معرفش ليه

معرفش بحبك ليه
نفسى أبطل أحبك
لكن قلبى أعمله إيه
لو كان بإيدى ماكانش أختارك
ولا كان يفكر يشغل بالك
نفسى أسكت دقات قلبى
وأقوله كفاية حرام عليك
حبيته ليــــــــــــــــــــه
وأنت عارف أن ده بالذات لأ
ولا هو عِند
ولا أنت ناقص آلام وجراح
وأنت يعنى يوم ما تحب
تحب واحد مش ليك
حبيته ليه
تقول معرفش
أقولك سيبه
تقول ماقدرش
طب آخرك إيه
تقولى سيبينى أحبه
وأملى عينيا دايماً بيه
وأصبر نفسى على بعاده
وأقول يمكن طيفى يناديه
فيحن وييجى وأشوفه
وأقول كفايه عليا لقاه
وأرضى بنصيبى فى بعده عنى
و أ نـــــــــــا
با صبر قلبى على فراقه
وبعيش وبحيا على ذكراه
*********************
لمن لا مست كلماتى قلبها وشعرت أن هذه الكلمات تعبر عن حالها.
إليها أقول: بتعذبى نفسك ليه؟ الحب الكتير اللى جواكِ ده كله وزعيه على اللى حواليكِ بلاش يفضل لشخص واحد أنتِ نفسك عارفة أنكم مش هتكونوا لبعض.
حِبى دينك وربك أوى فهما أحق بكل هذه المشاعر.
حِبى أسرتك وأهلك أوى لأنهم مش هيعيشولك العمر كله ولا أنتِ هتفضلى معاهم على طول.
حِبى دراستك أو وظيفتك عشان تقدرى تنجحى وتثبتى جدارتك وتفوقك.
حِبى نفسك شوية وماتجعليهاش مذلولة أوى كده عشان أى شخص مهما كان.
أتركى بعض من هذه المشاعر الفياضة لزوج المستقبل حتى لو اتجوزتى جوازة صالونات فطالما جواكِ مشاعر ولو شوية صغيرين يبقى فيه أمل أنك تحبى زوجك وتسعدى معاه لأن لو كل مشاعرك الفياضة دى خلصت قبل الزواج يبقى هتكملى ازاى ده لو عرفتى تبدأى أصلاً.
بلاش حكاية أن لو حتى هو مش ليا أنا مش هكون غير ليه لأن محدش يستاهل أنك تترهبنى عشانه وخصوصاً لو كان هو نفسه شايف حياته وعايشها عادى جداً.
فوقى يا حبيبتى وماتمشيش ورا قلبك. أستعينى بالله وأدعى ربنا طول الوقت فربك بيده ملكوت كل شئ وماسمى القلب قلباً إلا من كثرة تقلبه . والقلوب بين أصابع الرحمن يقلبها كيفما يشاء . يعنى اللى أنتِ متوقعه أن عمره ما هيحصل .. بالدعاء هيحصل.
وأخيراً لا تجعلى قلبك ينبض بإسم أحد إلا من تحملين اسمه فى قسيمة الزواج. وقتها فقط حِبى بكل قوتك حتى تسعدى.
أرجو للجميع بحياة سعيدة خالية من أى ألم.

***********

أدعوكم لقراءة هذا الموضوع تناقض ملحوظ.

62 Comments »

  1. blue-wave Said:

    كلمات جميله
    ومعانى اجمل
    ويارب تسمع
    تحياتى

  2. ليس فقيرا من يحب Said:

    السلام عليكم

    كلماتك رائعه وعندك حق فى كل كلمه فيها لازم الواحده توفر مشاعرها ومتستهلكهاش لحد ما يجى صاحب نصيبها

    وليكن شعار كل بنت حبيبى هو جوزى

    فى حفظ الرحمن

  3. منال مصطفى Said:

    وما عجب موت المحبين في الهوى … ولكن بقاء العاشقين عجيب …
    ربنا يسعدك يا موني ويثبتك علي الحق و يسعد شباب المسلمين و بنات المسلمين ويرزقهم بأزواج و زوجات صالحين و صالحات…

  4. أحمد بسام Said:

    يا ريت ناس كتير تقرأ الكلام ده اصل ناس كتير فاهمه الموضوع غلط
    جزيت خيرا

  5. mahasen saber Said:

    دايما مواضيعك مفيده وجميله
    يا مونا

    انا قبلنت الاضافه ومستنياكى عشان نشوف هنعمل ايه

    مفيش وقت كتير يا مونا فارجو اننا نتكلم فى ااقرب وقت

  6. منال مصطفى Said:

    السلام عليكم و رحمة الله و بركاته:
    بارك الله فيكي وفي أمثالك من الفتيات الصالحات ، و أسعدك الله تعالي في الدنيا والآخرة…

  7. جمعية مفاتيح الفرج Said:

    موضوع جميل ،ويارب هذه الفتاة و غيرها من الفتيات يفهمن حقيقةالحياة…

  8. romansy Said:

    على فكره الحب شئ اساسى فى حياتنا مشاعرنا مبنقدرش نحكمها الحب هو اللى يقدر يغير حياتنا بس اكيد لازم نحب اربنا ونحب الناس ونومن ان زوج المستقبل هنقدر نديله كل الحب اللى اتحرمنا منه

  9. ঔღঔ نـــوارة ঔღঔ Said:

    رائعة ياحبيبتي

    كلامك عين العقل

    ربنا يحفظ بنات المؤمنين

    جزاكي الله كل خيررررر

    دمتي بحفظ الرحمن

  10. ماما أمولة Said:

    الله عليك يا أمة الله وعلى كلامك الطيب

    جعله الله في ميزان حسناتك

    دمت بكل الخير

  11. ahmed_k Said:

    كلمات جميله ورأي يحترم
    أتفق معك فيه تماما
    وكما ذكرتي فالقلب سمي قلبا لتقلبه
    ونجد ذلك واضحا في حياتنا فما كنا نحبه ونريده منذ 10 سنوات مثلا تغير الآن وأصبح شيئا آخر
    فالحياه لا تتوقف عند شخص بعينه بل هي مراحل قدرها الله وعلينا أن لا ندعها تسرقنا وتسرق منا سعادة قادم الأيام

    دمتي برعاية الله

  12. MaNoOoSh Said:

    فعلا الحياة مبتقفش عند حد

    علشان كده لازم نعيشها صح

  13. موناليزا Said:

    بلو واف
    ــــــــــ
    اهلا بيك يادكتور
    اشكرك جدا لرايك ولتعليقك
    نورتنى

    *********************************

    ليس فقيرا من يحب
    ـــــــــــــــــ
    وعليكم السلام ورحمة الله وبركاته
    اختى الحبيبة:الله عليكِ
    تسلميلى ياجميلة
    نورتينى حبيبتى واشكرك جدا لتواجدك

    ***********************************

    منال مصطفى
    ــــــــــ
    اختى الحبيبة:بحب تواجدك عندى جدا وتعليقاتك الجميلة
    ربنا يسعدك يارب ويتقبل دعائك
    نورتينى منال الجميلة واسعدتينى بتواجدك

    *********************************

    احمد بسام
    ــــــــــــ
    اهلا بيك استاذ بسام فى زيارتك الاولى
    عندك حق ياريت فعلاً
    نورت مدونتى وارجو دوام التواصل

    ********************************

    محاسن صابر
    ــــــــــــ
    اختى الحبيبة:ربنا يكرمك ويعزك يارب
    بفرح بجد بوجودك عندى
    ان شاء الله نتقابل فى اقرب وقت
    نورتينى حبيبتى واسعدتينى بتواجدك

    *********************************

    منال مصطفى
    ـــــــــــــ
    وعليكم السلام ورحمة الله وبركاته
    اختى الحبيبة:ربنا يعزك ويتقبل دعائك ويارب ماتحرم منك ابدا
    نورتينى غاليتى ويارب دايما منورانى

    ********************************

    جمعية مفاتيح الفرج
    ـــــــــــــــــــ
    اهلا وسهلا
    ربنا يتقبل دعائك واشكرك جدا لرايك
    أسعدنى زيارتك

    *********************************

    رومانسى
    ـــــــــــ
    اهلا بيك يافندم
    ماختلفناش على فكرة:)
    اشكرك جدا لمشاركتك

    **********************************

    نوارة
    ــــــــــ
    اختى الحبيبة : ربنا يكرمك ويتقبل دعائك واشكرك جدا لرايك
    نورتينى حبيبتى وسعيدة بتواجدك

    **********************************

    ماما امولة
    ـــــــــــــ
    اختى الحبيبة: ما اجمل تواجدك عندى وما اجمل كلماتك وتعليقك الرقيق
    دمتِ لى ودام تواجدك
    نورتينى غاليتى واسعدتينى بتواجدك

    ********************************

    احمد-ك
    ـــــــــ
    اهلا بيك استاذ احمد
    الله عليك
    عاجبنى المثل اللى قلته علينا من ان لاخر نقارن بين مشاعرنا لنحكم بأنفسنا
    اشكرك جدا لرايك ولتعليقك
    نورتنى

    *********************************

    منوش
    ــــــــ
    اختى الحبيبة:صح جدا
    نورتينى ياقمر وسعيدة بتواجدك

  14. عاشقة الأحزان Said:

    السلام عليكى

    بسم الله ماشاء الله ربنا يبارك فيكى هو ده الكلام الصح

    بجد عسل قوووووووى
    تسلم ايديكى

    تحياتى
    انوسه

    منتظراكى عندى خبر حلو لينا كلنا

    انوسه

  15. تأثير الفراشة Said:

    موناليزا الجميلة، وحشتينى جدا جدا ، و وحشنى كلامك الجميل
    اعتذر عن غيابى الفترة اللى فاتت اللى كان لظروف قهرية، و أتمنى تكونى افتكرتينى فى دعائك

    ربنا يكرمك على البوست الجميل ده، و كلام راااائع و أكثر من ممتاز ، و اسلوب مبتكر و جميل

    ربنا يسعد البنات و الشباب

    بالتوفيق لك دايما، تحياتى لك

  16. EMMY BABY Said:

    جميل اوى كلامك ده يا موناليزا وفى فعلا ناس كتير سمعتها بتقول انها عايزة تفضل جنب اللى بتحبه وخلاص

    طب يا موناليزا سؤال بالنسبة للزمن اللى احنا فيه ده مع طول فترة الخطوبة هل ينفع التعبير عن الحب بالكلام ؟؟؟

    تحياتى

    ايمى

  17. على خطى الحبيب Said:

    السلام عليكم ورحمة الله,

    جميل ما خطته أناملكم تجاه هذا الموضوع بالذات,
    أكيــد من الأفضل لاى بنت انها توزع مشاعرها بالشكل الصحيح على من تراه يستحق بالفعل هذا الشعور, وان تحتفظ بجزء (كبير طبعاً) من مشاعرها المكنونه بداخلها لزوج المستقبل, اللى طالما هى بتحاول تسعده وتعيشة زمانه أكيد هو كمان هيعمل كل ما فى وسعه من اجل اسعادها وتلبيه رغباتها (بالحـــب),

    تفكيـــر معتدل جدا"موناليزا", من شخصية سوية جداً جداً ومعتدلة الى أبعد الحدود.

    جزاكى الله عنا جميعاً كل الخير ووفقنا الله الى ما يحب ويرضى,
    انه ولى ذلك والقادر علية.

    تقبلـــى مرورى,,
    دمتى بكل الود,,,,,,

  18. د. ياسر عمر عبد الفتاح Said:

    هيه كلمه واحدة

    عندك حق جداً

  19. أبو كريم Said:

    المرء فى زمن الأقبال كالشجره
    والناس من حولها ما دامت الثمره
    حتى إذا راح عنها حملها إنصرفوا
    وعلقوها تقاسى الحر والغبره

    فليحرص كل منا على أن يعطى ثماره لمن يحفظ له جميله عندما يجدب.

    تحياتى

  20. Sweet Violet Said:

    ارجو فعلا ان اى واحدة بتقول الكلام ده تأخد بالنصيحة بتاعتك وتعمل بيها
    v_v

  21. ستيته حسب الله الحمش Said:

    السلام عليكم يا مونا
    وحشاني
    اختلف معك واتفق برضه

    اختلف في ان المشاعر نقدر نحكمها بالريموت كنترول

    يا عزيزتي حواء ان تحركت مشاعرك في اتجاه شخص فده مش بغيديك سبحانه مقلب القلوب والأبصار

    لكن اللي اتفق فيه هو مين بيتحكم في مين؟
    لو قلبك تحكم في العقل قادك للهلاك والتعاسة والإكتئاب

    ولو عقلك اشتغل فرامل صح
    ها يكون لك حرية انك تشعري مشاعر رقيقة وجميلة
    وفي نفس الوقت التصرفات حكيمة
    وفي ذات الوقت لو طلع راجل اي كلام تقدري تديه استمارة ستة من جواك ويسمعك سلام بودعك
    وترجعلك تاني مشاعرك تنتظر اللي يستحق حب غالي وعالي ولا يأسرها من لا يستحقها

    تحياتي وسلامي

  22. ستيته حسب الله الحمش Said:

    بالمناسبة انا محبتش قبل جوزي يعني لم أهيم في الهوا عشقا الا مع حسبو
    بس برضه شفت حالات حب مجبرة احترمها واحترم اختلاف اصحابها عني وعلشان كده دي خلاصة الرؤية الستيتية في دنيا البشر واحوالهم المستخبية

  23. NilE_QueeN Said:

    يسعدني انى اضم صوتى لصوتك
    واؤيدك بشده

    الانسان الوحيد الجدير بالحب هو زوج الفتاه

  24. Nostor Azzuro Said:

    معرفش ليه بحب ادخل مدونتك وبحس براحة لما بقرالك مع انك بقيتى دلوقتى مبطلة تزرونى بس انا ماقدرش ابطل اقرالك

    وادخل اشوف الموضوع التانى

  25. mohamed ghalia Said:

    مع حضرتك حق بجد
    المشاعر دى أولى بيها ناس كتير وكمان دى متأكده انى الموضوع منتهى
    يعنى مفيش أمل
    دايما اقف عاجزا على أن أعطى كلماتك حقها

  26. ريمان Said:

    الله يفتح عليكى

    موضوع مميز جدا

    موفقه فيه

  27. بحب كل الناس Said:

    كلمات رائع ومعبر

    وياريت الشبابا يعرفوا هذه المعانى

  28. ذكري رحيل قلم Said:

    السلام عليكم
    ايه الجمال ده مين اللي كاتب موناليزا ياعم يا عم
    بنكتب كل فين وفين
    طيب متحرمناش من الخواطر الحلوة ده

    برفوا عليكي الموضوع مهم جدا وياريت كل واحدة كانت بتحب واحد وخلاص اتجوز او سابها هي كمان تشوف نفسها ومتقولش انا ها عيش ليه

    كلام كده يختي يفرس بس هانقول ايه ربنا يهدي
    تمنياتي بمزيد من الموضوعات المهمة التي تهم الشباب والفتايات

  29. وردة Said:

    كان نفسي اعارضك واقولك لاء
    كان نفسي اختلف معاكي
    بس كلامك صح مليون في المية
    بس صعب التنفيذ
    انتي عارفة ليه
    لان القلب لا يخضع لاحد
    ممكن نمثل ونبدع كل الكلام اللي انتي قولتيه
    لكن نسبة بسيطة اوووي هي اللي حتنفذه من قلبها
    ربنا يكرمك يارب
    وكل الناس تعيش سعيدة مع اللي بيحبهم وبيحبوه
    سلام

  30. ريمان ونوسه فى هاكونا مطاطا Said:

    انتى لسه هنا؟

    لا لا تعالى بسرعه عندنا

    تيمون وبوبما عايزينك

    كل ما تضحك اكتر كل تاكل بطاطا اكتر

    هاكونا مطاطا

    مش هتقدر تغمض عنيك

    هاكونا مطاطا هديتنا لكل المدونين عشان نخرج من حاله النكد

    هاكونا مطاطا تهييس للصبح

    هاكونا مطاطا … لااااا للملل

    هاكونا مطاطا… قول لاء للهم

    هاكونا مطاطا…. اوعى تزعل ابدااا

    هاكونا مطاطا… ارمى الماضى ورا ضهرك

    انسى الماضى اللى يغيظ

    يلاااااااااا تعالى مستنى ايه

  31. موناليزا Said:

    عاشقة الأحزان
    ــــــــــــــــ
    وعليكم السلام ورحمة الله وبركاته
    أختى الحبيبة:ربنا يكرمك يارب اشكرك جدا لرايك
    دعوة مقبولة طبعا:)
    نورتينى انوسة الجميلة وسعيدة بتواجدك

    **********************************

    تأثير الفراشة
    ـــــــــــــــ
    أختى الحبيبة:اهلا اهلا بالقمر
    وانتِ كمان وحشتيينى جدا كنتى فين ده كله؟
    يارب تكونى بخير وربنا ييسرلك جميع امورك ويهيئ لك كل خير يارب

    اشكرك جدا لرايك وسعيدة جدا بتعليقك وبتواجدك
    نورتينى غاليتى

    **********************************

    ايمى بيبى
    ــــــــــ
    اختى الحبيبة:اهلا اهلا بالقمر
    اشكرك جدا لرايك وفعلا الساذجات كتير

    سؤال وجيه:)
    من وجهة نظرى البسيطة انها لو اعتمدت على طول فترة الخطوبة وقالت كل مشاعرها طيب بعد الزواج هتقول ايه؟
    انا عارفة ان كلامى صعب يتنفذ بس لو العقل اتدخل شوية هيقدر يقنع القلب ان كل الكلام اللى عايزة تقوله لو أجلته لما بعد الزواج هيكون افضل بكثير
    اولا من الناحية الشرعية: انها مش بتقول حاجة حرام ممكن تتحاسب عليها
    ثانيا من الناحية الاجتماعية: الخطوبة دى ممكن جدا ماتكملش ووقتها هتندم انها قالت كلام لواحد مايستاهلش
    ثالثا: من الناحية الاخلاقية:مش يمكن يكون خطيبها بيضعها فى اختبارات عشان يشوف اخلاقها
    رابعا: بقى وده المهم كل ماكانت كلامها ومشاعرها عزيزة ومش بالساهل انه يسمعه قبل الزواج ده هيحفزه انه ينجز ويحاول الزواج سريعا لكن لو كل الامور والكلام الجميل ميسر قبل الزواج هيفكر فى الزواج والمسئولية ليه.
    دى وجهة نظرى وانتِ اللى سألتينى ماتلومنيش على إجابتى بقى:)

    نورتينى ايمى الجميلة وسعيدة جدا بتواجدك

    ********************************

    على خطى الحبيب
    ــــــــــــــ
    وعليكم السلام ورحمة الله وبركاته
    اهلا بيك يافندم
    ربنا يكرمك واشكرك جدا لرايك
    ياريت تعليقك ده تقرأه جميع البنات

    اشكرك جدا فماتوفيقى الا بالله ربنا يكرمك أخجلتم تواضعنا حقاً
    (اللهم لاتؤاخذنى بمايقولون واغفرلى
    مالايعلمون واجعلنى خيراً مما يظنون)

    ربنا يعزك ويتقبل دعائك
    اشكرك جدا لمشاركتك واسعدنى مروروك

    *********************************

    د. ياسر عبد الفتاح
    ــــــــــــــــــــــ
    اهلا بيك يادكتور
    وانا بشكرك جدا على كلمتك دى:)
    اسعدنى مرورك

    *********************************

    ابو كريم
    ـــــــــــ
    اهلا بيك يافندم
    الله عليك
    ما اجمله من تعليق
    اشكرك جدا عليه

    ***********************************

    سويت فيوليت
    ـــــــــــــــ
    اختى الحبيبة:اهلا اهلا بالقمر
    وانا كمان والله ارجو هذا:)
    نورتينى حبيبتى وسعيدة بتواجدك

    *********************************

    ستيتة حسب الله الحمش
    ــــــــــــــــــ
    وعليكم السلام ورحمة الله وبركاته
    اختى الحبيبة:اهلا اهلا بنبض الحكمة

    كده يبقى مافيش اختلاف بينا خالص🙂 وعشان كده طلبت منها تدعى دايما لان ربنا وحده هو مقلب القلوب بس المهم تبقى عايزة فعلا ده

    بيعجبنى كلامك دايما ومتفقة معاكِ جدا فيه ويسعدنى تواجدك فما تتأخريش علينا:)
    نورتينى سوتيتة الجميلة

    ********************************

    نايل كوين
    ــــــــــــ
    اختى الحبيبة:اهلا اهلا بالقمر بعد طول غياب
    الله عليكِ
    مبسوطة بجد برأيك وباتفاقك مع كلماتى
    نورتينى حبيبتى واشكرك لتواجدك

    *********************************

  32. موناليزا Said:

    نوستور ازور
    ـــــــــــــــ
    اهلا بيك يافندم
    والله يافندم كلك ذوق واخجلتنى بتعليقك
    وسيادتك تنورنى دايما

    *********************************

    محمد غالية
    ــــــــــــ
    اهلا بيك استاذ محمد
    المهم هى تقتنع بهذا قبل فوات الاوان
    اسعدنى تعليقك ووجودك المتميز
    يافندم ربنا يكرمك ده بس من ذوقك
    اشكرك جدا ونورتنى

    *********************************

    ريمان
    ــــــــ
    اختى الحبيبة:اهلا اهلا بالقمر
    ربنا يكرمك ياريمو واشكرك جدا لرايك
    نورتينى حبيبتى وسعيدة بتواجدك

    ********************************

    بحب كل الناس
    ـــــــــــــــ
    اهلا بيك يافندم
    اشكرك جدا لتشجيعى بتعليقك الجميل
    نورتنى

    ********************************

    ذكرى رحيل قلم
    ـــــــــــــ
    وعليكم السلام ورحمة الله وبركاته
    اختى الحبيبة:اهلا اهلا بالقمر
    🙂 ماتكسيفنيش بقى:)
    كلك ذوق والله وانتِ دايما رافعة من روحى المعنوية ماتحرمش منك ابداً
    🙂 والله انتِ عسل وانا بحبك جدا وببقى مبسوطة بجد لما بشوف تعليقك عندى
    نورتينى ياجميلة واشكرك جدا لمشاركتك

    *********************************

    وردة
    ــــــــ
    اختى الحبيبة:اهلا اهلا بالقمر
    بما انه صعب التنفيذ يبقى مش مستحيل:)
    وده معناه ان ممكن جدا يحصل حتى لو كان بصعوبة
    وبعدين من ترك شيئاً لله عوضه الله حرمانه
    اسعدنى تعليقك الواقعى ويارب كل البنات تعتمد على عقلهم شوية اكتر من اعتمادهم على القلب
    نورتينى وردتى الجميلة واسعدنى تواجدك

    ********************************

    ريمان ونوسة فى هاكونا مطاطا
    ــــــــــــــــــــــــــ
    اهلا اهلا
    يادى النور يادى النور
    دعوة مقبولة وجايلكم باذن الله قريب جدا
    نورتونى:)

  33. اللى تشوفه Said:

    السلام عليكم

    اختى

    مالقتش غير انى اقولك
    بحبك فى الله

  34. منى Said:

    متفقه معاكى جدا وخصوصا وزعى حبك على اللى حواليكى هههههههه رغم انى دى كانت مشكله

    عايزه اقولك حاجه ومكسوفه وخايفه تزعلى بس حاسه فيه مشكله فى الصوره
    اوعى تزعلى منى
    ربنا يكرمك يا موناليزا دايما بكل الخير

  35. موناليزا Said:

    اللى تشوفه
    ـــــــــــ
    وعليكم السلام ورحمة الله وبركاته
    اختى الحبيبة: ربنا يعزك ويكرمك يارب
    أحبك الذى أحببتنى فيه وأنا ايضا احبك فى الله
    نورتينى حبيبتى واسعدتينى بتواجدك

    *******************************

    منى
    ـــــــ
    اختى الحبيبة:اهلا اهلا بالقمر
    ليه بس مشكلة دى اسهل حاجة:)

    انا ازعل منك برضه؟! قولى ياجميلة براحتك
    وبعدين انتِ عارفى انى ببقى سعيدة جدا لما حد يوجهنى او ينبهنى لخاجة انا مش واخدة بالى منها
    بس انا مش فاهمة بجد ايه المشكلة اللى فيها؟
    ياريت توضحيلى وبالتفصيل عشان افهم كويس:) وانا مش هنشر التعليق
    نورتينى منمن القمر وسعيدة جدا بتواجدك

  36. شمس النهار Said:

    ازيك
    بجد بجد البوست جميل جدا
    تسلمي وتسلم افكارك

    انا عارفه اني مقصره بس بتابع علي قد ماالوقت يسمح

  37. ياسر سليم Said:

    طيب انا كده عايز افهم ..

    هل انتى اللى كنتى كاتبة الكلام اللى فى الاول .. وبعدين بتردي على نفسك فى الكلام اللى فى الآخر

    ولا مش انتى اللى كاتبه اللى فى الاول وبتردى على اللى كاتباه ؟

  38. موناليزا Said:

    شمس النهار
    ـــــــــــــ
    اختى الحبيبة:اهلا اهلا ازيك انتِ ياقمر
    عذرك معاكِ ويارب تيجى بالف سلامة
    اشكرك جدا لرايك ولتواجدك
    نورتينى حبيبتى واسعدتينى بزيارتك

    ******************************

    ياسر سليم
    ـــــــــــ
    اهلا بيك استاذ ياسر
    ايوا يافندم انا اللى كاتبه الكلام اللى فى الاول
    بدليل قولى
    "لمن لا مست كلماتى قلبها وشعرت أن هذه الكلمات تعبر عن حالها."
    أى خدمة:)
    اشكرك لتواجدك

  39. عاشقة الفردوس Said:

    الله عليكِ

    ماأروع كلماتكِ وكلامك العقلاني

    ربي يصلح حال شباب المسلمين يارب العالمين

    :::::

    موووون

    انا عايزة الكود بتاع ترجم المدونة اللي فوق عندك ده (وش مكسوف )

    ^_^

  40. مدحت محمد Said:

    ربنا يعزك ياموناليزا يارب

    وتبقى مدونتك نور ليكى فى الجنة

    وفى ميزان حسناتك

  41. موناليزا Said:

    عاشقة الفردوس
    ــــــــــــــــ
    اختى الحبيبة:اهلا اهلا بالقمر
    ربنا يكرمك يارب فما توفيقى الا بالله
    اشكرك جدا لرايك

    حد يتكسف من اخته!!
    عموما:)غالى والطلب رخيص انتِ تأمرى ياحبيبتى حالا هيكون عندك على الايميل
    نورتينى غاليتى وسعيدة بتواجدك

    *********************************

    مدحت محمد
    ــــــــــ
    اهلا بيك استاذ مدحت
    ربنا يسعدك ويتقبل دعائك اللهم امين
    دعائك جميل بجد واسعدنى جدا
    اشكرك جدا لتواجدك

  42. fL0weR-giRL Said:

    السلام عليكم
    ************
    الكلام جميل والموضوع اجمل
    فعلا الحب الصحيح لما تحبي واحد يكون دبلته ف ايدك واسمك ف بطقته الشخصيه واسمه برده ف بطقتك

    **تقبلي مروري **

  43. مصعب صلاح Said:

    السلام عليكم

    تمام اوي

    بس انا عارف ليه
    لان مراية الحب عامية

  44. أم مالك Said:

    موناليزا الحبيبة
    وحشانى جدا وبعدى علمتى ظروفه
    ولااملك الا ان اقول
    اللهم يامقلب القلوب ثبت قلبى على دينك
    تحياتى

  45. عاشقه الرومانسيه Said:

    بلاش حكاية أن لو حتى هو مش ليا أنا مش هكون غير ليه لأن محدش يستاهل أنك تترهبنى عشانه وخصوصاً لو كان هو نفسه شايف حياته وعايشها عادى جداً.
    *******************************
    صح جداااااااا
    واسئل مجرب

  46. نبضات Said:

    أول مادخلت المدونهوشوفت الصوره والكلام قولت اكيد دخلت مدونه غلط
    خرجت ودخلت مره تانيه قلت اكيد دى مدونه واحده صحبتك وضايفها عندك
    ووقف فى الروفيل فتره وعماله افكر واقول ياربى راحت فيه المدونه بس
    مالقيتشى غيرها دخلت تانى وقلت طيب اقرا للاخر واشوف هيا ليه شخصيتها اختلفت كده اكيد فى سبب
    وبعد ماقرات للخر عرفت طبعا واقعدت اضحك على نفسى
    موضوع جميل
    فعلا الحب مش لازم يكون حب رجل للمراه او العكس
    ومشاعر الحب لها توجهات كتيرررر جدا
    واولها حب الله وحب الرسول صلى الله عليه وسلم
    وحب العمل وحب اى حاجه بنعملها وحب اهلنا واصحابنا وحاجات كتير

    والقلب من التقلب

    ومافيش مشاعر حب مضمونه فى الدنيا كلها مهما كان قرب الانسان منا
    وانا معكى انه لايوجد انسان يستحق مشاعر الا فى اطار الجواز حتى ولو كان جواز صالونات لكن يكفى انه انسان محترم عنده الشجاعه ان يعيش فى النور بعيد عن الظلام الذى تعيش فيه الكثير من قصص الحب الفاشله
    فهو فعلا يستحق كل الحب وكل المشاعر
    وانه حرام ان الانسانه او الانسان ان يوهب مشاعره لانسان مهما كان فى نظره شخصيه جميله لكنه فى الظلام لانه استنزاف للمشاعر التى يجب ان نحافظ عليها ولا نستهلكها حتى نقابل من يستحقها …وحتى اذا لم يقابل الانسان او الانسانه الشريك الذى يكمل معه باقى حياته فهناك صور كثيره للحب نستطيع ان نوهب من حبنا لها كتير جدا ممكن تكون فى ابتسامه او مسح على راس او طبطبه طفل يتيم او محتاج او الاحساس بالغير وحب الاصدقاء والاخلاص فى العمل وحب ديننا والدفاع عنه بقدر المستطاع وان نكون دائما سفراء لديينا
    احيانا قد تدخل فى قلوبنا مشاعر لانسان ما تجمعنا به ظروف عمل او غيره ويحاول التقرب منا ….نعم قد نشعر بهذه المشاعر التى تستوقفنا لاننا بشر..قد تهاجمنا هذه المشاعر ولا يد لنا فيها ولكن بايدينا الا نستسلم طالما انها ليس فى نطاق رسمى وان نتجه إلى الله وان نملىء قلوبنا بحب الله ورسوله وديننا لاننا نؤمن ان الدنيا اختبار وملىء بالفتن والاخره الدائمه…ولا نستسلم
    فلا يوجد مستحيل
    لكن فى انسان مستسلم وفى انسان يرفض الاستسلام حتى ولو كان لمشاعر بداخله
    وكل شىء بالايمان وقوة العقيده ممكن

    تحياتى
    موضوع مميز

  47. rovy Said:

    ما شاء الله عليكى حبيبتى ..
    حقيقى انتى رائعه ..
    سلمت يداكى و جزاكى الرحمن كل الخير
    كده ما سألتيش عليا و انا تعبانه و درجة حرارتى 40 .. اد ايه كنت محتاجه لدعاكى .. بلاش تنسينى لو غيبت عنك .. صدقينى لو بأقصر مش بأيدى ..
    بارك الرحمن فيكى و ما حرمنى منكى ابدا

    خالص مودتى و ارق تحياتى

  48. شجرة الدر Said:

    السلام عليكم

    ليس دائما يكون الانسان مسطر لما سيكون من احداث
    ومرات عزيزتي مونا ليزا يعجز عن التحكم في عواطفه اتجاه طرف اخر
    لكن كل مانتمناه ان لا يكون عبد له لان عبودية الهوى اذل انواع العبوديةفاللهم اجعلنا عبيدا لك وحدك وقلوبنا متعلقة بك وحد
    تحياتي لك

  49. EMMY BABY Said:

    والله عمرى مازعل من كلامك ابدا

    لانك بتقولى الحق دايما ولولا كدة مكنتش سئلتك

    بجد انا دايما بستفيد منك

    بحبك اوى

    تحياتى

    ايمى

  50. شريكة في المطعم Said:

    السلام عليكم ورحمة الله وبركاته

    كلمات جميلة ونصائح اجمل
    وفعلا الحب الي مفيش امل انه يكمل
    لازم نبعد عنه من الأول

    بارك الله فيكي وجزاكي خير الجزاء

  51. RaRa Said:

    وحشتينى اوى
    وعايزة اقولك ان مفيش حياه بدون حب
    لان الحب اجمل مافى الدنيا
    رغم كل العذاب الذى يكون فى الحب
    ولكن لانستيع ان نعيش دون الحب

    دمتى بخير دائما
    واتمنى تنورينى من تانى فى مدونتى

    أختك
    RaRa

  52. العصفورة Said:

    أختى الفاضلة
    السلام عليكم
    أشكر لحضرتك مرورك وأتمنى دوام التواصل
    ما شاء الله
    موضوع جميل
    جعله الله فى ميزان حسناتك
    خالص تقديرى

  53. موناليزا Said:

    فلور جيرل
    ـــــــــــ
    وعليكم السلام ورحمة الله وبركاته
    اختى الحبيبة:اهو ده الكلام وعين العقل كمان:)
    اشكرك جدا لرايك
    نورتينى حبيبتى ويسعدنى مرورك دائما

    **********************************

    مصعب صلاح
    ـــــــــــ
    وعليكم السلام ورحمة الله وبركاته
    اهلا بيك استاذ مصعب
    ده حقيقى:)
    اشكرك جدا لمشاركتك

    ********************************

    أم مالك
    ــــــــــ
    اختى الحبيبة:اهلا اهلا بالقمر
    عذرك معاكِ بس انتى دايما بتوحشينا:)
    ما اجمله من دعاء
    اللهم يامقلب القلوب ثبت قلوبنا على دينك
    نورتينى غاليتى واسعدنى تواجدك

    ********************************

    عاشقة الرومانسية
    ـــــــــــــــــــ
    اختى الحبيبة:عاجبنى اتفاقك معى:)
    ربنا يسعدك
    نورتينى ياجميلة وسعيدة بتواجدك

    **********************************

    نبضات
    ــــــــ
    اختى الحبيبة: لا مش معقول! ايه النور ده:) وحشتييييييييينى جدا وبجد مفاجأة جميلة.. ازيك ياقمر عاملة ايه ياحبيبتى يارب تكونى بخير

    انا غيرت الصورة على فكرة اتضح انى كنت مركزة على الكلام اللى فيها وماخدتش بالى من اى حاجة تانية:)

    دخلتك دى خضتنى جدا وقلت خلاص انا بدأت انحدر فى كتاباتى:(
    بس الحمدلله طمنتينى فى الاخر:)

    اشكرك جدا لرايك ومتفقة معاكِ جدا
    الله عليكِ
    الامثلة اللى ذكرتيها جميلة بجد وكلها أمرنا بها رسولنا الحبيب صلوات الله وسلامه عليه يعنى هنسعد دنيا وآخرة

    عاجبنى تعليقك جدا فعلا لا يوجد مستحيل مهما كانت الصعوبة وفعلا نحن بشر والضعف سمة غالبة ولكن يبقى الارادة وعدم الاستسلام
    نورتينى غاليتى واسعدتينى جدا بتواجدك
    وماتغيبيش علينا تانى

    ********************************

    روفى
    ـــــــ
    اختى الحبيبة الغالية: بجد مش عارفة اقولك ايه من كتر كسوفى وخجلى منك
    انا اسفة بجد حقك عليا ماتزعليش منى
    الفترة اللى فاتت النت كان وحش جدا ودلؤتى بقى الجهاز هو اللى بحالات يعنى غصب عنى والله بدخل بالعافية اصلا

    دايما بتحرجينى بذوقك وكرم اخلاقك
    روفى بجد ماتزعليش منى والله فاكراكِ دايما ومفتقداكِ جدا
    حقك عليا ياقمر وادى راسك(k)

    الف سلامة عليكِ ياغالية بعيد الشر عنك يارب يخفف عنك وتخفى بسرعة ويجعله يارب فى ميزان حسناتك
    نورتينى غاليتى واسعدتينى جدا بتواجدك

    *********************************

    شجرة الدر
    ـــــــــــــ
    وعليكم السلام ورحمة الله وبركاته
    اختى الحبيبة:اهلا بيكِ فى زيارتك الاولى
    متفقة معاكِ وعشان كده لازم شوية ارادة:)
    نورتى مدونتى وارجو دوام التواصل

    ********************************

    ايمى بيبى
    ــــــــــ
    اختى الحبيبة:يارب افضل عند ثقتك دى على طول
    بحبك جدا ومبسوطة بجد بتقبلك لكلامى
    نورتينى ياجميلة واسعدتينى بمتابعتك وتواجدك

    *********************************

    شريكة فى المطعم
    ــــــــــــــــ
    وعليكم السلام ورحمة الله وبركاته
    اختى الحبيبة: اهلا بيكِ فى زيارتك الاولى
    ربنا يكرمك واشكرك جدا لرايك
    نورتي مدونتى وارجو دوام التواصل

    ***********************************

    رارا
    ــــــ
    اختى الحبيبة:اهلا اهلا بالقمر بعد طول غياب
    متفقة معاكِ بس حُب عن حُب يفرق:)
    نورتينى رارا الجميلة ويسعدنى زيارتك

    **********************************

    العصفورة
    ـــــــــــ
    وعليكم السلام ورحمة الله وبركاته
    اختى الحبيبة:ربنا يكرمك واشكرك جدا لرايك
    نورتينى ياجميلة واسعدتينى بتواجدك

  54. رفقة عمر Said:

    موناليزا ممكن فى بدايه الامر بيكون شئ صعببببببببب
    ولكن مع طول الفترة وبالتدريج ستهدأ العاصفه ويرجع القلب الى نبضاته العاديه ويدخل فى النسيان
    لكن كل شء فى اوله صعبببب
    وخصوصا الصدمه فمن اختاره قلبك ولكنه تخلى عندك وداس على هذا القلب الذى هو يسكن بداخله
    الافضل ان يكون الحذر من المنع ان نضع على القلب اسوار وحصون حتى لا يستطيع احد اختراقه سوى من يستحقه

  55. masrur Said:

    كالتيار الجارف لايبالي بما يصادفه
    لعب العيال او ما يسمى زوراً وبهتاناً " الحب "
    وهنا اقصد ما احدثته سينما المراهقين
    في الكبار والصغار
    والله اننا لنجد اطفال في سن 11 سنة " وبيحبوا "
    ـــــــــــــ
    كلمة حب كلمة راقية ينبغي الا نطلقها على التفاهات ولعب العيال
    ــــــــ

    س -ما علاقة كلامي بالموضوع

    ج- مش عارف

    المهم انا اضم صوتي لصوتك وادعوا البنات خصوصا .. واقول لكل بنت تزوجي بالطريقة العادية حتى لو كان العريس اسمه عوضين
    والله الموفق

    تحياتي لك

  56. norahaty Said:

    عاجبنى الكلام كله لكن اكتر
    حتة لامستنى اوى (حبى اهلك
    لانهم مش حيفضلوا طول العمر
    معاكى ولا انتِ حتفضلى معاهم)
    نفسى يسمعها ويعقلها كل من له
    ام او اب مزعلهم او مشغول عنهم
    بسفر او بشغل او(زوج أو زوجة حتى)
    كل دول باقيين بأذن الله اما الاب والام
    فهولاء(اطال الله اعمارهم)غير متواجديين
    دائماً.نفسى يصحوا قبل فوات الاوان.

  57. حاول تفتكرنى Said:

    لا يحتمل كلمة لماذا !!!

    كلام واقعي ورأي يحترم

    لكن قليل من يستطيع

    تحياتي

  58. موناليزا Said:

    رفقة عمر
    ــــــــــ
    اختى الحبيبة:اهلا اهلا بالقمر
    متفقة معاكِ جدا
    نورتينى ياجميلة وسعيدة جدا بتواجدك

    *********************************

    مسرور
    ـــــــــ
    اهلا بيك استاذ مسرور
    مين قال ان كلامك بره الموضوع
    طب ياريت حد من اللى سنه صغير يقرأه ويطبقه ولا ننكر بالطبع دور الاعلام فيما آل اليه الامور وعلى كافة المستويات والاعمار
    اشكرك جدا لمشاركتك واسعدنى اتفاقك معى

    **********************************

    نوراهاتى
    ــــــــــــ
    اختى الحبيبة:اهلا اهلا بالقمر
    عندك حق والله
    نورتينى حبيبتى واسعدتينى بتواجدك

    *********************************

    حاول تفتكرنى
    ــــــــــــ
    اهلا بيك يافندم
    مع ان ده السؤال اللى على لسان الجميع .. لماذا
    اشكرك جدات لمشاركتك

  59. طبيبك الخاص Said:

    كلمات جميله

    جميل الحوار بينك وبين قلبك

    احب كثيرا الكلمات اللى فيها حوار مع القلب

    مثلا اغنيه لن انساها لهانى شاكر بيخاطب قلبه فيها ويقوله انت السبب

    جميل الكلام
    تحياتى

  60. أم أحمد المصرية Said:

    حبيبتي موناليزا
    بعد السلامات و الاحضان و وحشتيني
    الكلمات رقيقة و حقيقية فعلا عند بعض الناس لكن الاحلي منها تعليقك عليها لأن هو ده الصح
    ما ينفعش نحب اللي ما يستهالش الا لو غاويين ذل

  61. زى الهوا Said:

    نصائح رااااااائعة

    من صديقة اروووووووووع

    جميل اوى ياموناليزا , ربنا يكرمك يارب : )

  62. موناليزا Said:

    طبيبك الخاص
    ــــــــــــ
    اهلا بيك يافندم فى زيارتك الاولى
    اشكرك جدا لرايك
    أى خدمة:)
    ماسمعتهاش قبل كده
    نورت مدونتى وارجو دوام التواصل

    *******************************

    أم أحمد المصرية
    ــــــــــــــــــ
    اختى الحبيبة:اهلا اهلا بالقمر
    مش عارفة ارد على تعليقك الجميل ده غير انى اقولك بتسعدينى دايما بتواجدك فما تتأخريش عليا كتير
    نورتينى حبيبتى

    *******************************

    زى الهوا
    ـــــــــــ
    اختى الحبيبة:اهلا اهلا بالقمر
    اشكرك جدا لرايك
    نورتينى حبيبتى ومبسوطة بجد بتعليقك


{ RSS feed for comments on this post} · { TrackBack URI }

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: