حبيبة بابا

مسميها على تليفونه “حبيبة بابا” بس هى للأسف مش حساها.. فاقترحت عليها أنها تتكلم معاه لأنها أكيد ظالماه.
قالت لى: أنا مقدرش أتكلم معاه مباشرة لأنى ماتعودتش على كده بس هكتب له رسالة وعايزاكِ تنشريها عندك عشان أى أب يقرأها يعرف قد إيه ممكن يؤذى بنته من غير ما يقصد.
قلت لها: لكِ ما طلبتِ.. هذا الموضوع ملكك.. اكتبى فيه ما تريدين .
——
قعدت كتير أدور على بداية أبدأ بيها كلامى معاك مالقتش.. وعشان كده هدخل فى الموضوع على طول.
إزاى أبقى حبيبتك وأنت بتنقدنى طول الوقت مهما كان الفعل الذى قمت به بسيط ولا يذكر.
مثال: أحكيلك إن فيه واحدة قابلتنى فى الشارع وسألتنى عن مكان معين وأنا وصفت لها الطريق مظبوط وكان ردك عليا وقتها: كنتى قوليلها كذا.. ووصفت لى المكان بأسلوب تانى!.
فاكر لما كنا ماشيين مع بعض فى الشارع وقابلنا واحدة زميلتى وأنا عملت مش واخدة بالى فأنت سلمت عليها وأجبرتنى بفعلك هذا أنى أسلم عليها ولما روحنا إديتنى درس عن إفشاء السلام وثوابه.. ونسيت تسألنى أنا ليه ما كنتش عايزة أسلم عليها.. مش يمكن تكون هى غلطت فيا أو يمكن أكون أنا زعلانة منها ومنتظراها هى تصالحنى.
فاكر لما دايماً بتدينى دروس فى القيم والأخلاق لو شوفتنى عملت أى حاجة مهما كانت بسيطة حتى لو عبرت عن غضبى بالتجهم. وغيرها كتير…
خلتنى أخاف أوى على مشاعر الناس ونسيت تعلمنى إزاى أحافظ على مشاعرى عشان محدش يأذيها.
أنا عارفة إنك عايزنى أكون متربية كويس ومحدش يقول عليا نص كلمة بس أنا فعلا يا بابا متربية كويس وكل اللى بيتعامل معايا بيشهد بأخلاقى.. أنت بس اللى معندكش وقت تشوفنى فيه لأنك مخصص الوقت كله لنقدى.
ليه مش عاطينى مساحة تسمعنى فيها مش يمكن أكون حد كويس فعلاً بالنسبة لك وأنت اللى مش واخد بالك.
مش يمكن أكون محتاجة أحس بأهميتى عندك.
نقدك ليا المتكرر جعلنى أفقد الثقة فى نفسى وإحساسى الأبدى أنى لازم هكون خطأ.
تعرف أنى نفسى أوى أرمى نفسى فى حضنك عشان أحس بالأمان وبحُبك ليا.. لكن للأسف فيه فجوة بينا.. أنا مش فاكرة إمتى آخر مرة قبلتنى أو حتى حضنتنى رغم أن في كل مرة أنا اللى بطلب منك.. نفسى فى مرة أحس بحنانك ليا.ماتعرفش كام مرة إتمنيتك تاخدنى فى حضنك وتطبطب عليا وتطمنى بأى كلام ممكن تقوله لو بنت أخوك مثلاً هى اللى كانت مكانى.
أوقات كتير ببقى محتاجالك أوى وبيبقى نفسى تسألنى مالى أو إيه اللى مضايقنى وتحاول تساعدنى وتخفف عنى.. لكن ده عمره ما حصل.نفسى مرة تسمعنى بدون إنتقادات لأنى عارفة كل الكلام اللى بتقوله فأنا حافظاه وبطبقه من وأنا صغيرة.
خلتنى أكبت جوايا أى مشاعر سواء حزن أو فرح والنتيجة إنى بجد صعوبة فى الكلام معاك.
إيه المشكلة لما يبقى عندى حاجة خاصة ومش عايزة حد غريب يعرفها.. ليه تقولها وتعملَّها إعلان.. ولما آجى أعاتبك تقولى وإيه المشكلة ما تبقيش معقدة وخدى الأمور ببساطة ..و لما استسمحك إنك تحترم رغبتى فتقولى حاضر وفى أقرب مناسبة تفعل نفس الشئ.. دون الإكتراث لمشاعرى.
النتيجة أنى قررت أخبى عنك أى حاجة خاصة بيا وما قولكش غير الحاجة اللى عايزة الناس تعرفها.. فأنا معاك ماليش اسرار.. بس المشكلة أنى أوقات كتير مبعرفش.
كلمتنى عن قرايبك كتير أوى وخلتنى أحبهم زيادة عن اللزوم من كلامك عنهم رغم إنى كنت محتاجة إنك تتكلم معايا عنى أنا ..ومع مرور الوقت ولما كبرت إكتشفت إن قرايبك مش بيحبونا بنفس الدرجة اللى أنت بتحبهم بها..
أعذرنى يا بابا أصل الحب بالنسبة لى فعل وأنت طول عمرك واقف معاهم دايماً على حسابى ولما جه الدور أنهم يردوا ده معايا مالقيتش حد منهم ولا حتى أنت.
وكنت بتهتم بقرايبنا كلهم وتقعد تفكر فى الهدايا والولائم الذى تعد خصيصاً لهم ويصبح بيتنا فى حالة طوارئ لقدوم أى شخص.. وماكنتش بتفكر فيا أنا.
فاكر لما كنت أشوف عندك حاجة وأطلبها منك وأنت تقولى بعدين لما تنجحى – وكأنك فى كل سنة كان بيتهيألك أنى عمرى ماهنجح- ويوم النتيجة أنتظر ما كنت طلبته ولا أجده.. لأجدك بعدها تعطى هذا الشئ لإحدى قريباتى أمامى وحينما أعاتبك تقولى: أصلها ضيفة وإكرام الضيف واجب. ولو تماديت فى زعلى تشخط فيا وتقولى أنا مش فاكر اللى أنتِ بتقوليه!!.
حتى يوم ما كنت بجيب درجات وحشة فى المدرسة بدل ما تسألنى ليه أنا ضعيفة فى المادة دى أو تحاول مساعدتى كنت بتكتفى بخصامى والنتيجة أنى أوقات كتير كنت بمضى مكانك فى الشهادة عشان أتجنب معاملتك السيئة ليا وقتها. والغريب إنك عمرك ماأخدت بالك أن شهادة كل شهر ماعدتش بجيبهالك وكأن فيه حاجة طول الوقت شغلاك عن متابعتى.
تعرف لو كنت مسافر أو لو كان شغلك بيتطلب البعد عن البيت دايما يمكن كنت عذرتك لكن أنت معظم الوقت فى البيت لكن مش بتهتم بأحوالى أنا وأخواتى. شاغل نفسك بأمور أى حد من قرايبك أو أصدقائك وكأنهم أهم مننا.
ويوم ما مُدرسة تضربنى ظلم كنت برضه مارضاش أقولك لأنى كنت عارفة أنك مش هتنصفنى ولا هتقف فى صفى ومش بعيد تخلينى أعتذر لها على غلطة أنا ماعملتهاش.
فاكر يوم ما زارنا أحد أقربائك وابنته التى لاتحبنى وكان تصرفى أنى دخلت أذاكر عشان مااتكلمش مع واحدة عارفة أنها مابتحبنيش واتفاجئت بيك جايبها عندى بدون سابق إنذار وبتقولى ذاكروا سوا!!.
لو فتحت فى البند ده مش هخلص المهم إن
النتيجة أنى ماعدتش طايقاهم وبالمقابل مش قادرة ماسامحكش.
عيشتنى من وأنا صغيرة فى دنيا الخيال وعلمتنى إزاى أحلم لوحدى وأعيش فى الحلم لوحدى ولما كبرت أكتشفت أنى مش عارفة أعيش فى الواقع لأنى معرفوش.
علمتنى أزاى أحوش الفلوس وأحوش أى حاجة أشتريها حتى لو قلم غالى.
والنتيجة أن عمرى راح وأنا ماستمتعتش بأى حاجة عندى لأنى ماتعلمتش إزاى أستخدمها..
إيه فايدة أن يبقى عندى حاجة ومااستخدمهاش!!.
علمتنى إنى ماطلبش منك ترجع لى حقى من أى حد لأن ردك عليا هيكون” من عفا وأصلح فأجره عند الله”.
يا بابا أنا الحمدلله عارفة دينى كويس بس مش قابلة إنى أكون ضعيفة.. أنا عارفة إنك بتقولى كده مش عشان الثواب زى ما أنت بتبين ولكن عشان أنت مش قادر تعمل حاجة أكتر من كده وده فى حد ذاته واجعنى لأنى متوقعة أنك تدخل فى أى موضوع علشانى.. لكن للأسف أنت ممكن تصدق عليا أى كلمة تبين أنى غلطانة ووقتها بيروح حقى. رغم إن تاريخى مشرف ومافيهوش حاجة تقلل من مصداقيتى بس مش عارفة أنت واخد الفكرة الوحشة دى عنى منين.
بتحبنى إزاى وأنت يوم ما بيتقدم لى عريس مابتسألش عن أخلاقه ودينه وبتسأل بس هو معاه كام .. يعنى أى حد معاه ثمنى يشيل وكأنى بيعة وشروة.
بتحبنى إزاى وأنت ماتعرفش عنى أى حاجة ولا حتى أكلتى المفضلة ولا إيه الدعاء اللى أنا محتاجاك تدعيهولى.
يا بابا حضرتك بتعمل حاجات كتير بتضايقنى من ضمنها أنك مابتحترمش خصوصيتى يعنى ممكن تدخل عليا بدون ما تخبط على الباب ومش مهم إذا كنت بغير هدومى وعشان كده لازم أقفل عليا الباب بالمفتاح.. وبالمقابل حضرتك بتدخل الحمام ومابتقفلش عليك الباب بالمفتاح يعنى ممكن شوية هوا يفتحوا الباب وأوقات تانية بتكتفى أنك توارب الباب وخلاص…
يوم ما بتزعل من ماما وبتقولى ده أنا بحترم فضفضتك معايا لكن بتضايق من أسلوبك فى الكلام عن أمى لأنها طول الوقت بتشكر فيك حتى لو كانت متضايقة منك وحتى لو زعلتها قدامى.. ما بحبكش تعامل أمى وحش.. رغم أن المشكلة أنك عمرك ما حسيت إنك بتعاملها وحش!.
ما بحبكش تكلمنى عن عيوب إخواتى لأنهم عندك ممكن تكلمهم بكل بساطة وتعرفهم إيه اللى مضايقك منهم أنا ماليش علاقة بده ولا أحب أكون واسطة بينك وبينهم لأنى برضه ما حبكش تتكلم عن عيوبى قدامهم .. كلمنى بدون واسطة.
ليه مايبقاش فيه حوار عن حياتى وطريقة تفكيرى فيها وبدل ما تنقدنى شجعنى .. ما هو أكيد هتلاقى حاجة فى كلامى تستدعى إنك تشجعنى.
وهذه يا بابا أكبر مشكلة إنك بتعمل حاجات كتير بتضايق اللى حواليك وأنت معتقد إنك كده عملت معاهم الواجب وبتستغرب لما تلاقينا واخدين موقف عكس ما أنت متوقع.
تعرف إنى بتجنب التواجد معاك فى مكان لوحدنا لأنى هبقى مش على طبيعتى لو اتكلمت فى أى حاجة هتنقدنى حتى لو تابعت حاجة فى التليفزيون هتنقدها ويوم ما يحصل وتكلمنى هيكون عن أى حد ومش هتتكلم معايا عنى.
والنتيجة أنى بحس وأنا معاك أنى متراقبة ومحسوب عليا كل تصرفاتى.
بتحبنى إزاى وأنت ممكن تنهينى عن فعل شئ معين عملته لا إرادياً وأنت نفسك بتعمله طول الوقت.
بتحبنى إزاى وأنت ممكن تضحى براحتى مقابل راحة حد تانى لا يمت لنا بصلة.
بتحبنى إزاى وأنت بتسترخص الحاجة اللى بتجيبهالى.. وتودينى أماكن رديئة ورخيصة الثمن عشان توفر مبلغ زهيد رغم أنك ممكن تصرف أضعاف المبلغ ده وأنت بتعزم أصحابك وبتتمنظر عليهم.
حبيبتك زاى وأنت يوم ما بنيت الشقة اللى احنا قاعدين فيها مافكرتش يكون لى فيها غرفة مستقلة عن أشقائى البنين.
نفسى يكون ليا اسم دلع مخصوص منك ومحدش غيرك يندهلى بيه.
بتحبنى إزاى وأنت ما بتعلمنيش فعل الأشياء الضرورية وكيفية الإعتماد على النفس وكأنك ستعيش لى طول العمر حتى أوراقى الخاصة معرفش مكانها.
يا بابا بدل ما تكلمنى عن ماضيك وماضى من حولى كلمنى عن مستقبلى وعن حياتى.
علمتنى للأسف إزاى أعاملك بجفاء لأنى عمر ما كنت تعبانة سواء جسدياً أو نفسياً وألاقيك جنبى ولذلك يوم ما بشوفك تعبان ما بيأثرش فيا لأنى مبعرفش أعمل غير اللى أنت كنت بتعمله معايا.
يا بابا أنا أولى بحناناك وباهتمامك وبحُبك.. أى حد إستحالة يصدق معاناتى لأنك بتتعامل مع الغريب قبل القريب بود وحب شديد واهتمام مبالغ فيه.. أرجوك يا بابا من فضلك حبنى أكتر من كده.. حبنى زى ما أنا محتاجة.
—-
انتهت رسالتها.. و أعتقد بأن رسالتها وصلت لكل الآباء.

سؤال جانبى:
ــــــــــــــــــــ
*لو هتوجه رسالة لوالدك دلؤتى تقوله إيه؟.

25 Comments »

  1. وصلت الرساله واضحهاما عن الرساله ففقط ساقول له شكرا على كل ما فعلته من اجلى

  2. والله ما عارفبس حاسس اني رجعت للعالم اللي بحبه من جديدبالرغم من كل ما فيه من صعوبات و حكايات صعبةمش هاعلق دلوقتياسف علي طول الغياب

  3. *لو هتوجه رسالة لوالدك دلؤتى تقوله إيه؟.____________________________________هقوله انا آسف يا بابا انا عرفت دلوقتي ان فيه حاجات غلط عملتها في حقكواوعدك اني مش هعمل كده تاني ان شاء الله _______________________الى الأخت كاتبه الرساله راجعي نفسك هتلاقي ان كل الى قلتيه ده في مصلحتك انتي حتي لو بيضغط عليكي شويه و هو بيبان كده و انتي بتحسي بكده بس في الأخر ده في مصلحتك صدقيني في مصلحتك !!!!________________________انا اعتذاري في الأول لوادي بسبب رسالتك دي لأن فيها غالبا حاجات انا كنت بحسها تجاه والدي بس دلوقتي عرفت ان هو الى صـــــــح وانا الى غلط ___________________________و اتمني ان تعرفي كده لوحدك بدون ما يحد يفهمك وا يشرحلك ______________________________في النهايه احي و بشده امه الله على نشرها للرساله دي و اشكرك عليها جدا جدا

  4. حقك معاكي يا بنتي، مع إنو في أشياء مش صحيحة خالص. بس تعرفي إيه، دا إنتي غالية على قلب أبوكي، وهو بيحبك أوي.

  5. سلسبيل Said:

    بجد موضوع راااائع جزاك الله كل خير تحياتى لك

  6. سبحان اللهفعلا هناك بعض الامور التى قالتها كانت تحدث من أبى …وبعضها من زوجى…ولكن ايضا هناك الكثير من الحقيقيه فى الرسالهاشعر ان هذه الرساله ارسلت إلى شخص اعرف زوجته وبنتاهصعب قوى توجيه النقد طول الوقتصعب قوى الاهتمام بالغير دون اولادناالاصعب ان نفعل ما لا نقولاو نقول ما لا نفعل ونطالبهم بالتغييروفى الرساله بعض الظلم للأب لانه أكيد هو يحبها ..ولكنه غير قادر على التعبيرصدقينى يا ابنتى…حاولى ان تتقبلى ابوك كما هو..لانه لن تستطيعى تغييرهوحبيه كما هو لانه لن يكون إلا ما هو عليهواكيد لو دورتى فى حياتك هتلاقى قد ايه كان ملهوف عليك وانت طفله لما مرضتىيمكن بل أكيد هو مش عارف يعبر عن مشاعره حال الكثيرامنحيه بعض الاعذار حتى يمنحك ابناؤك العذر عندما تكون صورة من ابوك..وانت لا تدركينمونى يا جميله دائما مقالاتك رائعه وتمس الوجدانابى وامى توفيا إلى رحمة اللهليس هناك ما يقال..سوى الدعاء بالرحمه

  7. رسالة قوية للغاية وليت الأباء يقرؤون يا موناليزتي حقيقي….أوجه رسالة لوالدي : أقوله شكرا يا بابا علشان خليتني أنا (:وشكرا إنك علمتني لما بدأت أكبر إني اتعلم من أخطاؤكم ولا أكررها و اتلاشى بعض طباعكم لإنها مش موروثة …..شكرا يا موناليزتي على بوستاتك الطيبة وربي يجعلها في ميزان حسناتك

  8. السلام عليكملو يعلم الابناء ما يعانيه الآباء لأحبوهم حتى البكاءأوجه رسالة لوالدى -رحمه الله- أقول فيهاوالدى الحبيبالسلام عليكم و رحمة الله و بركاتهرغم أننى لم أراك و لا أتذكر أيا من ملامحك إلا أننى يأخذنى شوق غريب إليك..أشتاق إليك لدرجة أننى كلما رأيت من يشبهك أو يشترك معك فى صفاتك التى عرفتها من أمى أو من صورتك القديمةأود أن أحتضنه و أقبله..والدى الحبيبأحتسبك عند الله عزو جل ولعلك الأن مع الصحابة الكرام فى دارا خيرا من دارنا والدىأتمنى أن يجمعنى بك الله فى الجنة إن شاء اللهفكم أشتاق إليك أبى الغالى وعندها سأقول لك كلمة لم أقلها و لم أشعر بمذاقها يوما…..هل عرفتها…نعم…تلك الكلمة هى….أبىرحمك الله أيها الغالىتحياتى إليكى أختنا فى الله و سامحكى الله على ما شعرت بهدمتى فى حفظ اللهملحوظة..مشكورة لتنويهك عن قصيدتى

  9. وحـدي Said:

    رسالة مهمة..تستحق أن تطبع وتوزع على الآباء..@ *لو هتوجه رسالة لوالدك دلؤتى تقوله إيه؟.آسف حقًا على كل ماقصرت فيه تجاهك..وليت الزمان يعود بي..ليته يا أبي.

  10. السلام عليكم ورحمة الله وبركاته ان شاء الله تكوني بقيتي احسن .. بشوف اللي بتكتبيه عالفيس بوك .. مش بلاقي حاجة ارد بيها عليكي .. ربنا كريم و ان شاء الله يكون دا كله خيراما عن كاتبة الرسالة .. ممكن اقولها ان في اللي اسوء من كده بكتير اوي .. فانظري لمن هو حاله اسوء منك لتعرفي نعمة ربنا عليكي .. اصبري واحتسبي و اعرفي ان مفيش حد في الدنيا بياخد كل حاجة .. ربنا يباركلك فيما رزقك و يهديكي لوالدك ويهدي والدك ليكي ويقر اعينكم برضاهكل سنة وانتم جميعا بخير و ربنا يبلغنا رمضان ان شاء الله ويعيننا علي طاعته

  11. الفراغ Said:

    رساله توجع القلبوتفكرنى بمعاملة امى ليا من صغرى حتى يوم زواجى وخروجى من البيتبس مش بنفس الصوره المستفزه اللى قالتهالان امى ليها فضل عليا كتير برضهبس والدى ده كان الحنان والحب والطيبه وامى المدرسه اللى اتعلمت فيها الدين والاقتصادوشغل البيتكل عتابى على امىانها لم تعطينى الثقه ولا الاهتمام والحب واللطف اللى كانت بتتعامل بيهم مع الناس وولادهمياريت فعلا الاب او الام اللى يقرأ الرساله يراجع نفسه فى معاملته لاولاده اما رسالتى لابى فهىاشكر الله انك كنت والدى

  12. تحياتى للاخت صاحبه الرسالهبس بقولها العلاقه بين الاباء والابناءمش حساسه للدرجاتى احنا واحد والاكيدزى ماقولتى انه عايزك الافضلبقول لابويا الله يرحمه ويكرمه بصحبه المصطفى عليه وال بيته وصحبه افضل الصلاه واذكى السلامبابا حبيبى بالرغم من اختلافى كتير معاكفى وجهات النظر وبالرغم من قسوتك عليا ساعاتوبالرغم من رؤيتنا المختلفه للدنيابعد ماكبرت وشوفت الحياه بوشها الحقيقىانت صح والف صحقسوتك فى موضعها قوتنىاختلافى معاك اظهرلى الحقيقه مع الوقترؤيتك المختلفه كانت اوقع واشملانت كنت جميل الخلق والخلقولسه جميل زى ما انت اشكرك وبحبكياريت زى ما اختنا صاحبه الرسالهافتكرت ككككككككل داتقعد تانى مع نفسها وتحاول تفتكر اى حاجه كويسه اكيد هتلاقى كتيرولو مالقتش يبقى اكيد مش هو الراجل اللى اتكلمت عنه فى الرسالهاللى حاول يعلمها افشاء السلام رغم الغضبصله الرحم رغم اللى بيحاولو يقطعوهاتحاول تشوف تصرفاته بعنيه هو مش بعنيها هىتحياتى ليكى يا موناليزاوشكار انك ادتلها فرصه تبعت الرساله دىوتسمعنا بالمره

  13. ياااااااااهدي صاحبتك دي مليانة من جواها و شايلة جداااا !!دة ايه دة ؟؟بس هي معاها حق لدرجة كبيرة اوي .. يا ريت باباها يسمعها .رسالة لبابا :بابا .. انا عارفة انك فخور بيا جداً .. و متأكد من اني بحبك جدا جدا ..عاوزة أقولك إني لولاك .. ماكنتش بقيت كدة .. !!يعني كل الفخر دة .. انت اللي خلقته .. كل الحاجات الجميلة انت اللي عملتها جوايا .. بابا .. انا بحبك اوي .

  14. salwa Said:

    السلام عليكم خت موناليزاالآباء ياكلون الحصرم و الاولاد يضرسونالرعيان بواد و القطعان بوادتسلم يدك ادراج مفيد كعادتكسلام

  15. hamma Said:

    لم أجد عنوانا غير " غربة في نفس البيت"مع الأسف إجتمعت كل الظروف السيئة في نفس الوقت :محيط و عاداة و لكن لن بفيد النظر الى الوراء…..بل الوثب الى الأمام من إثبات للجميع بالجدارة و عدم الإنسياق بالعاطفة : الصدق و الإخلاص أهم شعار المرحلة القادمةو لعل فيها خيرا للجميع ….لا بل أكيد جداأحيانا تجري الرياح عكس ما نريد ولكن هذه مشيئة الله للبشرفالصبر و المثابرة———جرني الموضوع الى آخر عكسه تماما حيث فتاة توفر لها ما تتمناه كل شابة……لدرجة الدلعفي المقابل كانت جادة جدا في دراستها ومن الممتازات قولا و فعلاو لكن حدث ما لم يكن في الحسبان :ذات مرة شك والدها في كثرة المكالمات الهاتفية في أوقات مختلفة من النهار والليلماذا فعل ؟طلب منها هاتفها ….في البداية إرتبكت مما اكد شكوكهأصر على معرفة الشفرة و تحصل عليها و جد صورا ( لها و لصديقها) و جد إرساليات غزل مع صديقهاتوقف يسترجع انفاسهسألها : لماذا ؟علما تم الإتفاق بينها ووالدها سابقا بالتركيز على الدراسة ثم تفكر في الزواجتصوري ماذا كان الجواب : هو مستعد للإنتظار حتى أنهي دراستي ( بعد 15 سنة من الآن)….. علما يفوقها بثلاث عشر سنة…………. أي عذرا هذا؟هل تستطيعي التركيز مع هذا ؟جواب : نعمندب حظه الأب الندم لا ينفع الآنأما الأم فهي موافقة على رأي إبنتهالكن لم تتخيل تصل الأمور الى هذه الدرجةو الآن وقد تجاوزت إبنتها الخطوط الحمر لا تستطيع فعل شيءا مع إضافة شيءا مهما و هو :إبنتي مثل صديقاتها….. فالكل لديهن أكثر من صديق و من ليس عندها يعاب عليها و تتهم بأشنع النعوتإنهن يركبن أرقام هواتف "موبايل" على الهامش ..إن طلع شاب تبدأ بالعمومياتوإن كان الرد لرجل كبيرا في السن آسفة أخطأت الرقمإنه التطور—————– معذرة أطلت رغم محاولة الإختزال…………………..

  16. السلام عليكم و رحمة الله و بركاتهأختى الكريمة بالنسبة لأبى فلن أجد من الكلام أو الأفعال ما أعبر به بالنسبة للأخت صاحبة الرسالة فأقول لها .. رأيت فى كلامك حب أبيك لك و حرصه عليك و أقول للأب .. بعض الحنان و التغاضى قد يفعلا الكثير و الكثير جدابارك الله فيك

  17. عايش ولكنـــــــــــــأهلا بيكأشكرك جدا لرأيك ولمشاركتكيسعدنا دوام التواصل***********************************حصان المرجيحةــــــــــــــأهلا بيكوعودا أحمداوتسعدنا زيارتك دائما********************************سبايدر مانـــــــــــــأهلا بيك يادكتورأشكرك جدا لتعليقك ولمشاركتكيسعدنا دوام التواصل********************************أبو محمدـــــــــأهلا بيك يافندم فى زيارتك الاولىقد ايه تعليقك جميلأشكرك جدا عليهيسعدنا دوام التواصل***********************************سلسبيلـــــــــأهلا بيكِأشكرك جدا لرأيكنورتى مدونتى وفى انتظارك دائما*********************************الفقيرة الى الله ام البناتـــــــــــــــــــــــأهلا بيكِ بعد طول غيابقد ايه تعليقك مؤثر وواقعى جداأشكرك جدا على مشاركتكنورتينى حبيبتى وفى انتظارك دائما*********************************كلمات من نورــــــــــــــأهلا بالغاليةعجبنى تعليقك ورسالتك جداومن الجميل حقا ان نتعلم من اخطاء الاخرينربنا يعزك ياحبيبتى ويعينك على تربية ابنائك تربية حسنةنورتينى وتسعدينى دائما بتواجدك***********************************واحد من البلد دىــــــــــــــــــــوعليكم السلام ورحمة الله وبركاتهأهلا بيك يافندمربنا يرحم والدكوأشكرك جدا على مشاركتكملحوظة: لا داعى للشكر فكلماتك تستحق القراءة حقايسعدنا دوام التواصل**********************************وحدىـــــــأهلا بيكأشكرك جدا على تعليقك وعلى مشاركتكنورت مدونتى ويسعدنا دوام التواصل**********************************أليس فى بلاد العجائبـــــــــــــــــــوعليكم السلام ورحمة الله وبركاتهأهلا ياحبيبتىربنا يعزك ويكرمك ياربوماتحرمش من سؤالك انا الحمدلله احسن من الاول بكتير:)أشكرك جدا لرسالتك لصاحبة الرسالةوكل سنة وانتى جميلة وربنا يبلغنا جميعا رمان ويعيننا على صيامه وقيامه اللهم اميننورتينى غاليتى واسعدنى تواجدك********************************الفراغـــــــــأهلا بيكِ بعد طول غيابأشكرك جدا على تعليقك ومشاركتكنورتينى واسعدنى تواجدك********************************ريتشادر قلب القطةـــــــــــــــــــأهلا بيكِأشكرك جدا لتعليقك ولمشاركتكولرسالتك لصاحبة الرسالة ايضانورتينى حبيبتى واسعدنى تواجدك***********************************شيماء علىـــــــــــــأهلا بيكِأكيد طبعا شايلة جدا والا ماكنتش اتكلمت على الملأ كده:)أشكرك جدا لتعليقك ولمشاركتكنورتينى شيمو الجميلة واسعدنى تواجدك*********************************سلوىــــــــوعليكم السلام ورحمة الله وبركاتهأهلا بيكِأشكرك جدا لتعليقكنورتينى ياجميلة وتسعدينى دايما بتواجدك***********************************هاماــــــــأهلا بيكمع احترامى الشديد لتعليقك بس مش فاهمة ايه علاقته بالموضوع!تقصد ان التدليل الزائد ممكن يفسد ولا ايه؟يسعدنا دوام التواصل***********************************د/ على خميســـــــــــــوعليكم السلام ورحمة الله وبركاتهأهلا بيك يادكتورأشكرك جدا لرسائلك ولمشاركتكيسعدنا دوام التواصل

  18. عايزه اقولك تصفيق حاد ربنا يكرمك يارب وبجد بجد وحشتينى موووووووووووت

  19. السلام عليكمالحقيقة الموضوع ده عنيت منه كتير لحد اما قربت من والدي وكلمته بصراحة ساعتها هو احترم عقلي وتفهم الموقف رحمة الله عليه

  20. بالنسبة لإجابة السؤال لو هتوجه رسالة لوالدك دلؤتى تقوله إيه؟.هقوله الله يرحمك يا بابا لو كنت قربت لك من زمان مكنتش تندمت دلوقتي

  21. طوبة فضة وطوبة دهبـــــــــــــــــــأهلا اهلا بعد طول غيابأشكرك جدا لتعليقكونورتِ مدونتى***********************************مصعب صلاحــــــــــــوعليكم السلام ورحمة الله وبركاتهأهلا بيكأشكرك جدا لتعليقك ولمشاركتكوفعلا المصارحة فى اى علاقة تجعلها متميزة جدايسعدنا دوام التواصل

  22. أناهعلق ع البوست ده لأنه مسني جدآ..شوفي الأب ده هوكل حاجة في الدنياوده طبعآ مش أي أب….. هقول لبابا وحشتنييييييي أووووووووووووي ونفسي أشوفك "ربنايرحمه" بوست جيد

  23. أفروديتــــــــــأهلا بيكِعلقى ياحبيبتى على أى موضوع مهما كان ولا يهمك فانا اهتم بجميع التعليقاتأشكرك جدا على تعليقكوربنا يرحم والدك ويغفرلهنورتينى ياجميلة واسعدنى تواجدك

  24. Tota Said:

    >الموضوع دا مكتوب من مدة طويلة بس انا لسه شايفة النهاردة وبجدعجبنى جداا اسلوب جميل كالعادة وكلام قوى …انا فعلا كتير اوى بحس ان الاب نعمة كبيرة اوى وبيصعب عليا اوى الناس اللى بيكون ابوهم متوفى بجد الاب دا دورة مهم اوى اوى وحتى لو فى حد مش بيحب ابوة مش بيحس بالموضوع دا حاليا ..بس اكيد الاب دا لو قرأ الرسالة اللى اتكتب بالطريقة دى هيفكر مليون مرة هو كان بيعمل كدا ليه واكيد هيقولها هو كان بيعمل كدا ليه بس كلمة لصاحبة الرساله اللى بردة انا حاسة وانا بقرها انها حساسة اكتر من الازم الواحد مش بيحس بالشىء الا لما يضيع منه او يروح فاعرفى انك عمرك ما هتقدرى تعوضى الاب عشان حاجة غالية جداا والاب العمود الاساسى والفقرى للبيت وانتى لسه مش بتحسى بعكس دا يعنى ليه مش بتفكرى هو بيعمل كل دا ليه؟؟ وسؤال مهم اوى لو انا موجهه رسالة لولدى اقوله فيها انك اكتر شىء اساسى فى حياتى ولشدة تعلقى بيه بعمل حاجات كتيرة زية وانا دايما بدعى ربنا يطول فى عمرة لانى بدونة ولا شىء وبردة اقوله ماتفكرش تزعل منى عشان لو زعلت مش بعرف انام ولا بيبقى سومى سعيد ولا ايامى واستحمل دلعى اللى بعتبرة رخم عليك وربنا يطول فى عمرك ويخليك لي ولامى واخواتى يااغلى عندى من اى شىء

  25. >توتةــــــأهلا بيكِ يا توتةيسعدنى تعليقك دائما على أى موضوع مهما كان قدمه فأنا اهتم بجميع التعليقاتأشكرك جدا لتعليقك ولمشاركتكفى انتظارك دائما


{ RSS feed for comments on this post} · { TrackBack URI }

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: