كلمات قاتلة

بعض الكلمات تحيي وتميت ولكن أغلبية الناس لا يدركون ذلك.. فبكلمة واحدة قد تجعل حياة فرد من أسوأ مايكون وبكلمة أخرى قد تجعله يلمس السماء بيديه.
والأمثلة كثيرة منها:
* مفيش جديد؟. – سؤال ملازم لمن عدت سن الخامسة والعشرين-.
فتقول المتلقية بداخلها: والله لو فيه هقول وهعمل إعلان كمان بطلوا تسألونى السؤال ده بقى.
——–

* فرصتك فى الزواج أصبحت قليلة وماتطمحيش فى عريس كويس وماتجوزش قبل كده.. أنتِ مُطلقة .. فوقى.
-أنا أشرف من بنات كتير لسه ماتجوزوش وطلاقى مايدينيش أنا عمرى مامشيت مشى بطال ومن حقى احلم بزوج يعوضنى عن اللى آسيته فى حياتى.

——-

* أنا عايز ماما- يقولها الطفل لعمته-
– بعد ماضيعت عمرى عليك بتقولها هى يا ماما وهى كانت فين من وأنت طفل صغير وبتعيط جوه حضنى من قسوتها عليك.. دلؤتى بقت هى ماما.. طب وأنا!!.

————–

*لازم تخرجى.. لازم ترجعى شغلك حتى لو مابتحبيهوش.
-كل ده ليه عشان اتزوج.. عايزنى أعرض نفسى .. ناقص أعلق ورقة على ضهرى وأكتب فيها مطلوب عريس.. للدرجة دى شايفينى رخيصة ولا أنا بقيت حمل تقيل عليكم!.

—————-

*كله كان بمزاجك.. وأنا ماغصبتكيش على حاجة.. يقولها لخطيبته.
غلطتى أنى حبيتك أكتر من نفسى وسلمتها ليك عشان أنت ماتزعلش ومفكرتش فى أى حاجة تانية.

————–

*مفيش أخبار عن طليقك؟ وأنتِ عاملة إيه بعد الطلاق؟.
بحاول انسى وياريت مش كل شوية حد يفكرنى.

—————-

* أنتِ طالق.
– فى لحظة كده بيتى اتهدم.. حتى لو كنت أنا اللى طلبته فى لحظة كبرياء ومحاولة لحفاظى على كرامتى أنت ماصدقت.. ليه مادافعتش عن بيتنا أكتر من كده.

——————

*أنا مش ممكن ارجع أعيش فى مصر تانى واقبض 200 جنيه أنا دلؤتى بقبض بالدولار.
– سافرت وجاى تتمنظر عليا وأنا اللى ياما سلفتك زمان رغم أنى كنت بقبض أقل من مرتبك اللى مش عاجبك دلؤتى.

—————-

*أنا خلاص دفعت تمنك واللابتوب بتاعى أغلى منك– يقولها لزوجته-.
-أنا ماكنتش للبيع ولا عمرى هكون.

——————–

* أنتِ مش حلوة زى مامتك ليه؟. – تقولها إحدى المعارف لفتاة صغيرة-
– ربنا خلقنى كده.

——————-

*ياغبى.. عمرك ماهتفلح.- يقولها أب لابنه-.
– بطريقتك دى فعلاً عمرى ماهفلح.

——————

*عايزك تصبغى شعرك أصفر وتقصيه زى فلانة وتلبسى زى علانة وترفعى حواجبك وتركبى ضوافر.
– للدرجة دى مش عاجبك شكلى طب استنى لما نتجوز ده احنا لسه مكتوب كتابنا من كام يوم لحقت تزهق من شكلى.

——————

*أنا عايزاك تفسحنى.. أنا تعبانة ومحتاجة أخرج- تقولها لشقيقها-.
يرد عليها قائلاً :محدش فايق لحد.. بصى لما آجى أخرج مع فلانة صاحبتى هقولك وهوديكى تقعدى عند علانة صاحبتك ولما أخلص خروجتى هبقى آجى آخدك.
يعنى صاحبتك أهم منى!!. هيحصل إيه لو عملت لى خروجة مخصوص عشان تبسطنى فيها.. هو أنا مش ليا حق عليك.

——————–

*هو فيه بينا وبين بعض حاجة.
– لا والله بعد حب سبع سنين وماكنش فيه!!
– أنا شايفة كل واحد يشوف حياته وبعدين أنا ما وعدتكش بحاجة.

———————

*تؤجل القضية.
– لغاية إمتى هتفضل تتأجل هو أنا هضيع عمرى كله فى المحاكم.

——————–

*أنا جاى أعزمك على فرحى.
– وحبك ليا كان كذب.
– بس أنا عمرى ما قلت لك أنى بحبك.

———————-

*مش عايزة مراتك تعرف عنى حاجة- تقولها لشقيقها-.
– بتتكلمى عنها كده ليه- يقولها الأب بغضب شديد-
-ياااه خايف على مشاعرها أوى كده حتى وهى مش موجودة وأنا مش مهم رغم أنى أقرب لك منها.

——————-

* مالوش لازمة.. ايه الفايدة يعنى.. إحنا مش مقتنعين.
– بس أنا مقتنعة ..كل ده عشان عرفتكم أنى هزور ملجأ ده أنا لو قلت أنى هخرج مع زمايلى ماكنتوش اعترضتم كده.

——————–

*ابنى أحلى منك.. أنا عارفة خدك على إيه.
– ماهو القرد فى عين أمه غزال.

————————-

*آدى اللى خدتيه من الحلال.. ياما اتحايلنا عليكى ايام الجامعة تعيشي حياتك مع الشباب اللى كانوا هيموتوا عليكِ وكنتى تردى بكل ثقة أنك محوشة كل الحاجات دى لزوج المستقبل.. طيب أهو سابك وبقيتى أنتِ الوحيدة اللى فينا مطلقة.
-أنتِ جاية تفتنينى فى دينى.. أنا ماعملتش حاجة حرام أو غلط هو اللى قليل الأصل ومالوش فى الطيب.

————————

*ماقولتيش ليه إنك متزمته ومش عايزة تسيبى شعرك وترقصى فى فرحك .. كنتى لبستى نقاب أحسن.– تقولها لعروسة ابنها-.
– أنا مش محتاجة أتنقب عشان أنفذ تعاليم دينى.

——————-

* أنا عايز أصارحك يا ماما أنا إتجوزت عرفى بس خلاص قطعت الورقة وكمان مدمن مخدرات بس بحاول أبطل.
يا خيبة أملى فيك وبتقولى ليه!! عايز تموتنى!! ولا عايز تبين لى أنى معرفتش أربيك.. ياخسااارة عمرى.

—————–

* يابختك اتبنى لك قصر فى الجنة بتعيطى ليه بقى..- تقولها لأم ماتت طفلتها-.
عقبالك يارب بإذن الله.

————————-

*بعزمك على فرحى وأنا عارفة أنك مش جاية عموماً فرحى بكرة– تقولها لصديقتها وتنهى الإتصال قبل أن تخبرها عن مكان الفرح-
-وبتعزمينى ليه تأدية واجب.. طيب ما أنا عزمتك فى فرحى قبلها بكتير وكنت عارفة برضه أنك مش جاية.

——————-

* قومى يا بنت الـ (…) اعملى كذا.
– وايه لازمة الشتيمة ولا هو طولة لسان وخلاص.

———————-

*حافظى على شرفك- تقولها سيدة لداعية تجلس جوارها فى المواصلات-.
– بتقولى أنا كده!! هو أنا ليا إيه غيره عشان ماحفظش عليه ولا أنتِ شوفتى منى إيه فى أول مرة بنتقابل فيها عشان تقوليلى كده!!!.

————————-

*ماتعملش كده تانى
-ليه
-عشان حرام
-أنا عايز سبب مقنع
طب أقول أنا سبب مقنع تانى منين!.

———————–

*مين فلانة اللى باعتالك رسالة اوف لاين على الايميل دى؟
– أنت بتتجسس عليا.. أنا مابعملش حاجة غلط لكن أرفض شكك فيا ولا أقبل انتهاك خصوصيتى.

———————-

*أنت فاشل
– أناَ!! بعد تعبى وجهدى ده كله.. طيب يابابا شكراً.

===

أنا عارفة أنى عرضت أمثلة كثيرة ولكنها حقاً مؤلمة لدى من يستقبلها وأعلم أنه يوجد المزيد منها والتى سأتركها لكم لتكتبوها فى التعليقات.
فقط سأختم بنصيحة:
ضربة الحبيب قاتلة فقد تقبل كلام مميت من الأغراب وتستقبله وممكن جداً ترد عليه لكن كلمة واحدة من الحبيب غير مقصودة تترك جرح غائر بداخل القلب.. ولذلك رجاء خاص أن تحافظوا على قلوب من تعلمون أنكم تسكونها لأنهم مهما عملوا مايستاهلوش منكم أى جرح.

23 Comments »

  1. >عقدتينى الله يسامحك:(

  2. >موناليزا اختي العزيزة كم من يوم نذبح فيه اناسا كثيرين بغير سكين كم من جرائم قتل نفذناها وليست لنا اسلحة الا السنتنا لذلك امرنا النبي صلى الله عليه وسلم ان نقل خيرا او لنصمت تحياتي واشكرك لعرضك القضايا الاجتماعية المهمة جدا حتى يتكون لدينا مجتمع يراعي شعور واحترام افراده

  3. alirbidi Said:

    >السلام عليكم شكرا لمرور الحلو على مدونتي أحلى شي بالتدوينة عبارة الأب لإبنه إنه مش رح ينجح و إنه فاشل و إنه عمره ما بصير بني آدم ، هاي العبارات دايما أبوي كان يقولي إياها ، بس هسا أنا سافرت و كل سنتين بشوفه عالصيف فا ما في مجال يقولي إياهن .دمت بود و خير

  4. >اختي موناليزا ..عن جد بوست كثير حلو ، دمه خفيف رغم من سخريته الحادة .. كثير مواقف بيحصل فيها نفس الكلام مع اختلاف الاشخاص والاماكن .. أعجبني جزئية " يابختك اتبنى لك قصر فى الجنة بتعيطى ليه بقى..- تقولها لأم ماتت طفلتها-.عقبالك يارب بإذن الله." عن جد كثير باستغرب من الناس لما تقول كلام زي هيك لواحدة فقدت ابنها او بنتها ، وكأنه اللي مات هذا مش بني ادم ولا هي تعبت في حمله وولادته وتربيته .. بس كان لازم تضيفي جملة جديدة وحلوة بتتعلق باللي يشتري نضارة طبية ، ويقولوله مبروك ..(!) فيرد عليهم ويقولهم الله يبارك فيكم ، عقبال عندكم (!)استمتعت بالقراءة فتقبلي خالص تحيتي وتقديري.

  5. >هقوللك كلمتين وياريت ميزعلوكيشمن اكبر مشاكلنا اللي لو اتخلصنا هنبقي من احسن شعوب الدنيا هي تغليب العاطفة علي العقل وهي فرط الحساسية من جهه التحذير وعلي طول تحويله وتاويله علي انه اتهام وده لايمنع ان اللي بيسدي النصيحة ايضا بيقولها علي انها المقصود منها اظهار التعاطف والخوف علي من يسدي له بالتفاف وكانه يتهمه يعني باختصار (((كلمة حق يراد بها باطل )))تحيتي اختي الطيبة

  6. >وما كثرة الكلمات القاتلة التى تنطق بها الالسنة دون انتباه بعض الكلمات المكتوبة آلمتنى

  7. >بعد كم حرقة الدم اللي حسيتها من التدوينة ووصلني لإني حاسة بالحالة اللي كنتي فيها وانتي بتكتبيها .لاأملك في الوقت دا الا أن أدعو لك بأن يفرج كربك ويرزقك زوجاً صالحاً يعوضك عن اللي شوفتيه الله يصلح حالك يامووون

  8. >من كثرة تعود الجزار على منظر الدم اصبح اليفهايضا من كثرة ما يتردد من حوارات فى المجتمع اصبحت اكليشهات دون ان ننتبه انه ربما يجرح من امامنامثل سوال هو لسه مفيش بيبى فى السكة انتو كسلانين كده ليه متجدعنوا كان الموضوع بايديناخالص تحياتى

  9. >ليه كده يا موناليزتي؟؟؟سكينه موجعه في صورة ووجع كلمات مالهوش حد .؟؟؟؟طبعا الحقيقه انها برغم الألم إلا إنها تعتبر جرس تنبيه للكل لانها حاجات و إن بدت صغيرة إلا أنها كبيرة وموجعه…

  10. >اختنا العزيزةاحييكي انك قدرتي تجمعي كل الكلمات المؤلمة و القاتلة من اقرب الناس في بوست واحد كدهجامع شاملفعلا ما اقسي جرح الحبيبتحياتي و تقديري

  11. momken Said:

    >ضحكت واتصدمتكلماتك كلنا بنقبلها يوميا ولا نلقى لها بالالكنك وثقتها ووضعتيها فى اطار امام اعينناتعليقك منتهى الروعه على كل كلمهدمتى مبدعهتحياتى

  12. eng_semsem Said:

    >فعلا اللسان سلاح فتاك مش بنعرف نقدر ايه اللي ممكن يطلع منه ومش متخييلين ان ممكن كلمه تخلي اللي قدامك بيتحرق جواه واكتر سؤال بيضايقني بتاع واخبار بنتك ايه ؟؟ مع انهم عارفين اني مش اعرف عنها حاجهتقبلي تحياتي

  13. >نعم سيدتى هناك كلمات كثيرة قد تكون قاتلة .والكلمة كالرصاصة إذا خرجت استحالت عودتهانسأل الله تعالى العفو والعافيةتقبلى تقديرى واحترامىوبارك الله فيك وأعزك

  14. >قريت البوست مرتين وقريته لبنتيبجد خلاصة الخلاصةوخدي من ده كتييييرناس بتقول كلام بايخ مايتردش عليه اصلاتسمعيه وتبتسمي ابتسامة بلهاءلاتدل علي شئ اكتر من الاندهاش

  15. >بصراحه بحيكى على التجميعه دىتقرريبا راصده معظم امراض المجتمع المصرىاللى ربنا يشفيه بقى مصر كلها بتتغيييييير مااعرفشى ليه فيه ناس مصره ع انها تفكر بمنطق غررررريبفعلا معاكى حق الجرح من القريب بيبقى اصعب بكتيرتسلم ايدكتحياتى(:

  16. Dr Ibrahim Said:

    >يجب علينا أن نقل خيراً أو لنصمت.

  17. >سومة مجنونة فى بلد عاقلــــــــــــــــــــــأهلا بيكِ يا سومةعذراً غاليتى فهذا هو الواقع الذى نحياه جميعاً أنا فقط نقلتهفى انتظارك دايما*********************************مصطفى سيفـــــــــــأهلا بيك يا دكتورعندك حق فالكلمة كالرصاصة الذى إذا اطلقناها أصابت من أمامنا بلا شفقةأشكرك جدا لرأيك ولتعليقك يسعدنا دوام التواصل*******************************مدونة محمدــــــــــــوعليكم السلام ورحمة الله وبركاتهأهلا بيك أستاذ محمد:)والغريب أن الأب مابيعرفش أن كلماته تجعل ابنه يرغب فى الهروب منه حتى لا يسمع هذه الكلماتأشكرك جدا لمشاركتكويسعدنا دوام التواصل********************************وجع البنفسجـــــــــــأهلا بيكِ أختىأشكرك جدا لرأيك فى البوست:)وأنا استمتعت بمشاركتك جدا لأنها وضحت جملة يقولها البعض باستخفاف دون الاهتمام بمشاعر الطرف الآخرنورتينى حبيبتى وفى انتظارك دايما********************************سواح فى ملك اللهـــــــــــــــأهلا بيك أستاذ خالدمابزعلش من اى تعليق يافندم🙂 اتفضل كلى آذان صاغيةأنا فاهماك أخى الكريم وفاهمة قصدك ومقدراه بس الشخص المجروح مابيستحملش حاجة تلمس جرحه حتى لو كانت مجرد طبطبة أشكرك جدا لتوضيح وجهة نظرك ولتعليقك المميزويسعدنا دوام التواصل******************************أحاسيس أيوشةــــــــــــــأهلا بيكِ يا أيوشةكلمة قلتها رصاصة أطلقتهاكلمة لم تقلها لؤلؤة احتفظت بهانورتينى وأسعدنى تواجدك******************************عاشقة الفردوســــــــــــــــأهلا اهلا أختى الحبيبةمش عارفة أقولك إيه على احساسك بيا غير أن ربنا يسعدك ويتقبل دعائك ويرزقك بالمثل اللهم آميننورتينى حبيبتى وفى انتظارك دايما*****************************ابراهيم رزقـــــــــــــأهلا بيك أستاذ ابراهيم"من كثرة تعود الجزار على منظر الدم اصبح اليفه"تعبير عجبنى وفعلا عندك حقأشكرك جدا لمشاركتكويسعدنا دوام التواصل******************************كلمات من نورـــــــــــــــأهلا بيكِ غاليتىبنقل الواقع مش أكترعندك حق فالكلمات تحيي وتميتأشكرك جدا لتعليقك واعذرينى على الصورة والكلماتنورتينى غاليتى وفى انتظارك دايما********************************الشاعر الفنان أحمد فتحى فؤادــــــــــــــــــــــــــــأهلا بيك أستاذ أحمدأشكرك جدا على رأيك وتعليقكيسعدنا دوام التواصل*****************************ممكنــــــــأهلا بيك يافندمأشكرك جدا لرأيك ولتعليقكيسعدنا دوام التواصل*****************************انج سمسمــــــــــأهلا بيك يا باشمهندستعليق بليغ فعلاًأشكرك جدا عليه وعلى مشاركتكويسعدنا دوام التواصل*****************************محمد الجرايحىـــــــــــــأهلا بيك أستاذ محمدربنا يكرمك ياربأشكرك جدا لتعليقك البليغوفعلا الكلمة كالرصاصةويسعدنا دوام التواصل****************************شمس النهارــــــــــــأهلا بيكِ يا شموسةسعيدة جدا بقرائتك للبوست اكتر من مرة وكمان مشاركة ابنتك فيهويارب دايما تفضلوا من زوارى الادائمينأشكرك جدا لتعليقكوفى انتظارك دايما******************************دعاء العطارـــــــــــــأهلا بيكِ يا دعاءأشكرك جدا على رأيك وتعليقكولعلنا نساعد من يجيدون فن التجريح بأن يعتزلوا هذا الفن حتى لا يتسببوا فى جرح من حولهم دون أن يشعرواأسعدنى تواجدك وفى انتظارك دايما*****************************د/ ابراهيمــــــــــــأهلا بيك يادكتورفعلاأشكرك جدا لتعليقكويسعدنا دوام التواصل

  18. >السلام عليكم أختي موناليزا..* الحقيقة أن هذا البوست من أكثر البوستات التي احترت في التعليق عليها، ليس لأن (المفروض أعلق وخلاص)، لكن لأن مشاعري تغيرت ورأيي تنوع من عبارة لأخرى، فصراحة بعض العبارات أراها منطقية ومناسبة لفكرة البوست، وبعضها لا أراه كذلك، وبعضها أرى أنه لا يجوز إعطاء رأي فيه حيث سيتغير الرأي ويتغير الوقع بتغيير الموقف (أو السياق) الذي ستقال فيه العبارة…* ثم جاءت الفقرة الأخيرة لتغير فهمي لبعض العبارات من جديد.. عارف إني حيرتك معايا 🙂 لكن هذا انطباعي عن البوست.. وأنا واثق أنك ستتقبليه.* لكن بصورة عامة أنا متفق معاك تماما في نصيحتك وأؤيدها كاملة..* أحييكِ والله على اختيارك لصورة البوست (القلب المخترق بسكين).. قوية ومؤثرة جدا… وتتبنى فكرة البوست ببراعة…!!! تحياتي وتقديري أختي الكريمة……………………………..* معذرة أختي موناليزا.. لكن لدي تصويب على معلومة وردت في ردك على تعليقي في بوست "مثل خاطئ" وهي أن الإسلام حرم الأكل واقفا..فالموضوع (لمن أخذ بهذا الرأي) فيه كراهة فقط، ونفس الأمر بالنسبة للشرب، وقد ورد في الصحيح أن النبي – صلى الله عليه وسلم – شرب واقفا.

  19. >موجعه أويييي :(فعلا الكلام أحيانا أحد من السكين،وجروحة لا تندمل كجروح البدن.

  20. >خواطر صحيحه تقابلنا دائما فى حياتنا عدنى كل الحق فى كل كلمه كتبتيها سعدت جدا بوجودى هنا تقبلى مرورى وتقبلى تحياتى الاحــــــلام

  21. re7ab.sale7 Said:

    >أغيب أغيب وارجع لك تانيعلي موضوع ولا أروعبجد كل كلمة وكل مقطوعة بتلمس شيء جوانا كلناوكل كلامك رائع ومفيدوتاني برضه أقول اني مع اخي مصطفي في كلماته …لن اقول انني لا اجرح احد بكلماتي واني احافظ دوما علي هذا ..ولكناحاول بقدر استطاعتي هذا …فأنا اعلم جيدا ماذا تعنيها كلماتي لاي شخص …..فضرب السياط اريق عندي من كلمة يقولها شخص عزيز علي ولو بمجرد الهزار تحياتي عزيزتي

  22. >ماجد القاضىـــــــــــــوعليكم السلام ورحمة الله وبركاتهأهلا بيك أستاذ ماجد:) متقبلاه يافندم ولو انى كنت عايزة أمثلة:)أشكرك جدا لتعليقك ولرأيك فى صورة الموضوع ——————أشكرك جدا للتوضيحويظل نبينا الحبيب صلى الله عليه وسلم قدوتنا الغالية فى تطبيق الأخلاقيات التى يتقبلها الجميع بصدر رحبيسعدنى دائما تواجدك وتواصلك*******************************سلمى محمدـــــــــــأهلا بيكِ يا سلمى بعد طول غيابوهذا للأسف مايحدث فى الواقعأشكرك جدا لتعليقكوفى انتظارك دايما*******************************الأحلامــــــــأهلا بيك يافندمأشكرك جدا لتعليقك وسعداء برأيك فى مدونتىويسعدنا دوام التواصل********************************رحاب صالحــــــــأهلا بيكِ يارحاب بعد طول غيابأشكرك جدا لرأيك ولتعليقكوفعلا لازم ناخد بالنا من كلامنانورتينى حبيبتى واسعدنى تواجدك

  23. >ان للكلمة وقعا خطيرا جدا لو علمنا ذلك لاحترزنا قبل ان نتفوه بحرف وفكرنا مرة تلو المرة قبل ان نتكلم بكلمة .فالكلمة اما ان تطفىء حربا او تشعل حربااما ان تدمر انسانا او تنقذ انسانا من الدماراما ان تصنع مجدا واما ان تهدم صرحااما ان تكون سببا فى نعيم ابدى او هلاك ابدىالله المستعاناللهم ارزقنا الحكمة وطيب الكلمة


{ RSS feed for comments on this post} · { TrackBack URI }

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: