عاجبك حالنا

أنا بحبك أوى وبعشق هواكِ وترابِِك . واسمِك ده بقى فخر ليا بجد. مهما قالوا ومهما حصل أنتِ بجد بالنسبة لى مالكيش بديل .وصعبان عليا إنى مش عارفة أدافع عنِك. خلصت كل المبررات اللى ممكن تقنع أى حد.
صعبان عليا جداً إن كل تفكير الغالبية إزاى يرحلوا عنِك بأى طريقة حتى لو كانت هذه الطريقة فيها نهاية حياتهم. أنا عارفة إنك أكيد بتحبيهم بس ليه مش بتحسِسيهم بكده. ليه يرموا نفسهم فى حضن أم تانية. وأنتِ أولى بيهم وبمجهودهم وبتفكيرهم. ولادك جواهم طاقة كبيرة جداً وعقل يحسدهم عليه الجميع ليه تستغنى عنهم وتحسِسيهم إنك مش عايزاهم.
ليه دايماً متأخرين عن أى مكان تانى حتى فى الساعة!! شوية نقدمها وشوية نأخرها.
ليه وضعنا مايبقاش ثابت دايماً فى كل شئ مهما كان بسيط.
طيب يرضيكِ الأقوياء وأصحاب النفوذ يقهروا الضعيف اللى مالوش ضهر.
يرضيكِ أى ضيف يجيلنا يبقى له كرامة عننا. وأحنا لما نروح عند حد برضه مايبقاش لينا كرامة.
يرضيكِ إن الشوراع ما تبقاش نظيفة وصالحة للأستخدام الآدمى إلا لو حد من الكبار هيمشى عليها.
تعرفى أنتِ لو شفتى الشوارع بس أكيد هنصعب عليكِ. الأنوار مطفئة رغم وجود الأعمدة والمطبات والتكسير ده العادى كأنها تقصد كسر رقبة قبل أقدام من يمشى عليها حتى أغطية البلاعات مش موجودة.
بصى شوفى الصور دى أكيد هتعبرلِك أكتر.
أنا قضيت فترة فى بلد عربى وشوفت فيها قد إيه المرأة المنتقبة بالنسبة لهم من المحارم التى لا يجوز إنتهاكها. وسمعت واحد قعد هناك مايقارب العشرين سنة بيقول أنه من أول ماجه البلد دى وثمن رغيف العيش موحد ولم يتغير لا ثمناً ولا حجماً بل المرتبات هى اللى بتزيد.
بصراحة وقتها اتضايقت واتغاظت أوى وقلت بينى وبين نفسى ليه إحنا مش كده!!؟؟

ليه النوابغ اللى عندنا يسافروا بره ؟.
ليه مانوفرش ليهم الإمكانيات عشان نتقدم بيهم .
مش هم أولى من لعيبة الكرة اللى بيتصرف عليهم بالملايين.



**************
ليه ما نبقاش كده؟؟؟.

***
مجرد إقتراح:
ــــــــــــــــــــــــــ
إيه رأيكم لو كل واحد يكتب رسالة عتاب ويوجهها لأمنا كلنا. مع مراعاة أن هذه الرسالة من باب عتاب الأحباب.
************************
عزاء واجب
ـــــــــــــــــــــ
نتقدم بخالص التعزية للأستاذ مصعب صلاح صاحب مدونة
وحي القلم لوفاة والده سائلين المولى أن يتغمد الفيد الرحمة ويرزق أهله الصبر والسلوان.

52 Comments »

  1. د. ياسر عمر عبد الفتاح Said:

    مش رسالة عتاب لأمنا
    هيه الست ملهاش ذنب
    رسالة عتاب لينا إحنا
    ولكل من أعطاه الله سلطة

    اتقو الله

  2. Israa El-sakka Said:

    بصراحة عبرتي عن مدى إحباطي و زعلي من البلد و من اللي بيحصل فيها بجد مبقتش حاجة تسر عدو ولا حبيب و البلد مش حتتغير لما إحنا نتغير الاول بالنسبة لموضوع رسالة العتب فدي فكرة صعبة ممكن تكون صحية بس صعبة تحياتي و أتمنى دوام التواصل

  3. أبو كريم Said:

    يا أمة الله ثبتك الله والسلام عليكم ثانيا

    أمى العزيزه:
    بعد السلام والتحيه,أود أن أقول لك أنى مازلت أحبك رغم قسوتك على وعلى أخوتى, هل تعرفين لماذا؟ لأنى عندما نظرت لم أجد سواكى وحين مشيت لم أجد سوى أرضك وحين عطشت لم أجد سوى نيلك ولكن!!! يا أمى العزيزه لم أتوقع أن تتخلى عنى بهذه السرعه.ما أن كبرت قليلا ما عادت عيناك ترانى ولا أرضك تتحملنى على ترابها كأنى ثقيل الظل وها هو نيل قد ضن على بنقطه الماء النقيه.. والله أعلم أنك مازلت تحبيننى أنا وجميع أولادك واعلم أن هذا الطبيب الذى أتو به ليعالجك قد أعطاك منوما لتنامى فى ثبات عميق لى يختلى بالبيت وبمن فيه لكنى مقتنع انك ستفيقين يوما ونحن وانت سننضف بيتنا ونيلنا ونحرث أرضنا وندعوا أخوتى جميعا ليحضروا للعشاء.

    فمتى تجمعنا طاوله عشاء واحده ولو كانت طاوله العشاء الأخير

    أبو كريم

    يارب خد الدكتور وأبنه والتمرجيه الى طابقين على أنفاس أمنا قولو أمين

  4. ماء تشرين Said:

    طيب بس بداياة كده انا متبريه منها ولاامى ولا اعرفها بس الواحد قال رمضان وكده فيصلحها
    بص ياست انتى على فكره عيب اوى كده ده احنا غلابه وولادك ياعنى اتقى ربنا ياظلمه في حد يعمل في ولاده كده
    مش عارفه اكتب يامنواليزا بجد اصل الكلام بقه قليل اوى قدام البيحصل والله بجد احنا محتجين نغير المصرين بجد مش عارفه ايه الحل الوضع بقه صعب اوى

    تقبلى مرورى وكل سنه وانت طيبه يارب

  5. Tamer Atya Said:

    السلام عليكم ورحمة الله وبركاتة
    وحشتيننننننننننننننننننننننننننننى
    جدااااااااااااااااااااااااااا
    يا موناليزتى
    عتاب جميل وكلام اجمل
    وللاسف كلة صحيح
    وبجد انا مش لاقية كلام اقولة غير
    ان ربنا يهديها
    ويحنن قلبها علينا
    دمت بالف خير
    من اختك
    توتا المسلمة
    حتى تشرق الشمس

  6. Butterfly Said:

    الهم ده كلنا شايلينه وكلنا بنسأل نفس الأسئله وببنتمنى نفس الشئ ..
    بس فى نفس الوقت مش فى ايدينا نعمل كتير ..
    ربنا هيحاسب الناس المسؤوله دى على مسؤليتهم اللى ضيعوها وكميه الناس اللى كانت فى رقبتهم وخانوا المسؤوليه دى !!!

  7. ماما أمولة Said:

    نعم الرسالة لكل من اعطاه الله السلطة وولاية الأمر

    اتقوا يوما تقفون فيه أمام الله

    تقديري لك حبيبتي

    بوست اكثر من رائع

    جزاك الله كل الخير

  8. أبو كريم Said:

    أعاتبك بس ليه

    وأعاتب فيكى إيه
    ولو حبيت أعاتب
    أعاتبك إنتى ليه
    طول عمرك كنتى قاهره
    ومن القذاره طاهره
    وإسطى جنب بيه
    أعاتبك بس ليه
    كنتى التاريخ بدايته
    وللعالم نور هدايته
    ونيلك سر فيه
    أعاتبك بس ليه

    راجعيلك يا بهيه
    بس انتى تصفى ليه
    أشرب من نيل هواكى
    وأحنى كفوف إيديه
    وأزرع فالأرض ورده
    تسقيها دموع عنيه
    تكبر بالحب شجره
    بفروع كتير عفيه
    يشوفوها الناس يقولوا
    أدى مصر الحلوه أهيه
    راجهت بتوبها لأخضر
    والشال والجلابيه
    تقول لولادها قوموا
    الشمس بنورها جايه
    أدى الطريق قصادكوا
    فرشاه برموش عنيه
    وأنسوا الضلام ويأسه
    الفرحه جايه جايه

    ابو كريم إهداء لمصر ( الخميس 13 أغسطس )

  9. مصعب صلاح Said:

    السلام عليكم
    دا معناه اننا نعاتب نفسنا
    احنا اللي تخلينا عن مصجر قوتنا
    فكان لازم نظل ف التيه

  10. Dr Ibrahim Said:

    انا صعبان على حالنا

    اللهم لاتؤاخذنا بما فعل السفهاء منا

    لم يعد حساب النفس موجود اصبح كل انسان همه نفسه ولا يهمه مصلحة الجميع قبل نفسه..

    اللهم ارحمنا

  11. موناليزا Said:

    د. ياسر عبدالفتاح
    ــــــــــــــــــــ
    اهلا بيك يادكتور
    ياسلام لو الكل يتقى الله لكانت الدنيا اختلفت تماماً
    اشكرك جداً لمشاركتك
    دمت لمدونتى زائرا

    ********************************

    اسراء السقا
    ـــــــــــــــ
    اختى الحبيبة:اهلا بيكِ
    مش عارفة أقولك ايه بس اكيد الوضع هيتحسن فى يوم من الايام
    نورتى مدونتى وارجو دوام التواصل

    **********************************

    ابو كريم
    ــــــــــ
    وعليكم السلام ورحمة الله وبركاته
    اهلا بيك استاذ بهاء
    ربنا يكرمك ويتقبل دعائك اللهم امين
    جميلة هى رسالتك
    دمت لمدونتى زائرا

    **********************************

    ماءتشرين
    ــــــــــــ
    اختى الحبيبة: من غير زعل
    ماتقوليش عليها كده
    بجد اى كلام وحش فى حقها بيوجعنى
    انا عارفة اللى أنتِ حساه بس برضه مهما كان دى برضه أمنا وعيب حد يكلم مامته كده:)

    وأنتِ طيبة ياحبيبتى وبالصحة والسلامة
    نورتينى ياجميلة ويسعدنى مرورك دائماً

    *********************************

    تامر عطية
    ــــــــــــ
    وعليكم السلام ورحمة الله وبركاته
    تعرفى انى كنت همسح التعليق ده وقلت ازاى واحد يبعت يقولى وحشتينى
    لولا ماانتِ كتبتى اسمك فى الاخر:)

    وانتِ كمان ياحبيبتى وحشتييينى جدا وايه حكاية الاكونت ده؟

    أنتِ اللى تعليقك بجد جميل ورقيق زيك
    بحبك جدا ويارب تكونى بخير
    نورتينى حبيبتى واسعدتينى بتواجدك

    ***********************************

    بيترفلاى
    ــــــــ
    اختى الحبيبة:اهلا اهلا بالقمر
    تعرفى نفسى اوى نكون من الدول المتقدمة
    نورتينى حبيبتى واسعدتينى بتواجدك

    *********************************

    ماما امولة
    ــــــــــــ
    اختى الحبيبة:اهلا اهلا بالقمر
    ربنا يكرمك واشكرك جداً لمشاركتك
    نورتينى حبيبتى واسعدتينى بتواجدك

    ****************************

    ابو كريم
    ـــــــــ
    اهلا بيك مجدداً استاذ بهاء
    تصفيييق حاااااااااد
    جميلة بجد
    وإهداء رقيق جدا
    تعرف حضرتك أنا الشعر لايستهوينى قراءته ولكن كلماتك أجبرتنى على قراءتها ومش بس كده وكمان الاستمتاع بها
    بجد تسلم ايدك وبورك قلمك
    أسعدتنى حقاً بعودتك وبإهدائك

    *********************************

    مصعب صلاح
    ــــــــــ
    وعليكم السلام ورحمة الله وبركاته
    اهلا بيك استاذ مصعب
    فعلا ما هى إحنا
    دمت لمدونتى زائرا

    *********************************

    د/ ابراهيم
    ـــــــــــــــ
    اهلا بيك يا دكتور
    صدقت اخى الكريم فلو كل واحد اتقن ما يفعله واراد ان النهضة لبلاده فسيفعل
    اشكرك جدا لمشاركتك
    دمت لمدونتى زائرا

  12. مهندسة لعزة الامه Said:

    الموضوع جميل بس قلب علينا المواجع
    يمكن اكبر رسالة عتاب نرسلها لنفسنا قبل امنا كلنا هى ان احنا اللى اخترنا واحنا دلوقتى اللى سكتين على اللى بيحصل لا اللى اكتر من كده ان احنا دول اللى بنتكلم عنهم يعنى كل واحد فى الشعب لو راعى ربنا فى شغله وتربية اولاده اللى جين وحينضموا للشعب ده بالتاكيد حالنا حيبقى احسن

    (يارب اصلح حال بلدنا وباعد عنها الامراض والسوء وكل شر)
    (اعضاء مدونة الحور فى ميكانيكا النور)

  13. أم مالك Said:

    موناليزا الحبيبة
    والله البوست بكانى عارفة بكانى ليه ياموناليزا
    لان اللى قلتيه عن امنا انا بدفع تمنه
    بسببه اعزاء احبابى برة
    اخواتى هربوا من التعامل هنا
    عارفة ياموناليزا انا اخويا ليه
    عشرين سنة بره وطبعا شكله حيكمل
    والتانى ليه 15 سنة وبيقولوا نفس
    اللى ذكرتيه الاسعار هناك ثابتة وفيها بركة وغير ده اخويا يقولى
    عارفة يعنىايه الولاد ولا انا فى كل هذه
    عمرنا ماسمعنا شتيمة ولاسب دين
    زى مابيحصل فى مواصلاتنا وشوارعنا
    وبعد اخواتى اصبح اولادى
    وكل ده مش بسبب جفاء امنا
    لا بسبب القائمين على امورها
    على راى ياسر هى ملهاش ذنب
    الله يجازى اللى كان السبب
    كل عام وانتى الى الله اقرب ياموناليزا
    تحياتى

  14. GiGi world Said:

    حاجه واحده
    بحبك يامصر بعشق التراب اللى فيكى مابالك بكل حاجه فيكى

  15. Sweet Violet Said:

    العتاب مش هيكون ليها هى
    العتاب لشعبها اللى راضى بالذل و الهوان
    v_v

  16. Hossam Said:

    صديقتى الجميلة موناليزا
    كالعادة تبهرينى بمواضيعك وكل الكراكيتيرات رائعة وواقعية واكثر حاجة شدتنى كاريكاتير التعليم لانى دايما بدعى لتطوير التعليم الانتقاض اللى انتى مقدماة تفتكرى هيحصل بعد اد ايه امتى هنروح الصيدلية ونلاقى الصيدلى يقول اجبلك كرسى على مجبلك الدوا والاتوبيس يقول اتفضل فى الكرسى اللى يعجبك وهكذا
    هكتب بوست قريب كعتاب
    *************************************
    صديقتى اقصدك فى خدمة لانى احتاجها جدا جدا جدا وهى اللى يجى عندى ويعمل كوبى يتطلعلوا مسج تقولو انه مينفعش انك تاخد حاجة مش بعتك زى منتى عاملة كده اعملها ازاى
    ارجوكى ساعدينى
    تحياتى

  17. العصفورة Said:

    السلام عليكم
    موضوع رائع ومتميز حقاً
    وصور معبرة جداً
    ورأى صريح جداً
    خالص تقديرى

  18. موناليزا Said:

    مهندسة لعزة الامة
    ــــــــــــــــــ
    اختى الحبيبة:اهلا اهلا بالقمر
    كلامك حقيقى
    وعاجبنى دعائك جدا ربنا يتقبل
    نورتينى حبيبتى ودمتِ بخير

    ********************************

    أم مالك
    ــــــــــ
    اختى الحبيبة:اهلا اهلا بالقمر
    انا اسفة جدا ياحبيبتى والله ما اقصد ابداً انه يبكيكِ بس انا نفسى كنت موجوعة وانا بكتبه حتى فيه حاجات كتير معرفتش اتكلم عنها
    بس هنقول ايه ما هى برضه مصر
    وبنحبها رغم كل شئ ونفسنا اكيد انها تبقى احسن البلاد اللى فى العالم كله

    ربنا يرجعلك احبائك بالسلامة وتسعدى بيهم ويطمنك عليهم

    وكل سنة وانتِ بصحة وسعادة
    نورتينى حبيبتى واسعدتينى بتواجدك

    ********************************

    جيجى وورلد
    ــــــــــــ
    اختى الحبيبة:اهلا اهلا بالقمر
    🙂 فرحانة برسالتك ليها جداً
    أحبك فى الله
    نورتينى حبيبتى واسعدتينى بتواجدك

    ********************************

    سويت فيوليت
    ـــــــــــــــ
    اختى الحبيبة:اهلا اهلا بالقمر
    عندك حق
    نورتينى حبيبتى واسعدتينى بتواجدك

    *********************************

    حسام
    ــــــــ
    اهلا بيك استاذ حسام
    ربنا يكرمك واشكرك جدا لرايك وفى انتظار موضوعك قريباً
    ===
    واضح يافندم انك مش بتابع ردى على تعليقاتك عندى:)
    عموما هاجى أعرفك الطريقة(اى خدمة)
    دمت لمدونتى زائرا

    ********************************

    العصفورة
    ــــــــــ
    وعليكم السلام ورحمة الله وبركاته
    اختى الحبيبة:اهلا اهلا بالقمر
    ربنا يكرمك واشكرك جداً لرايك
    نورتينى حبيبتى واسعدتينى بتواجدك

  19. كيــــــــــــارا Said:

    المشكله مش في البلد المشكله ف اصحاب القرار

    الزباله احنا اللي بنرميها مش غيرنا

    الزحمه لو عدد الاتوبيسات والمواصلات زادت مش هيكون في زحمه

    حاجات كتير لو العقل والحكمه دخلو فيها هتتغير المهم نكون ايد واحده

  20. المعتصم Said:

    بسم الله الرحمن الرحيم
    السلام عليكم ورحمة الله وبركاته
    اختى الكريمه
    موناليزا
    تحياتى
    مستغرب جدا من العنوان !!!!!!!
    هو انتِ بتكلمى مين ؟؟؟؟؟
    وهى مصر مالها ومال حالنا؟؟؟
    حالنا ده ماحدش يتسئل عليه غيرنا
    لاننا وببساطه احنا اللى سمحنا لقلة انها تعمل فينا كل ده
    مش مصر اللى نسألها عن حالنا
    المفروض ان مصر هى اللى تسألنا عاجبكم حالى ؟؟؟؟ وحالكم؟؟؟؟؟؟
    لو تفتكرى انا كنت كتبت بوست عن حب مصر فى شهر مارس اللى فات واتكلمنا كتير وكانت خلاصة الكلام ان مصر اللى هى مصر مالهاش اى ذنب من قريب او من بعيد باللى احنا وصلنا له ده من تدنى فى كل شيئ
    وانه احنا السبب فى كل الكوارث الحاصلة فيها
    احنا السبب بتسيبنا واستهتارنا وعدم اهتمامنا وعدم مراعاة ضمايرنا
    ….
    مش هينفع اكتب رسالة عتاب لمصر
    لان الرساله المفروض تكون من مصر لينا مش العكس
    تقبلى مرورى وتحياتى
    والسلام عليكم ورحمة الله وبركاته

  21. EMMY BABY Said:

    جميل البوست اوى والكاريكتر معبر

    بس مش هقدر الومك يا مصر ياامى لكن هلوم اللى مسكوكى وضيعوا خيرك على غير ولادك

    وهلوم ولادك اللى سكتوا ورضيوا

    وهلوم كل واحد معملشى اللى يمليه عليه ضميره

    لكن عمرى ماهلومك يا امى لانى بحبببببببك اوى يا مصر

    تحياتى

    ايمى

  22. مسرور Said:

    امنا مالهاش ذنب
    بلدنا تملك من الخير ما يكفينا ويفيض
    بلدنا مالهاش ذنب

    —-

    لما يكون اتوبيس مليان ركاب
    كل يوم يعمل حادثة

    مين يكون السبب

    الركاب ولا الكمسري ولا السواق

    طبعا العييب في السواق وكارثة لو كان
    بدون رخصة
    —-

    بلدنا كده بالضبط

    محتاجة سائق معه رخصة

    محتاجة سائق بيشوف

    ولن ينصلح الحال ابداً لو كان السواق ضعيف البصر

    تحياتي لك

  23. موناليزا Said:

    كيارا
    ـــــ
    اختى الحبيبة:اهلا اهلا بالقمر
    الله ينور عليكِ لو بنحبها بجد هيبان عليها
    نورتينى واسعدتينى بتواجدك

    **********************************

    المعتصم
    ـــــــــ
    وعليكم السلام ورحمة الله وبركاته
    اهلا بيك يافندم
    ماهو احنا منها وهى مننا
    وكان لازم اتكلم مع حد وماينفعش اكلم نفسى لانى بريئة من كل ما يحدث فمالقيتش قدامى غيرها
    تستحملنى بقى مش انا بنتها:)
    اشكرك جدا لمشاركتك
    دمت لمدونتى زائرا

    **********************************

    ايمى بيبى
    ــــــــــ
    اختى الحبيبة:اهلا اهلا بالقمر
    اشكرك جدا لرايك
    عجبتنى رسالتك جداً
    نورتينى ايمى الجميلة واسعدتينى بتواجدك

    *********************************

    مسرور
    ــــــــ
    اهلا بيك استاذ مسرور
    اشكرك جدا لمشاركتك
    دمت لمدونتى زائرا

  24. ستيته حسب الله الحمش Said:

    ها اقول لها ايه

    مصر
    بعد التحية
    عمري ضاع في الدفاع المستميت عنك
    ان ذكرك غريب اكلت كبده
    وان ذكرك قريب لمته لوم المحب وذكرته باسمك الذي ذكر في القرآن

    مصر
    اعلم علم اليقين انه في يوم قريب سينادينا ترابك أن ادفعوا عني كيد الأعداء وسنلبي النداء
    "ومش ها نقول ايه ادتنا مصر"

    مصر
    اوقن اننا نحبك بمازوخية عجيبة "كما يقول عمرو صاحب الحبشتكانات الفلسفية" ولكن ألم الجسد وذل النفس وانكسارها جريا وراء لقمة العيش في بلاد الغربة كادوا يطغوا على العقول وينسونا حبك

  25. تأثير الفراشة Said:

    انت قولت و وفيت بكل ما يجول بانفسنا

    على فكرة معظم الناس دلوقتى عندها نفس الاحساس ، و ده فى حد ذاته حاجة إيجابية إننا – على الأقل – حاسين ببعض

    بس عجبتنى قوى الكاريكاتيرات اللى انت جايباها🙂

    ربنا يصلح حالنا يارب ، فرصة للدعاء فى رمضان
    اللهم بلغنا رمضان

    تحياتى لك

  26. سماء Said:

    موضع جميل جدا

    لوكل واحد ادى واجبة بضمير ويبقا فى تكافؤء للفرص هنبقا فى حال كويس

    دمتى بكل خير

  27. أحمـــــــــــــد أبو العلا Said:

    انا فاهم قصدك
    وعارف انك تقصدي رساله عتاب للبيعملوا كده في بلدنا
    لان بلدنا جميله ومظلومه زينا اكتر من أي بلد تانيه

    بس الناس اللي بتعمل كده ملهاش رساله عتاب, ديه لازم رساله تكون فيها ما لذ وطاب وعشان كده هما بتجاهلوها

    سياستنا اننا نعتبر المواطن ارخص حاجه في الدنيا وملولش غير انه يدفع ويدي ومش من حقه ياخد غير اللي ميعجبوش

  28. salwa Said:

    السلام عليكم اخت موناليزا
    نعم رسالة عتاب للقيام بالواجبات
    و رسالة عتاب ليكن كل مواطن خفير
    مودتي و تقديري رائعة كعادتك
    سلاااااااام

  29. ليس فقيرا من يحب Said:

    السلام عليكم

    صدقينى يا حبيبتى العيب مش فى ام الدنيا

    العيب فينا احنا كناس عايشين فيها

    كمسئولين ماسكينها

    مصر ما قلتش للظابط يعذب متهم

    وينتهك حقوقه

    ومقلتش لدكتور ينتهك شرف مهنته

    ويصور مريضاته

    مصر مقلتش للمدرس روح ارمى بسمو

    وامانه مهنتك عرض الحائط وصور

    التلميذات فى اوضاع مخله

    مصر مقالتش لحد اعمل حاجه

    احنا اللى بنعمل كل حاجه

    واحنا اللى ممكن نلتزم وعلى الاقل

    نعامل بعض باحترام ونحسن اوضاعنا

    ولكل المسئولين من رئيس الجمهوريه

    لابسط انسان

    اتقوا الله فى نفسكم قبل ما تتقوا الله

    فى اللى قدامك

    ايه الرغى اللى انا فيه ده

    كل سنه وانتى طيبه يا حبيبتى

    ربنا يكرمك ويسعد قلبك يارب

    فى حفظ الله

  30. سمسم Said:

    السلام عليكم
    كل سنة وانت طيبة يا حبيبتي
    والله كلامك يوجع القلب
    واهو حال كل المسلمين
    ضعف ووهن وتراجع
    والحق علينا احنا
    احنا الي الخوف مالي قلوبنا
    ومش قادرين نغير من نفسنا
    علشان ربنا يغيرنا
    لازم كل واحد يبدا بنفسو
    تحياتي

  31. فرفشة الوان Said:

    بجد حلوة رسالة العتاب لي ماما

  32. mohamed ghalia Said:

    العتاب لنفسنا بجد
    احنا الى مقصرين

  33. مامة مازن Said:

    ازيك يا موناليزا الجميلة
    خلصت كل اللى ورايا وقلت لازم اقرا البوست النهاردة باذن الله
    وقريته ووجعنى قوى
    لاتقل يارب عندى هم كبير بل قل يا هم عندى رب كبير

    ده اللى بقوله لنفسى دايما وده مقترن عندى بدوام الحمد والشكر لله وايضا بدوام حسبى الله ونعم الوكيل
    هى المشكلة مش فى امنا لا خالص
    كلكم راع وكل راع مسئول عن رعيته المشكلة فى الراعى مش فى الرعية
    يعنى اناأم عن اولادى اعلمهم الادب علشان نبقى شعب مؤدب
    انا طالب مسئول عن مذاكرتى وانى ابحث فى اللى بذاكره علشان افهم بمفهوم اوسع
    انا موظف مسئول انى اخلص شغل الناس معطلش المصالح
    انا طبيب اخلى انسانيتى وعلمى تسبق جيبى
    انا رجل امن احافظ على امن الناس مش اروعهم
    انا رجل اقتصاد افكر فى اللى يوفر لبلدى مش يهدر المال العام
    انا رجل سياسة افكر فى مصلحة بلدى اولا مش فى مصلحتى او فى علاقتى باى بلد تانى مش اصدر غاز باقل من ربع تمنه العالمى
    انا رجل دين مقولش اى فتوى تعمل بلبلة
    انا مدرس لازم اشرح بذمة مستناش الدرس الخصوصى
    انا مهندس اتقى الله وانا بعمل مقيساتى علشان البيت ميوقعش على دماغ اللى فيه
    انا كناس الشارع هكنس من الفجر بس بالله عليكم مترموش زبالتكم فى اى حته

    انا مش هلومك يا امى لانى ام واعرف معنى الامومة وانك تبقى عايزة تفدى ولادك بنفسك اعرف يعنى ايه اضلل على ولادى اخاف من شوية الهوا دول ليتعبوهم وشوية الحر دول يضايقوهم
    مقدرش اعاتبك يا امى
    انا اعاتب الراعى ولقوله بص شوية ع الرعية وفكر وقولنا رايك ايه

    خالص احترامى ليكى اختى

  34. همس الاحباب Said:

    رسالة عتاب لمين
    دايما الام مظلومة
    وبلدنا مظلومة واحنا اللى ظالمينها مع الاسف
    رسالتك رائعة جدا والهدف منها نبيل
    بس يا ريت احنا نهتم بيها اكتر
    والمسئولين يتقوا الله فيها
    وباذن الله هتكون اعظم بلد فى الدنيا
    ومهما تعمل فينا بنفضل نحبها ونعشق ترابها ما هى امنا وبلدنا
    وحب الوطن من الايمان
    تحياتى وتقديرى لحضرتك

  35. الباحث عن الصفر Said:

    كان فى برنامج على قناة الأو تى فى بيقول وعشان بنحبها وعايزينها افضل من كده لازم نقولها ونعتب عليهاوعشان كده بنيجى ساعات ونبقى زعلانين منها لان نفسنا تكون احسن من كل الدنيا عشام هى اصلا امهم
    شكرا على البوست الجميل ده وياريت تقرأى البوستين دول عن ام الدنيا برده
    http://moon-bokra.blogspot.com/2009/02/blog-post_18.html
    http://moon-bokra.blogspot.com/2009/08/blog-post_08.html

  36. Mr.Hazem Said:

    كاريكاتير معبر ,
    يسلموا دياتك يارب , بتمنالك التوفيق والى الأمام .
    ارق نسمة

  37. موناليزا Said:

    ستيتة حسب الله الحمش
    ـــــــــــــــــــــــ
    اختى الحبيبة:اهلا اهلا بنبض الحكمة
    الله عليكِ
    دائماً أنتظر تعليقاتك الجميلة لأنها بلغة شبابية دارجة"بتجيب من الآخر":)
    نورتينى حبيبتى واسعدتينى بتواجدك

    *********************************

    تأثير الفراشة
    ـــــــــــــــ
    أختى الحبيبة:اهلا اهلا بالقمر
    الله يكرمك:)
    فعلاً جميل اننا نحس ببعض ويبقى عندنا نفس الكلام اللى عايزين نقوله
    اشكرك لرايك فى الكاريكاتيرات والشكر لمصمميها

    ماقدمناش غير الدعاء:) ربنا يتقبل
    نورتينى ياجميلة واسعدتينى بتواجدك

    *********************************

    سماء
    ــــــــ
    أختى الحبيبة:اهلا بيكِ فى زيارتك الاولى
    ربنا يكرمك واشكرك جدا لرايك ولتعليقك
    نورتى مدونتى وارجو دوام التواصل

    ********************************

    أحمد ابو العلا
    ـــــــــــــــ
    اهلا بيك استاذ احمد
    لأ خالص.. عليك واحد:)
    انا فعلاً بكلم مصر لانها بلدى وانا متعشمة فيها انها تسمعنى
    لكن اى حد تانى اكيد شايف اللى احنا فيه ومش محتاج حد يكلمه

    ومع ذلك احترم تعليقك جدا واشكرك عليه
    دمت لمدونتى زائرا

    *******************************

    سلوى
    ــــــــ
    وعليكم السلام ورحمة الله وبركاته
    اختى الحبيبة:اهلا اهلا بالقمر
    ربنا يكرمك واشكرك جدا لتعليقك
    بس انا مفهمتش يعنى ايه مواطن خفير؟؟
    نورتينى سلوى الجميلة واسعدنى تواجدك

    *********************************

    ليس فقيرا من يحب
    ــــــــــــــــ
    وعليكم السلام ورحمة الله وبركاته
    أختى الحبيبة:اهلا اهلا بالقمر
    عندك حق بلدنا ماعليهاش لوم احنا السبب
    رغى ايه بس!! اتكلمى زى مايعجبك انا مبسوطة بتعليقك
    وأنتِ طيبة ياحبيبتى وبالصحة والسلامة
    نورتينى يا جميلة واسعدتينى بتواجدك

    *********************************

    سمسم
    ـــــــ
    وعليكم السلام ورحمة الله وبركاته
    اختى الحبيبة:اهلا اهلا بالقمر
    وانتِ طيبة ياجميلة وبالصحة والسلامة
    عندك حق "فان الله لا يغير ما بقوم حتى يغيروا ما بأنفسهم"
    نورتينى سمسمة الجميلة واسعدتينى بتواجدك

    *********************************

    فرفشة الوان
    ــــــــــــــــ
    اختى الحبيبة:اهلا اهلا بالقمر
    اشكرك جدا لرايك
    نورتينى حبيبنى واسعدتينى بتواجدك

    *********************************

    محمد غالية
    ــــــــــــ
    اهلا بيك استاذ محمد
    عندك حق
    اشكرك جدا لتواجدك
    دمت لمدونتى زائرا

    *********************************

    مامة مازن
    ـــــــــــ
    اختى الحبيبة:اهلا اهلا بالقمر
    انا الحمدلله بخير ازيك انتِ ياجميلة
    انا اسفة بجد على وجعك وانا كمان والله بتوجع طول الوقت لما اشوف اى حاجة تجعل شكلنا وحش قدام اى حد
    وده الطبيعى ياحبيبتى ماهو احنا منها وهى حتة مننا

    ايه يابنتى الرسايل الجامدة دى:)
    ياريت بجد الكل يقرا تعليقك ده ويطبقوا اللى فيه

    نورتينى حبيبتى واسعدتينى بتواجدك

    *********************************

    همس الاحباب
    ــــــــــــ
    اهلا بيك استاذ خالد
    اشكرك جدا لرايك ولتعليقك
    عنك حق
    وفعلا مهما يحصل برضه بنحبها
    دمت لمدونتى زائرا

    **********************************

    الباحث عن الصفر
    ـــــــــــــــــــ
    اهلا بيك يافندم فى زيارتك الاولى
    فعلا كلامنا ليها من حبنا رغم انى ماشوفتش البرنامج اللى حضرتك بتقول عليه بس واضح ان مشاعرنا كلنا واحدة:)
    اشكرك لذكر الروابط وسأزورهم قريباً بإذن الله
    نورت مدونتى وارجو دوام التواصل

    **********************************

    مستر/ حازم
    ـــــــــــ
    اهلا بيك استاذ حازم
    ربنا يكرمك
    بالنسبة للكاريكاتيرات الشكر لمصمميها
    اشكرك جدا لتواجدك
    دمت لمدونتى زائرا

  38. kmt Said:

    السلام عليكم ورحمة الله وبركاته

    كل يوم وانتي بصحة ورضا وحب وايمان

    ربنا يكرمك ويرضى عنك

    تحياتي
    الى اللقاء

  39. حاول تفتكرنى Said:

    امنا ملهاش ذنب
    بالعكس ابسولوتلي سأكتب لها رسالة اعتذار من كلمة واحدة

    استحملي

    تحياتي

  40. عاشقة الأحزان Said:

    السلامه عليكم

    كل سنه وانتى طيبه
    وبجد روعه كعاداتك تسلم ايديكى

    والكاركتير تحفه

    ههههههههههههههههه

    مودتى

  41. احمد بدر الدين Said:

    توفى اليوم والد اخى وحبيبى المدون الرقيق الاخ مصعب صلاح تغمدة الله برحمتة واسكنة فسيح جناتة
    ادعو له بالرحمة والمغفرة
    هذا عنوان مدونة الاخ مصعب
    http://wa7y.blogspot.com/

  42. موناليزا Said:

    كمت
    ـــــــ
    وعليكم السلام ورحمة الله وبركاته
    اختى الحبيبة:اهلا اهلا بالقمر
    اشكرك جدا على تواجدك وكلماتك الجميلة
    وكل سنة وانتِ دايما بخير
    نورتينى ياجميلة وفى انتظارك دائما

    **********************************

    حاول تفتكرنى
    ــــــــــــــ
    اهلا بيك يافندم
    هى فعلا ملهاش ذنب
    بس سؤالى هو لامتى هتستحمل وهنستحمل معاها
    دمت لمدونتى زائرا

    ******************************

    عاشقة الاحزان
    ـــــــــــــ
    وعليكم السلام ورحمة الله وبركاته
    اختى الحبيبة:اهلا اهلا بالقمر
    وانتِ طيبة ويصحة وسعادة
    ماتحرمش منك ياحبيبتى فماتوفيقى الا بالله
    كلك ذوق يا جميلة
    نورتينى يا انوسة واسعدتينى بتواجدك

    *********************************

    احمد بدر الدين
    ــــــــــــــ
    اهلا بيك استاذ احمد
    لا اله الا الله
    البقاء لله
    ربنا يرحمه ويصبر اهله اللهم امين
    اشكرك لإخبارنا

  43. طهر فؤادك Said:

    السلام عليكم ورحمة الله وبركااااااتة
    جزاكى الله خيرا على الموضوع الجميل دة ..
    وفعلا مش بيحس بقيمة البلد الا الانسان الى اتغرب وبالرغم ان المميزات الى حصرتيها من الخدمات الى بنشفها برة ومدى الرفاهية والراحة الا ان مفتقدينا الام مصر وياريت نرجع ويتصلح حالها ونكون اول ناس تجرى عليها لان فعلا مفتقدين الحضن وحنان الناس الى هناك …. وربنا يكرمنا ان شاء الله وووطننا يرجع تانى اللهم امين وياريت نوحد دعائنا علشان الفساد يزول ونرجع لطاعة الله فى كل نواحى حياتنا ان شاء الله …. ثبتنا الله واياكم والمسلمين على طاعتة وحسن عبادتة اللهم امين

  44. MOHAMMED ELBANNA Said:

    موناليزا
    موضوعك جميل ومؤثر فعلاً
    وياريت فعلاً ينصلح حالنا عن قريب.
    …………
    بلادي وان جارت عليا عزيزة
    وأهلي وان ضنوا عليا كرام
    ………..
    تقبلي تحياتي على الابداع
    محمد البنا
    طريق النجاح

  45. موناليزا Said:

    طهر فؤادك
    ــــــــــــ
    وعليكم السلام ورحمة الله وبركاته
    اهلا بيك يافندم
    ربنا يكرمك اشكرك جداً لرايك
    ربنا يتقبل دعائك اللهم امين
    دمت لمدونتى زائرا

    **********************************

    محمد البنا
    ــــــــــــ
    اهلا بيك استاذ محمد
    اشكرك جدا لرايك ولمشاركتك
    دمت لمدونتى زائرا

  46. منى Said:

    السلام عليكم ازيك يا موناليزا
    جيتى على الجرح وخلينا اقولها على اللى فى قلبى
    ليه ماليش مكان فيكى؟؟؟؟؟؟؟؟
    لما اتعلم واتخرج والاقى حد اقل منى دفع رشوه وخد مكانى

    لما كل واحد من اخواتى وولادك يحاول يهرب ويروح اى حته تانيه عشان يقدر يعيش حتى لو وصل البعض انه يعرض نفسه للموت وهو بيقول اعيش انسان او اموت

    لما الاقى زحمه قاتله فى كل مكان من اول المدرسه لباب التقديم فى كل مسابقه رغم انى من الاقاليم عشان محدش تعب نفسه وفكر فى طريقه يخف بيها الزحام

    لما اشوف الفساد بعينى وكلنا شايفينه ونصرخ ومحدش سامع الصوت

    لما يقولوا شدوووووووووا الحزام واحنا شايفين هناك مفيش حزام اصلا

    لماالراقصات يبقوا صفوه المجتمع وفى كل برنامج

    لما ااحب ارفه عن نفسى واشوف فيلم ومالقيش حاجه محترمه اشوفها
    ولما
    ولما
    ولما
    مش قصدى الومك يا امى انا بس عايزه افهم ليييييييييه؟؟؟؟؟؟؟؟؟؟؟؟؟؟؟؟

  47. rovy Said:

    اه يا حبيبتى .. قلبى وجعنى فى اول البوست و بعدين لقيتنى بصراحة بأضحك لأحلامك و اسأل نفسى يا ترى ممكن نعيش لحد ما نشوف الاحلام الخياليه دى ..معقول !!
    تعرفى ساعتها الناس حتكون اكيد ماتت و دخلت الجنه
    معلش سامحينى لتشاؤمى المره دى .. اصل لسه اول امس سمعت عن ضحيه جديده من ضحايا الاهمال عندنا تصورى برغم ان جنبنا مدرسه و الطبيعى ان يكون فيه مطب و برغم تكرار الحوادث بصوره محزنه منها فتاه فى مقتبل عمرها فقدت حياتها و هى تعبر الطريق فى لحظات و غيرها الكثير
    الا انهم لم يتحركوا و لم يضعوا اى مطب يجبر مجانين السرعه و السائقين التافهين عديموا المسؤليه ان يهدأوا من سرعتهم خصوصا فى تلك المنطقه التى تكررت بها الحوادث ..
    لذا اقول لكى لنا الله
    و لكنى ايضا سأظل احاول ان احلم مثلك فما اجملها احلام .. و مين عارف قادر ربنا على كل شىء
    دمتى غاليتى بكل الود و الخير

    ارق تحياتى لكى اختى الحبيبه

  48. Sonnet Said:

    السلام عليكم
    امة الله
    كل رمضان و انت بخير
    تحياتى

  49. كلمات من نور Said:

    والله يا أمة الله العيب مش في أمنا العيب في عقوق الأبناء لها…..يعني لما تحسي إن الغلط موجود في كل مكان فداه مش من غلط الأم أبدا…فاكرة في سورة الكهف حينما قتل الرجل المؤمن الذي رافق سيدنا موسى ، غلاما أبواه مؤمنين؟؟؟

    سبحان الله أبوين مؤمنين وولد عاق يعملوا فيه إيه؟

  50. موناليزا Said:

    منى
    ـــــــ
    اختى الحبيبة:اهلا اهلا بالقمر
    انا الحمدلله بخير ماتحرمش من سؤالك
    فينك من زمان يارب تكونى بخير

    انا كمان بقولها معاكى لييييه؟
    لعله خير
    يمكن فى يوم ترد علينا بفعل يرضى الجميع
    مين عارف.. مش يمكن:)
    نورتينى حبيبتى واسعدتينى بتواجدك

    ********************************

    روفى
    ـــــــ
    اختى الحبيبة:اهلا اهلا بالغالية
    ده مش تشاؤم ولكنه واقعية مؤلمة
    حقاً إنا لله وإنا اليه راجعون
    هنقول ايه بس حسبى الله نعم الوكيل ربنا يرحمها ويصبر اهلها

    فعلا مين عارف مش يمكن نبقى فى يوم من الايام من الدول المتقدمة:)
    نورتينى حبيبتى واسعدتينى بتواجدك

    ********************************

    سونيت
    ـــــــــ
    وعليكم السلام ورحمة الله وبركاته
    اختى الحبيبة:اهلا بيكِ فى زيارتك الاولى
    وانتِ طيبة وبخير
    اشكرك جدا لتواجدك
    نورتى مدونتى

    **********************************

    كلمات من نور
    ــــــــــــــــ
    اختى الحبيبة:اهلا اهلا بالقمر
    ونِعم التشبيه:)
    أحسنتِ الاختيار يا جميلة
    نورتينى حبيبتى واسعدتينى بتواجدك

  51. قلب انحنى له الألماس Said:

    اولا البقاء لله
    _______________
    عتاب لامى
    مقدرش اعاتبك
    مهما يكن
    انتى حبيبتى
    وهعمل كل اللى يرضيكى ان شاء الله عشان ابئا خلصت ضميرى قدام ربنا
    بس اللى خايفة منه حاجة وحدة
    مش بيقولووا اعز الولد ولد الولد؟؟؟؟؟؟؟
    اقول ايه لولادى بس ؟
    انا خايفة عليهم
    اوديهم فين عايزاهم يتعلموا افضل تعليم
    ويخترعوا
    وينجحوا
    ويبئوا فخر لدينهم وليكى قبل مايكونوا فخر ليا
    اعمل ايه واقولهم ايه؟؟؟؟
    ______________________
    تسلمى يااختى
    بوست رائع كالعادة
    جزاك الله خيرا
    تقبلى مرورى

  52. موناليزا Said:

    قلب انحنى له الالماس
    ــــــــــــــــــ
    اختى الحبيبة:اهلا بيكِ
    اشكرك جدا لتعليقك ولرايك ولمشاركتك
    نورتينى واسعدتينى حقاً بمتابعتك


{ RSS feed for comments on this post} · { TrackBack URI }

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: