الوحدة الوطنية!!.

تعليقى: ليس بالشعارات والحماس الزائد الذى ينافى عقيدتنا الاسلامية أظهر استنكارى وإدانتى لمن قتل وسفك الدماء.

– فى بعض المدونات أضيف معلومة أو تنبيه أو اترك ملاحظة أو أصحح أخطاء لغوية وتكون النتيجة ياإما الثورة ضدى
– وكأنى المفروض ادخل اصقف للكاتب وأشيد بكتاباته حتى لو لم تروقنى-.
أو يشكرنى ولايبدى أى تعديل لما نبهته له !!.

تعليقى: إذا كنا لا نقبل النقد أو النصيحة فكيف نطلب من غيرنا أن يقبله!.

– فى إحدى الجروبات على الفيس بوك كنت أتحدث عن إنجازات عمرو خالد للشباب فوجدت هجوم شديد على الرجل لا لشئ سوى أنهم سمعوا احد الشيوخ قال عليه كذا وكذا أو لكراهيتهم له وبحكم استماعى الجيد ومتابعتى لما يقوله عمرو خالد نفيت ماقالوه عنه وشهدت بالحق لما أعرفه عنه ولكن الهجوم لم ينقطع مما جعلنى أنهى الحوار سريعاً فدينى يمنعنى عن الجدال حتى وإن كنت مُحقة. فمن يتحدث يختلف لمجرد الاختلاف !!.

تعليقى: لا أحد معصوم من الخطأ ولكنى لا أرى أى غضاضة فيما يفعله لنهضة بلدى فهو رجل أفعال لا أقوال.

– إحدى الصفحات على الفيس بوك تطالب بانتخاب الشيخ الفلانى رئيساً للجمهورية.. وكان تعليقى بأن ليس كل من نحب ان نستمع له وبغض النظر عن ثقافاته او مؤهلاته نرشحه رئيساً لنا فهناك مقومات أخرى أهمها قبوله عند جميع الفئات وقدرته على التحاور ورصيده من الانجازات التى تشهد له وسماعه للآخر مهما اختلف معه وقبل كل هذا براعته السياسية وغيرها من الأمور التى قد تغيب عن ذهننا ..وكانت النتيجة حذفى من الجروب!!!.

تعليقى: لم أخطئ فى شخص الرجل وليس هذا لكمال فى شخصه ولكن لأن هذا ليس من شيمى .

– نشر أخبار غير مؤكدة أو كاذبة ولايذكر المصدر كموت “سالى زهران” التى قالوا انها استشهدت فى ميدان التحرير لتخبرنا والدتها بالفيديو بأنها سقطت من البلكونة وهى تهددها بأنها ستقفز إذا لم توافق على نزولها للتظاهر فى سوهاج- مدينتها- فاختل توازنها لتسقط من الدور التاسع!!.
وانتشار صورتها وهى محجبة وانها ماتت بالحجاب ولايجوز نشر صورها لنفاجئ بشقيقها يقول بأن شقيقته خلعت الحجاب منذ شهرين!!.
فى صالح من هذه الأخبار المتفبركة؟؟.

وإذا تحدثت فى هذا فأنا- من وجهة نظرهم- أطعن فى دماء الشهداء!!!.

– ظهرت عدة جروبات على الفيس بوك هدفها الوحيد السخرية تارة من الرجل اللى واقف ورا عمر سليمان وتارة لبلوفر أحمد شفيق وتارة لمبارك و للقذافى وغيرهم وبغض النظر عن أى شئ أجد أنه لايجوز ولايحق لنا أن نسخر من الآخرين.. هذه قناعتى الشخصية . ولكنى أجد التعجب من رد فعلى وكأننى من العمالة الأجنبية!!.

تعليقى: لم أفرض أرائى على أحد أنا فقط أعرضها وأرحب بمن يتفق معى أو يعترض عليها بسبب منطقى خالى من أى انفعال ولكنى حقاً لا أقبل أن تصبح القضية اختلاف شخصى وعداء غير مبرر.

وكأننا نتمتع بثقافة من ليس معى فهو ضدى!!!.
أين الديموقراطية وحرية التعبير الذين تطالبون بها!.

هل حقاً نريد أن نتغير للأحسن؟؟.

إذا أردت أن تدعو للتغيير إسأل نفسك أولاً هل أنت حقاً لا تحتاج إلى تغيير.
هل تستطيع أن تتكلم مع الناس فى أى مواضيع بطريقة مهذبة ؟.
هل تذهب عملك فى موعده المحدد وتبدأ فيه سريعاً أم تنتظر أن تفطر وتشرب كوباية شاى؟؟.
هل تتسرب من شغلك قبل موعد الانصراف الرسمى بساعتين مثلاً؟.
هل تستخدم هاتف عملك فى مكالمات خاصة بك وبعيدة تماماً عن سير العمل؟
هل تتشاجر مع جيرانك وأهلك لأنهم مختلفين مع طريقة تفكيرك؟.
هل تعتبر أى امرأة ماشية فى الشارع مهما كان عمرها أنها إحدى محارمك؟.
هل أخلاقك الطيبة هى أول من يطرق فى ذهن من يسمع اسمك؟.
هل تدعو لتنظيف الشوارع وأنت أول واحد معروف عنه فى بيتك بالإهمال؟.
هل ناوى تزور أسر الشهداء ومصابى الثورة وجارك بيموت بقى له شهرين ومافكرتش تسأل عنه؟.
هل ترفض النصيحة أم تتقبلها بصدر رحب؟.
هل تضيع وقتك فى عمل جروبات تافهة على الفيس بوك بلا أى غرض سوى السخرية وإضاعة الوقت؟.
هل تستثمر وقتك حقاً؟.
هل تعتذر لمن أخطأت بحقه؟.
هل تقبل اعتذار الآخر لك؟.
هل مازالت قدوتك المطرب الفلانى أو لاعب الكرة العلانى؟.
هل تحرص على أداء الصلوات المكتوبة فى وقتها؟.
هل تحاول أن تتعلم كيف تقرأ القرآن قراءة سليمة حتى تكون صلاتك صحيحة؟.
هل تحاول زرع الأشجار فى مدينتك وأنت قاطع رحمك؟.
هل تعمل أى شئ حقاً بإتقان؟.
هل ما زلت تمشى بين الناس بالغيبة والنميمة؟.
هل تنشر أى خبر تقرأه أو تسمعه دون أن تتأكد منه ودون أن يكون لك هدف محدد سوى أن تظهر فى الصورة؟.
هل مازلت مستمر فى شرب السجائر والحشيش والخمور أم أنك نويت حقاً التغيير؟.
هل مازلت تظلم زوجتك؟.
هل ما زلت تغضب لأتفه الأمور أم أنك حقاً نضجت عقلياً؟.
هل إذا طلب أحدهم رأيك فى شخص لا يعجبك يكون ردك هو سب وإهانة هذا الشخص أم تقول رأيك فى تهذيب وبتحديد نقاط الاختلاف بينك وبينه؟.
هل مازلت تكذب لتبرر تصرفاتك وأنت تعتقد بأنها فهلوة؟.
هل تقود سيارتك بسرعة فائقة وسط الشوارع المكتظة ؟.
هل تحرص على ارتداء حزام الأمان أم مازلت معتقد بأنه مالوش لازم؟.
هل تحترم الإشارة حتى وإن لم يوجد شرطى مرور؟.
هل جعلت قضيتك هى سب وإهانة من يختلفون معك حتى تثبت لنفسك بأنك صح؟.
هل تكرم ضيفك ؟.
هل تساعد محتاج؟.
هل أنت مرن فى التعامل مع الآخرين أم إنك فظ غليظ؟.
هل… وهل… وهل …

مع احترامى للجميع الثورة ليست عصا سحرية فالمواطن الصالح لا يحتاج إلى انقلاب عسكرى حتى يشع ضوءه الأبيض على الآخرين.. أما من كان يتحجج بفساد النظام ليمارس إهماله وفساده فعليه أن يتغير أولاً قبل أن يكون صاحب شعارات.

مازلت أقول بأننا سفراء للإسلام شئنا أم أبينا وعلينا أن نكون قدوة صالحة للآخرين مهما كانت الظروف.
ولكن مادمنا نريد أن نكون شعباً صالحاً مسلمين وأقباط فلنبدأ أولاً بأنفسنا .

فمن الخطأ أن تحاول تغيير من حولك وتنسى أن تبدأ بنفسك.


20 Comments »

  1. >بارك الله فيكى على هذه الكلمات الاكتر من رائعه "ان الله لا يغير ما بقوم حتى يغيروا ما بأنفسهم " عارفه يا غاليتى اننا نعرف نقول فى كل انسان نقابله مية الف عيوب ولكن لو قولتى لواحد ياترى ايه اهم عيوبك اللى تتمنى اصلاحها هيقعد يفكر ويقولك انى طيب اوى وهادى ونفسى اتعلم انتقم من الناس وكأنك بتتكلمى مع ملاك ولا حول ولا قوة الا بالله العلى العظيم …للاسف الشديد هناك الكثير من بنى البشر يرفعون شعار من ليس معى فهو ضدى يعنى اما توافقى على كل كلامى دفعه واحده وانتى ساكته او انك تبقى ضدى على طول الخط …اتذكر انى قولت مره قبل التنحى انى خايفه ومش حاسه بالامان فوجئت باحدى السيدات على الفيس تقول بلهجه كلها سخريه وانتى كنتى حاسه بالامان واحمد نظيف رئيس الوزرا او لما كان العادلى وزير الداخليه بصراحه اتصدمت من كلامها لانى مش جبت سيرى اى انسان لكن قولت انى كانسانه مش حاسه بالامان وكانها غلطه من غلطات عمرى …للاسف احنا لم نتعلم ان نختلف بطريقه متحضره وبصراحه اتضايقت من كل اللى اتقال على بلوفر احمد شفيق والرجل اللى واقف ورا عمر سليمان واصبحت ماده للسخريه …نفسى كل واحد يتهم بنفسه شويه وسصلح من عيوبه اسال عن جارك المريض شوف قريبك اللى مشى من شغله بسبب تقليل العماله فى الايام دى ابدا بنفسكاسفه على الرغى موضوعك يحمل جوانب مهمه كثيييييييييره جدا جداربنا يوفقك ويكرمك يااااااااااربزهــــراء

  2. >اول مرة من فترة ادخل بوست عندك ومالاقيش سؤال الاختبار في آخر البوست اتمنى يكون المانع خير :)بس انتي مقلتيش سؤال في الآخر وجبتي كمية اسئلة كتير اوي اولا احييكي على شجاعتك اللي بتخليكي تتكلمي عن رايك واللي شايفاه حتى لو كان بيخالف اراء كل الوسط اللي حواليكي ومش بتعملي زي جحا اللي قال للميت : يعني اصدقك واكدب كل دول اللي ماشيين في جنازتكثانيا انا معاكي مفيش هرم ممكن يتبني الا من القاعدة واللي يفكر في راس الهرم قبل قاعدته يبقى الهرم مش هيطول وهيقع بسرعة الفرد ثم الفرد ثم الفرد لازم سلوكياتنا تتغير لازم على الاقل نحترم بعض وكل واحد يبقاله حرية تعبير عن رايه والباقيين لازم يتفهموا ان من حقه يعرض وجهة نظره انا مثلا اعترضت على اللي كانوا عايزين يعملوا قائمة سوداء لكل اللي كانوا بيأيدوا مبارك لان قائمة زي دي بتهد اعظم حاجة عملتها الثورة وهي حرية التعبير هو مؤيد ده حقه انت معارض ده حقك مادام انتو الاتنين مش بتعدوا الخطوط الحمرا واي تعدي للخطوط الحمرا في قضاء يفصل بينكم انا فهمت كده من الثورة وفهمت كمان ان الشهداء ضحوا بدمهم علشان كانوا عايزين يعبروا عن رايهم ومبارك لانه مؤمن بالصوت الواحد رفض الاستماع ليهم نقوم احنا نبقى زي مبارك؟الحرية ليها حدود ولو اتعدت الحدود دي هتبقى فوضى لازم كلنا نفكر الاول اننا نحترم بعض ونحترم عاداتنا وتقاليدنا وسلوكياتنا ومبادئنا والعرف اللي اتربينا عليهمآسف للاطالة بس احب اقولك انا معاكي في كل اللي قلتيه الا حزام الامان مش فاهمله فايدة برضه :)تحياتي لقلمك الذي يستطيع ان يعبر عن مشاكل حقيقية تعترضنا ويعطينا مساحة للكلمة الحرة

  3. >; كنت اتفرجت علي حوار لابراهيم عيسيبيقول فيه *ان نظام مبارك نجح في ان يخرج اوحش مافي الشعبالمصري باخلاق الزحمة وسياسة التضييق التي انتهجها فجلنا بالعامية كده مش طايقين بعض وانا اقتنعت بهذاالحديث ولا اعرف ماهو رايك نتي في ذلك*التمس لاخاك سبعون عذرا فان لم تجد له عذر فالتمس عذرا *كانت هناك مجاعة اثناء حكم الامير عمر بن الخطاب رضي الله عنه فاسقط حدا من حدود الله وهو قطع يد السارق لان السارق قد يكون له دافع في هذا الوقت وهو الجوع*الانكسار اختي الفاضلة هو صانع الرذائل فحينما يحس الناس ان لديهم كرامة يدافعون عنها باستماتة فمن شيم اصحاب الكرامة ان لايخطئوا متعمدين اختي الفاضلة انتظري قليلا وسوف ترين خيرا باذن اللهتحيتي

  4. >أمة اللهكلامك جميل ويدل على تفكير منظم .. أشترك معكِ فى الرأى بأن التغيير يجب أن يكون فى أنفسنا الأن بعد أن حققنا مبدأ العداله أو على الأقل فى الطريق الصحيح لتحقيقه ولكنى أرى أن الشباب بالفعل إتغير من جواه .. والثوره أوضحت مدى رقيه ووعيه ووطنيته وإلتزامه أيضا بدينه وهويته وتقاليده التى اصبح العالم أجمع يتحاكى بها بإنبهار.بالنسبه لبعض الصفحات اللى بترشح حد مش مناسب أو لا تقبل الرأى الأخر .. فعموما أعتقد إن حزفك من الصفحات دى لا يضيرك فى شئ وإنما يبين لكى إلى أى مدى منتِ محقه.أما عن الأموات والشهداء فأنا أيضا سمعت القليل .. لأنى لم أجعل المتحدث يخوض فى الكلام أكثر .. فمن مات أو إستشهد أو قتل .. فحسابه عند ربى .. وليس لموتانا عندى إلا ذكرهم بالخير وكفى .. رحم الله موتى المسلمين .. أمينوأخيرا بالنسبه للأخطاء اللغويه التى يقع فيها البعض .. فالكثير منها يكون ناتج عن سرعة الكتابه على لوحة المفاتيح والبعض الأخر يكون عن عدم معرفه فعلا بقواعد اللغه … على كل .. فمن المهم أن نحاول التمسك بالقواعد اللغويه إن أردنا الكتابه بالفصحى. وبمناسبة الخطأ أثناء السرعه .. فأعتقد إنك نسيتى وكتبتى كلمة (إيذاء) عوضا عن (إزاء) وطبعا الفرق واضح فى المعنى بالنسبه ليكى .. وده فى جملة . فإيذاء هذا القول نبهتها بأن ملابسها شديدة الضيق والتجسيم وهذا يتنافى مع ما تريده فضحكت قائلة : ده كويس انى اتحجبت أصلاً دمتى فى حفظ الله

  5. >بارك الله فيك أختي موناليزا ، و بالفعل صدق الله حين قال "ان الله لا يغير ما بقوم حتى يغيروا ما بأنفسهم " و ما أحوجنا لأن نبدأ بأنفسنا ، و أدعوك لقراءة مقال كتبته منذ عام مضى عن موضوع مشابه على هذا اللينكhttp://pulpit.alwatanvoice.com/articles/2010/02/28/190719.html

  6. momken Said:

    >اللههو ده الكلام..وانا اعتقد ان التغير اصبح امر حتمىوساذج جدا من اراد تغير واقع محيط به ويتجاهل تغير ذاته التى بين اضلعهسيدتى اعتقد ان التغير أمسى فرضاً علينا ومن لن يستطيع التغير ببساطه ستدهسه عجله الاحداث الهادرهاستمتع دائما بموضوعاتك الجادهدمتى بخيرتحياتى

  7. >لولا وزهراءـــــــــــــأهلا بيكِ يا زهرةالله يكرمك ده من ذوقكآه والله عندك حق وبتبقى تسألى نفسك أمال لما كل النس حلوة ونقية أمال فين الفاسدين الاشرار.. ماهو محدش بيشوف عيوب نفسه وقليل اللى بيحب يسأل عن عيوبه عشان يصلحها.انا معاكى وبستغرب جدا هذا الشعار وكأن ليس من حقى أيضا التعبير عن رأيى بحريةأما عن عدم الشعور بالأمان فانا شايفة انه مش مرتبط بوجود شخص معين فى الحكم ده مجرد احساس ناتج من موقف معين بس كتير اوى بيخلطوا الأمور وبيلعبوا فى منطقة أنت معانا ولا مع الناس التانيين:)أما عن السخرية فحدثى ولا حرج انا بس عايزاهم يحطوا نفسهم مكان اى حد بيسخروا منه أنا عن نفسى شايفة أنه عيب أوى نسخر من حد.. ممكن اختلف مع شخص وقد اكون ضده وضد تصرفاته ولكن هذا لايعطينى الحق بأن أسخر منهأهو ده بجد اللى عايزينه نصلح نفسنا وده مش هييجى غير لما اللى بيتعامل معايا يقولى ايه العيب اللى شايفه فيا وعايزنى أغيره ماهو مش معقول تكون انت الوحيد اللى شايف نفسك ملاك مابتغلطشما تتأسفيش ياحبيبتى انتى ترغى براحتك وكلى آذان صاغية:)سعيدة بتواجدك وفى انتظارك دائما*******************************مصطفى سيفــــــــــــأهلا بيك يادكتور:) والله يافندم انا فعلا كنت هكتب سؤال ودلؤتى حالا فكرت احط سؤال تانى بس حبيت تكون التعليقات على الموضوع ككل مش على الأسئلة وبسعموما بما إنك اهتميت بأسئلتى فأنا هقولك السؤال اللى كنت ناوية احطه بعد ما كتبت الموضوع ولك مطلق الحرية فى الاجابة. عشان تعرف بس انى ديموقراطية:)* أذكر موقف تعجبت فيه من تصرف شخص أمامك لانه من وجهة نظرك ينافى مايقوله؟السؤال التانى اللى فكرت فيه وانا برد على أول تعليق فى البوست وماحطتوش لانى سألته كتير قبل كده وآخرها يوم عيد ميلاد مدونتى الثالث من اسبوعين يعنى ومحدش جاوب على السؤال!. بس هقولهولك وبرضه لك حرية الاجابة* ايه عيوبى من وجهة نظركم؟ أو ايه اكتر حاجة بتضايقكم من اسلوبى سواء فى كتاباتى او فى تعليقاتى عندكم او فى الرد على تعليقاتكم؟.————–أرد على تعليقك بقىأولا:أشكرك جدا ولو انى ارى ان ده الطبيعى – مش شجاعة منى ولاحاجة:)-فحرية الرأى مكفولة للجميع.ثانيا:متفقة معاك جدا وفعلا قليل اللى يعرفوا يعنى إيه حريةبستغرب اوى من اللى يمشى بعربيته عكس الاتجاه مثلا ويقول أنا حُرأو اللى يعلى صوت اللى بيسمعه حتى لو صوت قرآن على موبايله مثلا ويقول أنا حُر!.وانا كمان ماحبتش القائمة السودا لنفس سببك ولأن ممكن جدا يتحط فيها اسماء بريئة من التهمة دىيعنى مثلاً أنا اتفاجئت ان محمد صبحى موجود فيها رغم أن فنه يشهد له بمحاولة الاصلاح ده غير انى سمعت مكالمات له وقت الثورة ومالقتوش قال حاجة تدينه ولا هو عشان مثلا قال ان الثورة حلوة ولكن… كلمة ولكن دى من غير ما الرجل يكمل الجملة يبقى خلاص اتحط فى البلاك ليست وغيره كتير وبالمقابل فيه ناس ماتكلمتش وماظهرتش رغم انها صديقة للنظام السابق يعنى القائمة غير عادلة على جميع المستويات:) معقول يادكتور تكون ضد حزام الامان!!تعرف حضرتك فى الدول المتقدمة حزام الامان مش بيكون للسائق وللى جنبه وبس لأ ده كمان بيكون للى فى الكنبه اللى وراوبعدين ضماناً لسلامتك يعنى يهمك أنت قبل أى شخص تانىأنا اللى بشكرك على تعليقك الثري وتواجدك المتميزيسعدنا دوام التواصل******************************سواح فى ملك اللهـــــــــــــــــأهلا بيك أستاذ خالدده حقيقى ه وكأن الناس تنفث عن كبت السنين فى وجه بعضها.لأن اخيرا بقى فيه مساحة للصراخ وللاعتراض حتى لو هنعترض على بعض وهنصرخ فى وش بعض.. وهذا للأسفالتماس الاعذار جميل حقاً ولكنه نادر الوجودطبعا متفقة معاك الانكسار والظلم وعيشة الذل والقهر بتعمل اكتر من كده:) أنا بشكرك بجد على تعليقك وخصوصا الجملتين الاخرنيتين اعطونى أمل وفيهم روح حلوةيسعدنا دوام التواصلودمت فى حفظ الله******************************

  8. >مها البناـــــــــــــأهلا بيكِ يا مها بعد طول غيابأشكرك ياحبيبتى فما توفيقى الا باللهده حقيقى يكفى ان ميولهم واتجاهاتهم وحتى موضوع حواراتهم اتغيرت وده فى حد ذاته انجازالأغرب مش الصفحات دى ده فيه صفحات عنوانها شتيمة لمن يختلفون معهم!!أما عن حذفى أنا أصلاً كنت داخلة بس عشان أعلق واطلع تانى:)أما عن الشهداء فحكايات موتهم لما تسمعيها بالفيديو من أهلهم بتلاقيها مختلفة تماما عن ما اتنشر!!أنا معاكى ان الكتابة على الكى بورد بيكون فيها اخطاء انا نفسى بعد ما اكتب جملة وانشرها واجى أقرأها بعدها بكتير الاقى فيها خلل بس بجد فيه اخطاء لا تغتفر وخصوصا لو اتكررت:) انا بجد بشكرك على لفت نظرى لهذا الخطأ المطبعى وياريت بجد لو لاقيتينى كاتبة اى حاجة فيها أخطاء تنبيهينىسعيدة جدا بتواجدك وبتعليقكوفى انتظارك دائما******************************محمد محمود عمارةــــــــــــــــأهلا بيك أستاذ محمدربنا يكرمك وأشكرك جدا لتعليقكوسأذهب لقراءة موضوعك بإذن الله فى نهاية اليوميسعدنا دوام التواصل********************************ممكنـــــــــأهلا بيك يافندمالله يكرمكهذا حقيقى ولكن قليل من يعترفون بضرورة تغييرهم وكأنهم معصومينوأنا بستمتع بتعليقاتك جدا رغم قلة تواجدها:)أشكرك جدايسعدنا دوام التواصل

  9. Mafrousa Said:

    >الله يفتح عليكي و يبارك لك يارببالله عليكي حطيه على الفيس بوك و اعمليله تاج لكل الناسالموضوع مهممع انى عارفة مسبقا انه ستتواجد تعليقات تفرسبس معلش ماهو لعلمك انا اكتشفت ان التعليقات اللى تفرس بتفيد برضهتحياتى ليكي

  10. eng_semsem Said:

    >ربنا يفتح عليكي فعلا كلام مهم وجميل لازم نحاسب نفسنا على افعالنا وعلى اقوالنا قبل ما نحاسب الناس وننصب ليهم المشانق لازم نتغير عشان نغير تقبلي تحياتي على موضوعك المهم جدا

  11. نسيبه Said:

    >السلام عليكم ورحمة الله وبركاتهكلماتك معبرة جزاكي الله خيرا عنا فعلا إن الله لا يغير مابقوم حتي يغيروا ما بأنفسهم لازم نتغير إحنا الأولربنا يرزقنا ونتغيروحششششتيني جدا جدا ربنا يجمعنا قريبا

  12. >معاكي في اغلب البوستوخصوصا ان مش عيب اني اغلط وحد يدخل يصحح لي العيب اني اكتب معلومه مش متاكده منها وانشرها وكمان ازعل ان حد يصحح لي فالكلمة مسؤليه ونسأل عليهاولي اعتراض علي موضوع الهلال والصليبان ليس من الشرع ان يكون رمزنا الهلالمش مفتيه انا علشان اقول من الشرع او مش من الشرع ان اضع الهلال مع الصليب ولو ان الشيوخ فعلوا هذا وعلي رؤوس الاشهاد يبقا دي موافقه علي هذانيجي ان الهلال ليس رمز للدين الاسلاميعزيزتي عندما تم بناء المساجد علي الشكل المتعارف عليه الان كان في مصر كنائس تحمل الصليب ومن المتعارف ان المتحكم في مواقيت الاشهر العربيه اللي هي اسلاميه وتتحكم في الصيام والاعياد والحج والعدةواشياء كثيرة تمس الشرعولكي نعرف الشهر لابد من تعقب الهلالوايام بناء الجوامع وضع احد المهندسين في تصمصم الجامع هلال كبير اجوف يعني زي المركب كده ليضع فيه الغلال للحمام واليمام والعصافير والطيور المهاجره لتأكل منهومن هنا جاء رمز الهلال للدلاله علي ان هذا جامع حتي لايدخله من ليس علي دين الاسلام من كتابيين وغير الكتابيين من الديانات الغير سماويهووجود الهلال فوق الجامع الازهر يجعل دي موافقه من هؤلاء الشيوخ علي هذا الوضع والا كانوا انتزعوه من مكانهوكون نرفع الصليب او لانرفع الصليب مش هي دي القضيه الايمانيهالقضيه الايمانيه هي تجنب الفتنه واعتقد انك شوفتي في المظاهرات المنتمين للجماعات الاسلاميه سواء السلفيه او المعتدله او الاخوان كانوا يحمون المسيحيين اثناء القداس في التحريروالعجيب بقا وده شوفته بعينيان القس لما دعا لمصر وشعب مصرالشعب كله وكان بجانبي سلفيين واخوان وزوي الدقون الطليقه والشارب محفوفيقولون آآآآآآآآمينوبعد ان انتهي القس الشعب كله مسيحين ومسلمين قالوا الله اكبراعتقد ان الدنيا رجعت تاني في مصر معتدله امنهومااصبحش المسيحيين غرباء بالنسبه لبعض الناس

  13. >السلام عليكم أختي موناليزا..الف شكر على هذه المواضيع الدسمة.. صدقا كل منها يحتاج تفكير وتأمل بمفرده..عبرتِ بصدق عن كثير مما بداخلي.. وبالتأكيد بداخل الكثيرين..إشادة خاصة بسلسلة الأسئلة الأخيرة.. كلها مهمة وعلى كل منا وضع المزيد منها.. ربما قريبا سأتكلم في الموضوع من زاوية مختلفة بعض الشيء..دمتِ غيورة على الحق داعية له..خالص تحياتي وتقديري أختي الكريمة.

  14. >السلام عليكم ورحمة الله وبركاتةبارك الله فيكى على كلامك الجميل وجهدك الرائع …وفعلا لازم نتغير داخليا وخارجياااا يعنى بالمظهر والجوهر وان شاء الله انا متفائل خير بالشعب العظيم وربنا ان شاء الله يكمل الفرحة على خير اللهم امين والمسلمين

  15. Butterfly Said:

    >فعلا المقوله دى انا دايما بقولها وكنت بقولها اكتر على حال البلددلوقتى خلاص البلد اتغيرت وفى ناس برده اتغيرت عشان كده ربنا هيقف معانا ان شاء الله لحد ما نوقف البلد على رجليها من تانى وتبقى ام الدنيا فعلا.على المستوى الشخصى بقى فعلا كل شخص لازم يركز على نفسه اكتر من كده لأن اصلاح نفسنا من اصلاح البلد

  16. >من أروع ماقرأت عندكبارك الله في تفكيرك وقلمكدمتي مبدعه في أمان الله:)

  17. >مفروسةـــــــــــأهلا بيكِ بعد طول غيابالله يكرمك يارب:)طالما حلفتينى بالغالى وعشان خاطرك حطيته:)بس لغاية دلؤتى ماجاليش عليه ولا تعليق:)نورتينى حبيبتى واسعدنى تواجدك********************************انج سمسمــــــــــــأهلا بيك يا باشمهندس بعد طول غيابربنا يكرمك"حاسبوا أنفسكم قبل أن تحاسبوا"وأشكرك جدا على رأيك و تعليقكيسعدنا دوام التواصل*****************************نسيبةـــــــــوعليكم السلام ورحمة الله وبركاتهأهلا اهلا بصديقتى الغاليةربنا يكرمك ياحبيبتى وأشكرك جدا على تعليقكوأنتِ كمان وحشتيينى ويارب دايما تكونى بخيرفى انتظارك دائما*****************************شمس النهارــــــــــــأهلا بيكِ حبيبتىأشكرك جدا لرأيك وفعلاًفيه ناس بتعتبر التوجيه إهانة!! يسعدنى استقبال اعتراضك ومع احترامى لرأيكومع احترامى لجميع رجال الدينولكن اذا فعل احدهم أو بعضهم فعل لم يرد صريح فى القرآن والسنة وأنا غير مقتنعة به فلن أفعلهكمن منهم يشرب سجاير مثلاً فهل هذه تعتبر إجازة للتدخين.. كل فرد يحاسب على أفعاله لأنه مسئول عما يفعلهذه وجهة نظرى وقناعتى الشخصيةأما عن ان الهلال رمز للإسلام فوجهة نظرى ببساطة أنه إذا رأيتى صورة بروفيل لأحد الأشخاص وفيها "هلال" هل أول ما سيأتى فى بالك وقتها أنه يعبر عن ديانته الإسلامية؟؟أما عن وقوع فتنة طائفية فرفع المسلمين لهذه الشعارات لن ينفى شئ لو كان هذا موجوداً بالفعل.. ولكن نحن فعلاً نعيش فى إخاء والخير والشر موجود فينا وفيهموأنا لا أطلب من المسيحى مثلاً ولا أتوقع منه أن يضع صورة المصحف تضامناً مع المسلمين !!الأمثلة التى ذكرتيها لا أتعجبها لأننا كلنا مصريين وليس بالشعارات تكون وحدتنا الوطنية فالمواقف الكثيرة أكبر دليل على هذاأشكرك جدا على تعليقكنورتينى حبيبتى واسعدنى تواجدك****************************ماجد القاضىــــــــــــــوعليكم السلام ورحمة الله وبركاتهأهلا بيك أستاذ ماجدربنا يكرمك يارب فالشكر لله هو من هدانى لهذاأشكرك جدا لرأيك ولتعليقك الذى ننتظره دائماوفى انتظار ما سيخطو به قلمكم المتميز فى هذا الشأنيسعدنا دوام التواصل********************************طهر فؤادكـــــــــــوعليكم السلام ورحمة الله وبركاتهأهلا بيك يافندم بعد طول غيابربنا يكرمك يارب فما توفيقى الا باللهكلنا عشمنا فى ربنا كبير أشكرك جدا على روحك التفاؤلية التى ميزت تعليقكميسعدنا دوام التواصل******************************بيترفلاىــــــــــأهلا بيكِ بعد طول غيابأشكرك جدا لتعليقكولنذكر أنفسنا دائماً بأن البداية تكون من داخلنا أولاًنورتينى حبيبتى واسعدنى تواجدك*******************************قلم رصاصــــــــــــأهلا بيك يافندمربنا يكرمك ياربفما أجمل تعليقكأشكرك جدا لتواجدكيسعدنا دوام التواصل

  18. >بصي يا بنت الحلال واسمحيلي بكل ادب هناك قواعد للاختلاف اذا خرجت عن سياقها اصبحت دعوة الى العداء والتنازع والاقتتال .. والى القتل ايضاً . اولا : اختلف كما تريد .. ولكن دون ان تعتقد في فكر يكون ضد الاطار العام للمجتمع الذي تعيش فيه من قيم واخلاق أو اعراف تؤثر بالسلب على ذلك المجتمع .. وتتعارض مع القيم الانسانية السامية المتفق عليها بين بني البشر . ثانياً : اختلف كما تشاء في طلب المصلحة الشخصية .. ولكن لا تكون مصلحتك سبب في فساد مصالح الاخرين او انتقاص من مصالحهم .. او ضد المصلحة العامة للمجتمع المحيط بك او الاشخاص المحيطين بك . ثالثاً : اختلف كما تشاء في اتخاذ الاجراءات المتاحة في طلب امنك .. ولكن لا تكون اداة لضرر المجتمع او الافراد الآخرين وسبب في اهتزاز أمن الاخرين . رابعاً : اختلف كما تحب وكما تشتهي في اعلان رايك او فكرك او فلسفتك .. ولكن لابد وان يكون لديك الحجة البليغة والبرهان الساطع المنطقي الذي لا يبنى على مصلحة شخصية او طائفية او مذهبية او فئوية او جهوية او قبلية او عنصرية او ضد القيم الانسانية السامية .خامساً : اختلف كما تريد في استخدام مفردات اللغة التي تريد ان تعبر بها عن ما تريد .. ولكن دون اسفاف او انحطاط او تردي او استعلاء او ثقة مفرطة حتى لا يكون وقع لغتك على محيطك الاجتماعي مقبول . هذه امور لابد من مراعاتها في منهج الاختلاف والا لن يصبح اختلاف بل يصبح عداء بلا منطق ولا قاعدة فكرية ولا فلسفية وحتى اخلاقية . فارس عبدالفتاح .. قومي عربي

  19. >فارس عبد الفتاحــــــــــــــــــأهلا بيك أستاذ فارس:)بداية كلامك حسيت أنه هيكون فيه اعتراض كامل على اللى انا كاتباهأشكرك جدا على تعليقك وتوضيح جميع التقاطيسعدنا دوام التواصل

  20. >حقا ان الله لا يغير ما بقوم حتى يغيروا ما بانفسهم المشكلة ان غضبتنا لم تكن لدين الله او من اجل العقيدة


{ RSS feed for comments on this post} · { TrackBack URI }

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: