صعبان عليا

على قد ما تمنيت أنى أشوفك جاى لى تانى وبتتمنى قربى.
على قد ما تمنيت أشوفك ذليل مكسور.
على قد ما تمنيت أشوف قلبك مجروح زى ما جرحنى.
على قد ماتمنيت تكون فى نفس مكانى وتدوق من نفس الكأس اللى شربتهولى من تجاهل ولا مبالاة.
على قد ماتمنيت إنك تعرف قيمتى وإن مفيش حد فى الدنيا حبك قدى. وإن جنتك فى الدنيا كانت معايا أنا.
لكن بجد دلؤتى صعبان عليا:
إنك تدعى على نفسك لو أنا مارديتش عليك وأنا ماتأثرش.
إنك جيت متأخر أوى.
إنك مش عارف توصللى.
إنك بتسلمنى قلبك فى وقت ماعدتش يلزمنى فيه.
إنك معتقد إن بُعدك عنى طول السنين اللى فاتت ماغيرنيش وإنى لسه زى ماسبتنى بلا تغيير !!.
إنك مش عارف إنى خلاص أخدت على بُعدك.
أنى أشوفك كده ومقدرش أعملك حاجة.
أنى مش حاسة بكل كلامك الجميل اللى ياما تمنيت أسمعه زمان.
أنى أشوف رقمك بيتصل وماردش عليك.
أنى مش عايزة أريحك بكلمة.
أنى ألاقى حد بيقول أنه بيحبنى وماوافقش أرتبط بيه.
أنى ماكملش حياتى مع أول رجل فى حياتى.
لأنى معاك فقدت إحساسى بالأمان.
لأن حياتى من غيرك أحلى.
لأنى أعطيتك فرصة أخيرة ولم تحسن إستغلالها.
لأن كل الشواهد ضدك.
لأنى مقدرش أتحدى حد بيك.
لأنى محتاجة حد يقنعنى بيك.
لأنى مرتاحة بعذابك.
لأنى مش بفتكرك بجد غير لما بشوفك.
لأنى بقيت أنطق اسمك دلؤتى عادى. واسمع اسمك برضه عادى. وأشوفك برضه عادى.
لأنى حقيقى نسيتك.
*******
# كُتر القسوة بيقطع عروق المحبة.
# محدش بيعرف قيمة اللى فى إيده غير لما بتروح منه.

54 Comments »

  1. سلوى Said:

    ياه اكيد عشان توصلي للمرحله دي
    اكيد مريتي بأيام مرة كتير

    ربنا يعفو عنك حبيبتي ويعوضك خير
    اللهم آمين

  2. أحمـــــــــــــد أبو العلا Said:

    لو في وقتها بنحس بكده
    عمرنا ماهنضيع
    بس للأسف بنمشي في نفس الطريق اللي مشي فيه اللي غلطوا قبلنا ونوصل لنفس النتيجه وبعدين نفهم

  3. (Joudy) Said:

    بجد حاجة صعبة ومرارته فوق الوصف ان قلبك يكون بيتخلع علشان انسان وهو عادى ولا كان يفرق معاه ولما تقعى وتقومى وتبقى أقوى من غيره لما بيرجع ويقولك انا جيت بس علشانك ويبقى جواك ألف سؤال اشمعنا دلوقتى اشمعنا حالا كنت فين وأنا بناديك بعلو صوتى ويبقى واقف وشيفاه بعنيكى الوقفة اللى كنت بتتمنياها بس ولا تحسى بحاجة إلا المرار صعبان عليكى لأنه بيفكرك بيكى لما كنت مستنيه بس خلاص فات الأوان ان ايدك ترجع تتمد له

    فعلا كتر البكا يعلم القسوة

    دمتى بكل الخير والسعادة

  4. الشعب لابد له من حكومه تشكمه Said:

    مفيشحد بيحب حد ويبعد عنه ويرجع يقوله غلطان.
    يباه من الاول مكنش بيحب ويستاااااااااهل كل اللى يحصله.

  5. سمية قهوة ؛آه ياني Said:

    أكيد اتجرحتي منه قوي و هو ماحسش بجرحك و كل مرة كان بيزوده او يفتحه من جديد لغاية ما زهقتي و بعدتي و نسيتي و لجرح اتحول لندبه مبتوجعش بس بتفكرك باللي حصل

    ياترى تحليلي صح و لا غلط

  6. Mr.Hazem Said:

    فعلا كلامك صحيح 100/100
    كُتر القسوة بيقطع عروق المحبة.# محدش بيعرف قيمة اللى فى إيده غير لما بتروح منه.

    يعطيكي العافية

  7. ماء تشرين Said:

    مش عارف اعلق باايه كلامك لسان حال بنات كتير اعرفهم ويمكن في يوم كنت منهم

    تقبلى اعجابى

    دمتى بكل الود

  8. نسيبه Said:

    السلام عليكم ورحمة الله وبركاته
    أخيرا هأرد بدري شوية
    إحساس صعب بس كويس إنها الحمدلله نسيته ده أكبر عقاب ليه يستاهل وعقبال كل اللي زيها وربنا يعوضها عنه

  9. ليس فقيرا من يحب Said:

    السلام عليكم

    ربنا يارب يعوضك خير ويكتبلك الخير حيث كان ويرضيكى بيه ويريح بالك
    وينصرك على من ظلمك

    اللهم امين

  10. موناليزا Said:

    سلوى
    ـــــــ
    اختى الحبيبة:اهلا اهلا بالقمر
    ربنا يكرمك ياحبيبتى ويتقبل دعائك
    نورتينى سلوى الجميلة وتسعدينى دائما بتواجدك

    ********************************

    احمد ابو العلا
    ـــــــــــــ
    اهلا بيك استاذ احمد
    مع احترامى لرأيك ولو انى مش فاهماه اوى
    اللى بيقدم على خطوة الانفصال عن شريك حياته اكيد بيكون فكر كويس ومن ثم رفضه للرجوع بيكون طبيعى
    وساعتها الرد بيكون"لو كنت عايزك من البداية كنت هسيبك ليه؟"
    اشكرك جدا لزيارتك

    *********************************

    جودى
    ـــــــ
    اختى الحبيبة:اهلا اهلا بالقمر
    تحليلك منطقى جدا:) أحييكِ عليه
    نورتينى جودى الجميلة واسعدتينى بتواجدك

    **********************************

    الشعب لابد له من حكومة تشكمه
    ـــــــــــــــــــــــــــ
    أختى الحبيبة:اهلا اهلا بالقمر
    فعلا من دلائل المحب انه لايستطيع ان يبعد عن حبيبه
    نورتينى حبيبتى واسعدتينى بتواجدك

    ********************************

    سمية قهوة, اه يانى
    ـــــــــــــــــــ
    اختى الحبيبة:اهلا اهلا بالقمر بعد طول غياب
    صح ياجميلة:)
    أصبح مجرد ذكرى عابرة كانت فى حياتى يوماًما
    نورتينى ياسمية واسعدنى تواجدك

    ********************************

    مستر/حازم
    ــــــــــ
    اهلا بيك استاذ حازم
    التجربة خير مُعلم على مر الأجيال
    أشكرك جدا لمشاركتك

    *********************************

    ماء تشرين
    ـــــــــ
    اختى الحبيبة:اهلا اهلا بالقمر
    🙂 المهم اننا وصلنا للنهاية دى وده فى حد ذاته انجاز
    نورتينى حبيبتى واسعدنى وجودك

    ******************************

    نسيبة
    ـــــــ
    وعليكم السلام ورحمة الله وبركاته
    اختى الحبيبة:اهلا اهلا بالغالية
    وحشتيييييينى جدا ويارب تكونى بخير

    يارب ياحبيبتى يعوض على الجميع وعقبال اللى فى بالى يارب:)
    نورتينى واسعدتينى جدا بوجودك
    مفاجأة جميلة بجد:)

    **********************************

    ليس فقيرا من يحب
    ـــــــــــــــ
    وعليكم السلام ورحمة الله وبركاته
    أختى الحبيبة:اهلا اهلا بالقمر
    الله:)
    ما اجمل دعائك لى ربنا يتقبل يارب ويرزقك بكل ماتحلمى بيه وييسرلك كل الخير
    نورتينى ياجميلة واسعدنى تواجدك

  11. ماما أمولة Said:

    # كُتر القسوة بيقطع عروق المحبة.
    # محدش بيعرف قيمة اللى فى إيده غير لما بتروح منه.

    ياريت الكلام يتحس

    تسلم ايدك يارب

    دمت بكل الود

  12. بنات مرام Said:

    يااااااااااااااا يامنمن
    لقسوة دى
    بجد موضوع رااااائع بس قاسي قووووووى
    انا عارفة وحاسة بيه على فكرة
    وعارفة كمان ان بعد كل اللى حاصل ده لأى حد يكون مبرر قوى لرد الفعل ده
    بس صدقين مش قادرة اتخيل كل القسوة دى
    عارفة انك هتقولى لا تخيلى واكتر كمان
    هقول انا حاسة كويس قوى بجرح زى ده
    لكن انا بقول كده لانى حاسة رغم كل الجرح ده مايتحولش لكره بالشكل ده

    اللى يحب عمره مايكره
    ولو اتجرح وكره هيكون كرهه عبارة عن بعد وبداية حياة افضل واحلى من اللى فات

    رزقكى الله ما تتمنى وزياااااااااادة ونصرنى ونصرك على من يظلمنا آمين

  13. salma mohamed Said:

    حبيبتي عوضك الله خيرا,ورزقك الخير حيث كنت ومع من يستحق قلبك الطيب,
    كثيرا هؤلاء الذين يدعون حبنا, لكن
    المحبة ليست كلمات تقال ولا شعارات ترفع ولا تثمر عملاً,ولاهي دعوى باللسان وهيام بالوجدان,
    للمحبة أدله,فمن أتى بها صدقناه وإلا كانت دعواه كاذبه.

  14. أخبار المدونات Said:

    تابعوا معنا سلسلة جوجو وزمردة علي أخبار المدونين

    تحت الأضواء
    تتمني لكم تدوين هادف

  15. طوبه فضه وطوبه دهب Said:

    يااااااااااااااه قلتى احسن كلام كتر القسيه بيعلم الجفاء بيقتل الحب فى القلوب وبيمسح التضحيه والمعانى الجميله من العقول ياريت كل حد عنده نعمه الحب الحقيقى يحس بيها ويتمسك بيها عشان ما يبكيش عليها بعد فوات الاوان تسلم ايدك كلامك لمس جوا قلبى وابكى عيونى

  16. حـــلـــم كــــان Said:

    بتهيقلى فى حاجه بنكم اتكسرت ومستحيل ترجع زى الاول

  17. حنان الشافعي Said:

    والله اللي زي دول ولا يستاهلو اساسا
    وحلال فيهم يدعوا
    وانا ادعي ربنا يستجيب

    دمتي بكل خير

    ودي

  18. ঔღঔ نـــوارة ঔღঔ Said:

    مش عارفة اعلق واقووله ايه

    احساس صعب و شكلك اتحملتي كتير

    وللاسف فهم متاخر اوووي

    القسى ما بينتسى

    ربنا معاكي ياقلبي ويعوض صبرك خير

    دمتي بحفظ الرحمن

  19. كلمات من نور Said:

    لسه ليكي حتة صغنونه قوي يا موناليزتي

    التسامح علشان انتي تعرفي تعيشي مع نفسك

    ربنا بيسامح عباده وهو القهار وهم المسئون والمذنبون بذنوب مخجلة مشينة فما بالك بنا؟؟نسامح علشان الله الحنان المنان يسامحنا

    نسامح علشان تكون قلوبنا بلا نقاط سوداء ..نسامح بلا عودة ولا ذكريات سوداء تملىء القلوب …ربي يبعد عنك كل شر وكل حزن ويملى أيامك بهجة وسرورا

  20. ذكري رحيل قلم Said:

    السلام عليكم

    ان الكره قسوة ومنتهي القسوة اللامبالاة

    ما اجمل الحرية وقوة الارادة وتجمد القلب عندما ياتي الجارح نادم آسف
    وانا لا ابالي

    منتهي الجبروت والقوة ومنتهي النصرة ورد الحق الي قلبي
    دمتي جميلة

  21. الأحــــــ إيناس ــــــزان Said:

    تعرفى بجد معاكى حق

    لانى مريت بكده

    وصعب انى ارجع رغم الحب الكبير اللى عشته بس هو وصلنى انى اكره حتى سيرته مش عاوزها تتنطق قدامى ولا اى حاجه من ريحته
    انا ارتحت لما بعدت
    وكنت بتعذب فى قربه

    ياااااااااااااااااااااااااة
    قلبتى عليا كتير

    ربنا معانا كلنا

    مودتى

  22. المعتصم Said:

    السلام عليكم ورحمة الله وبركاته
    تحياتى اختى الكريمه
    للاسف فيه ناس مش بتعرف قيمة الناس اللى بتحبها غير بعد فوات الاوان
    ولما يفكروا يرجعو بيفاجأوا بيهم وبموقفهم الرافض للرجوع
    لانهم بيبقوا لسه متخيلين ان الناس دى لسه بتحبهم
    ومش عارفين ان جرحهم ساب علامه كبيرة قوى فى قلوب حبايبهم(سابقا)العلامة دى قتلت كل الحب اللى كان موجود

    ربنا يكرمك ويفرح قلبك ويعوضك كل خير يارب
    تقبلى مرورى وتحياتى
    والسلام عليكم ورحمة الله وبركاته

  23. صيدلانيه طالعه نازله Said:

    سيبك انتى احلى حاجه اما الانسان يبقى بيتكلم و يتصرف و هو فى مركز قوه مش ضعيف و لا ذليل
    لانها بتفرق كتير قوى لان اللى مكسور من جواه و بيمثل القوه بيجى عليه وقت و يحن لكن اللى قدر يخف من الجرح و ينساه و يخليه عصايا تسنده عشان يقف بيبقى موقفه ثابت و مبيتغيرش
    اااااااااه لو كل واحد حافظ على نصه التانى اللى معاه و مفرطش فيه و لا جرحه كان زمانا دلوقتى فى الجنه الحقيقيه بس مين يفهم و يقدر
    ياريت كلنا نبقى فى القوه دى دايما

  24. جمهورية شومبونجو العربية Said:

    السلام عليكم

    موضع جميل بجد

    ودة بيأكد ان مكانش فى تفاهم بين الطرفين

    طب انتى حاسه انه ظلمك
    لانه معرفش قيمه حبيبته

    طب تخيلى العكس
    احساس الشاب بيبقى اشد قصوة من لبنت
    (دة لوكان هو المضلوم)
    لان (معظم) البنات بيبقى عندها برود فى المشاعر وعندها واحد راح التانى يجى
    (عادى)

    على العموم الدنيا تجارب
    واحسن حاجة خليكى ديمأ متفأله ان بكرة احسن من امبارح

    تقبلى مرورى

    تحياتى
    …….

    رئيس الجمهورية

  25. مدونون من اجل الاقصي Said:

    السلام عليكم
    جزاكي الله خيرا
    القسوة والبعد ليهم تاثير
    كبير اوي
    ومرارة عالية
    المهم فالنهاية كل شئ نصيب ومكتوب

  26. ستيته حسب الله الحمش Said:

    مبروك لصاحبة القصة
    تستحق المباركة صحيح

    فيه شيء غريب جدا
    دعوة المظلوم ليس بينها وبين الله حجاب
    واقسم ربنا لأنصرنك ولو بعد حين
    ومن كرم ربنا علينا يرينا إجابة بعض الدعوات آجلا غير عاجل ليثبت القلوب ويرد الظالمين ويجعل بعضهم عبرة لبقية البشر

    طالما لا تتذكره الا ان مر امامها
    طالما بتنطق اسمه عادي
    يبقى الحمد لله على تمام الشفاء
    الحمد لله ان ايامها بقت تاني قدامها مش وراها

    الا الأمان
    الا الأمان
    بين كلمة رجل وكلمة دكر حب وحنان وحماية وأمان
    بس خلاص

    تحياتي يا مونا

  27. مي Said:

    فعلا على اد ما الواحد بيحب اووووووووووووووووووووووووى ممكن القسوة تخليه يكرررررررره اوى
    بسبب الغباء والقسوة
    كل اللى قلتيه صح جدااااااااااااااااا
    مع كل جملة كونتى قصة بينتى سبب ونتيجة
    ماعمر الجفاء هيقابله محبة
    كلماتك صادقة جدا احييكى عليها بجد
    تحياتى

  28. mohamed ghalia Said:

    صح
    دايما كده مش بنعرف قيمة الحاجة غير لما نفقدها
    بوست رائع

  29. موناليزا Said:

    ماما امولة
    ـــــــــــ
    أختى الحبيبة:اهلا اهلا بالقمر
    عشان يحسوه لازم يشوفوه بعينيهم ويجربوه
    ماتحرمش منك ياحبيبتى
    نورتينى ياجميلة واسعدنى تواجدك

    ********************************

    بنات مرام
    ــــــــــ
    أختى الحبيبة:اهلا اهلا بالقمر
    اشكرك جدا لرايك
    بس مين قال انه تحول لكره شديد!! تقدرى تقولى تحول للمبالاة
    "بعد كل حاجة هو ولا حاجة:))

    الله على دعائك الجميل :)ربنا يسمع منك يارب عاجلا غير اجلا اللهم امين
    نوررتى مدونتى وفى انتظارك دائما

    *********************************

    سلمى محمد
    ــــــــ
    أختى الحبيبة:اهلا اهلا بالقمر
    ازيك ياسلمى؟ وايه اخبار ياسر
    يارب نسمع عنكم اخبار جميلة قريب اللهم امين

    ربنا يعزك ياحبيبتى ويتقبل دعائك ويرزقك بالمثل اللهم امين

    ايه التعليق البليغ ده:)
    أشكرك جدا لجمال كلماتك
    نورتينى سلمى الجميلة واسعدنى وجودك

    *********************************

    أخبار المدونات
    ــــــــــــــــ
    أهلا وسهلا
    أشكركم لدعوتكم المميزة والمفاجئة بالنسبة لى:)
    ونرجو للجميع التوفيق

    **********************************

    طوبة فضة وطوبة ذهب
    ـــــــــــــــــــ
    أختى الحبيبة:اهلا اهلا بالقمر
    تسلميلى يارب من كل شر ورزقكِ بمن يستحقك ويحافظ على رقة قلبك
    نورتينى حبيبتى واسعدنى تواجدك

    **********************************

    حلم كان
    ـــــــــ
    أهلا وسهلا فى زيارتك الاولى
    ده حقيقى
    نورت مدونتى وارجو دوام التواصل

    **********************************

    حنان الشافعى
    ــــــــــــــ
    اختى الحبيبة:اهلا اهلا بالقمر
    ازاى ياحنونة!!
    لأ طبعا يستاهلوا يتجرحوا ويشربوا من نفس الكاس:)
    نورتينى ياجميلة واسعدنى تواجدك

    ********************************

    نوارة
    ـــــــ
    أختى الحبيبة:اهلا اهلا بالقمر
    ماتحرمش منك ياحبيبتى ولا من تواجدك المميز
    نورتينى ياجميلة وفى انتظار دائما

    **********************************

    كلمات من نور
    ـــــــــــــ
    أختى الحبيبة:اهلا اهلا بالغالية
    ياااه ضغطى على الجرح اوى
    انا مشكلتى بجد انى مش عارفة اسامح
    (كاتبة موضوع عن اسبابى وهنشرها قريبا بإذن الله)
    متهيألى طول ماانا ضعيفة ومظلومة مش هقدر اسامح:(
    ادعيلى بجد
    نورتينى حبيبتى وفى انتظارك دائما

    *********************************

    ذكرى رحيل قلم
    ــــــــــــــــ
    وعليكم السلام ورحمة الله وبركاته
    اختى الحبيبة:اهلا اهلا بالقمر
    صدقتِ غاليتى
    نورتينى ياجميلة واسعدنى تواجدك

    *******************************

    أحزان ايناس
    ـــــــــــــ
    اختى الحبيبة:اهلا اهلا بالقمر
    خلينا نخرج اللى جوانا عشان مايبقاش فاضل ولا حتى كلمة نقولها عليه
    ونبقى بكده قدرنا ننتصر ونرجع ملكية قلبنا لينا تانى:)
    نورتينى انوسة الجميلة واسعدنى تواجدك

    *********************************

  30. موناليزا Said:

    المعتصم
    ــــــــ
    وعليكم السلام ورحمة الله وبركاته
    اهلا بيك يافندم
    سعيدة جدا بتعليقك الذى يؤيد ما كتبت:)
    ربنا يكرمك يارب ويتقبل دعائك ويرزقك بكل الخير اللهم امين
    أشكرك جدا أخى الفاضل لتعليقاتك المثمرة دائما ولتحليلك المميز ولمتابعتك الجيدة:)
    فى انتظاركم دائما فنحن يسعدنا تواجدكم

    ********************************

    صيدلانية طالعة نازلة
    ــــــــــــــــــــ
    أختى الحبيبة:اهلا اهلا بالقمر
    عندك حق فالقوة الداخلية للفرد خير سلاح
    وحتى لو حسينا بلحظات ضعف يكون برضه عندنا القوة الكافية لأن الطرف التانى مايشوفهاش
    نورتينى حبيبتى واسعدنى تعليقك

    *********************************

    جمهورية شومبونجو العربية
    ــــــــــــــــــــــ
    وعليكم السلام ورحمة الله وبركاته
    اهلا بيك يافندم
    أشكرك جدا لرايك
    بس مين قال ان البنات عندهم برود وسهل تغير اللى بتحبه!!!
    من غير زعل ومن غير تحيز لنوعى
    ماسمعناش عن بنت قدرت تضحك على ولد وتخليه يتجوزها عرفى مثلا وبعد كده تقطع الورقة وتسيبه لمصيره لوحده!:)
    مسمعناش عن بنت مثلا سابت حبيبها لان ابوها قالها لو ماتجوزتيش ابن عمك هحرمك من الميراث!!
    (عكس الولاد اللى غالبتهم بيتحججوا بالحِجة دى)
    بالعكس البنت يوم ما بتحب بتتحدى الدنيا كلها عشان حبيبها
    اتفرج على اى فيلم عربى وانت تشوف الفرق بين حب البنات وحب الولاد

    ان من تتحدث عنهم أيها الرئيس قِلة قليلة جدا فى مجتمع الإناث

    والحمدلله يافندم عشمنا فى ربنا كبير وظننا بالله خيرا
    أشكرك جدا لمشاركتك

    ********************************

    مدونون من اجل الاقصى
    ــــــــــــــــــــ
    وعليكم السلام ورحمة الله وبركاته
    اختى الحبيبة:اهلا اهلا بالقمر
    ربنا يكرمك
    عندك حق فعلا
    نورتينى سمسمة الجميلة واسعدنى تواجدك

    *********************************

    ستيتة حسب الله الحمش
    ـــــــــــــــــــ
    أختى الحبيبة:اهلا اهلا بنبض الحكمة
    الله يبارك فيكِ
    عقبال يارب ما تباركيلها قريب على فرحتها الكبير برد مظلمتها ورجوع حقوقها المهدرة:)
    ماتحرمش منك ابدا ياحبيبتى ولا من تعليقك اللى بجد بستناه
    نورتينى ياجميلة واسعدنى تواجدك

    ***********************************

    مى
    ـــــ
    اختى الحبيبة:اهلا اهلا بالقمر
    انا اللى بحييكِ على مشاعرك الجميلة واحاسيسك المرهفة العالية
    نورتينى مى الجميلة واسعدنى تواجدك

    *********************************

    محمد غالية
    ــــــــــ
    اهلا بيك استاذ محمد
    عندك حق
    ربنا يكرمك واشكرك جدا لرايك

  31. norahaty Said:

    فعلاً كتر الآسية
    بيقطع عروق المحبة
    ولو كانت من الصلب!

  32. عاشقة الفردوس Said:

    بس ده من رحمة ربنا بيه

    علشان متبقيش ناقمة عليه وممكن ممكن تسامحيه

    لان عذاب الظالم يوم القيامة شدييييييييييد شديييييييييد

    :::::::::::::
    نفسي أنا كمان آخد حقي م اللي ظلمووووني وللأسف كانو أقرب الناس ليا

    " إن ربك لبالمرصاد"

  33. نهــــــــــار Said:

    السلام عليكم…
    بالفعل صعب جدا ….
    ودوما تجهل قيمة الشيء ولا تتضح إلا بعد خسارته….

  34. هكذا علمنى سيدنا محمد( صلى الله عليه وسلم) Said:

    السلام عليكم ورحمة الله وبركاته
    حياكى الله وبياكى أختى الكريمة

    الكلام اللى قرأته دا كلام حد إتظلم أوى
    أسأل المولى عز وجل أن يجبر كسرك وأن يجيرك فى مصيبتك ويخلف لكى خيرا منها

    وأسأله ربى عز وجل أن يفرح قلبك بما يسرك وينير بصرك وبصيرتك

    حفظكى الله من كل سوء انتى وسائر المسلمات
    دمتى فى معية الله عز و جل

  35. مهرة ضي القمر Said:

    انا يمكن صغيرة
    بس اللي فهمته
    ان حضرتك ببساطة لا تحترميه بعد احداث معينة
    اشياء جارحة خلته صغر في عينك
    وطالما انتهى الإحترام اظن استحالة يفضل حبيب

    تحياتي

  36. أم مالك Said:

    الغالية موناليزا
    ربنا يكرمك يارب ويكتب لك
    الخير حيثما كان
    رجعت وبشكل مبسط للتواصل معكم
    رغم انف الاوامر سواء الدكاترة
    او الاولاد
    ربنا مايحرمنى منكم ولامن دعواتكم
    وينصرك دايما ويطمنى عليكى بالف خير
    تحياتى

  37. موناليزا Said:

    نوراهاتى
    ـــــــــــ
    اختى الحبيبة:اهلا اهلا بالقمر بعد طول غياب
    طبعاً فنحن بشر ولكل انسان طاقة على التحمل
    نورتينى حبيبتى واسعدنى تواجدك

    ***********************************

    عاشقة الفردوس
    ـــــــــــــــــ
    أختى الحبيبة:اهلا اهلا بالقمر بعد طول غياب
    بجد والله نفسى اقدر اوصل لدرجة التسامح دى
    لكن للاسف لسه مش عارفة
    =
    ان شاء الله ياحبيبتى وهتشوفى ده بعينك قريب اوى
    ربنا ينصرنى وينصرك قريبا اللهم امين
    نورتينى غاليتى واسعدنى تواجدك

    ***********************************

    نهار
    ــــــ
    وعليكم السلام ورحمة الله وبركاته
    اختى الحبيبة:اهلا اهلا بالقمر
    العاقل دائما هو من يعرف قيمة ما يمتلكه وبالتالى يحافظ عليه
    أما غير ذلك فلا نأسف عليهم
    نورتينى حبيبتى واسعدنى تواجدك

    *********************************

    هكذا علمنى سيدنا محمد صلى الله عليه وسلم
    ـــــــــــــــــــــــــــــ
    وعليكم السلام ورحمة الله وبركاته
    اهلا بيك يافندم
    ربنا يعزك يارب ويبارك فيك
    متعرفش دعائك لى أسعدنى قد ايه:)
    ربنا يسعدك ويتقبل دعائك ويرزقك بكل الخير اللهم امين
    أشكرك جدا لتعليقكم الطيب

    ********************************

    مهرة ضى القمر
    ــــــــــــــــ
    أختى الحبيبة:اهلا بيكِ فى زيارتك الاولى
    كلامك جميل بس هو ماصغرش فى عينى هو بس خرج من حياتى فماعدتش شايفاه لا صغير ولا كبير:)
    نورتى مدونتى وارجو دوام التواصل

    *********************************

    أم مالك
    ــــــــــ
    أختى الحبيبة: يادى النور:)
    ايه المفاجأة الجميلة دى بجد:)
    مانتحرمش ابدا من وجودك بينا ياحبيبة قلبى
    ربنا يطمنا عليكِ يارب ويبعد عنك اى مكروه وينجيكِ ويحفظك يارب اللهم امين
    نورتينى ووحشتيينى وبحباااااااك جدااا

  38. سمسمه Said:

    ما حدش يقول كده غير لانه اتجرح قوى من قبلها حب قوى
    ربنا يفرح قلبك

  39. البنفسج الحزين Said:

    غاليتي أمه الله
    صدقيني اللي يكسر قلب كان بيجبه الحب ده كله
    اللي يأسي علي أكتر قلب حن عليه في الدنيا
    اللي يفرط بسهوله في حبه
    ميستاهلش اصلا مجرد التفكير فيه
    عارفه ان الفراق في الحاله دي وان كان صعب جدا ع الطرف المظلوم لكنه بيكون رحمه من ربنا بيه علشان ربنا مرضيلوش يكمل حياته مخدوع ومظلوم وتعبان وبيعاني مع شخص ميستاهلش حبه الكبير
    وربنا انقذك واداكي فرصه تلحقي نفسك ربنا يعوضك خيرا منه في الدين والدنيا…

  40. ghorBty Said:

    فليعلموا يا موناليزا

    ان المرأة عندما تحب تعطي دون مقابل وتصبر دون حد ولكن عندما تنسي لا تحب ان تنظر الي الوراء ولا تخدعها بريق الكلمات فمن يريد ان يحافظ علي قلبها فليعتني به من اول الخط ..

    خايفه اقولك المسامح كريمـ لاننا في عصر الواحد مش ضامن فيه شئ هيضمن غيره ازاي !!!

    الله يصلح الاحوال ويعوض خير ..

  41. آخر العنقود Said:

    منمن انا صاحبة التعليق باسم بنات مرام
    🙂
    ومش اخدت بالى ان علقت بالاسم ده
    بس خير ياقمر ع العموم دى مدونة مشتركة وجديدة اتمنى منك المشاركة فيها حبيبتى

    احبك فى الله🙂

  42. عمرو Said:

    توبكـ راآآئع موناليزا

    وياريت يكون في عظهـ والكل يستفيد منهـ

    وبيعكس كمان شخصيهـ قويهـ لانسانهـ تحب بصدق

    دمتي بسعادة

    خالص تحياتي ,,

  43. موناليزا Said:

    سمسمة
    ــــــ
    أختى الحبيبة:اهلا بيكِ فى زيارتك الاولى
    ربنا يكرمك يارب اشكرك جدا لرايك
    نورتى مدونتى وارجو دوام التواصل

    **********************************

    البنفسج الحزين
    ـــــــــــــــ
    أختى الحبيبة:اهلا اهلا بالقمر
    انا شايفاه شعور حلو للقلب المظلوم لانه خد بتاره:)
    ماتحرمش منك ياحبيبتى
    أشكرك جدا لتعليقك الجميل
    نورتينى وأسعدنى تواجدك

    ********************************

    غربتى
    ــــــــ
    أختى الحبيبة:اهلا اهلا بالقمر
    دائما يبهرنى بريق كلماتك
    أشكرك جدا لتعليقك
    وفعلا التسامح ده حاجة صعبة اوى بجد مش اى حد يقدر عليه
    نورتينى ياجميلة واسعدنى تواجدك

    *********************************

    آخر العنقود
    ــــــــــــ
    أختى الحبيبة:يادى النور
    كنت حاسة انى اعرفها:)
    ميرسى ياقمر للتوضيح
    بحبك جدا على فكرة
    أحبك الذى أحببتنى فيه
    نورتينى ياجميلة واسعدنى تواجدك

    ********************************

    عمرو
    ــــــ
    أهلا بيك استاذ عمرو
    اشكرك جدا لرايك ولتعليقك
    دمت طيبا ولمدونتى زائرا

  44. Heba Faruq Said:

    وكيف أعاودك وهذا أثر فأسك!

    ربنا يصبرك ويعوضك خير من ذلك

    ومين عارف مش يمكن عشان ربنا بيحبك وعارف الشخص ده فعلا على حقيقته خلصك منه لانه أراد لك أفضل منه إنشاء الله

    دمتي بكل خير

  45. طهر فؤادك Said:

    السلام عليكم ورحمة الله وبركاتة ,,,

    الحمد الله على كل شئ … وربنا يكرمك يارب ويعوضك خير اللهم امين … كفاية دينك واخلاقك وتربيتك دول خير معين وصديق ورفيق … وربنا يكرمك يارب دائنا بالخير

  46. Tamer Nabil Said:

    كلمات جميلة

    والفكرة موجودة بين الكتير من الناس مرت بنفس التجربة

    واتفق معاكى تماما

    نحن لانعلم قيمة ماننمتلك الا بعد فقدانة

    مع خالص تحياتى

  47. اقصوصه Said:

    معاج حق🙂

  48. رفقة عمر Said:

    موناليزا
    لو حبيته بجدعمرك ما تكرهيه
    وعمر اللى بيحب يتشفى فى حبيبه
    اخاف ان تكون الفرصه اتتك مره اخرى وانتى التى ستضيعيها
    ووقتها يتحول الوضع وتكونى انت النادمه
    على فكرة ان بتاذى كتير جدا ومن اعز صديقات
    ولكن بمجرد ان يعتذوا باقبل الاعتذار
    استخيرى الله
    وربنا يقدملك اللى فيه الخير

  49. mahasen saber Said:

    تقولى لمين يا مونا …ولاا يهمك كلا منا بياخد نصيبه

    ربنا يعوضط بالخير دايما

    احساس وهيمر زى كل شئ اسأل مجرب يا مونا بئا

  50. زى الهوا Said:

    كل دى قسوه؟؟؟؟

    😦

  51. موناليزا Said:

    هبة فاروق
    ـــــــــ
    أختى الحبيبة:اهلا اهلا بالقمر
    "وكيف أعاودك وخذا أثر فأسك"
    جملة فى الجووووون
    ماتحرمش منك ابدا ياحبيبتى
    والحمدلله فعلا محدش عارف الخير فين
    نورتينى هبة الجميلة وأسعدنى تواجدك

    **********************************

    طهر فؤادك
    ـــــــــ
    وعليكم السلام ورحمة الله وبركاته
    اهلا بيك يافندم
    ربنا يعزك يارب ده من ذوقك وكرم اخلاقك
    (اللهم لاتؤاخذنى بمايقولون واغفرلى مالايعلمون واجعلنى خيرا مما يظنون)
    أشكرك جدا لتعليقك

    *********************************

    تامر نبيل
    ــــــــــ
    أهلا بيك استاذ تامر
    اشكرك جدا لرايك ولتعليقك
    دمت طيبا ولمدونتى زائرا

    **********************************

    اقصوصة
    ــــــــ
    أختى الحبيبة:اهلا اهلا بالقمر
    اشكرك جدا لمشاركتك
    نورتينى حبيبتى وأسعدنى تواجدك

    ********************************

    رفقة عمر
    ــــــــــ
    أختى الحبيبة:اهلا اهلا بالقمر
    مع احترامى لرأيك
    فيه غلط مابيتنسيش وفيه جرح ممكن يسيب جواكِ عاهة مستديمة ازاى بقى ممكن تسامحى وترجعى المياه لمجاريها وكما قالت اختنا هبة فاروق"كيف أعاودك وهذا أثر فأسك"
    فلا يلدغ المؤمن من جحر مرتين
    نورتينى حبيبتى الغالية واسعدنى تواجدك

    *********************************

    محاسن صابر
    ــــــــــ
    أختى الحبيبة:اهلا اهلا بالقمر
    ربنا يسعدك ياحبيبتى ويهيألك كل الخير
    بتسعدينى بجد بتواجدك وبتوحشينى جدا على فكرة:)

    ******************************

    زى الهوا
    ــــــــ
    أختى الحبيبة:اهلا اهلا بالقمر
    أصل أنا تلميذة شاطرة:)
    نورتينى حبيبتى واسعدنى تواجدك

  52. رفقة عمر Said:

    هاذكرك بقول الله تعالى
    وان تعفوا اقرب للتقوى ولا تنسوا الفضل بينكم ان الله بما تعملون بصيرا

    وقوله تعالى وعسى ان تكرهوا شيئا ويجعل الله فيه خيرا كثيرا

    من حقك تظهرى غضبك ومن حقه يعتذر ويرد لك حقوقك ويعطكى كل الضمانات
    انه سيعوضك عن كل الامك واحزانك
    لا اعترض على موقفك
    ولكن من منا لا يغلط او يخطأ
    ربنا يقدر لك الخير اينما كان
    بس كلامك فى البوست به قسوة لم اعهدها منك
    وكان صادم بالنسبه لى

  53. rovy Said:

    ازيك يا مونى ..
    حاسة بيكى جدااا
    انتى طبعا عندك حق و المؤمن لا يلدغ من جحر مرتين .. ربنا يخلف لكى خيرا منه و يرزقك بمن يستطيع اسعادك و يقدر قيمتك حقا ..
    و سبحان المنتقم الجبار الذى بواسع رحمته و عدله شاء ان يأخذ حقك و يريكى ما كنتى تتمنيه بمن ظلمك ..
    لله كل الحمد و الشكر سبحانه ..
    ربنا يطمنى عليكى دوما

    مودتى لكى دائما

  54. موناليزا Said:

    رفقة عمر
    ـــــــــ
    اختى الحبيبة اهلا بعودتك
    مش عارفة أقول ايه غير انى ماوضحتش حاجات كتير واكتفيت بتوضيح مشاعرى الخاصة فقط بس يكفى أقولك
    أن لا حقوقى رجعت ولا فيه ضمانات حتى الاعتذار وكأنه فض مجالس
    اطمنى ياحبيبتى فانا حينما قلت اننى اشبهك فى موضوعك "لماذ رفقة عمر" لم أكن أكذب أو أتجمل ولكن حينما يصل الأمر الى أن البُعد هو أسلم قرار فلنبتعد غير نادمين
    لو خيروكِ مابين دينك ودنيتك هتختارى مين؟
    إجابتك هى اجابتى:)
    نورتينى حبيبتى

    **********************************

    روفى
    ــــــ
    أختى الحبيبة:اهلا اهلا بالغالية
    انا الحمدلله بخير ماتحرمش منك ابدا
    فينك من زمان
    بتقلقينى عليكِ على فكرة
    يارب تكونى بخير دايما

    الحمدلله ياحبيبتى على كل شئ بس انا لسه حقى ماجاش والظلم مازال مستمر
    وزى ماتقولى كده انه كان موقف وعدى وكأن الله أراد أن يختبر مشاعرى تجاه هذا الشخص والحمدلله فقد خرج من داخلى بنجاح:)
    وهذه نعمة كبيرة أحمدالله عليها
    عقبال يارب ماشوف نصر ربنا ليا قريب
    دعواتك ماتنسيش:)
    نورتينى حبيبتى واسعدنى تواجدك


{ RSS feed for comments on this post} · { TrackBack URI }

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: