أنت سَفير

أحمِد الله كثيراً أن جعلنى مُسلمة. وأن هدانى إليه. وأتسائل هل لو كنت أتولدت غير مسلمة هل كنت سأسعى للتعرف على هذا الدين.أم ماأراه من تصرفات بعض المسلمين تجعلنى أنفر من هذا الدين.
وكم أتعجب حينما أشاهد بعض الغير مسلمين يتعاملون بأخلاق الإسلام. وأقول بداخلى ماينقصهم هو الشهادة وبعض التوجيه البسيط. وبالمقابل أشاهد تصرفات من بعض المسلمين تجعلنى أتسائل هل مايفعل أشياء مُشينة يندى لها الجبين يعتنق الإسلام حقاُ!!!.
وهذا جعلنى أستنتج بأننى سفيرة لدينى أينما أكون.شئت أم أبيت.فانطباع الآخرين عنى سيحدد نوع ديانتى دون حتى أن أفصح عنها.
ولذلك أردت ان أطرح عليكم هذه الأسئلة:
*لو أنت مش مسلم هل كنت ستسعى للتعرف على هذا الدين؟ولماذا؟.
*هل تتعامل مع من حولك بأخلاق الإسلام؟ .
*هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟
*هل تشعر حقاً بأنك سفير للإسلام؟.
* أذكر موقف شاهدته سواء من مسلم أو غير مسلم وشعرت معه بالعِزة؟.
رجاء خاص:إلى كل من يعتز بإنتمائه للدين الإسلامى أن يضع أى شعار إسلامى فى مدونته يدل على ذلك .

47 Comments »

  1. زوجه Said:

    السلام عليكم
    ازيك موناليزا
    *لو أنت مش مسلم هل كنت ستسعى للتعرف على هذا الدين؟ولماذا؟
    يمكن لو كنت عايشه في بلاد غير مسلمه ممكن لا
    لكن لو عايشه في بلد مسلمه تقريبا كنت هبحث واتعرف
    *هل تتعامل مع من حولك بأخلاق الإسلام؟
    في الغلب اه
    لكن ساعات بتصرف تصرفات غبيه
    *هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟
    لا الحمد الله
    *هل تشعر حقاً بأنك سفير للإسلام؟.
    اه طبعا الحمد الله
    وبحاول اكون سفيره كويسه
    انا بقي عايزه احكيلك علي موقف استفزني جدا جدا وفي نفس موضوع البوست
    من يومين كنت في فرح علي مركب علي النيل وكنا لازم نروح
    وطبعا خرجنا من قاعة الفرح انا وجوزي وبنتي علشان الاغاني
    وفضلنا بره في كافتريا في نفس المركب لحد مخلص الفرح
    وانا قاعده فوجئت ببنت منتقبه ومعها رجل ملتحي لحيه طويله قاعدين بره معانا علي نفس الكافتريا
    فقولت اكيد مش عايزين يدخلو الفرح زينا علشان الاغاني برده
    وانبسطت اوي من تصرفهم وان لسه فيه خير في الناس
    وبعد شويه فوجئت بالجارسون منزلهم اكل وان البنت اديتنا ظهرها وقلعت النقاب خالص قال ايه علشان تاكل
    ومش كده وبس وبتبص علي اللي حوليها عادي جدا ووشها مكشوف ووشها باين للكل
    ولما قولت لاحمد اللي بيحصل قالي يمكن مش مصرين اكيد عرب
    قولتله عرب ايه دول تبع فرح هنا داخلين خارجين من القاعه اللي هناك ديه
    قالي طيب انا هقوم اخده علي جنب واكلمه
    قولتله لا الله يكرمك ليطلع قليل الزوق ويتخانق معاك
    مش ناقصه
    قالي بس هي كده بتسئ للنقاب
    قولتله الله يكرمك بلاش وانا معاك
    طبعا بعد محايله علي احمد انه يتنازل عن انه يكلم الراجل اللي معاها حتي سكت ووافق انه ميكلموش
    وبعد مخلصنا كلام والبنت لبست النقاب
    قاموا ودفعوا الحساب ودخلوا الفرح ومخرجوش تاني
    قال وانا اللي فاكراهم خارجين علشان الاغاني
    شوفتي بقي سفراء الاسلام
    لاحول ولا قوة إلا بالله
    الحمد الله الذي عافني مما ابتلي به غيري وفضلني عليهم تفضيلا
    تحياتي علي المدونه الجميله ديه

  2. Butterfly Said:

    *لو أنت مش مسلم هل كنت ستسعى للتعرف على هذا الدين؟ولماذا؟.
    نعم اذا رأيت تصرفات جميله من المسلمين
    – والحمد لله انى اتولدت مسلمه- .

    *هل تتعامل مع من حولك بأخلاق الإسلام؟ .
    الحمد لله ويمكن ده مخلينى بتضايق من اللى بيتعاملوا بطريقه مش كويسه .!

    *هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟
    لأ الحمد لله أنا بعمل اللى بقدر عليه عشان ابقى مسلمه بجد مش كلمه وخلاص .

    *هل تشعر حقاً بأنك سفير للإسلام؟.
    الحمد لله وبحاول على قد ماقدر اوصل اللى أعرفه وأتعلم وأساعد الناس انها تتعلم كمان .

    وشكرا.

  3. ABOALI Said:

    مسلمين اه
    سفراء لا
    نحمد الله ان ولدنا مسلمين نعم
    الامام محمد عبده يقول حينما سافر للخارج
    رايت مسلمين بلا اسلام
    وهنا اسلام بلا مسلمين
    لذا نحتاج ان نكون سفراء
    ودى حاجة بسيطة
    اخلاق ظاهرة معاملات بين الناس
    نجد انفسنا سفراء
    ومصعب بن عمير خير دليل

    ولدت مسلما
    محمدى الهيئه
    وانتسبت اسما الى المسلمين
    فوقفت فى وسط الطريق
    فوجدت نفسى من الحائرين
    هل انا فى بقعة مباركة
    ام ترانى من المحظوظين
    فتبسمت ضاحكا
    ولما السؤال؟
    وانا من الغافلين
    وتذكرت دينا”
    سئل يوما عن العاقلين
    وكان عنوانه افلا تتدبرون
    فوجدت نفسى اتنفس الصعداء
    واسئل نفسى لما انا من الحائرين
    فالطريق هنا واضح
    وكفى ان الله انعم على وجعلنا من المسلمين
    اللهم ارضى عنا
    واكمل رضاك
    واجعلنى عنوانا” لخير العالمين
    محمد الامين

    تحياتى لبوستك
    واسئلتك التى تنير الطريق وتضع اجراس انذار

  4. EMMY BABY Said:

    الله عليكى يا موناليزا

    انا عمرى مافكرت انى مش مسلمة فمش هعرف ارد على اول سؤال

    بالنسبة للباقى

    الحمد لله بحاول على قد ماقدر انى اكون قد كلمة مسلمة اللى فى البطاقة بس ناقصنى كتير اوى بصراحة

    نفسى فعلا اكون سفيرة للاسلام

    ادعيلى

    تحياتى

    ايمى

  5. جنّي Said:

    السلام عليكم

    تدوينة ممتازة تثير تساؤلات في منتهى الاهمية ..

    ومن الصعب على الانسان ان يتحدث عن نفسه ولكن نحمد الله تعالى ان جعلنا مسلمين ونجتهد ان نكون فعلا مسلمين مؤمنين قدوة بسلوكنا واخلاقنا الاسلامية ..

    اما الاخلاق المشينة فهذا شئ طبيعي في كل المجتمعات وكل العصور ولأن الله تعالى خبير عليم بخلقه شرع الحدود ..

    شكرا وتحيتي

  6. HERO Said:

    سؤالك منطقي وجه على الوجيعة هو طبعا مفيش حد كامل وكلنا بنغلط بس المشكلة ان فعلا المسلمين اكثرهم وليس كلهم اصبحوا مجرد اسم بس وفعلا لازم الواحد يعيد تفكير في النقطة دي

    اما بالنسبة للأسئلة
    على حسب المكان اللي هبقى فيه يعني لو في بلد عربي اكيد كنت هحاول اعرفه لكن لو بلد اجنبي معتقدش اني كنت هسمع عنه

    على قد ما بأقدر والله بتعامل وعلى الاقل مش بحاول ازعل حد مني

    لا طبعا مش مجرد ديانة والحمد لله احسب نفسي كذلك ولكن باحاول اخليها افعال

    ده واجب عليا مش شعور وده جزء من كوني مسلم لأن الاسلام مش هيتنقل الا عن طريق الافعال وليس القول او الحروب او او

    وتحياتي

  7. موناليزا Said:

    زوجة
    ــــ
    وعليكم السلام ورحمة الله وبركاته
    اختى الحبيبة:اذيك انتى ياقمر انا الحمدلله بخير
    مشكورة جدا لاجابتك الصريحة
    اما عن الموقف فهذا للاسف انتشر بكثرة واصبحت ظاهرة النقاب فى انتشار كظاهرة الحجاب يعنى الغالبية واخدينهم موضة دون معرفة ان هذا الزى يعتبر بطاقة تعريف بالديانة
    اللهم ردنا اليك ردا جميلا
    وربنا يباركلك فى بيتك وفى بنتك يارب ويرزقكم دائما تقوى الله
    نورتينى حبيبتى ودمتى بخير

    ***********************************

    بيترفلاى
    ـــــــــ
    اختى الحبيبة:اشكرك جدا لمشاركتك ولاجابتك
    وربنا يوفقك يارب وتكونى ممن استخدمهم الله لخدمة دينهم
    نورتينى حبيبتى ودمتى بخير

    *********************************

    ابو على
    ـــــــــ
    اهلا بيك يافندم
    اه والله الحمدلله على نعمة الاسلام
    ما اجمل تعليقك ومشاركتك التى تجمل الموضوع وتوضح ما اردت قوله بسهولة ويسر
    ماحرمنا الله من ابداعتكم
    اللهم استخدمنا ولاتستبدلنا
    دمت طيبا ولمدونتى زائرا

    *********************************

    ايمى بيبى
    ــــــــــ
    اختى الحبيبة:ربنا يستخدمك لخدمة دينه
    اللهم اعزنا بطاعتك ولاتذلنا بمعصيتك
    والحمدلله اننا مسلمين
    نورتينى حبيبتى ووحشتينى جدا

    ********************************

    جنى
    ــــــ
    وعليكم السلام ورحمة الله وبركاته
    اهلا بيك استاذ سعيد
    اشكرك جدا لمشاركتك
    اللهم اجعلنا من يستمعون الى القول فيتبعون احسنه
    دمت طيبا ولمدونتى زائرا

    **********************************

    هيرو
    ـــــ
    اهلا اهلا يادكتور
    اشكرك جدا لمشاركتك ولاجابتك
    ويارب نكون سفراء لاسلامنا دائما
    دمت طيبا ولمدونتى زائرا

  8. راجى Said:

    من المفارقات انه بعد احداث 11 سبتمبر وفى وسط الهجوم الطاغى على الدين الحنيف وعلى المسلمين طرحت المكتبات فى اوروبا وامريكا القرآن على الجمهور الذى اقبل على شراء كتاب الله بهدف التعرف على هذا الدين وكانت النتيجة المئات الذين اعتنقوا الاسلام
    تأملى قليلا المعنى الكامن فى ما حدث ستجدى حكمة بالغة من قدرة الله سبحانه وتعالى

  9. DR.HAMAS Said:

    كلام جميل اختنا

    و أما إجاباتى

    *لو أنت مش مسلم هل كنت ستسعى للتعرف على هذا الدين؟ولماذا؟.

    لن أفترض هذا الإفتراض … لأنى لا أدرى إن لم أكن مسلما .. فكيف حينها ستكون حياتى
    فلله الحمد على هذه النعمة العظيمة
    و لكن اظن ان كل البشر عندهم فطرة ثابتة … غير انهم يكسرونها ليكونو غير مسلمين

    *هل تتعامل مع من حولك بأخلاق الإسلام؟ .

    أعتقد ذلك … لكنى لا أستطيع الجزم بهذا
    لأن من حولى هم أصدق منى فى الحكم على أخلاقى

    *هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟

    أظن أنى مقصر تقصيرا شديدا تجاه دينى و لا أرانى أقوم بما ينبغى فعله تجاه اسلامى
    و أسأل الله أن يعيننى على العمل

    *هل تشعر حقاً بأنك سفير للإسلام؟.

    نعم أشعر بذلك و الحمد لله

    * أذكر موقف شاهدته سواء من مسلم أو غير مسلم وشعرت معه بالعِزة؟.

    صراحة لا يحضرنى شئ حاليا … لو تذكرت سأعود لسرده

    جزاكم الله خيرا على الموضوع القيم

    حقيقى كلام فيه إحياء

    و ربنا يحيي بيكى الأمة يا أختنا

    تقبل الله منك الموضوع

    د.حماس

  10. ghorBty Said:

    السلام عليكم ورحمة الله وبركاته

    جزاك الله خيرا اختي موناليزا علي الطرح الطيب

    الحمد لله علي نعمة الاسلام وكفي بها نعمة

    لو أنت مش مسلم هل كنت ستسعى للتعرف على هذا الدين؟ولماذا؟.

    عمري ما فكرت في السؤال دا بس انا مش هقول غير الحمد لله اني مسلمة وان ربنا اصطفاني وجعلني من أمة محمد عليه الصلاة والسلام

    *هل تتعامل مع من حولك بأخلاق الإسلام؟

    الحمد لله والشكر الرسول عليه الصلاة والسلام بيقول اٍنما بعثت لاتمم مكارم الاخلاق
    فالاسلام عباره عن عبادات واخلاقيات ومعاملات والمسلم الحق لازم يلتزم بثلاثه مع بعض لانهم كلا لا يتجزا .

    *هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟
    الحمد لله لا الاسلام نعمة كبيرة جدا ولو عيشنا به هتكون حياتنا كلها نور لكن الي احنا شايفينه دلوقتي ما هو الا نتيجة البعد عن تعاليم الدين وياااريت الكل يدرك نعمة ديانتك مسلم ويعمل بيها لينصلح حال الامة كلها

    *هل تشعر حقاً بأنك سفير للإسلام؟.
    ايوا ولله الحمد كلمة سفير ديه كبيرة اوي

    تعرفي طريقه التزامك للحجاب نوع من اعتزازك بدينك وبرضوه بتكوني سفيره ليه

    التزامك باخلاق الاسلام برضوه يدل علي انك سفيره ليه

    وامرك بالمعروف ونهيك عن المنكر برضوه يدل علي انك سفيره ليه

    وكفانا فخرا ان نكون جنود لهذا الدين العظيم الذي شرفنا الله به

    * أذكر موقف شاهدته سواء من مسلم أو غير مسلم وشعرت معه بالعِزة؟.

    اكتر موقف حسيت به بعز الاسلام وان احنا بجددددددد امه قويه بس محتاجين نتجمع ونوحد كلمتنا
    هو موقف الحج وبالذات يوم عرفه بجد ساعاتها حسيت اد ايه احنا قويين بس محتاجين قلوب تقيه تتحرك حبا لهذا الدين مثل قلوب الحجاج التي تحركت شوقا الي الله

    بوركتي وسلمت يمناك

    دمت بود

    غربتي

  11. ماما أمولة Said:

    الحمد لله على نعمة الاسلام

    **لم أسأل نفسي لو لم اكن

    ولكن دائما أحمد الله أن خلقني مسلمة

    **بحاول أعامل الله في معاملتي مع الاخرين

    والحمد لله لانه يساعدني كثيرا في التحكم

    في ردود أفعالي

    لان معاملة البشر اصبحت في غاية

    الصعوبة

    **يجوز ان اكون سفيرة للاسلام بأخلاقي وزيي الاسلامي

    **الصراحة انا قرأت تعليق ( زوجة ) واستغربت

    هل النقاب هو سفير للاسلام؟
    وهل اللحية هي سفيرة الاسلام؟
    اذا خلا كلاهما من الاخلاق فسلام على الاسلام
    الاسلام ايضا نهي عن المنكر وأمر بالمعروف
    وعدم لفت انتباههما لكشف وجهها سلبية لاتليق بمن لايسمع الاغاني

    وردك يا أمة الله أن البعض يرتدين النقاب موضة ازعجني
    وهل النقاب موضة؟

    هل شققت عن صدورهن وعلمت لما ارتدين النقاب ؟

    الله وحده هو الذي يعلم خائنة الاعين وما تخفي الصدور

    انا لاانكر ان البعض يسيء للاسلام بتصرفاته

    ولكن المحزن اننا لانري الا ما نريد

    حبيبتي في الله ارجو ان تتقبلي ردي

    وجزاكي الله خيرا

  12. واحدة مفروسة Said:

    ازيك يا مونى يا قمرة
    كل سنة و انتى طيبة و بخير
    بوستك حلو اوي جدااا خااالص

    بصي يا قمرة
    انا يمكن تعليقى حيكون مختلف
    و يمكن مش يكون على هوا البعض

    اولا انا الحمد لله انى بدعي على طول
    الحمد لله يارب انك خلقتنى مسلمة
    الحمد لله على نعمة الاسلام
    ديه لوحدها نعمة كبيرة من ربنا علينا

    ثانيا
    اذا كنت اتولد مش مسلمة
    معرفشي انا كنت ححاول اعرف حاجه عن الدين ده و لا لأ
    بس مش متهيألى
    لان اصحاب ليا كتار مش مسلمين و مش بيسعوا انهم يعرفوا كتير عن ديننا

    اما عن التعامل و المعملة
    كتير من اصحابي اللى مش مسلمين
    بيتعاملو بما يرضي الله احسن من المسلمين الصراحة

  13. موناليزا Said:

    راجى
    ــــــ
    اهلا بيك استاذ راجى
    فعلا كانت من الاخبار المفرحة ان الله جعل كيد اعدائنا فى نحرهم
    اللهم استخدمنا ولا تستبدلنا
    دمت طيبا ولمدونتى زائرا

    ***********************************

    د/حماس
    ــــــــ
    اهلا بيك يادكتور
    ربنا يكرمك على مشاركتك واجابتك
    اللهم اعزنا بطاعتك ولا تذلنا بمعصيتك
    تعجبت حقا من اجابتك لانك ماشاء الله ختمت حفظ القرآن على حد علمى ومع ذلك تشعر بالتقصير!!
    فكيف بمن لايذكرون الله مطلقا!!!
    ربنا يعزك ويبارك فيك
    دمت طيبا ولمدونتى زائرا

    ***********************************

    غربتى
    ـــــــ
    وعليكم السلام ورحمة الله وبركاته
    اختى الحبيبة:اشكرك جدا لرايك ربنا يكرمك
    ما اجمل اجابتك
    تعرفى قصدت كلمة سفير لاننا فعلا كده بنعبر عن ديننا شئنا أم أبينا
    اللهم اعزنا بطاعتك ولا تذلنا بمعصيتك
    نورتينى حبيبتى ودمتى بخير

    ***********************************

    ماما امولة
    ــــــــــ
    اختى الحبيبة: ربنا يكرمك واشكرك على اجابتك
    اما عن رايك على تعليق زوجة وردى عليها
    بصى ياستى زوجة لم تغلط حينما وصفتهم بسفراء الاسلام لسبب وهو ان هذا الزى المتعارف عليه ان اللى بيلبسوه مسلمين
    اما عن سلبيتها فهى ايضا أبدت أسبابها وهو الخوف من عدم تقبل الرجل الذى معها كلام زوجها وبالتالى هتبقى خناقة وهى وابنتهم معه
    اما عن ردى فى ان النقاب اصبح موضة لم أعمم حبيبتى ولكنى قلت الغالبية الان لان هذا ما اشاهده فماذا تقولين عن من ترتدية على ملابس قصيرة!! او ضيقة جدا!! كمن ترتدى الحجاب الان وهى عاملاه اسبانش او مرتدية ملابس ضيقة وملفتة …وهكذا
    حبيبتى الغالية لم نقصد مطلقا الاسائة للزى بعينه
    ولكننا ننقد تصرف يسئ للاسلام
    ارجو ان اكون وضحت المقصد
    نورتينى حبيبتى ودمتى بخير

    **********************************

    واحدة مفروسة
    ــــــــــــــ
    اختى الحبيبة:انا الحمدلله بخير
    اذيك انتى حبيبتى وكل سنة وانتى بالف خير

    اشكرك جدا لمشاركتنا
    والحمدلله على نعمة الاسلام
    نورتينى حبيبتى ودمتى بخير

  14. romansy Said:

    كل سنه وانتى طيبه
    موضوعك جميل
    بس انا حبيبت اقولك ان الاسلام دا اكبر نعمه من ربنا
    ولو احنا مش مسلمين كنت على الاقل هحاول اعرف حاجات كتير عن الدين الاسلامى
    وعن حلاوته
    وليه
    المسلمين كده
    وليه حجر بيعبد
    وحجر بيرجم
    وليه اذان واحد بيجمعهم

  15. حنان سعيد Said:

    موناليزا
    بحيكي على موضوعك بجد
    اول سؤال اني لو كنت مشمسلمه هحاول اتعرف على الدين الاسالامي ولا لا؟؟
    ده بجد مش عارفه
    مش لاني انا هبقى مش عايزه
    لان لان غالبا بحس ان الاسلام بقى مجرد كلمه..او نوع ديناه في البطاقه مع اغلب الناس
    يعني مثلا لو افترضت اني انا واحده اجنبيه
    وعايشه بره
    بفكر كده ببه كام في الميه هقابل حد يخليني نفسي اتعرف على الاسلام
    المسلمين في الددول الاجنبيه ومش كلهم اكيد بس الاغلبيه العظمى الا من رحم ربه
    بيكون شايل الدين من حسابه
    وبيطبع بطباع الي هناك
    للاسف اصبح المتمسك بدينه كالممسك بالجمر

    واتمنى طبعا ان كانت اجاتي تكون اه
    بس بجد الاجابه تعتمد على طبيعه الناس الي هكون بينهم
    ……….
    هل تتعامل مع من حولك بأخلاق الإسلام؟
    بجد بحاول على قد ما اقدر
    لان فعلا ديما بيكون في تفكيري
    هل اني ممكن اكون سبب في فكره كويسه حد مش مسلم ياخدهتا عن الاسلام
    او في اصلاح في تصرف اخ مسلم
    …….
    هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟

    اتمنى من الله ان يكون لا
    وبحاول جاهده اني اكون مستحقه لنعمه الاسلام
    وربنا يعينني
    ………….
    هل تشعر حقاً بأنك سفير للإسلام؟.

    بتمنى ان انول الشرف ده
    واكون قده … وانا بحاول اني اكون سفيره حسنه للاسلام
    لان اكيد في كل منا رمز للاسلام
    ويارب كلنا نعرف قيمه ده
    ياااااااااارب

    ………

  16. mohamed ghalia Said:

    السلام عليكم
    الحمد لله على نعمة الإسلام وكفى بها نعمة
    *لو أنت مش مسلم هل كنت ستسعى للتعرف على هذا الدين؟ولماذا؟
    إنك لاتهدى من أحببت ولكن الله يهدى من يشاء
    فالحمد لله على نعمة الهداية
    *هل تتعامل مع من حولك بأخلاق الإسلام؟
    في الغالب؟
    الحمد لله نحاول قدر المستطاع والله المستعان
    هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟
    نفس الإجابة السابقة
    *هل تشعر حقاً بأنك سفير للإسلام؟.
    هذا هو شغل أى مسلم
    دمتى فى حفظ الله

  17. الازهرى Said:

    موناليزا
    اختى فى الله

    *لو أنت مش مسلم هل كنت ستسعى للتعرف على هذا الدين؟ولماذا؟
    نعم كنت سأسعى للتعرف عليه لاننى ابحث دوما عن الحق ولقد بحثت بالفعل فى الاديان كثيرا وتعلمت كيف ان الاسلام هو الدين الكامل الصحيح

    *هل تتعامل مع من حولك بأخلاق الإسلام؟
    احاول قدر استطاعتى واعتقد اننى ناجح فى هذا والحمد لله

    *هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟
    لا بالطبع والا فلا فائدة اساسا

    *هل تشعر حقاً بأنك سفير للإسلام؟
    انا اعيش فى حياتى طبقا لحديث الرسول صلى الله عليه وسلم والذى يقول ” كلكم على ثغر من ثغور الاسلام فليحذر احدكم ان يؤتى الاسلام من ثغره”
    وهو يعطى نفس المعنى المراد

    * أذكر موقف شاهدته سواء من مسلم أو غير مسلم وشعرت معه بالعِزة؟
    اتذكر موقفا حكى لنا من احد اساتذتنا فى الجانعة توصل الى اختراع وعندما سئل كيف جاءته الفكرة اجاب لاننى مسلم تعلمت من دينى ان ابحث عن خير البشرية

    موضوع رائع واسئلة فى الصميم كما عودتنا دوما
    جزاك الله خيرا على مجهودك الرائع

  18. TiMmY Said:

    السلام عليكم ..

    خلينا نرد على طول علشان ما نتكلمش كتير !!

    *لو أنت مش مسلم هل كنت ستسعى للتعرف على هذا الدين؟ولماذا؟.
    أظن ذلك .. لأني سعيت للتعرف على ديانات أخرى و أنا مسلم .

    *هل تتعامل مع من حولك بأخلاق الإسلام؟ .
    على قد ما أقدر .. !!

    *هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟
    لأ الحمد لله الواحد بيحاول يبقى أكتر من كده .. حتى لو في أي حاجة بسيطة .

    *هل تشعر حقاً بأنك سفير للإسلام؟.
    دي بقى الحاجة اللي بحاول أتجنبها .. لأني ما أنفعش !!

    و كل عام أنتم بخير ..

  19. nour shahen Said:

    بالنسبه لأول سؤال انا بجد مش عارفه
    كتير بقول أكيد لو انا لا قدر الله مش مسلمه كنت هسعى اعرف مين علي حق وفى الدين الصحيح
    وساعات بقول هكون محاطه بناس بتقولى دا الحق
    لكن لما عقلى بيشرد منى كدا برجع افكر
    صدق من قال بأنه لو كان من عند غير الله لكانوا وجدوا فيه اختلافا كثيرا .. سبحانك يا رب العالمين
    دا اجابه للسؤال الأول اما الباقى فالحمدلله ربنا يقدرنا ونبقى خير سفراء لديننا
    بشكرك جدا لطرح الموضوع الجميل دا ربنا يكرمك حبيبتى
    وكل سنه وانتى طيبه وعيد سعيد عليكى

  20. حـــــدوتـــــة Said:

    السلام عليكم

    موضوعك ده مهم جدا
    وانا اتكلمت فو جزء منه قبل كده عندى فى المدونه

    معظمنا كعرب شعوب غير قارئه وغير مثقفة
    عشان كده كل واحد بيعيش زى ما اهله عايشين
    يعنى اللى اتولد مسلم عايش مسلم
    واللى اتولد مسيحى عايش مسيحى

    لكن كام واحد مقتنع اقتناع كامل بدينه
    صدقينى العدد قليل جدا
    وهنا بقة المشكلة ان فى عدد كبير من المسلمين لا يعرفوا عن الاسلام شىء
    فالعدد الكبير ده محدش ينتظر منه انه يبقى سفير لاى حاجة فى الدنيا
    وربنا يرحمنا جميعا

    سلالالالالالالالالالالالالالالالالالالالالالالالالالالا

  21. mahasen saber Said:

    هقولك حاجه يا مونا فيه واحد اسلم وقال بعد ما شاف سلوك الناس فى الحرم المكى اليى هو اقدس مكان على وجه البسيطه
    قال انه بيحمد ربنا قبل انه اسلم قبل ما يتعامل مع مسلمين
    لانه لو كان تعامل معاهم قبل ما يشهر اسلامه مكنش اسلم ولا فكر يدخل الدين

    على النقيض الاسلام منتشر فى دول المغرب العربى زمان الا عن طريق التجار المسلمين وحسن سلوكهم وامانتهم فتخيلى سلوك بشر خلى امم بحالها تدخل الدين
    وسلوك بشر تانيين كان هيمنع ناس من دخول الدين

    ففعلا لازم نتحلى بحسن الخلق عشان نبقى سفراء لدينا

  22. Dr Ibrahim samaha Said:

    جزاكم الله كل خير

    نعم فتعاملات المسلمين وأخلاقهم تجبر غير المسلمين على التلهف على معرفة الدين الذى يأمر أتباعه على القيام بأعمال مؤمنين كل الإيمان بأنها خالصة لوجه الله

    ومن لم يتعامل بأخلاق الإسلام فلا يستحق أن يقال عليه مسلم فكلمة مسلم فعل وليس كلمة تقال

    أما بالنسبة لموضوع الترجمة

    حضرتك لعبتى فى الكود ومعملتيش زى منا قلت بالظبط..

    وعلى فكرة لو حضرتك حبيتى تمسحى الحقوق امسحيها كلها انما متحطيش برمجة المرحوم

    وتحطى اللينك بتاع حضرتك

    ولو عايزة الكود من غير حقوق قولى وانا مش هقول لا

    تحياتى الخالصة

    د إبراهيم

  23. و القادم....أجمل Said:

    السلام عليكم
    الأول كل سنة و إنتي طيب
    و عيد سعيد يارب على الجميع
    ————-
    *لو أنت مش مسلم هل كنت ستسعى للتعرف على هذا الدين؟ولماذا؟.
    الله أعلم
    بجد مسألة مقدرش أحكم عليها
    الا لو اتحطيت فيها
    الحمدلله على نعمة الإسلام
    الحمدلله
    ——–
    بقيت الأسئلة هقولك
    مقدرش أحكم على نفسي
    بس بجتهد
    و ساعات بنكون صح
    و ساعات غلط
    ———
    * أذكر موقف شاهدته سواء من مسلم أو غير مسلم وشعرت معه بالعِزة؟.

    مش فاكرة دلوقتي
    بس هركز و ارجعلك
    ———-
    أهم حاجة اللي كتير منا بينساها

    الدين المعاملة
    دا ركن مهم جدا في شخصية المسلم

    ربنا يرزقنا جميعا
    الهداية و الثبات و الإخلاص
    اللهم إرزقنا خلقا ً كخلق المصطفى
    آآآآمين يارب

    جزاك ِ الله خيرا
    على الموضوع
    بجد راااائع و مهم جدا
    في حياتنا

    تقديري

  24. عـــفـــراء Said:

    السلام عليكم
    ازيك يامنى يارب يكون عيد سعيد وايام مباركه
    كل سنة وانتى بكل الخير
    اسئلتك صعبه اوى
    فى البدايه الحمد لله على نعمة الاسلام وكفانا بها نعمة
    *لو أنت مش مسلم هل كنت ستسعى للتعرف على هذا الدين؟ولماذا؟
    والله حسب الظروف والوضع اللى هكون عليه او اذا كان عندى علم بالدين الاسلامى وقتها ام لا
    *هل تتعامل مع من حولك بأخلاق الإسلام؟
    اه الحمد لله بتعامل مع كل انسان مهما كانت ديانته وطبعه باخلاق الاسلام
    *هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟
    لا الحمد لله اكيد واتمنى الدوام على ذلك
    *هل تشعر حقاً بأنك سفير للإسلام؟
    بكل فخر واعتزاز وشرف
    * الموقف
    وانا فى كليتى بصراحه كان معايا نصارى
    مسحيين يعنى ومن ضمنهم واحدة كنت بعتز بيها جدا لدرجة انى عمرى ماحستها غير مسلمه بودها وسؤالها وتهنئتها ليا فى مناسبتنا ومش كدة وبس مواقف كمان كتير من زمايل اخويا فى شغلة
    ويارب ديما كدة
    عذرا لتتطويل
    خالص تقديرى……….

  25. اقصوصه Said:

    كل عام وانتم بخير🙂

  26. موناليزا Said:

    رومانسى
    ـــــــــ
    اهلا بيك يافندم
    وانت طيب وبالصحة والسلامة
    اشكرك جدا لرايك ولمشاركتك المتميزة
    دمت طيبا ولمدونتى زائرا

    **********************************

    حنان سعيد
    ـــــــــــ
    اختى الحبيبة:اشكرك جدا لرايك
    ولاجابتك الصريحة
    ربنا يقدرنا جميعا ونكون قدوة طيبة يحتذى بها الاخرين
    نورتينى حبيبتى ودمتى بخير

    *********************************

    محمد غالية
    ــــــــــــ
    وعليكم السلام ورحمة الله وبركاته
    اهلا بيك استاذ محمد
    اشكرك جدا لمشاركتك ولاجابتك
    وليت الجميع تكون اجابتهم الاخيرة كاجابتك
    دمت طيبا ولمدونتى زائرا

    ***********************************

    الازهرى
    ــــــــ
    اهلا بيك يافندم
    ربنا يكرمك واشكرك جدا لمشاركتك ولاجابتك
    دمت طيبا ولمدونتى زائرا

    **********************************

    تيمى
    ـــــــ
    وعليكم السلام ورحمة الله وبركاته
    اهلا بيك يافندم
    عجبنى جميع اجابتك عدا الاجابة الاخيرة مستوعبتهاش بجد
    اخى الكريم نحن بالفعل سفراء لديننا سواء رضينا أم لا كل ماعلينا هو اننا ناخد بالنا من هذه الوظيفة الاساسية
    اشكرك جدا لمشاركتك
    دمت طيبا ولمدونتى زائرا

    *********************************

    نور شاهين
    ـــــــــــ
    اختى الحبيبة:اشكرك جدا لمشاركتك
    والحمدلله فعلا اننا مسلمين ويارب اجعل الاسلام يتباهى بينا يوم القيامة
    عيد سعيد علينا وعليكى حبيبتى
    نورتينى ياجميلة ودمتى بخير

    ***********************************

    حدوتة
    ـــــــــ
    وعليكم السلام ورحمة الله وبركاته
    اهلا بيك يافندم
    هذا بالفعل ماقصدته هل كل مسلم او غير مسلم مقتنع بدينه فعلا ام انه مجرد ديانة يحمل اسمها فقط
    اللهم ردنا اليك ردا جميلا
    اشكرك جدا لمشاركتك
    دمت طيبا ولمدونتى زائرا

    *********************************

    محاسن صابر
    ـــــــــــ
    اختى الحبيبة:رغم ان المثال اللى ذكرتيه موجع بجد بس ده انا شوفته بنفسى وانا بعمل العمرة لدرجة ان بيحصل انتهاك لحرمات الله فى هذا المكان المقدس وعلنا كمان
    اللهم لاتؤاخذنا بمافعل السفهاء منا
    اللهم اعزنا بطاعتك ولا تذلنا بمعصيتك
    اشكرك جدا لمشاركتك
    نورتينى ياجميلة ودمتى بخير

    ********************************

    د/ابراهيم سماحة
    ــــــــــــــــ
    اهلا بيك يادكتور
    ربنا يكرمك وصدقت اخى الكريم فالاسلام افعال وليست مجرد شعارات
    اشكرك جدا لمشاركتك
    وعن الترجمة مازلت اواجه مشكلة فى الكود ولا اعلم مصدرها
    ولن استطيع احذف اسمك فانت صاحب الفضل فيه ولا يمكن تجاهل هذا
    اشكرك جدا لاهتمامك
    دمت طيبا ولمدونتى زائرا

    *********************************

    والقادم اجمل
    ـــــــــــــ
    وعليكم السلام ورحمة الله وبركاته
    اختى الحبيبة:وانتى طيبة ياجميلة
    ربنا يكرمك ويتقبل دعائك
    واشكرك جدا لمشاركتك ولاجابتك
    نورتينى حبيبتى ودمتى بخير

    ***********************************

    عفراء
    ـــــــ
    وعليكم السلام ورحمة الله وبركاته
    اختى الحبيبة:انا الحمدلله بخير اشكرك لسؤالك
    وانتى طيبة ياحبيبتى وبالصحة والسلامة
    اشكرك جدا لمشاركتك ولاجابتك
    ولاتعتذرى على الاطالة فتعليقك يسعدنى
    نورتينى حبيبتى ودمتى بخير

    ******************************

    اقصوصة
    ــــــــ
    اختى الحبيبة:وانتى طيبة

  27. rovy Said:

    اختى الغاليه موناليزا

    اولا احمد الله لأنى اتولدت مسلمه و ادعوه ان يرحم ابى الغالى بأوسع رحمه و مغفره
    لأنه اتخذ القرار و لم يضيعنى انا او اخوتى و الحمد لله حين اعلن اسلامه و اختار الاسلام بكامل ارادته بعد ان رأى انه دين الحق و استشعر سماحته و تعاليمه و اقول لكى هذا ردا على سؤالك لو لم تكن مسلما هل كنت ستسعى للتعرف على الاسلام و الاجابه اكيد نعم و الدليل ان ابى رحمة الله عليه و لو انه كان اجنبيا اصلا الا انه سأل و علم و اختار الاسلام و الحمد لله
    ولهذا انا لا اشعر ابدا ان علاقتى بالاسلام مجرد كلمه فى خانة الديانه و كثيرا ما اتذكر و احمد الله انى ولدت مسلمه و كثيرا ايضا اتسائل ترى ماذا كان سيكون مصيرى و اخوتى لو لم يهدى الرحمن ابى الحبيب للاسلام .. لا يسعنى الا ان اظل اشكر المولى عز و جل على نعمته لى .. اما عن ان كل مسلم سفير للاسلام
    فهذا حق اكيد و لكن اتمنى ان يعلم كل مسلم انه ليس بالمظهر فقط كما يحدث مع كثيرا الان يكون سفيرا للاسلام بل يجب ان يحرص على ان ينشر رسالة الاسلام الحقيقيه فى ان الدين المعامله و ان يساعد الناس و ان يكون حسن الخلق و ان يجتهد فى عمله و يعامل الناس بضمير حى و لا يعطل مصالح الناس و يكون نموذجا محترما يحترمه الناس كافة و هنا يمكنه ان يقول نعم انا سفير للاسلام

    و اخيرا احمد الله و سأظل احمده واشكر فضله كثيرا لأننى ولدت مسلمه و لله كل الحمد و الشكر

    خالص مودتى و تقديرى

  28. مولان Said:

    بصراحه كلنا سفرا لدينا بس هل احنا سفرا صح ولا سفرا غلط وبنفر الناس من دينا بافعالنا اللي دينا برئ منها

  29. هذه حياتي Said:

    السلام عليكم ورحمة الله وبركاته

    أختنا العزيزة

    الموناليزا ……..

    فعلا جزاك الله خيرا أختاه وبارك الله لكي فكما علمنا الرسول الكريم أن من أدي إليكم معروفا فكافئوه وأنا لا أملك لما تقدمين لنا إلا أن أسأل الله لكي العفو والعافية ….. أما عن الموضوع الجميل فلا أملك إلا أن أكتب قول الله تعالي ” قل هذه سبيلي أدعو إلي الله علي بصيرة أنا ومن اتبعني وسبحان الله وما أنا من المشركين” دمتي بكل الحب والصدق …………..عذرا لا ينسي ف هذا الموقف أن نذكر بقصة مصعب بن عمير السفير الأول ….. خالص شكري وتقديري واحترامي

  30. أحسن تـستاهـل Said:

    جيتي ع الجرح يا مون مون

    دايما بدعي ان الاسلام يجيي يوم القيامة ويشاور عليا ويبتسم لي كده ويبقى فرحان بيا

    بس بدور دايما على حاجة امسكها واخلصلها وتبقى بتاعتي الحتة دي بس

    بفكر فيها من زمان،، ربنا يلهمني

    موناليزا،، انتي خطيرة

    مها ميهوووو

  31. الوردة البيضا Said:

    السلام عليكم
    العزيزة موناليزا منذ فترة طويلة لم تزوريني فجئت أسأل عنك
    البوست جميل جدا، والأسئلة اللي دارت بداخلك هي نفسها التي طالما تدور بداخلي، وبالنسبة للإجابات:لو أنت مش مسلم هل كنت ستسعى للتعرف على هذا الدين؟ولماذا؟ صدقيني لا أدري ما الإجابة، وخاصة عندما أرى موقف الآخرين من غير المسلمين الذين يستسهلون أخذ انطباع سلبي عن الإسلام دون أن يفكروا في الاطلاع والقراءة لمعرفة حقيقة هذا الدين، ولذا كثيرا ما أتساءل هل كنت سأفعل مثلهم لو لم أكن مسلمة؟؟!!

    هل تتعامل مع من حولك بأخلاق الإسلام؟
    الحمد لله أجتهد في التعامل مع الآخرين دائما بأخلاق الإسلام لإدراكي الكامل أني سفيرة لديني وإن كانوا لا يريدون اجهاد نفسهم بالقراءة للتعرف عليه فيجب على الأقل أن يتعرفوا عليه من خلال بعض المسلمين الملتزمين بأخلاق ديننا الجميل.

    هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟
    لا والف لا ، وأحمد الله سبحانه وتعالى على نعمة الإسلام.

    هل تشعر حقاً بأنك سفير للإسلام؟
    نعم، وقد أوضحت ذلك فيما سبق
    تحياتي لك على الموضوع المتميز، وإن كنت أرى أن الأهم من وضع شعار في مدوناتنا يدل على إسلامنا، فياليت جميع المسلمين يضعون هذا الشعار في قلوبهم وألسنتهم وتصرفاتهم مع الآخرين.

  32. Khaled Said:

    جذاكى الله خيرا على مواضيعك المتميزة و الجديرة بالمتابعة ….

    أنا فكرت مرة إنى مش على أى دين و بدأت أتخير دين جديد أو عقيدة جديدة فلم أجد أكمل ولا أنسب من دين الأسلام ولا رسول هو أشرف خلق الله من محمد صلى الله علية وسلم رسولا

    اللهم ثبتنا على دين محمد و أحسن خواتيمنا

    تحياتى

  33. mony Said:

    انا فعلا اشعر اني سفيرة لديني

    مش بس لغير المسلمين

    لا للمسلمين كمان

    لان ممكن حد يشوف تصرف انا بعمله انه كويس و ياخدني قدوة

    و فعلا بعتز بالاسلام
    الحمد لله علي نعمة الاسلام

    و بصراحة ماعرفش لو كنت مش مسلمة كنت هبحث عن الاسلام ولا لاء

    الحمد لله علي الهداية من عند الله

    ليكي عندي تاج يا منمن

  34. المستنصر بالله Said:

    *لو أنت مش مسلم هل كنت ستسعى للتعرف على هذا الدين؟ولماذا؟

    بجد السؤال صعب الاجابه عليه لانى لم اشعر احساس غير المسلمين

    هل تتعامل مع من حولك بأخلاق الإسلام؟
    باسعى وباحاول انى اتعامل باخلاق الاسلام كلما تعلمت او علمت شئ منها

    *هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟

    لا طبعا اكيد اتعلمت من اهلى بعض تعاليمه وان هناك حرام وحلال فاكيد هويتى الاسلاميه فرضت عليا التزمات محددة

    هل تشعر حقاً بأنك سفير للإسلام؟

    سفير دى كلمه كبيره قوى اتمنى ان اكون على قدرها

    الحمدلله على نعمه الاسلام وكفى بها نعمه

    كل سنه وحضرتك طيبه

    تحياتى

  35. المعتصم Said:

    بسم الله الرحمن الرحيم
    السلام عليكم ورحمة الله وبركاته
    اختنا الكريمه تقبلى التحيه والتقدير
    موضوع جميل وهادف
    *السؤال الاول:مش هعرف اجاوب عليه لانى بصراحه عمرى مافكرت انى اكون مش مسلم
    *السؤال الثانى : الحمد لله احاول قدر استطاعتى ان اتعامل مع كل من حولى بأخلاق الاسلام وربنا يعينى ولو كنت مقصر يقوينى واعالج التقصير ده
    *السؤال الثالث: بحاول قدر المستطاع ان علاقتى بالدين تكون علاقه حقيقيه مش مجرد مسلم بطاقه وربنا يوفقنى واكون بعمل ده صح
    *السؤال الرابع : أى شخص مسلم هو سفير للاسلام الموضوع مش اختيارى لان اى حد غير مسلم لما يشوف تصرفاتنا كمسلمين لازم بيعلق عليها فلازم احنا كمسلمين نراعى ده وناخد بالنا من تصرفاتنا كويس جدا
    ***بحكم العمل بنتعامل مع كذا دكتورصيدلى غير مسلم وف مرة من المرات دكتور بيقول لمحمد صاحبى (واحنا بنسلمه شغل وكان معاه مبلغ كبير) طبعا انت تتمنى انى دلوقتى تحصلى اى مصيبه عشان تاخد انت الفلوس دى وتخلع , رد عليه محمد وقاله مش هاخد منها ولا تعريفه وهسيبهم زى ماهما كده لغاية ماتيجى الدكتورة مراتك وتاخدهم, استغرب الدكتور وسأله ليه كده؟ رد عليه وقاله احنا ناس مسلمين وديننا يمنعنا اننا ناخد اى حاجه مش بتاعتنا حتى لو كانت بتاعة واحد مش مسلم .
    الحمد لله على نعمة الاسلام وكفى بها نعمة
    اختى الكريمة تقبلى مرورى وتحياتى
    والسلام عليكم ورحمة الله وبركاته

  36. سبهللة Said:

    ايوة لو مش مش مسلمة وشفت حد مسلم اخلاقه كويسة ممكن احاول اتعرف على الدين دة

    طبعا بتعامل مع من حولى باخلاق الاسلام ويمكن دايما اقول لنفسى انا بعمل كدة عشان ربنا مش عشان الشخص اللى قدامى
    لكن فى بعض الاوقات بغلط زى كل الناس واتعامل مع اللى قدامى خاصة لو زعلانة منه او مضايقنى فى حاجة بندية

    لا طبعا علاقتى بالدين هى علاقتى بربى واللى بحاول من خلالها انى ارضى ربنا على قد ما اقدر وابعد عن كل ما يغضبه

    يمكن مش حاسة اوى انى للاسلام عشان احنا فى بلد مسلم لكن ممكن لو عشت فى بلد غربى يمكن ساتها احس الاحساس دة

  37. منى Said:

    الاسئله دى صعب اوى الاجابه عليها وفى نفس الوقت مهم جدا
    واعتقد لازم كلنا نجاوب عليها حتى لو بينا وبين نفسنا
    وانا هحاول اعمل كده
    جزاك الله كل خير يا موناليزا
    تحياتى

  38. موناليزا Said:

    روفى
    ــــــ
    اختى الحبيبة:ربنا يرحم والدك ويغفرله والحمدلله الذى هداه الى دينه
    فهذا يدل على فطرة نقية وبيئة طيبة جزاه الله عنكم كل خير وجعل مثواه جنة الخلد وبارك لكم فى ذرياتكم
    وماذكرتيه من حسن المعاملة هو فعلا ماقصدته بان نكون سفراء لديننا عن طريق حسن الخلق وبأن نكون قدوة حسنة امام المسلمين وغيرهم
    والحمدلله اننا مسلمين
    اشكرك جدا لمشاركتك المتميزة
    نورتينى روفى الغالية ودمتى بخير

    *********************************

    مولان
    ـــــــ
    اختى الحبيبة:صدقتى وجبتى الخلاصة
    نورتينى حبيبتى ودمتى بخير

    *********************************

    هذه حياتى
    ــــــــــــ
    وعليكم السلام ورحمة الله وبركاته
    اهلا بيك يافندم
    اشكرك جدا ربنا يكرمك
    وكنا نتمنى ان تشاركنا بقصة اول سفير للاسلام حتى تعم الفائدة الجميع
    دمت طيبا ولمدونتى زائرا

    *********************************

    احسن تستاهل
    ــــــــــــ
    اختى الحبيبة:ما اجمله من دعاء وتمنى
    ربنا يلهمك الرشد ويختارلك ماتستطيعين أداءه باتقان
    :)ده بس من ذوقك أخجلتم تواضعنا
    نورتينى حبيبتى ودمتى بخير

    **********************************

    الوردة البيضا
    ـــــــــــــــ
    وعليكم السلام ورحمة الله وبركاته
    اختى الحبيبة: دايما سباقة بالخير ماتحرمش من سؤالك ياجميلة واعذرينى كان الجهاز عندى بايظ عاااا

    اشكرك جدا لرايك ولمشاركتك
    ومتفقة معكى جدا ولكنى أردت من وضع شعار دينى أن يكون هذا أولى من وضع صورة لمطرب او اى صورة أخرى فديننا اولى ان نبين للاخرين اعتزازنا به ومن ناحية أخرى لان اوقات كتيرة تدخلين مدونة ولا تعلمى ديانة صاحبها..
    نورتينى حبيبتى ودمتى بخير

    ********************************

    خالد
    ـــــــ
    اهلا بيك استاذ خالد
    ربنا يكرمك اشكرك جدا لرايك فماتوفيقى الا بالله
    الحمدلله الذى هداك اليه
    وما اجمل ان نقتنع تماما بديانتنا
    اللهم يامقلب القلوب ثبت قلوبنا على دينك
    دمت طيبا ولمدونتى زائرا

    ********************************

    مونى
    ــــ
    اختى الحبيبة:ربنا يعزك ويبارك فيكى
    ويجعلك ممن يباهى بهم الاسلام يوم القيامة
    اشكرك جدا لمشاركتك واعذرينى فى حل التاج فقد جاوبت عليه سابقا
    نورتينى حبيبتى ودمتى بخير

    *********************************

    المستنصر بالله
    ـــــــــــــــ
    اهلا بيك يافندم
    اشكرك جدا لمشاركتك ولاجابتك
    وانت فعلا سفير للاسلام امام المسلمين قبل غير مسلمين
    دمت طيبا ولمدونتى زائرا

    *********************************

    المعتصم
    ــــــــــ
    وعليكم السلام ورحمة الله وبركاته
    اهلا بيك يافندم
    ربنا يكرمك واشكرك جدا لرايك
    الله عليك وعلى اجابتك وخاصة الموقف الذى ذكرته
    ربنا يبارك فيك وفى صاحبك ويجعلكم واجهة مشرفة للاسلام دايما
    دمت طيبا ولمدونتى زائرا

    *********************************

    سبهللة
    ـــــــــ
    اختى الحبيبة:اشكرك جدا لمشاركتك واسمحيلى ابين وجهة نظرى فى اجابتك الاخيرة وهى اننا بالفعل سفراء لديننا سواء فى بلدنا ام فى اى بلد اخر لسبب بسيط وهو اننا دون ان نشعر نترك انطباعات لدى الاخرين سواء كان مسلم او غير مسلم يعنى مثلا ممكن تعملى موقف كويس امام واحدة مسلمة فتتعلم ده منك من غير ماتقوليلها ولا كلمة انتى بس فعلتى حاجة كويسة قدامها وهى قلدتك
    هذا ماقصدته
    نورتينى حبيبتى ودمتى بخير

    *********************************

    منى
    ــــــ
    اختى الحبيبة:ربنا يكرمك واشكرك لمشاركتك
    وحتى لو مش هتجاوبيها هنا يكفينى ان تشغل بالك قليلا
    نورتينى حبيبتى ودمتى بخير

  39. Mahmoud farag Said:

    السلام عليكم يا موناليزا

    و كل سنة و انتي طيبه

    موضوعك مثير للمناقشة فعلا

    انا هتكلم بس عن الجزء اللي بيقوول

    وكم أتعجب حينما أشاهد بعض الغير مسلمين يتعاملون بأخلاق الإسلام.

    بجد فعلا يعني الواحد بيحزن جدا لما بيشوف معامله غير المسلمين مع بعض ازاى
    بطريقة الاسلام .. تواضع … محبة … تعاون … أخلاق …

    و ازاى المسلمين بيعاملوا بعض بطريقة زى الزفت انا مش بعمم بس الاغلبية

    و ساعتها بتمنى جدا جدا في نفسي ان المسلمين يكونوا فعلا مسلمين ظاهرا و باطنا

    و ربنا يرحمنا جميعا .. و الحمد لله رب العالمين

    تقبلي مروروي …. و السلام ختام

  40. kochia Said:

    موضوع جميل
    فعلا لو الواحد اتعامل مع نماذج وحشة ودي منها كتير هياخد فكرة مغلوطة جدا عن الدين
    الحمد لله علي نعمة الاسلام وكفي بها نعمة

    الاسئلة بقي
    لو مش مسلم ايوة كنت هحاول لاني قريت فعلا في الاديان الاخري
    واحاول التعامل مع من حولي باخلاق الاسلام ما استطعت
    علاقتي بالدين زي درجة الحرارة ترتفع وتنخفض .. ساعات تبقي خانة وساعات تبقي حياتي كلها من اول ما اصحي لحد ما انام .. وسبب التباين ده للاسف مش عارفاه
    والسؤال بتاع سفير الاسلام مكمل للسؤال الذي قبله .. فترات الحرارة المرتفعة انا سفير .. وفترات الانخفاض لا اكن سفير
    الحقيقة اشعر بالعزة اكثر من القراءة في التاريخ الاسلامي .. مش مواقف حالية

    اشكرك علي الموضوع ده
    تحياتي

  41. على عبدالله Said:

    السلام عليكم ورحمة الله وبركاته

    كل عام وانت بالف خير
    وتقبل الله منا ومنك صالح الاعمال

    لو انت مش مسلم هل كنت ستسعى للتعرف على هذا الدين ؟ ولماذا ؟
    السؤال صعب والاجابة عليه اصعب ،لانى بشوف ناس كتير مش بتفكر هى عايشة ليه وازاى ،فبالتالى مش فارقة معاه يكون مسلم ولا اى حاجة تانى ،ممكن اكون منهم ؟؟!! ربما !!
    لكن انا عن نفسى والله اعلم دائما بحب افتش وادور واوزن بعقلى ،واكيد اى واحد هايدور ويفكر تفكير صح ،هاتكون المحصلة النهائية الاسلام
    المفروض اننا منسالش لو كنا هانكون ايه ،السؤال ازاى نداوم على الطاعة والعبادة حتى لا تزيغ قلوبنا
    هل علاقتك بالدين الاسلامى مجرد كلمة فى

    خانة نوع الديانة ؟؟؟!!
    بالتاكيد لا طبعا
    يكفى المسلم لارتباطه بالدين الذهاب للمسجد فى كل صلاة

    هل تشعر حقا بانك سفير للاسلام؟؟
    اكيد المفروض ان كل مسلم يحس الاحساس ده :انه سفير للاسلام ،بس هل نشعر بذلك ؟؟ نسأل الله الثبات

    اذكر موقف ؟؟!
    خليها بعدين !!

    خالص تحياتى

  42. حنين.. Said:

    كل سنه وانتى طيبه يا قمر
    *لو أنت مش مسلم هل كنت ستسعى للتعرف على هذا الدين؟ولماذا؟ احساسى بيقولى ايوا كنت هسعى وهتعب لغيت ما اعرف الاسلام واسلم
    *هل تتعامل مع من حولك بأخلاق الإسلام؟ الحمد لله , بس فى ناس بتخليكى تبتكرى معامله وتعامليها بيها, بس فى اغالب اه
    وربنا يستر
    السؤال دا خلانى افكر فى حاجات كتير, جزاكم الله خيرا, وكل الاسئله بجد
    *هل علاقتك بالدين الإسلامى مجرد كلمة فى خانة نوع الديانة فى بطاقتك الشخصية؟ لا الحمد لله
    جزاكم الله خيرا على البوست

  43. نبضات Said:

    وحشتنى جدااااا
    افتقدت جدا الفتره السابقه قرأه مواضيعك الصادقه من القلب بعيدا عن الزيف والتى تكتبيها بطريقه مميزه دائما

    اجابه الاسئله
    لو لم اكون بعد الشر عليا مش مسلمه اعتقد انى كنت سافكر فى الدين الذى تعلمته من اهلى هل هو الذى اريد ان اعتنقه ومؤمنه بيه اما لا وكنت ههتم بالقراءه فى كل الاديان لارى مايميز دينى عن غيره وماهو الاصح
    وطبعا نحن نؤمن بكل الدينات وكل الكتب السماويه التى انزلت ولكن قبل التحريف و نؤمن ان الرسول صلى الله عليه وسلم خاتم المرسلين

    لانه موضوع يستحق التفكير واكيد فى ناس كتير بيمر هذا السؤال على بالهم
    سواء مسلمين او غير مسلمين

    الاسلام بالنسبه لى ليس مجرد ديانه مكتوبه فى البطاقه ولكنه دين اؤمن بيه جدا واحاول دائما ان اعمل بيه وان احترمه واحترم دائما كونى مسلمه وسفيره لهذا الدين الجميل
    واحاول بقدر الامكان ان اتعامل فى كل اقوالى وتصرفاتى ومعاملاتى باخلاق الاسلام

    اكتر حاجه بتوجع قلبى …عندما ارى ناس ملتزمين فى العبادات ولا يتعاملوا باخلاق الاسلام سواء فى عملى او فى الشارع

    موقف استفزنى …واحد سواق ميكروباس مشغل القران الكريم واستغفر الله العظيم بيسب الدين
    اتخانقت معه وقلت له ازاى بتشغل قران وبتعمل كده ومش من حقك تسب الدين لانه دين كل المسلمين مش حاجه تخصك …تناقض غريب ان نسمع بشر يشغلون القران او يقرئون كتاب الله ولا يعملون بيه
    مش بعرف هما ليه بيشغوله
    او حد بيصلى ومدوام وبيعمل حاجات تتنافى مع تعاليم دينه وهو بيقف بين ايدين ربنا فى الصلاه كل يوم كذا مره ومش بيفكر فى اسلوب حياته

    بكون سعيدا جدا لما بلاقى ناس بتخاف من ربنا ومؤمنه ان ربنا شايفها فى كل وقت وستحاسب ولاقى حاجات صغيره جدا وبيراعوا فيها ربنا
    وفى كل تصرفاتهم بكون سعيده باسلامى وانى من سفراء هذا الدين الذى يدعو الى مكارم الاخلاق وعدم الظلم او الكذب او الغش والقسوه
    دين الانسانيه
    والحمد لله على نعمة الاسلام

    تحياتى

  44. موناليزا Said:

    محمود فرج
    ــــــــــ
    وعليكم السلام ورحمة الله وبركاته
    اهلا بيك استاذ محمود
    وانت طيب اخى الكريم
    معاك حق والله مشاهد تحزن ليتنا نتحلى جميعا باخلاق الاسلام
    اشكرك جدا للمشاركتك
    دمت طيبا ولمدونتى زائرا

    *******************************

    كوشيا
    ـــــــ
    اختى الحبيبة:اشكرك جدا لرايك ولمشاركتك ولاجابتك الصريحة
    اللهم لاتزغ قلوبنا بعد اذ هديتنا وهب لنا من لدنك رحمة انك انت الوهاب
    نورتينى حبيبتى ودمتى بخير

    –********************************

    على عبدالله
    ـــــــــــــ
    وعليكم السلام ورحمة الله وبركاته
    اهلا بيك استاذ على
    وانت طيب يافندم وبالصحة والسلامة

    انا معاك ان فيه ناس مش فارقة معاها بس انا هنا بسأل اسئلة خاصة وليست عامة يعنى كل واحد من خلال اجابته يقدر يحكم على نفسه
    اختلف معاك فى نقطة”يكفى المسلم لارتباطه بالدين الذهاب للمسجد فى كل صلاة “
    لان اوقات كتير الصلاة بتصبح عادة ويخرج من المسجد يسرق ويظلم ويغتاب ويكذب ويشهد زور الخ
    قصدت بهذا السؤال المعاملات وليست العبادات فالله هو من سيحاسب على اداء الفروض ولكن انطباعات البشر من المعاملات بينهم
    بالنسبة للموقف هنخليها بعدين لامتى بالظبط؟ عموما نحن فى الانتظار
    اشكرك جدا لمشاركتك
    دمت طيبا ولمدونتى زائرا

    ********************************

    حنين
    ــــــــ
    اختى الحبيبة:وانتى طيبة ياجميلة
    ربنا يكرمك واشكرك جدا لمشاركتك
    نورتينى حبيبتى ودمتى بخير

    ***********************************

    نبضات
    ــــــــ
    اختى الحبيبة:اهلا اهلا بالقمر وحشتييينى جدا فينك من زمان يارب تكونى بخير
    مدونتى افتقدت تعليقك المميز جدا
    ماتتأخريش علينا كتير كده تانى:)
    عجبنى اوى موقفك مع السواق ايوة كده اهى دى السفيرة ولا بلاش
    ربنا يعزك بالاسلام ويعز الاسلام بيكى ويبارك فيكى ويسعدك اللهم امين
    نورتينى حبيبتى ودمتى بخير

  45. سلوى Said:

    الله عليكي🙂

    أنا مسلمه وبحاول أكون مسلمه صح

    لو مش مسلمه كنت هشوف إيه الدين اللي بيقولوا عليه خاتم الأديان
    وكنت هدور

    الحمد لله على نعمه الإسلام وكفي بها نعمه

    دمتى بكل الخير موناليزتي

  46. مجداوية Said:

    السلام عليكم

    دائما أجد عندك الافادة والاستفادة
    أسئلة هامة جدا المفروض توزع استبيان على كل مسلم ومسلمة

    لنعلم هل نحن حقا مسلمون ؟؟!!!

    اجابة السؤال الأول

    نعم لأني سعيت للتعرف الى العقائد الأخرى لأعرف للمعرفة لماذا لا يؤمنون بما نؤمن ولما عرفت حمدت الله على أني مسلمة لأن العقل والبيان فى الاسلام وهذا ما فعله من دخل الى الاسلام حديثا فمهاجمة الاسلام بهذه الضراوة جعلتهم يتعرفون على الاسلام فعرفوا أنه الدين الحق يبقى أن يتعرف عليه معظم المسلمين !!!!!!!!!!!

    اجابة السؤال الثانى
    نعم أحاول جاهدة أن أكون انعاكسا للمرأة المسلمةالتى تتعامل بأخلاق الاسلام وأذكر نفسى دائما بهذا عند انفلات أعصابى وغضبى مما أراه

    اجابة السؤال الثالث
    لا ,,والحمد لله فعلاقتى بدينى الآن علاقة سعى للمعرفة والدراسة والتفقه فيه وأسأل الله أن يعيننى

    اجابة السؤال الرابع
    نعم بكل تأكيد أحس أنى سفيرة لديني ولكن كل ما أرجوه أن أكون سفيرة مؤهلة لهذه المهمة العظيمة

    يبقى أن أشكرك على وضعك للينك مدونة الدكتور ابراهيم سماحة فهى من المدونات الرائعة والمفيدة والجادة وذات الهدف وهو ما قل وندر هنا فى عالم المدونات

    فجزاك الله خيرا وبرجاء متابعة تعقيبى على تعليقك عندى على تدوينة القطار
    دمت بخير دائما غاليتى ونفع بك دائما

  47. موناليزا Said:

    سلوى
    ــــــــ
    اختى الحبيبة:اشكرك جدا لمشاركتك
    والحمدلله فعلا اننا مسلمين
    نورتينى حبيبتى ودمتى بخير

    **********************************

    مجداوية
    ــــــــ
    وعليكم السلام ورحمة الله وبركاته
    اختى الحبيبة:ربنا يخليكى فماتوفيقى الا بالله
    تعرفى ان بجد نفسى كل مسلم يسأل لنفسه الأسئلة دى ويشوف إجابته هتكون إيه

    ربنا يكرمك على اجابتك ويعزك بالاسلام ويعز الاسلام بيكى

    لا شكر على واجب فمدونة الدكتور ابراهيم هى صاحبة فكرة ترجمة المدونة للغات العالم فكان هذا اقل شئ يقدم

    تمت المتابعة والتعليق حبيبتى الغالية
    ماحرمنى الله من تواجدك وكتاباتك المميزة


{ RSS feed for comments on this post} · { TrackBack URI }

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: