الحماة المُتسلطة

هذه رسالة إلى من أنعم عليها الله بنعمة الزواج والإنجاب ورؤية وليدها بجوار عروسه. ولم تقدر ماهى فيه من نعمة.
– إلى من ذهبت إلى بيوت الناس كى تخطب جوهرتهم إلى ابنها.وبعد ذلك رجعتها لهم مكسورة.
– إلى من لم تراعى الله وتتقيه فيمن قالت لها عن طيب خاطر ياماما دون أن ترى منكِ أى فعل يدل على الأمومة.
– إلى من لم تستوعب أن لكل شخص حياة مستقلة وأسرار خاصة تتم بين الزوجين ولا يجوز بأى حال من الأحوال الإطلاع عليها.
– إلى من لاتستوعب الفارق العمرى بينها وبين عروسة ابنها والذى بدوره يجعلها أنضج وليس العكس.
– إلى من تعامل زوجة ابنها كأنها ضرتها . ولا يهدأ لها بال إلا إذا تم مُرادها بأن تحدث مشاجرة بينهما.
– إلى من لا تحتمل رؤيتهما يعيشان سوياً وبمفردهما دون وجودها.
– إلى من تشاركهما فى كل شئ.
– إلى من تتدخل فى حياتهما. حتى ولو لم يتم أخذ رأيها.
– إلى من تهوى أن تنكد على من حولها. دون سبب يذكر.
– إلى من تفرق بين الزوج وزوجته.
– إلى صاحبة الوجهين.
– إلى من تخطط بدهاء وتُبيت لنية الغدر دون أن يشُك فيها أحد.
– إلى مُتقلبة المزاج , و صعبة العِشرة, و صديق السوء.
– إلى من تقضى وقت فراغها فى الغيبة ومشاهدة المسلسلات وتريد تطبيق ماتشاهده على أرض الواقع بالتمثيل على الآخرين. والحبكة الدرامية المظبوطة التى لايستطيع ذوى النفوس النقية كشفها.
– إلى من تستخدم سلاح المكر إلى أن تتمكن من فريستها.
– إلى من تستولى على ممتلكات الغير.
– إلى من تقذف المحصنات, وتخون العِشرة, وتظلِم , وتُقسِم بالله كذباً.
– إلى من غرتها صحتها ونفوذها وقوتها.
– إلى من تقول الكلمة كلمتى ولا أحد يستطيع فعل أى شئ دون الرجوع إلىَّ.
– إلى من تتحكم فى زوجها وابنائها كما الانسان الآلى الذى لايمشى إلا بالريموت كنترول.
– إلى من تتصيد الأخطاء للآخرين وتُسجلها فى كشف خاص لديها تقرأه من آن لأخر وكأنها ناظرة لمدرسة تسجل أخطاء التلاميذ لتعاقبهم فى درجات أخر العام!!!.
– إلى من ترتدى رداء الملائكة وهى بداخلها شيطان.
– إلى من لاتخاف الله.
إليكِ أهدى هذه الكلمات:-
ماذا سيفيدك من تحطيم قلب لم يأذيكِ فى شئ. ماذا سيفيدك من محاولاتك المستميتة من فرض سيطرتك علي حياة من لم تحاول حتى أن تتدخل فى شئونك.
اعلمى أن كل شخص حُر تماماً.مَن رشحك لتنسقى حياة الآخرين على هواكِ. والأجدى أن تشعلى نفسك بحياتك.
ماذا سيفيدك إذا هدم البيت بسببك أو استنفذتى محاولاتك لعدم تكملة بنائه. هل يسعدك أن تكون قلوب من حولك محطمة.
اتركيهم يديروا حياتهم كيفما يشاءون وإذا طلبوا نصيحتك فافعلى وإذا لم يطلبوها فالتزمى الصمت. واعلمى أن الإنسان لن يتبقى منه بعد موته إلا ذكراه فاتركِ ذكرى حسنة لأنك لستِ مُخلدة فى الدنيا. ولن تدوم لكِ هذه الحياة التى تسيطرين فيها على الآخرين فدوام الحال من المحال. وانظرى إلى من سبقوكِ وطغوا فى الأرض ماذا كان مصيرهم!.
هل تستهونين بدعاء من ظلمتيه. والذى ليس بينه وبين الله حائل.
لماذا لا تضعين نفسك مكان أى شخص تتعاملين معه. لكى تعلمى هل ما تفعلينه مع الآخرين طبيعى أم أن هذا لايهمك طالما يرضى رغباتك.
لاتقولى طاعة الأم واجبة فلا طاعة لمخلوق فى معصية الخالق.
النبي صلى الله عليه وسلم قال: ( إن الشيطان يضع عرشه على الماء، ثم يبعث سراياه في الناس، فأقربهم عنده منزلة أعظمهم عنده فتنة، يجيء أحدهم فيقول: ما زلت بفلان حتى تركته وهو يقول كذا وكذا.. فيقول إبليس: لا والله، ما صنعت شيئا. ويجيء أحدهم فيقول: ما تركته حتى فرقت بينه وبين أهله. فيقربه ويدنيه ويلتزمه، ويقول: نِعْم أنت.
فلا تكونى خليفة الشيطان واتقى الله.


أريد أن تكون التعليقات رسائل خاصة للحماوات (يعنى كل واحد يكتب رسالة لحماته سواء عايشة أو ميتة).
والغير متزوجين يكتبوا رسالة افتراضية وعلى اعتبار ماسيكون.

79 Comments »

  1. الطالبة عفو الله Said:

    السلام عليكم

    الموضوع مهم جدا

    مش عارفه ليه مؤخوذة على الحماة صورة وحشة

    ممكن تكون مش صورة اعتقد انها حقيقة فعلا بس السؤال في جميع الحالات
    لييييه؟؟

    باعتبار اني مقبلة على جواز ففي الحقيقة خيفانة اوي من الموضوع دة

    لحد دلوقتي مش شايفة منها حاجة وحشة بس يا رب تفضل على كدة

    و رسالتي ليها كالتالي

    حماتي بعد شهور معدودة ساصبح زوجة ابنك الغالي و ساكون سببا في سعادته او تعاسته
    فلو كنت فعلا تحبينه ستسعين لاسعاده و ذلك باسعادي
    و لتبعدي عنك نار الغيرة الذي لا اصل له
    و ارجوك لا تتدخلي في حياتنا الخاصة فكما اني لن اسمح بعائلتي و امي التي هي امي ان تتدخل فاترجاك لا تتدخلي فهذا اول باب يفتح للمشاكل
    افعلي دائما ما يسعدنا
    ساعتبرك امي و لست حماتي فلهذا اعتبريني ابنتك ولا تعتبريني زوجة ابنك

    و شكرا لك حبيبتي موناليزا ع الموضوع

    و فيييينك انا ع الياهو

  2. Punny_Punny Said:

    ياااااااه أول تعليق
    علي اعتبار ما سيكون هاقول ربنا يهديها , أو ربنا ياخدها قبل ما تجوز ابنها.

  3. ماء تشرين Said:

    اه ياموناليزا
    موضوع جميل وانا معاكى هكتب رساله
    انك بس ياسيدتى الجليله وهذا الجال اعطته لكى السنون وليس من السهل اخذه اعيدى شريط الذكريات الى ايام الشباب ايام حماتك انتى لو كانت عملتك حلو وانت لسه فاكراها لحد دلوقتى ليه متعمليش زايها عشان تفتكرك هيا وولد ابنك او بنتك بالخير ولو كانت عملتك وحش افتكرى دايما المراره الكانت ومازالت في قلبك تحبي انسانه تشرب منها انا متأكده انك متحبيش
    والعمر قصير مهما طال فعملى ليوم تدعو لكى فيه بالرحمه

    بس مش عايزة انسي انو في بنات سيئين هى اصلها مش حرب هى امه وانت مراته وانتو الاتنين مهمين مش فكرت مين الاهم ابدا ولا هى حرب والى ملوش خير في امه الربت ورضعته وسهرت ليالى عشانه مش هيكون ليه خير ابدا في واحده عرفها من كام يوم

    تحياتى

  4. القدر و انا Said:

    امة الله
    موضوعك جمييييييييييييييييل
    ويوجع القلب
    الله يرحمها ويسامحها حماتى
    عانيت منها فوق طاقة البشر
    كان ولد وحيد وغرفة نومها ملاصقة لغرفة نومه
    ولك ان تتخيلى …………
    الله يسامحها
    تحياتى

  5. حنان الشافعي Said:

    اولا جزاك الله كل خير
    وادام ايامك سعادة وسلام
    رسالتي بقي لحماتي المستقبليه باذن الله
    ……………………………
    ماما فلانه
    هقولها يا ماما عشان هحبها جدا
    حاولي تفهمي وتستوعبي وجودي انا مش عدوتك ولا خطفت ابنك منك انا اللي هجيبلك ابن ابنك او بنت ابنك
    اعز الولد يعني يا ماما
    خلينا ديما نبقي حواليكي بطيبتك وحبك
    خلي ولادي يحبوكي من معاملتك لمامتهم
    اعتبريني بجد بنتك
    ولو حصل عكس كده
    اتاكدي
    حبي لزوجي هيخليني احترمك وعمري ما هزعلك ابدا لانك حد مهم جدا وسبب رئيسي في وجود حياتي الزوجيه
    هكون جنبك اكتر من اي حد بقلبي وكياني
    معنديش طلبات غير بس اتعاملي معايا بقلبك
    ده كفايه
    …………………..
    بصراحه حاولت اتخيل اكتر من كده معرفتش
    بس ياااارب تكون انسانه كويسه
    لاني مستنيه احبها
    خالص ودي

  6. ABOALI Said:

    دعوا الحياه تمر
    فنحن ذو اعمار قصيرة
    دعوا الحياه تمر

    فنحن خلق الله فى ارضه

    دعوا الحياه تمر
    فنحن منكم وانتم نحن
    دعوا الحياه تمر
    فنحن احباء خير الخلق (ص)
    دعوا الحياه تمر
    فنحن للبناء نعمل
    دعوا الحياه تمر
    فنحن من سيدعو لكم
    دعوا الحياه تمر
    فنحن نبتكم فحافظوا على زرعكم
    دعوا الحياه تمر
    فنحن هناك سنقف فماذا سنقول
    دعوا الحياه تمر
    ولا تجعلوها مر

    كنت اود الا اعلق
    فهناك كلمات اذا كتبت تدمى القلب
    وانتى نقلتى حالة تحدث
    لمن فقد التربيه ولم يتذوق ماهى

    تحياتى

  7. رحــــيـل Said:

    والله الواحد من كتر ما بيشوف ويسمع اقول دايما ان مش عايزه يكون ليه اصلا حما اصل انا اساسا مفياش خلق للافلام دى والحورات الهم دى مش بستحمل حد انا اصلا مستحمله نفسى بالعافيه ولا اطيق اصلا ان حد يدخل فى حاجه تخصنى شوفى من الاخر لو جوازه بالشكل ده بناقص
    اساسا انا طول عمرى اقول ان انا حلى الوحيد اتجوز واحد مقطوع من شجره ههههههههههههههههههههه

  8. هذه حياتي Said:

    السلام عليكم ورحمة الله وبركاته

    أختي موناليزا

    فعلا تلكم نفوس ضعيفة تنطوي علي سريرة كالنار في شرها ولكن رغم حرارتها اللاذعة فإنها سرعان ما تأكل نفسها وتنقلب إلي رماد …. رزقنا الله واياكم الخير ورزقنا الرضا به …. خالص مودتي وصادق دعائي

  9. Butterfly Said:

    ايوه باعتبار ما سيكون

    صباح الخير يا جارى انت فى حالك وانا فى حالى🙂

  10. زى الهوا Said:

    موضوع جميل , رسالة ايه بس متهيألى رسالتك كافية جدا مش محتاجة اى اضافات بجد

  11. salma mohamed Said:

    اختيارك للمواضيع دايما جميل يا موناليزتي,
    ربنا يكرمك ويجازيك خير,
    اما بقى رسالتي على اعتبار ما سيكون
    انا اريدك اماً بما تحمله كلمة ام من معاني نعرفها من رافه ورحمة وتسامح وخوف عليّ واهتمام بي وبمشاكلي وحب لسعادتي و…..,
    اريدك ان تعامليني كابنه لكِ,واريد ان تكوني لي اماً تعوضني ولو عن جزء من حنان امي الذي فقدته بوافتها رحمة الله عليها,
    وسأكون لكِ ابنه كما يجب ان تكون البنات لامهاتهم,
    فانت اعطيتيني اغلى ما تملكين وهو ابنك وضي عنيك,وانت امه فيجب ان تكوني لي اما.

  12. ستيته حسب الله الحمش Said:

    إلى أمي سوسو

    والله ما رايت منك الا خيرا
    عمر طويل وانا قد أخذت لي احب الناس اليك في دنيا البشر
    رجلك وبكريك وسيد الرجال كما تقولين دائما
    ما سمعت منك يوما همزا ولا لمز
    تصري على ان تعلميني بحبك في كل زيارة وكأنك مدينة لي بهذا الأعتراف

    لطالما حملتيني وارسلت الي ما احب من افخر واشهى الطعام منه الجاهز للطبخ ومنه المطبوخ تقديرا منك لظروف عملي

    لما زرت بيت الله كانت هديتي الأغلى والأثمن والأقيم

    تبعثي لي السلامات والقبلات مع زوجي وان قصرت في زيارتك لكثرة اعمالي

    لم اعطيكي حقك قط ولم اوفيك جميل تربية زوجي .. الرجل في زمن عز فيه الرجال

    لطالما اعتبرتك وزوجي دعوة صالحة دعتها لي امي او جدتي في ساعة اجابة والحمد لله على نعمه لا أحصي ثناءا عليه هو كما أثنى على نفسه

    احبك واحب حضنك واحب ابنك واحب اللي يحبك
    بوسة وربنا يبارك في عمرك وصحتك ويغنيك عن البشر كلهم ويحسن خاتمتك

    المحبة سوتيتة

  13. موناليزا Said:

    الطالبة عفو الله
    ـــــــــــــــــ
    وعليكم السلام ورحمة الله وبركاته
    اختى الحبيبة:اشكرك جدا لرايك ولمشاركتك
    تعرفى ده نفس سؤالى ليه فيه حماوات بالشكل ده؟؟؟
    ربنا يسعدك ياحبيبتى ويجعلها ليكِ أم تانية
    🙂 ايه الموضوع انتى تفتحى وانا أبقى قافلة والعكس:)!!
    لعله خير🙂 ان شاء الله نتقابل قريب
    نورتينى حبيبتى ودمتِ بخير

    *********************************

    بنى بنى
    ـــــــــ
    اختى الحبيبة:وكأنك اول تعليق:)
    🙂 كده على طول مش يمكن تطلع طيبة
    ربنا يرزقك بالزوج الصالح ويهيئلك كل الخير
    نورتينى حبيبتى ودمتِ بخير

    *********************************

    ماء تشرين
    ــــــــــــ
    اختى الحبيبة:اشكرك جدا لرايك ولمشاركتك
    جميلة رسالتك
    وفعلا هى مش حرب بس الحماة او الزوجة اوقات بيحسبوها كده
    ربنا يهيئلك كل الخير
    نورتينى حبيبتى ودمتِ بخير

    ***********************************

    القدر وانا
    ــــــــــــ
    اختى الحبيبة:اشكرك جدا لرايك ولمشاركتك
    ياحبيبتى
    متخيلة والله ورأيت بعينى أيضا ولذلك حاسة بيكِ اوى
    ربنا هيوافيكِ أجرك من غير حساب بإذن الله
    نورتينى حبيبتى ودمتِ بخير

    *******************************

    حنان الشافعى
    ــــــــــــــــــ
    اختى الحبيبة:ربنا يكرمك واشكرك جدا لرايك ولمشاركتك
    ربنا يرزقك بالزوج الصالح ويهيئلك كل الخير ويرزق حماتك حبك
    نورتينى حنان الجميلة ودمتِ بخير

    *******************************

    ابو على
    ـــــــــــ
    اهلا اهلا بصاحب التعليقات المميزة
    معقول كنت ناوى تحرمنا من تعليقكم المميز؟؟
    نشكرك جدا لانك لم تفعل
    كلماتك مميزة جدا وبها رسائل كثيرة ولكنها فى الصميم
    وفعلا هناك أحداث ومواقف اذا ماسمعت عنها لا تصدق أبدا ان هذا ممكن يحدث على ارض الواقع
    دمت طيبا ولمدونتى زائرا

    ********************************

    رحيل
    ــــــــــ
    اختى الحبيبة:اهلا اهلا بالقمر
    فينك من زمان يارب تكونى بخير

    كنت زمان بقول زيك كده ولما بييجى النصيب مابتقدريش تتكلمى:)
    :)ربنا يرزقك بالزوج الصالح ويهيئلك كل الخير
    نورتينى حبيبتى ودمتِ بخير

    *********************************

    هذه حياتى
    ــــــــــــــــ
    وعليكم السلام ورحمة الله وبركاته
    اهلا بيك يافندم
    اشكرك جدا لهذا التعليق البليغ ولكن اين رسالتك؟؟
    دمت طيبا ولمدونتى زائرا

    *******************************

    بيترفلاى
    ــــــــــ
    اختى الحبيبة:خير الكلام ماقل ودل:)
    اشكرك جدا لمشارتك
    نورتينى ياجميلة ودمتِ بخير

    *******************************

    زى الهوا
    ــــــــــــــ
    اختى الحبيبة:اهلا اهلا بالقمر فينك من زمان يارب تكونى بخير

    اشكرك جدا لرايك
    مش يمكن تطلع طيبة؟ وتبقى رسالتى دى ماتنفعش ليها
    تفائلى بالخير ياموحا:)
    ربنا يرزقك بالزوج الصالح ويهيئلك كل الخير
    نورتينى حبيبتى ودمتِ بخير

    *********************************

    سلمى محمد
    ــــــــــــ
    اختى الحبيبة:اشكرك جدا ربنا يكرمك يارب فماتوفيقى الا بالله
    ربنا يرزقك بالزوج الصالح يارب ويرزقك بكل الخير
    نورتينى سلمى الجميلة ودمتِ بخير
    انتى عارفة انى بحبك مش كده:)

    ********************************

    ستيتة حسب الله الحمش
    ــــــــــــــــــــ
    اختى الحبيبة:ربنا يباركلك فى حياتك وفى كل من تحبين
    انه لوفاء نادر منك ولحنان جارف منها
    ربنا يديم عليكم يارب الحب ويرزقكم بكل الخير
    بجد اسعدتينى بوجود حماتك فى دنيتنا
    ربنا يخليهالك
    اشكرك جدا لمشاركتك
    نورتينى حبيبتى ودمتِ بخير

  14. المعتصم Said:

    مش هعلق على البوست او ابعت رسايل
    انا جاى اقولك انى بجد كنت بهزر فر الرد بتاعى
    وانا مكنتش اقصد ابدا انى اجرحك او اوجعك زى ماانتى قلتى
    وعلى فكرة انا عامل المدونة علشان افضفض فيها انما لو هتكون سبب لزعل حد منى(وخصوصا انك اخت فاضلة ويعلم معزتك ربنا)انا ممكن الغيها
    وعلى العموم انا هلغى البوست كله وكأنه مش موجود
    تقبلى اسفى على وجعك
    بجد انا اسف

  15. مسدس صغير Said:

    يا حماتى لما اخطب بنتك اياك اشوفك فة البيت واياك اشوفك حاطه بوزك فى كل حاجة بينى وبين خطيبتى اللى هتبقى مراتى .
    لو جيتى تزورى بنتك بعد الجواز متقعدوش لوحدكو عشان متنخريش فى دماغها.
    هههههههه
    لا طبعا يا حماتى طالما انا دخلت بيت اصحاب خلق ودين ويراعو الله فى اقوالهم واعمالهم مخافش ابدا..
    احييكى على هذا البوست
    جزاكم الله خيرا

  16. الربان Said:

    تحياتي

    الحماة هي انسانه في الاول وفي الاخر…بمعني ممكن تكون حنونه بشوشة كالام او قريبه الي حد ما من سلوك الام تجاه ابنتها…

    و يمكن بالطبع ان تكون غير ذلك…

    عموما الحماه من النوع الاول بتكسب كثيرا لان زوجة الابن بتكون ابنه لها .

    في الحالة الثانية هي خسرت كثيرا لانها حرمت نفسها من نعمة ان يكون لها ابنه
    لم تنجبها…كما انها حرمت ابنها من راحة البال و الهناء…و هذا بالطبع
    سيؤرقها و ينغص عليها حياتها لرؤية ابنها غير سعيد…

    يا ريت تعامل الحماة زوجه ابنها بما تحب هي ان تعامل ابنتها في بيت زوجها
    و ليعلم الجميع ان كل شيء لا يضيع عند الله…فمن يعمل مثقال ذرة خير يره و من يعمل مثقال ذرة شر يره….
    و اعمل ما شئت كما تدين تدان…فالبر لا يبلي و الذنب لا ينسي و الديان لا يموت.

    تحياتي و تقديري

  17. لجين أبو الدهب Said:

    والله هو انا قبل ما اتزوج كان على طول اسمع المثل ..

    خدى بالك من حماتك .. الحمامة حماة حتى لو ملاك من السما ..

    وفعلا فى حماوات تتطق وكل فرححتهم لما يشووفوا ابنهم غضبان وجايلها والحماة دى اقولها اتقى الله فى اولادك ولما تموتى يدعولك ويقولوا افتقدناكِ بدل ما يقولوا كنا مستنين اليوم ده بفارغ الصبر وارتحنا ..

    وواجه رسالة لحماتى ..

    ربنا يخليكى لينا ويديم طيبتك لنا ..
    وهافضل ادعيلك طول عمرى علشان انتى كنتى سبب رئيسى فى تعجيل الزواج ..
    وعقبال اولادك التانين ..

    بجد ياموناليزا مواضيعك رائعة ربنا يبارك فيكِ..

    وليكى عندى تاج وياريت تجاوبيه ..

    بحبك فى الله ..

  18. مجداوية Said:

    السلام عليكم
    رغم إن الموضوع جد جدا لكن ضحكني

    طبعا أنا عارفة المفترية دي بس دي مش حماة دي هولاكو الذي يقتل النساء ويحرق الحرث والنسل
    🙂
    🙂

    أنا الحمد لله مليش حماة ولن يكون لي ولكن أرسل لكل حماة وأقول لها تذكري أنك كنت يوما عروسا تتوقين لحياة مستقلة بعيدة عن تسلط الحموات فضعي نفسك مكان عروسة ابنك وعامليها كأم وبحب ولا يمكن أن يثمر الحب الا الحب فما ستغرثيه فيها من حسن معاملة ستجنيه حبا واحتراما إلا اذا كانت أرضا غير صالحة لزراعة الحب أى أرضا بورا وهذا مستبعد لأنك باركت إختيار ابنك فلا تكوني أنت هذه الأرض الجدباء
    بل كوني بستانا من الحنان والعطف ليفوح عطرك على كل من حولك ويبقى العطر حتى لو رحلت أنت
    اتقاء الله في المعاملة هو غذاء هذا الحب هو الماء والهواء لهذا البستان فارويه دائما بهذه التقوى .

  19. akeed Said:

    الموضوع شائك جداً وهو علاقة ام الزوج بالزوجة و توجد بعض المشاعر للأم لا تفهمها الزوجة وهى ان ابنها كان معها طوال العمر منذ نعومة اظفاره حتى اصبح رجلاً وسوف يتزوج فعندما يتزوج تشعر الام بأن الابن قد بَعُد عنها وأخذته امرأه أخرى فهنا المشكلة هى مشكلة الزوج أن لا يشعر أمه بالجفاء وانه عندما تزوج هو ايضاً بار بأمه غير مقصر فى برها والسؤال عنها وهذا الشىء لا يزعج الزوجة لأن رضا الله على الرجل يحدث من رضا امه عنه ورضا الله عن الزوجة يكون من رضا زوجها عنها فالعلاقة منفعه مشتركة عندما تحب الزوجة ام زوجها وتعاملها معامله حسنة ينعكس ذلك على الزوج وعلاقته مع زوجتة مع حس زوجتة على بر امه باستمرار ، ولو حدث ذلك لن تكون هناك مشاكل بين الحماه والزوجة لان هدف الام فقط ان يبرها ابنها . ولاكن هناك ايضاً حماوات متسلطة تحب ان تتدخل فى جميع شئون ابنها حتى بعد الزواج وذلك يخلق المشاكل وتلك النقطة يكون الزوج هو الحاسم فيها حيث يضع القواعد منذ بداية الزواج ومنها عدم تدخل اى احد فى شئونه هو وزوجته لاسيما النصيحة التى تنصحها ام الزوج للزوجة فيجب ان نحترم وجهة نظرها ولاكن القرار دائماً للزوج .
    اسال الله ان يؤلف بين جميع الزوجات وامهات الازواج …….اللهم امين

    تحياتى البوست رائع

    أكيـــــــــــد

  20. انــتــحــاري Said:

    موضوع جميل

    ربنا يحقق امانيك يارب

    ويوفقك

    اتمني تزوري صفحتي

  21. د/عرفه Said:

    السلام عليكم
    مش عارف حسيت كده فى البوست ده
    ان شكلك مشحون اوى
    يظهر انك معبية منهم جامد اوى
    بالنسبة لىّ
    اظن ان حماتى هتكون ان شاء الله ست زى العسل
    بالعند فيكِ
    ههههههههههههههههههه
    بجد انا عارف ان الموضوع فعلا حقيقى وده نتيجة ترسبات نفسية
    الابن بيتحول من امه هى كل حاجة لواحده تيجى تشاركها الحب ده
    والعكس برضه مع البنت
    بصراحه انا شايف ان الواحد لازم يكون ذكى ويعرف يتعامل كويس ويحاول يرضى شريكه وحماته فى نفس الوقت من غير ما يزعل اى طرف

  22. momken Said:

    تسلم ايدك

    رساله رائعه…واجمل ما فيها انها صادره من انثى لانثى

    اتمنى جميع الاناث يقرائوها

    جوزاكى الله خيرا؟

    كلامك جميل جداً

    ماشاء الله

    تحياتى

  23. salwa Said:

    السلام عليكم
    ساكون واقعية ,وارجو ان تكون العلاقة ضمن الاحترام
    الحماة من الصعب ان تحب كنتها كابنتها
    و العكس صحيح,ولكن ليتقوا الله في تعاملهما مع بعض
    الحماة تنظر للكنة انها سلبتها فلذة كبدها ,فلماذا زوجته؟!و الكنة ستكبر و تزوج اولادها…….
    وليتذكر الجميع ان العمر قصير
    رائعة كعادتك
    سلام

  24. mohamed ghalia Said:

    واضح إنى خدت على الرسائل الإفتراضية هههههههههههه
    ولأمى بقى مش حماتى هقول
    لما اتقدمت لبنتك أكيد حسيت انك أمى زى ما إنتى أمها وأكيد كل أم تتمنى السعادة لأولادها عشان كده أكيد هتحبنى

  25. هاني النجار Said:

    والله يا موناليزا أنا شخصياً ربنا أكرمني في حماتي، انسانة طيبة جداً ربنا يعطيها الصحة والعافية، ويهدي كل حماه عاوزة الحرق، ونسيت إنها في يوم من الأيام كانت زوجة أبن.

    لكِ أجمل تحية يا موناليزا

  26. ســـــــهــــــــــر Said:

    طيب انا حماتى اتوفت قبل ما اشوفها
    اعمل ايه
    اكتبها لها ايه ؟؟

    الله يرحمك

    —————

    موناليزا الجميله
    طبعا انا فاهمه كويس اثر الحماه السيئه
    لكن كمان فيه حماوات رائعين و يمكن هم اللى شايفين الامرين ( من المر بضم الميم ) من زوجة ابنهم او زوج ابنتهم
    عافانا الله من الشرور جميعا

    تحياتى و سعادتى بك و بمدونتك الجميله

  27. موناليزا Said:

    المعتصم
    ـــــــــــ
    اخى الفاضل/ ماكنتش ناوية انشر تعليقك وكنت هرد عندك لكنى وجدت انى مش مسموح ليا بدخول مدونتك!!

    انا شايفة انك كبرت الموضوع زيادة عن اللزوم انا قلت لك انى عارفة انك اكيد ماكنتش تقصد بس هى الكلمة اللى ضايقتنى يعنى الموضوع كله ماضايقنيش
    ودى طبعا مدونتك وانت حر فى كل كلمة تكتبها
    كان كل اللى يرضينى انك تقولى ماكنتش اقصد وخلاص مش تقفل المدونة او تلغى الموضوع
    عموما انا طبعا متقبلة اسفك بس مش متقبلة ابدا انك تمنعنى من دخول مدونتك:)(ولا يعنى عشان انا من وجه بحرى انا ممكن ابقى صعيدية جدا واعمل احتلال لمدونتك انا وصحباتى الصعايدة المتفبركين فالطيب احسن وافتح المدونة بدل مااكسر الباب من كتر خبطى عليه وبعدين خسارة الباب ده المدونة لسة جديدة ومش حمل مصاريف وعمال وخصوصا ان العمال دلؤتى بقوا بالحجز
    تك تك تك(انا كده بخبط على الباب .. حتى الجرس شيلته؟:))
    تك تك تك

    انا هفضل واقفة كتير على باب المدونة ولا ايه يلا ورينى اخلاق الصعايدة وشهامتهم وافتحلى الباب وقولى اتفضلى:))
    ====
    بعيدا عن كل هذا
    فى انتظار رسالتك لحماتك المستقبلية
    دمت طيبا ولمدونتى زائرا

    **********************************

    مسدس صغير
    ــــــــــــــ
    اهلا بيك يافندم
    🙂 وبعد ده كله عايزها توافق على زواجك من بنتها :)!
    اشكرك جدا لرايك ولمشاركتك
    وربنا يرزقك بالزوجة الصالحة ويهيئلك كل الخير
    دمت طيبا ولمدونتى زائرا

    ********************************

    الربان
    ــــــــــ
    اهلا بيك يافندم
    صح جدا
    اشكرك جدا لرايك ولمشاركتك
    دمت طيباولمدونتى زائرا

    *******************************

    لجين ابوالدهب
    ــــــــــــــ
    اختى الحبيبة:اشكرك جدا لرايك ولمشاركتك
    وربنا يسعدك ياحبيبتى ويباركلك فى حياتك
    ربنا يعزك ويرضى عنك يارب فماتوفيقى الا بالله
    أحبك الذى أحببتنى فيه وانا ايضا اشهد الجميع أنى أحبك فى الله:)
    اشكرك على تمرير التاج وارجو قبول معذرتى فى عدم الاجابة عليه
    نورتينى لجين الجميلة ودمتِ بخير

    ***********************************

    مجداوية
    ــــــــــ
    وعليكم السلام ورحمة الله وبركاته
    اختى الحبيبة:أضحك الله سنك:)
    وانا مبسوطة انك ضحكتى(لقيت نفسى بضحك انا كمان لما قلتى انك ضحكتى:))
    الله عليكِ
    ما اجمل رسالتك
    ربنا يباركلك فى نسمة ويفرحك بيها
    اشكرك جدا لرايك ولمشاركتك
    نورتينى حبيبتى ودمتِ بخير

    *******************************

    اكيد
    ـــــــــ
    اهلا بيك يافندم
    اشكرك جدا لرايك ولمشاركتك
    وفعلا العيب على الزوج
    ربنا يهيئلك كل خير
    دمت طيبا ولمدونتى زائرا

    *********************************

    انتحارى
    ــــــــــــ
    اهلا بيك يافندم فى زيارتك الاولى
    ربنا يكرمك واشكرك جدا لرايك
    انتظر زيارتى قريبا باذن الله
    نورت مدونتى وارجو دوام التواصل

    *******************************

    د/ عرفة
    ـــــــــــ
    وعليكم السلام ورحمة الله وبركاته
    اهلا بيك يادكتور
    والله هو باين اوى كده:)
    بالعند فيا ليه بس وانا اكره! ربنا يسعدك ويهيئلك كل الخير
    المعادلة بتكون صعبة على فكرة وخصوصا لو كان احدى الطرفين متسلط
    اشكرك جدا لرايك ولمشاركتك
    دمت طيبا ولمدونتى زائرا

    ********************************

    ممكن
    ــــــــ
    اهلا بيك يافندم
    اشكرك جدا لرايك ربنا يعزك
    اين رسالتك؟
    دمت طيبا ولمدونتى زائرا

    *******************************

    سلوى
    ـــــــــ
    وعليكم السلام ورحمة الله وبركاته
    اختى الحبيبة:اشكرك جدا لرايك ولمشاركتك
    وفعلا معاكِ حق
    نورتينى سلوى الجميلة ودمتِ بخير

    ******************************

    محمد غالية
    ـــــــــــــ
    اهلا بيك استاذ محمد
    ربنا يسعدك ويرزقك بالزوجة الصالحة ويحقق لك كل ماتتمنى
    اشكرك جدا لرايك ولمشاركتك
    دمت طيبا ولمدونتى زائرا

    *********************************

    هانى النجار
    ــــــــــــــ
    اهلا بيك استاذ هانى
    ربنا يسعدك ويهديها لك كمان وكمان ويباركلك يارب فى حياتك
    اشكرك جدا لرايك ولمشاركتك
    دمت طيبا ولمدونتى زائرا

    *********************************

    سهر
    ــــــــ
    اختى الحبيبة:جميل انك تدعيلها حلو اوى كده:)
    معاكِ طبعا ان فيه الحلو وفيه الوحش فى جميع اصناف البشر
    ربنا يسعدك يارب ويباركلك فى حياتك
    اشكرك جدا لرايك ولمشاركتك
    نورتينى سهر الجميلة ودمتِ بخير

  28. ghorBty Said:

    السلام عليكم

    ربنا يبارك لك يا موناليزا يا حبيبتي

    وربنا ييسر لك امور اللهم امين ويسعد ايامك الجايه وتكون كلها سعاده وهنا اللهم امين

    موضوع رائع كالعاده وصدقت في كل كلمه

    واللي بيعمل خير بيعمله لنفسه واللي بيعمل شر برضوه لنفسه

    انا لسه برا المواضيع ديه ومش عايزه اكتب رساله لمجهوله لما تبقي تجي بقا وربنا يقدر

    دعواتك🙂 حبيبتي في الله

  29. همس الاحباب Said:

    لا حول ولا قوة الا بالله
    مش هينفع اكتب حاجة بصراحة
    غير انهم يتقوا الله
    وان كل حما تعتبر ان زوجة الابن مثل وبنتها
    وزوج الابنة مثل ابنها
    فى هذه الحالة سوف تتغير امور كثيرة
    تحياتى

  30. TIMMY !! Said:

    السلام عليكم ,
    للأسف فعلا الواحد بيسمع إن الحماة دي أساس المشاكل ,

    و نفسي أعرف هي بتعمل كده ليه ؟؟

    هي مش المفروض إنها بتحب ابنها ؟؟
    أمال بتنكد عليه ليه ؟؟

    ربنا يهدينا , و يعافينا من هذا مستقبلا إن شاء الله ..

  31. موناليزا Said:

    غربتى
    ــــــــــ
    وعليكم السلام ورحمة الله وبركاته
    اختى الحبيبة:ربنا يكرمك ويتقبل دعائك ويسعدك كما اسعدتينى اللهم امين
    اشكرك جدا لرايك فماتوفيقى الا بالله
    رزقكِ الله بالزوج الصالح وحقق لكِ كل ماتتمنى
    نورتينى ياجميلة ودمتِ بخير

    ********************************

    همس الاحباب
    ــــــــــ
    اهلا بيك استاذ خالد
    اشكرك جدا لرايك ولمشاركتك
    دمت طيبا ولمدونتى زائرا

    *******************************

    تيمى
    ـــــــ
    وعليكم السلام ورحمة الله وبركاته
    اهلا بيك يافندم
    ده نفس سؤالى لو عرفت الاجابة ياريت تعرفنى:)
    ربنا يرزقك بالزوجة الصالحة ويهيئلك كل الخير
    اشكرك جدا لمشاركتك
    دمت طيبا ولمدونتى زائرا

  32. أم أحمد المصرية Said:

    حبيبتي موناليزا
    اولا واحشني الحوار معك و ادعو لك بالسعادة و راحة البال و لو ان السعادة بتكون في الجنة اما الدنيا فلا تخلو من المنغصات التي قد يكون احد اسبابها حماة متسلطة و ان كان ليس كل الحموات سيئات و لكن المشكلة في اختلاف طريقة التفكير بين الاشخاص و اعتقاد كل انسان خصوصا مع تقدمه في العمر انه دائما علي صواب و لا يخطيء و الاصغر سنا هو المخطيء دائما خصوصا بقي لو زوجة ابنها🙂
    رحم الله حماتي و غفر لها و جزاها خيرا ان انجبت لي زوجي لذلك لن اوجه لها رساله و لكني سأوجهها لنفسي لأني سأصبح حماة عد عدة سنوات ان شاء الله ربنا يخلي احمد و اخواته تذكري يا ام احمد ان سعادة ابنك في يد هذه الزوجة فأسعديها لتسعده و تذكري نفسك عندما كنت في سنها كم كنت تحبين الاستقلال
    يا ام أحمد هي لم تخطفه منك و لن تسيطر عليه و تقلبه ضدك الا اذا اراد هو ذلك اي ان العيب سيكون في احمد وقتها لأنك لم تربيه جيدا ليكون رجلا ذو عقل راحج
    تذكري يا ام أحمد ان الفضول من اسوا الصفات بالله عليك يا شيخة خليك في حالك و اتركي احمد و زوجته في حالهم و ادعي لهم السعادة ووصي اخوات احمد البنات ما يعملوش حموات بالنيابة عنك و خليهم في حالهم

    ادعي لي يا موناليزا لما ابقي حماة ابقي افتكر الكلام ده و ان شاء الله اكون حماة طيبة لأن مامتي ربنا يعطيها الصحة حما زي العسل و الله

  33. حسام غانم Said:

    همممممممم

    الحماة

    ذلك الموضوع الأزلي

    هو يمكن سبب الخلاف

    إن الأم دايما تقارن بين نفسها وهي صغيرة وبين عروسة ابنها

    وبالتالي بتطالبها بحاجات كتير

    ومتهيألي من واجب الزوجة

    إنها تتعامل مع الفترة دي بكياسة

    وتكسب الأم في صفها سريعا

    عشان تتلافى المشاكل -الفسيولوجية- اللي بتحصل في أول سنة

  34. jonoon 3aqel Said:

    أقول لك ايه يا حماتي…؟؟؟
    مممم ايه؟ ايه؟
    ===
    اولا…أريد أن تعلمي بأني سأبذل كل جهد لكي أسعد ابنتك..
    و كما أخذتها أميره من بيت أهلها..ستعيش عندي كما واحده..مادامت تقوم بواجباتها…فسأعطيها حقوقها و زياده..
    سأعفو..و أصفح..و أصبر..
    و أريد المثل..
    تأكدي بأني سأراعي جوهرتك..و أحافظ عليها..
    فإن اشتكت لكي..فكوني خير ناصح لها..
    و إن فضحت سرا..فاكتميه..
    و أن اختلفنا..فأصلحي بيننا..

    نامي قريرة العين..فابنتكِ بأيد أمينه…
    ====
    جزاك الله خيرا

    تحياتي…

  35. mahasen saber Said:

    مونا اختيار الصوره ظريف جدا جدا ومناسب قوى بدون جدال

    والبوست اكتر من رائع يكفى انه وصلى ولاى ام بكره تبقى حما وصلنا مفهوم ورساله وتنبيه ما

    ربنا يكرمك دايما ويجازيكى كل الخير

    وحشتينى جدا جدا يا جميله
    بجد يا مونا والله ليكى وحشه جامده يا غاليه

  36. المعتصم Said:

    ملحوظة صغيرة جدا
    انا مش مانع دخولك انتى على المدونة
    انا قفلتها خالص
    ومافيش حد خالص بيدخل عليها
    تحياتى
    سلام

  37. حاجات جوايا Said:

    ممممممم
    والله انا شايفة ان الجهل هو أهم عوامل ظهور الحماة المتسلطة
    الجهل بالدين
    والجهل بالاصول
    والجهل بالتربية

    حماتى الحمد لله ست طيبة
    هقولها ربنا يديكى الصحة وينولك مرادك ويفرحك ببنتك يارب وميحوجكيش لحد ولا حتى ولادك

    اما انا بقى ربنا يستر عليا لما ابقى حما ان شاء الله هههههههههه
    😉 وش بيغمز

    لالالالالا انا ان شاء الله هبقى طيبة متخافيش🙂

    خالص ودى
    سالى

  38. اللؤلؤة Said:

    موناليزا
    السلام عليكم
    أنا أختلف معكِ فى بعض النقاط فلقد كانت حماتى رحمها الله حمامة سلام بيننا
    وكذلك أمى ووالدى متعهما الله بالصحة والعافية فزوجتى تعتبرها أمها الحقيقية وعندما تحل أمى علينا تأتى معها بما لذ وطاب وزوجتى تعتبر قدومها يوم عيد فى البيت وكذلك الأولاد
    دمت بكل الخير

  39. وردة Said:

    اه ثم اه ثم اه
    بجد انتي جيتي علي الجرح زي ما بيقولو
    انا سبب فشل ارتباطي كانت الحماة
    بس مش والدته لا اخته
    والدته ربنا يرحمها كنت اعرفها ست زي العسل ودايما بدعيلها بالرحمة والمغفرة حتي بعد ابتعادي عن ابنها بس حماتي
    اللي هي اخته الاصغر كانت الجحيم بعينه
    بقولها
    “استفدتي ايه ولحد فين
    مش عاوزة حد غيرك يكون معاه
    طيب انتي حتسبيه وتتجوزي
    عملتي زي الحموات ووقعتي الدنيا في بعضها
    دبرتي وخططتي
    يارب بس تكوني استريحتي
    مش حقول غير حسبي الله ونعم الوكيل”
    اما عن حماتي المستقبلية
    “انا عمري ما بكره حد حتي اللي بيجرحني مش بعرف اكرهه
    بحبك علشان بحب ابنك
    وحسعدك علشان انتي وهو شئ واحد
    لو بتحبيه فعلا حبيني انا كمان
    وحتي لو حتعمليني مش كويس وده انا بستبعده منك
    انا برضو بنتك
    وبحبك”
    سلام

  40. Rania Said:

    جزاك الله خيرا ياامه الله على الموضوع الرائع ده و يا ريت يتعلموا منه

    تحياتى

  41. الجواز و سنينه Said:

    الله عليكى
    ايه الكلام الجامد ده
    موضوع جدا خصوصا انى اعرف ناس فعلا كانت سبب فى مشاكل وصلت للطلاق
    ربنا يهدى الناس جميعا
    و يارب نهدى بقى

  42. موناليزا Said:

    أم أحمد المصرية
    ــــــــــــــــــ
    اختى الحبيبة:وانتى كمان وحشتيييينى جدا وواحشنى تواجدك ماتغيبيش علينا تانى بقى:)

    صدقتِ غاليتى احنا لسه فى الدنيا
    🙂 والله انتِ عسل ربنا يفرح قلبك بولادك يارب وتبقى حماة طيبة ومحبوبة جدا كمان
    عموما رسالتك فى الحفظ والصون:)
    وقبل فرح أحمد بإذن الله هعملك دعوة لقرائتها وتذكر ماكتبته يداك يوما ما
    نورتينى غاليتى وسعيدة جدا بتواجدك وبمشاركتك

    ***********************************

    حسام غانم
    ـــــــــــ
    اهلا بيك استاذ حسام
    أوقات كتير الحماة بتبقى مبينة انها ملاك وبتحب زوجة ابنها حتى تأتى الضربة الغادرة والقاتلة من ناحيتها دون حتى ان تستوعب الزوجة السبب
    (لايغرنك من الثعبان ملمسه)
    المرضى النفسيين مش اى حد يتعامل معاهم
    اشكرك جدا لرايك وفى انتظار رسالتك
    دمت طيبا ولمدونتى زائرا

    ********************************

    جنون عاقل
    ـــــــــــــــ
    اهلا بيك يافندم
    تعرف لو ليا بنت وانت قلتلى الكلمتين دول هديهالك بجد وانا مطمنة المهم مايكونش كلام وبس:)
    رزقك الله بالزوجة الصالحة وكنت لها نِعم الزوج
    اشكرك جدا لرايك ولمشاركتك
    دمت طيبا ولمدونتى زائرا

    ********************************

    محاسن صابر
    ــــــــــــــ
    اختى الحبيبة:اشكرك جدا لرايك فى الصورة(دورت على حاجة تعبر عن الحماة ملقتش غير دى:))
    مبسوطة جدا بتعليقك وبمشاركتك وربنا يفرحك ببيرو ويرزقك بكل الخير
    وانتى كمان ياسونا ياجميلة وحشتتييينى جدا ويارب تكونى فى احسن حال
    نورتينى حبيبتى ودمتِ بخير

    ********************************

    المعتصم
    ـــــــــ
    شكرا يافندم

    *******************************

    حاجات جوايا
    ــــــــــــــ
    اختى الحبيبة:اشكرك جدا لمشاركتك
    وربنا يتقبل دعائك لحماتك ويفرحك بولادك وتبقى حماة طيبة:)
    نورتينى سالى الجميلة ودمتِ بخير

    ********************************

    الؤلؤة
    ــــــــــ
    وعليكم السلام ورحمة الله وبركاته
    اهلا بيك يافندم
    ولمَ الاختلاف اخى الفاضل فماذكرته واقعى
    ومن حسن حظك ان حماتك ووالدتك بنفس درجة الطيبة والحب لاولادهما(ليس الكل هكذا)
    ربنا يرحم حماتك ويباركلك فى عمر والدتك
    اشكرك جدا لمشاركتك
    دمت طيبا ولمدونتى زائرا

    ********************************

    وردة
    ــــــــ
    اختى الحبيبة:عذراً لما ذكرتك به
    وربنا يعوض عليكِ يارب ويرزقك بالزوج الصالح
    اشكرك جدا لمشاركتك ورزقكِ الله بكل الخير
    نورتينى وردة الجميلة ودمتِ بخير

    *******************************

    رانيا
    ــــــ
    اختى الحبيبة:اهلا اهلا بعد طول غياب
    ربنا يكرمك واشكرك جدا لرايك وفى انتظار رسالتك
    نورتينى رانيا الجميلة ودمتِ بخير

    **********************************

    الجواز وسنينه
    ـــــــــــــــ
    اختى الحبيبة:اهلا بيكِ فى زيارتك الاولى
    اشكرك جدا لرايك وفى انتظار رسالتك
    نورتينى حبيبتى ودمتِ بخير

  43. حسام غانم Said:

    اللي عايز أقوله يا موناليزا

    إن الحموات دول مش مخلوقات فضائية

    ولا هما بيتولدوا حموات

    عشان نقول إنهم بيكرهوا ويفرقوا ويلدغوا

    الحموات دول كل الستات في فترة معينة من حياتها بتبقى حماة

    فاهماني

    فقصدي نبص للموضوع من وجهتين النظر

    ممكن من وجهة نظرك أو من وجهة نظر زوجة الابن يعني

    ان الحماة بتغضب ابنها عليا وعايزياني خدامتها
    وبتتمسكن وهي قدامه والكلام ده

    بس لو بصينا من وجهة نظر الحماة
    حطي نفسك مكانها يعني ( وده هيحصل يعني إن شاء الله ) مع مرات ابنك

    وشوفي اية البنت المايعة الملطخة بالأصباغ دي اللي كلت دماغ الواد

    بقى يسيب بنت خالته عشان المسلوعة دي

    وكمان شوف مش مدياني ريق حلو ازاي

    اش حال هي اللي جاية علينا

    والكثير من هذا الكلام

    اللي أقصده يعني

    إن الحماة ممكن تبقى شايفة البنت مش عاجباها أو مش قادرة تبعد عن ابنها أو عوامل كتير

    بس الذكاء والكياسة بقى عالبنت انها تقدر تاخدها في صفها وتتصاحب عليها وتحسسها كأنها بنتها

    بس

    اه بالمناسبة انت ليكي تاج عندي من يومين

    ازاي مقولتلكيش كل ده ؟

    اوعي تهربي

    تحياتي ليكي

  44. نهــــــــــار Said:

    السلام عليكم …
    حقيقتا لن أعلق للحماة ..
    بل للنفس البشريه …

    أتقي الله…

    دمت بخير

  45. د. إيمان مكاوي.. أم البنين Said:

    أم زوجي الحبيب
    أدام الله عليك الصحه والعافية
    وجزاك الله كل الخير على ما أهديتني

    وإلى كل حماه
    أرفقن بزوجات أبنائكم وتاملن معهن كبناتكن تفزن في الدنيا والآخره

    تحياتي

  46. موناليزا Said:

    حسام غانم
    ـــــــــــــ
    اهلا بيك استاذ حسام
    فاهماك والله يافندم بس حضرتك بتتكلم عن الحماوات الطبيعيين اللى بيضايقوا من زوجة ابنهم لاى من الاسباب اللى حضرتك ذكرتها او غيرها
    اما اذا كانت الحماة هى من رشحت هذة الزوجة لابنها منذ البداية واذا كانت الزوجة قايدة لها صوابعها العشر شموع ولا يوجد سبب منطقى بحق الله يجعلها تهدم بيت ابنها فإليها أهدى هذا الموضوع
    بس برضه ماكتبتش رسالة لحماتك:)
    اشكرك جدا لمتابعتك وفى انتظارك دائما
    وارجو المعذرة فى اجابة التاج
    دمت طيبا ولمدونتى زائرا

    ***********************************

    نهار
    ــــــــ
    وعليكم السلام ورحمة الله وبركاته
    اختى الحبيبة:اهلا اهلا بالقمر بعد طول غياب

    ونِعم القول
    اشكرك جدا لمشاركتك
    نورتينى حبيبتى ودمتِ بخير

    *****************************

    د. ايمان المكاوى .. ام البنين
    ــــــــــــــــــــــــــــــــ
    اختى الحبيبة:اهلا اهلا بعد طول غياب فينك من زمان يارب تكونى بخير

    ربنا يباركلك فى حياتك ويخليلك حماتك
    اشكرك جدا لمشاركتك
    نورتينى حبيبتى ودمتِ بخير

  47. ومازلتُ أتعلم Said:

    موضوع مهم جداً جداً
    ودايماً الحموات من أهم اسس المشاكل
    نصائح غالية ياموناليزا
    ربنا يكرمك.

  48. حاسوباتيه Said:

    حماتي عسوله جدا وطيبه جدا بقولها ربنا يخليكي وانا بحبها بجد والله حتى بقول لخطيبي لما ازعل هروح لحماتي مش مامتي

  49. (أم البنين) Said:

    فعلا لو تفكرت كل حماة أنها كانت عروسا وكان لها حماة
    ولو تفكرت كل زوجة أنها ستكون يوما ما…حماة
    ولو تخيلنا الموقف يوم القيامة
    لهانت كل الصغائر التي تسبب تغيير النفوس
    جزاك الله خيرا أختي

  50. Nostor Azzuro Said:

    ارحموا من فى الأرض

    يرحمكم من فى السماء

  51. موناليزا Said:

    ومازلت أتعلم
    ـــــــــــــــــ
    اختى الحبيبة:ربنا يعزك واشكرك جدا لرايك ولتواجدك
    وفى انتظار رسالتك
    نورتينى حبيبتى ودمتِ بخير

    ********************************

    حاسوباتية
    ــــــــــــــــ
    اختى الحبيبة:ربنا يديم عليكِ حبها ليكِ ويباركلك فى حياتك
    اشكرك جدا لمشاركتك
    نورتينى حبيبتى ودمتِ بخير

    *******************************

    ام البنين
    ـــــــــــــ
    اختى الحبيبة:اهلا اهلا بالقمر
    ربنا يكرمك واشكرك جدا لمشاركتك
    نورتينى ياجميلة ودمتِ بخير

    ********************************

    نوستور ازورو
    ـــــــــــــــ
    اهلا بيك يافندم
    اشكرك جدا لمشاركتك
    دمت طيبا ولمدونتى زائرا

  52. MOHAMMED ELBANNA Said:

    رسالة الي حماتي المستقبلية:
    (انتى لي كأمي الحبيبه وارجوا ان تسامحيني اذا اختلفنا واغفري لي كل ما هو سيئ واعدك ان احافظ على ابنتك وان تكون هي تاج رأسي الذي ينير لي الطريق ، حماتى العزيزه اذا أسأتي إلي سأسامحك ويكفيني انكي اهديتني فلذة كبدك وقره عيني زوجتى الحبيبه )
    محمـد زوج ابنتك

  53. سوبيا Said:

    لحماتي
    وعمتي
    بحبك
    اكتر ما بتحبيني

    ربنا يخليكي ليا
    ويديكي الصحة

  54. Gannah Said:

    حلوة حكاية الرسالة الافتراضية دى
    بس انا هقولها يا طنط علشان انا مش هعرف اقول يا ماما لحد غير ماما
    طنطى حبيبتى
    بجد بتمنى انى لما الاقى ابنك تكونى عايشة ومنورة حياته
    انا هحبك لانك امه اولا ولانك هتكونى سبب فى بركة تدخل حياتنا
    شوفى انا مش هنتظر انك تعاملينى كويس
    انا هبدأ واعاملك بما يرضى الله وكمان بصراحة هدلعك لانى مقدرة انى هاخد منك ابنك
    هشجعه انه يبرك ويدلعك هو كمان علشان متحسيش انه بعد عنك
    مهما عملتى هسامحك لانك زى امى بالظبط
    انا هعاملك بمبدأ “ادفع بالتى هى أحسن”
    ومتأكده انه هيجيب نتيجة هايلة لانى مجرباه مع ناس كتير
    كمان متأكده ان ابنك هيكون انسان عارف قيمة الام وهيعاملك بما يرضى الله وهيغض الطرف عن اى محاولة للتدخل منك وطالما هو عاقل ان شاء الله مش هتكون فيه مشاكل
    ربنا يبارك فيك ويخليكِ يا طنط
    تحياتى

  55. من غير عنـــوان Said:

    بناءا على طلبك

    إلى كل حماه

    إتق الله في مرات إبنك أو زوج بنتك

    وإعلمي أنه كما تعاملين الناس فسوف يعاملك الناس في أبنائك… ولو بعد حين

    وأقرب الطرق إلى الآخرين هي الحب

    أما عن حماتي أنا شخصيا رحمها الله فقد كانت ست أميره
    وللحق كان لحماي فضل بعد الله في ذلك

    فالرجل هو عصب الأسره

    أمنياتي

  56. ملكة بحجابى Said:

    الله الموضوع مهم جدا
    وبناء عليه رسالة الى حماتى المصون على اعتبار ماكان سوف يكون
    والله يا طشنط انتى ظلمتينى اوى .. وانا كنت حطاكى فوق راسى .. ومش كل انسانةليها ظروف عائلية بقت منتشرة جدا يتحكم عليها عشان والدها مش موجود انها تتحرم من دفا وحنية زوج كمان .. عمة ربنا يهديكى وتلاقيلو واحدة افضل منى مع ان مافيش واحدة كانت هتصونه وتطيعك انتى شخصيا ادى .. لانى اتقيت ربنا فيكو .. يالله بئى عشان مااعيطش

    تقبلى مروووورى
    وجامد ومهم جدا موضوع الحماه المتسلطة

    ملكة بحجابى

  57. موناليزا Said:

    محمد البنا
    ــــــــــــــ
    اهلا بيك استاذ محمد
    ربنا يكرمك ويرزقك بالزوجة الصالحة اللهم امين
    اشكرك جدا لمشاركتك
    دمت طيبا ولمدونتى زائرا

    ********************************

    سوبيا
    ــــــــــ
    اختى الحبيبة:اهلا بيكِ فى زيارتك الاولى
    ربنا يسعدك ويباركلك فى حياتك
    اشكرك جدا لمشاركتك
    نورتى مدونتى وارجو دوام التواصل

    ********************************

    جنة
    ــــــــــ
    اختى الحبيبة:اهلا اهلا ياجميلة
    ربنا يسعدك ويرزقك بالزوج الصالح
    اشكرك جدا لمشاركتك
    نورتينى جنتى الجميلة ودمتِ بخير

    ********************************

    من غير عنوان
    ـــــــــــــــ
    اهلا بيك يافندم
    ربنا يكرمك ويباركلك فى حياتك
    اشكرك جدا لمشاركتك
    دمت طيبا ولمدونتى زائرا

    ********************************

    ملكة بحجابى
    ــــــــــــــــ
    اختى الحبيبة:اشكرك جدا لرايك ولمشاركتك
    وربنا يعوض عليكِ يارب ويديهم على قد نيتهم معاكِ
    نورتينى حبيبتى ودمتِ بخير

  58. المعتصم Said:

    شكرا ياافندم !!!!!!!!!!!!
    يبقى انتى لسه واخده على خاطرك من الكلمه
    وكمان اللى ضايقنى قوى بعد ماقلتلك انى مكنتش اقصد
    انك قلتى ودى طبعا مدونتك وانت حر فى كل كلمة تكتبها
    بكده انا اتأكدت انك زعلانه خالص من الكلمة
    والموضوع ده ماتعرفيش عامل فيا ايه
    معلش انا ممكن اكون بضايقك بالموضوع ده بس انا مش بحب اى حد يزعل منى
    تحياتى ودمتى بكل خير وود
    والسلام عليكم ورحمة الله وبركاته

  59. hasona Said:

    السلام عليكم

    الي الحموات القاتنات
    عاملي زوج ابنتك/زوجة ابنك
    كفرد من اسرتك
    وليس غريمة
    أو حد أخد حاجة منك
    وانت عايزة تعاقبيه وخلاص

    وكده هتستريحي لو عاملتيها كبنتك
    والحياة ستكون أفضل وأحسن للجميع

    تحياتي

  60. الشاعر محمد عبدالرحمن Said:

    بارك الله فيكي على الموضوع الجميل
    حقيقةً هو موضوع مفيد
    بس يارب بعض الحموات يبطلوا شغلهم ده

  61. حارة سد Said:

    بالطبع كما هو قانون الحياة

    لا يوجد شيء للتعميم ولا توجد قاعدة الا ولها شواذ

    ليست كل الحماوات كما في أذهاننا بتسلطها وسطوتها ..وليست كلهن في الطيبة والتفاهم سواء

    فقط..ربح من أجاد التعامل معهن أيا كانت أخلاقهن

    الحارة سد

  62. dreem Said:

    السلام عليكم ورحمة الله وبركاته
    حماتى ربنا يرحمها ويتجاوز عن سيئاتها .. اللهم امين
    كنت بحبها ووحشتنى جدا
    اعتقد ان تربية الستات بتوع الاجيال اللى فاتت هى السبب !
    الولد عندهم بيكون مهم اوى وبيحسوا بطريقة او بأخرى انه السبب فى سندة ضهرهم ههه
    ويمكن الاحساس ده لما بيتمكن منهم وفالغالب بيتمكن بيحسوا بالتهديد من دخول امرأة اخرى لحياة ابنهم .. سندهم
    وده بيكون سبب سوء المعاملة والجفاء
    ربنا يهدى
    تحياتى

  63. (المهاجر الى الله) Said:

    السلام عليكم ورحمة الله وبركاته :
    الله يجازيهم بقة بتوع الافلام والسينيما اللى صوروا الحماة على انها ابو رجل مسلوخة وانها مفيش هم ليها الا العكننة على الزوجين عمال على بطال ،صحيح منكرش ان فيه حموات عايزيين الولعة بنار.. بس الحقيقة ان دول قلة او نسبة صغيرة ماينفعش نقارن بيها.
    والطلاق فعلا هو قرة عين الشيطان .. هوه كل همة ان يحصل طلاق ويتسد باب العفة الحلال فى وجوه الناس .. وكمان عشان الاولاد تتشرد فيكون سهل عليه اغوائهم.
    تحياتى:
    طارق سليم

  64. ذكري رحيل قلم Said:

    السلام عليكم
    مش عارفة اقول ايه بس هذا الموضوع ليس في كل البيوت سوف اذكر لك موقف قابلني انا وزوجات اخوة زوجي حيث كنا نشتري هدية عيد الام ودخلنا محل معين وكنا نتحدث عن الهدية وقيمتها كي تعجب حماتنا فردت علينا اخت لنا لا نعرفها وقالت كفاية انكم جبتم هدية كمان هاتفكروا في قيمتها سألناها انت جبتي ايه قالت والله ماجبت حاجة حماتي هي اللي جبتلي وحلفت عليا اني ما جيب لها حاجة هذا العام رديت عليها وقلتلها بسم الله ماشاء الله للاسف في فعلا حموات اكثر مما ذكرتي لدرجة انهن اي كلمة في بيت ابنها بتخرج برة لو سمعتها متعرفش انه بيت ابنها مثل بيتها تماما المفروض تحافظ علي اسراره
    لي صديقة حماتها فرقت بينها وبين زوجها في فترة لا تتعدي اربعة اشهر لدرجة انها كانت تأخذه ينام عندها ويترك زوجته وحيدة هانكتب لهم نقول ايه مثل هذه الحماوات نتعامل معهم علي انهم مرضي نفسيين حتي نحافظ علي العشرة بمعني اخر كما يريدن ان يفعلن يفعلن لكن المهم لا نتركهم يأخذن غرضهم ابدا
    ونصيحة لكل زوجة اذا كانت حماتك من هذا النوع هديها بهدية واضحكي في وجهها حتي لو هي عافة ان في مشكلة بينك وبين زوجك ومهما فعلت لا تقاطعيها ابدا
    ربنا يهدي حماتي عليا وعلي بيتنا جميعا ويهدي الازواج والزوجات
    اسفة للأطالة

  65. موناليزا Said:

    المعتصم
    ـــــــــــ
    اخى الفاضل/ إستنتاجك مش فى محله خالص على فكرة
    انا واخدة على خاطرى من حاجة تانية خالص

    ولمزيد من التوضيح سأعرض كل كلمة قلتها فى تعليقك وردى عليها

    ..مش هعلق على البوست او ابعت رسايل

    .انا مارديتش على الجملة دى لانه كان باين فيها اوى انك متنرفز
    رغم انى قلتلك بعد كده انا فى انتظار رسالتك(وواضح انى هستنى كتير:))

    ..انا جاى اقولك انى بجد كنت بهزر فر الرد بتاعى
    وانا مكنتش اقصد ابدا انى اجرحك او اوجعك زى ماانتى قلتى

    .
    .انا شايفة انك كبرت الموضوع زيادة عن اللزوم انا قلت لك انى عارفة انك اكيد ماكنتش تقصد بس هى الكلمة اللى ضايقتنى يعنى الموضوع كله ماضايقنيش

    ..
    وعلى فكرة انا عامل المدونة علشان افضفض فيها انما لو هتكون سبب لزعل حد منى(وخصوصا انك اخت فاضلة ويعلم معزتك ربنا)انا ممكن الغيها

    .
    ودى طبعا مدونتك وانت حر فى كل كلمة تكتبها
    كان كل اللى يرضينى انك تقولى ماكنتش اقصد وخلاص مش تقفل المدونة او تلغى الموضوع

    ..
    وعلى العموم انا هلغى البوست كله وكأنه مش موجود
    تقبلى اسفى على وجعك
    بجد انا اسف

    .
    عموما انا طبعا متقبلة اسفك بس مش متقبلة ابدا انك تمنعنى من دخول مدونتك:)(ولا يعنى عشان انا من وجه بحرى انا ممكن ابقى صعيدية جدا واعمل احتلال لمدونتك انا وصحباتى الصعايدة المتفبركين فالطيب احسن وافتح المدونة بدل مااكسر الباب من كتر خبطى عليه وبعدين خسارة الباب ده المدونة لسة جديدة ومش حمل مصاريف وعمال وخصوصا ان العمال دلؤتى بقوا بالحجز
    تك تك تك(انا كده بخبط على الباب .. حتى الجرس شيلته؟:))
    تك تك تك

    انا هفضل واقفة كتير على باب المدونة ولا ايه يلا ورينى اخلاق الصعايدة وشهامتهم وافتحلى الباب وقولى اتفضلى:))
    ====
    بعيدا عن كل هذا
    فى انتظار رسالتك لحماتك المستقبلية
    دمت طيبا ولمدونتى زائرا
    —-
    وبعد ردى على تعليقك ده اللى باين منه جدا انى خلاص مش زعلانة وانى تقبلت اسفك ومن البداية اصلا كنت عارفة انك ماكنتش تقصد بس حبيت اوضحلك عشان تاخد بالك بعد كده (فيها حاجة دى)

    كان ده ردك
    ..
    ملحوظة صغيرة جدا
    انا مش مانع دخولك انتى على المدونة
    انا قفلتها خالص
    ومافيش حد خالص بيدخل عليها
    تحياتى
    سلام


    يعنى برضه فضلت قافل المدونة رغم ردى بأنى مش هقبل انك تقفل المدونة بسببى ومع ذلك ماهتمتش وقفلتها(رغم المظاهرة اللى انا عملتها امام باب المدونة:))
    وكأن غلطتى انى عاتبتك على كلمة قلتهالى من غير ماتقصد بس ضايقتنى
    متهيألى كده عرفت انا زعلانة ليه
    ياترى بعد ده كله هتفضل قافل المدونة؟؟؟
    وممكن سؤال لو تسمحلى أنت زعلان انى عاتبتك؟؟؟

    والسلام ختام

  66. موناليزا Said:

    حسونة
    ــــــــ
    وعليكم السلام ورحمة الله وبركاته
    اهلا بيك يافندم
    الله يفتحها عليك
    ونِعم القول
    اشكرك جدا لمشاركتك
    نورت مدونتى وارجو دوام التواصل

    *******************************

    الشاعر محمد عبدالرحمن
    ـــــــــــــــــــــــ
    اهلا بيك استاذ محمد فى زيارتك الاولى
    ربا يكرمك واشكرك جدا لرايك
    وفى انتظار رسالتك
    نورت مدونتى وارجو دوام التواصل

    ***********************************

    حارة سد
    ـــــــــــ
    اهلا بيك يافندم
    عندك حق
    وفى انتظار رسالتك
    اشكرك جدا لرايك
    دمت طيبا ولمدونتى زائرا

    *********************************

    دريم
    ــــــــ
    وعليكم السلام ورحمة الله وبركاته
    اختى الحبيبة:فعلا والله معاكِ حق
    رغم ان فيه حماوات مسيطرين على ابنائهم وكأنهم لسة اطفال
    اشكرك جدا لرايك و لمشاركتك وارجو دوام التواصل
    نورتينى حبيبتى ودمتِ بخير

    ********************************

    المهاجر الى الله
    ــــــــــــــــــ
    وعليكم السلام ورحمة الله وبركاته
    اهلا بيك استاذ طارق
    مين قال بس انهم قِلة الشواذ على القاعدة يافندم اليومين دول الحماوات الطيبات ودول بنبص ليهم باستغراب قائلين بداخلنا “معقول هو لسه فيه كدة!”
    فى انتظار رسالتك الخاصة بحماتك
    اشكرك جدا لرايك
    دمت طيبا ولمدونتى زائرا

    *********************************

    ذكرى رحيل قلم
    ـــــــــــــــــ
    وعليكم السلام ورحمة الله وبركاته
    اختى الحبيبة:اهلا اهلا بالقمر
    المثال الاول ده حالة نادرة جدا
    اما الثانى فده العادى وعلى فكرة مابينفعش معاهم حاجة لان زى ماانتى قلتى مرضى نفسيين
    ربنا يهدى الجميع ويسعدك يارب ويباركلك فى حياتك
    بس انتى ماقلتليش جبتى لحماتك ايه فى عيد الام؟:)
    اشكرك جدا لرايك ولمشاركتك
    وطولى براحتك وماتتأسفيش تانى:) بحبك جدا
    نورتينى نور الجميلة ودمتِ بخير

  67. شمس النهار Said:

    بصراحه انا حماتي كانت صديقه وام لي رحمها الله اتخذتها ام فااتخذتني ابنه ولها معي مواقف جميله جدا وتعلمت منها اشياء كثيره جدا
    ولقد اهديتها بوست عندي في عيد الام

  68. دعاء مواجهات Said:

    باعتبار ما سيكون

    يارب تطلعى كويسة وطيبة

    بس كدة

  69. موناليزا Said:

    شمس النهار
    ــــــــــــ
    اختى الحبيبة:اتذكر موضوعك عنهاوربنا يجازيها عنك خير الجزاء
    اشكرك جدا لمشاركتك
    نورتينى حبيبتى ودمتِ بخير

    *******************************

    دعاء مواجهات
    ـــــــــــــــــ
    اختى الحبيبة:رزقكِ الله بالزوج الصالح وهئ لكِ كل الخير
    اشكرك جدا لمشاركتك
    نورتينى دعاء الجميلة ودمتِ بخير

  70. الازهرى Said:

    بالطبع ليس الحكم على العموم
    لأنه ليس كلهن كذلك

    اما عن لماذا يفعلن ذلك فهناك اراء كثيرة
    تتلخص فى اصحها وهو البعد عن تعاليم الله عز وجل
    وعدم الانصات الى حكمة الحياة

    تحياتى دوما

  71. موناليزا Said:

    الازهرى
    ـــــــــ
    اهلا بيك يافندم
    اشكرك جدا لرايك وفى انتظار رسالتك لحماتك
    دمت طيبا ولمدونتى زائرا

  72. المعتصم Said:

    السلام عليكم ورحمة الله وبركاته
    اولا انا مش زعلان انك عاتبتينى ولا حاجه
    انا بس زعلان انى كنت سبب فى حاجه ضايقتك
    ثانيا بخصوص المدونه فهو حصل فيها حاجه غريبه وانا مش عارف اظبطها وبصراحه مكسوف اسأل حد
    وكنت عاوز ارجعها وبحاول وربنا يسهل
    وبعدين ماالظاهر انك سلطتى اصحابك الصعايده المتفبركين عاملينلى مظاهرات على الميل
    وكمان بيضربوا طوب لما كسروا الشبابيك بتاعته
    انما اول ماالاقى حل للمشكلة العويصه دى هفتحها
    اصل انا مش عارف انا لعبت فين اصلا
    ………..
    بعيدا عن كل ده
    العيال فى المدرسه مطلعين عنيا ومش عارف اعمل معاهم ايه
    وكل اما اشرحلهم درس يقولولى الاستاذ اللى كان قبلك كان بيشرح لنا احسن منك وكمان كان بيملينا الحاجات اللى هتيجى فى الامتحان
    اعمل ايه انا فى الحوسه دى ؟؟؟؟؟؟؟؟
    شوفيلى حل الله يسترك
    تحياتى ودمتى بكل خير وود
    والسلام عليكم ورحمة الله وبركاته

  73. موناليزا Said:

    المعتصم
    ــــــــــ
    وعليكم السلام ورحمة الله وبركاته
    اهلا بيك يافندم
    اولا: عفا الله عما سلف
    ثانيا: مدرس كمبيوتر قد الدنيا ويبقى عنده مشكلة:)
    عموما على مااعتقد انك تدخل على”اعدادات” وبعدين “سماحات” وواضح انك مفعل أخر اختيار لو كان ده مظبوط المفروض تفعل اول اختيار
    وان شاء الله تلاقيها اتفتحت عادى

    ياخبر الشبابيك اتكسرت وانا اللى كنت خايفة على الباب:) يلا اهو برضه تهوية:)

    ===
    فين العصايا انا عايزة افهم:)
    عشنا وشفنا تلاميذ فى مصر بيتشرطوا ويتأمروا على المدرس
    أدخلهم بالطبنجة بعد كدا:)
    وامتحان ايه اللى بيسألوا عليه وهو اصلا مش بيضاف للمجموع:)

    وريلهم العين الحمرا وماتسمحش ليهم بالهزار معاك الا فى حدود(ده بجد على فكرة)

    (اى خدمة)
    دمت طيبا ولمدونتى زائرا

  74. موناليزا Said:

    جيجى
    ـــــــ
    اختى الحبيبة:رغم عدم وجود رابط مشترك بين موضوعى وبين ماذكر فى هذ الرابط الا انى اشكرك لاطلاعى عليه
    نورتينى جيجى الجميلة ودمتِ بخير

  75. نسيبه Said:

    السلام عليكم ورحمة الله وبركاته
    الحقيقة أنا لا أستطيع ان اتخيل موقفي ان وجدت حماتي كما تصفي ربنا يعافينا ويأجر صاحبة وصفك في مصيبتها ويجعله في ميزان حسناتها ويعوضها خيرا ولكن نرجع ونقول هذا قضاء الله وربنا يرزقنا الرضا بقضائه ويعافينا من هؤلاء الحموات وان كنت هابعت رساله لحماتي في المستقبل سأقول لها تذكري سؤال الله لك يوم القيامه عني وسأحاول ان اتذكر
    ولا يسعني الا ان اقول ربنا يسترها مع كل بنات المسلمين

  76. موناليزا Said:

    نسيبة
    ــــــــ
    وعليكم السلام ورحمة الله وبركاته
    اختى الحبيبة:اهلا اهلا بالقمر سعيدة بتواصلك معايا جدااا

    اشكرك جدا لمشاركتك
    وربنا يرزقك بالزوج الصالح والحماة الطيبة:)
    نورتينى حبيبتى ودمتِ بخير

  77. دعاء عبد الفتاح Said:

    شكرا على الموضوع حلو
    بس انا الحمد لله حماتى ست كويسة جدا وبتحبنى(على ما أظن) بس هى لا تتقبل اى نقض لإبنها.ساعات بحس ان كدة أحسن عشان لو فتحتلى باب الشكوى مش هسكت.

    مدونتك بجد حلوة..أنا لسة مبتدئة فتقبلى مرورى.
    دعاء

  78. موناليزا Said:

    دعاء عبد الفتاح
    ــــــــــــــــــ
    اختى الحبيبة:اهلا بيكِ فى زيارتك الاولى
    اشكرك جدا لرايك ولمشاركتك
    وربنا يهديلك حماتك كمان وكمان
    سعيدة جدا بمرورك
    نورتى مدونتى وارجو دوام التواصل


{ RSS feed for comments on this post} · { TrackBack URI }

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: