خُدى بالك

إلى من تقوم بهذا المشهد/ هل تستطيعين الصلاة وأنتى ترتدى هذه الملابس الضيقة؟.
هل تقبلين أن تكونى فريسة للذئاب بهذا الذى تعتقدينه ستره؟.
انتى عارفة كام شاب ممكن يتفتن بسببك ومايقدرش يغص بصره وبالتالى تبقى شاركتيه فى الإثم لإنك ساعدتيه؟.
ياترى هتبقى مبسوطة لما تتعاكسى ويتقالك أى كلمة بايخة؟.
ياترى هيبقى إيه شعورك لو حد قاللك “عيب ع الحجاب اللى أنتى لابساه” وهتردى عليه ولا هتسكتى لإنك معندكيش جواب؟.

هل تقبلين أن يراكى أحد من محارمك وأنتى فى هذا الوضع؟.
تفتكرى لو واحدة أنتى شوفتيها كده مع اخوكى إنطباعك عنها هيكون ايه؟.
هل فى إعتقادك إن نهاية المشهد ده هتكون سعيدة وهيكون فيه كوشة وزفة؟! يبقى بيتهيألك طبعا لأن المشهد ده آخره ورقة عرفى هتتقطع ومش هيبقى ليكى عنده حاجة غير فضيحتك.!
بتعملى فى نفسك كده ليه؟ للدرجة دى نفسك وكرامتك هاينة عليكى؟
عايزة أقوللك اللى بيرخص نفسه مينفعش يكون غالى عند حد؟
إزاى هو هيحترمك إذا كنتى انتى مش بتحترمى لا نفسك ولا اهلك؟

هل تقبلين أن يراكى أحد رؤسائك أو أساتذتك وأنتى تقومى بهذا؟
هل تقبلين أن يصورك أحد بالموبايل ويبعت هذا المشهد بالبلوتوث إلى من يعرفك ومن لايعرفك؟
هل تقبلين أن يتأمل فيكى الرجال بهذه الطريقة؟
هل تقبلين أن يقال عليكى أى كلمة توجعك؟

هحكيلك على موقف مماثل”شخص يمتلك كافتريا وسعيد جدا بزواج أخوه وكل شوية يشغل شريط فيديو الفرح على شاشة العرض المهم فيه بنت فضلت ترقص فى أكتر من أغنية وطبعا الفيديو مركز عليها وكان شخص متقدم إلى هذه الفتاة التى كانت ترقص ورآها فى البيت مكسوفة ووشها فى الأرض وفى الفيديو ذى ما أنتى شايفة تفتكرى أنتى لو مكانه هتعملى إيه؟ .

أختى الحبيبة:بالله عليكى كونى أمينة على نفسك.
الاسلام أكرمك ليه بتهينى نفسك؟.
شوفى إيه اللى ينفع تصلى بيه واخرجى بيه.
شوفى إيه اللى ينفع تعمليه قدام أهلك واعمليه.
أنتى عارفة يعنى إيه محجبة؟ يعنى بقيتى رمز للإسلام بما ترتدينه وبالمقابل بما تفعلينه فبالله عليكى ماتشوهيش الاسلام بأفعالك.

88 Comments »

  1. Khaled Farag Said:

    الله ينور
    موضوع غاية فى الاهمية أحييكى على طرحة بس نتمنى أن يتحقق ..
    تقبلى تحياتى

  2. la3lahakhier Said:

    ازيك حبيبتى
    وحشتينى من نص ساعه ههههههههه
    كان زمان العاهرات تضع رايات حمراء تدلل بها على انفسهن وان كان بيستتروا داخل خيامهم !!!!!!!!!
    الغريب بقى ان البنت دلوقتى بتبقى كويسة فى تعاملتها مع الناس ومحترمة فعلا بس مثلا جشمها كله باين وبتلبس ملابس اقل مايقال عنها انها اثارة . طيب اثارة لايه ؟
    ماهو لما البنت تكتب على صدرها i love u ايه تفسيرها غير انها دعوة منها للجنس الاخر بما يشاء من استجابات بقى
    وبعدين لما تلبس ملابس لها دلالات جنسية وتبقى محترمة طاب ايه مفهوم الاحترام بقى عندها ؟!!!!
    انها تتعامل صح ؟حيجى منين الا من ظاهر ينطق بالباطن
    يا بنات ونساء المسلمين لاتكن لحما رخيصا والا لن تشروا الا بالرخيص ولا يشتريكم الا الرخيص
    تحياتى

  3. عاشقه الجنه Said:

    و الله موضوعك اكثر من رائع
    ماشاء الله عليكي اختي الحبيبه
    حفظكي الله
    فعلا في بنات عايزين ضرب النار
    غابوا عن مفهوم الدين الحق
    اصبح الحجاب عاده و ليس عباده
    نسال الله لنا و لهم الهدايه
    بارك الله فيكي غاليتي

  4. خبيب Said:

    جزيت كل خير

    الحجاب أصلا أي الستر

    والتي لا تستر نفسها ليست محجبة وإن ادعت العكس

    العبرة في الإسلام بالمضمون مش بالشكل

    العبرة بأنها لا تغري الشباب ولا تفتنهم ، مش بأنها حاطة إيشارب على راسها وكل ما سوى راسها باين

    قولوا لها : أنت متبرجة

    متبرجة

  5. monaliza Said:

    khaled farag
    أهلا بيك يااستاذ خالد وربنا يكرمك على تعليقك وعموما اللهم قد بلغت اللهم فاشهد
    ***********************************
    la3lahakhier
    اختى الحبيبة : وانتى اكتر ياقمر
    المصيبة ان فيه بنات مش فى دماغها ومجرد تقليد اعمى وخلاص مع انها لو حكمت عقلها شوية اكيد هتختار الصح
    ربنا يهديهم يارب ويردنا جميعا اليه مردا جميلا
    نورتينى ياحبيبتى وماتتأخريش عليا تانى
    ***********************************
    عاشقة الجنة
    اختى الحبيبة:ياريته عادة المصيبة انه بقى موضة
    اللهم تقبل دعائك ويارب زين الايمان فى قلوبنا
    نورتينى وأشكرك على مشاركتك
    ***********************************
    خبيب
    ربنا يكرمك وارجو من كل القارئات ان تقرأ تعليقك لانه وجهة نظر ذكورية حتى يعلموا رأى الطرف الاخر
    نورتنى واشكرك على مشاركتك

  6. محمد مارو Said:

    موضوع فى الجون

    اووووووووووى

    بس يا ريت حد يخلى عنده دم و يعمل بيه

  7. بطوط حبوب Said:

    انا خايف يجي اجبه اه ينفع
    الله المستعان

  8. د/اجدع بنوته Said:

    ربنا يجازيك خير يارب

    الظاهره دى انتشرت بقوه

    المحجبات ع ما تفرج دى

    وفعلا نصايح ولاروع لاهداف ولا اروع

    وخدى بالك انتى

    ماشاء الله بوستاتك عماله تعلى وتعلى

    وهنبدا نغييير

    هههههههههههه

    ربنا يوفقك ويزيدك كمان وكمان

  9. Yuki Said:

    بوست مهم فعلا .. جزاكي الله خيرا يا جميل .

    فعلا ناس كتير اوى بتنسى الهدف الاصلي للحجاب و بتنساق ورا الموضة و الشيطان

    اللهم اهدى شباب و بنات المسلمين

    الكاريكاتير دة كنت شوفته من مدة و معبر جدااا..

  10. Whispers just for a Night Said:

    السيدة Monaliza

    لطالما تمتعيني بمواضيعك الجادة المرتبطة بالواقع. بورك قلمك وسلمت يمينك

    السيدات المتعريات

    تحية طيبة وبعد

    فهذا خطاب مفتوح من رجل مثل أي رجل، ينقل لكم ما رآه مِن مَن حوله من الرجال ومن وجهة نظره الشخصية عسى أن تعلموا ما يمثله عريكم لنا!

    المرأة بالنسبة للرجل كالماسة. ملكة متوجة. وكما تعلمين ياسيدتي أنه كلما وضع الماس في القماش المخملي وبولغ في ستره زاد بريقه، وكلما كثر الحرس حول الملكات زدن رفعة. فما بالكم بماسة لها الأصابع اللزجة تتناقلها والهواء المحمل بالأتربة يغطيها، وما لكنَّ بملكة قررت أن تكون متسولة تتسول النظرات من أعين الرجال؟
    يادرتنا المكشوفة
    ألا تعلمين أنه لما يتكاثر الذباب على اللحم يفسد؟ وإذا نهشت العيون منك فماذا يبقى منك؟
    الزوج الرجل بمعنى الكلمة هو من لا يرضى أن يتزوج من امرأة قد رأى غيره منها شيئاً، واسمعي كلام من يتزوج من هن مثلك:
    جالسنا أحد الرفاق يوماً وقد قرر أن يخطب إحداهن ممن تلتحف بالعري وذلك ليقدمها لمديره فينال ترقية!

    أحدهم أخبرنا أنه تزوج من ترتدي ثوب الشِفَاف حتى تكون واجهة إجتماعية ويقول أن لقائهما وكأنه لقاء بعاهرة وما لبث أن تزوج بأخرى سمتها الإحترام والإحتشام وقال تلك أم لأولادي أما الثانية فوعاء شهوتي!

    أحدهم تزوج من هم على شاكلتك ممن يكرهون ملابسهم لأنه يعاني من الشذوذ!

    أحدهم تزوج ممن سار على دربك لأن متعته كلها تنحصر في نظرات الإعجاب التي تطل من عيون الرجال “على ما هو ملك له دون غيره”!

    أؤكمل لك؟
    أم اكتفيت؟

    النماذج كثير وما في جعبتي من القصص أكثر.

    إني خيرتك فأختاري
    ما بين زواج من ذكر
    أو تقترني فخر الرجالِ

    إني خيرتك فاختاري
    ما بين عفو من ربي
    أو بين حبائل الشيطان

    إني خيرتك فاختاري
    ما بين جنان في الخلد
    أو تخلدين في النيرانِ

    واحتراماً للسيدة Monaliza أتوقف عند هذا القدر فقد أطلت بما فيه تعدي وإطاحة بقواعد اللياقة

    أسأل الله لنا لوكم وللمسلمين الستر في لدنيا والآخرة

    إحترامي وتقديري

  11. الربان Said:

    تحياتي

    احييك علي انك تحدثت في هذا الموضوع
    لاني أري مناظر يندي لها الجبين ، تأتي
    من المحجبات…لا بل من المنقبات أيضا.

    مثال بسيط: منقبة جالسة بمفردها علي كافيه…عادي…لكن غير العادي انها تدخن الشيشة…ترفع النقاب من اسفل
    و تستمتع بالتدخين…ثم تنزل النقاب في
    استراحة قصيرة قبل ان تعاود الكره.

    لو دخنت في البيت هي حرة…او في مكان
    خاص ..ايضا هي حرة…لكن في كافيه يرتاده الجمهور…يبقي مرض و ادعو الله ان يرفع عنها ما ابتلاها به.

    العري و الملابس غير المحتشمة ينافي الفطرة
    السليمة…

    تحياتي و تقديري…و مرة اخري شكرا لتنبيهك للاخوات…عسي الله ان يثبت إيمانهن و ينر قلوبهن بقبس من نور وجه الكريم.

  12. عصفور المدينة Said:

    جزاك الله خيرا وبارك في عقلك وقلمك وأتمنى عليكن أن تجتهدن في دعوة الفتيات إلى ذلك لأن هؤلاء يمكن أن يستمعن إلى الفتيات أكثر من المشايخ وحتى الآباء والأمهات

  13. nonoymm Said:

    يا امة الله الله يبارك فيكي ويكرمك
    والله انتي قلتي وكتبتي موضوع غاية الروعة
    ليتهم يعقلون
    بوركتي حبيبتي

  14. صوت من مصر Said:

    انا اسف بس ممكن اتكلم بصدق شويه
    بصراحه انا شايف ان لبس الحجاب مع الجينز الضيق والبادى امر رخم وشكله مش لذيذ لكن اذا كان يتفرض على الناس حريتهم فى لبس امر مزعج برضه ارى ان الدين لله مش لازم نقول للناس تعمل ايه كانه اجبار لكن الناس عارفه هى بتعمل ايه يعنى فى بنات كتير بتقول ان لابسه الحجاب ده عشان الناس يعنى لا ده غلط يا البس الحجاب وانا راضيه عنه يا بلاش صح كلامى ولا غلط

  15. حســــــــــــــــام حـــــــــــــــامد Said:

    اولا: بعد ما قريت الموضوع ده انا ندمان انى مدخلتش المدونة دى قبل كدة ..جزاكى الله كل خير بجد انا فخور ان فى حد لسه الموضوع ده شاغل دماغه ..ياريت تكملى المسيرة فى الجانب ده لانه مخلصش ..ودى مش اخر مرة هدخل المدونة …
    الموضوع ده مهم اوى يا جماعة .بحييكى ورينا يكتر من امثالك ويجعل تعبك بفايدة……
    ثانيا : المشكلة الاكبر ان الولاد كمان مبقوش زى زمان بمعنى ان زمان اى ولد تقوليله تقبل تتجوز بنت بتلبس محزق يقولك لا طبعا .دلوقتى بتلبس محزق ماشى .مش محجبة ماشى .كانت مرتبطة مرتين ده غير الخطوبة الاولانيه عادى.ويمسك اديها وبوستين مع حضن ده غير تليفونات لحد الصبح زمان كان الكلام ده مع البنات اللى بيتسلوا بيهم لكن المصيبة دلوقتى ان ده مش بياثر على البنت ولا بيقل منها قدام الولد ودى بقت كارثة .وده برده اللى مخلى البنات على راحتها اوى ..
    ثالثا ودى المصيبة اللى مش لاقيلها حل..
    الامهات انا مش عارف حصلهم ايه مفيش بنت ماشية مع واحد الا وامها عارفة ..وقال ايه تكلمه قدامى احسن ما تكلمه من ورايا ولما تخرج ماعاه تقولها وهى تفولك ياسلام على الادب اللى فى البنت وتفتخر بيها قدام صحابها وتقولك بنتى مش بتخبى عليا حاجة وابوها ياعينى غرقان فى دوامة لقمة العيش..وفاكر ان الام مسيطرة على الموقف واخوها غرقان لشوشته مع واحدة وطول اليل مع صحابه هو فاضى …
    انا اسف طولت بس الموضوع ده شاغلنى اوى ..

  16. رئيس جمهوريه نفسى Said:

    اولا طرحك للموضوع بالصور جيد جدا علشان كده انا بقول انى الحجاب مش مجرد اسكارف او طرحه اوحتى قماش بتغطى الشعر الحجاب كمان ساتر بيغطى القلب عن الغلط والسئيات فلو حجاب الشعر مغطاش القلب وحجبه عن السئيات توفر حق الاسكارفات احسن

  17. appy Said:

    عارفه مش بيغظنى غير اللى بيعملوا كده ويقولوا على نفسهم محجبات
    طيب ده ينفع والله شكلهم بيكون مقزز جدا
    ربنا يهدينا جميعا وتبقى تصرفاتنا كويسه

  18. liberal-egyptians Said:

    اعتقد اننا يجب ان نتجاوز دور الدعاة الصالحين ونلتفت الى امور اكثر اهمية من تلك التى تحاولى ان تثيريها … كل شخص حر ان يرتدى ما يشاء ويخلع ما يشاء … نحن لسنا داخل مدرسة إبتدائية ليتم فرضنا على ان نرتدي ملبس محدد. ثم ان سلوكيات البشر تختلف من وقت الى اخر ومن مكان الى اخر

  19. Egyptian Liberals Said:

    اعتقد اننا قد تجاوزنا دور الدعاه الصالحين ويجب التركيز على موضوعات اكثر اهمية

  20. آفاق الحرية Said:

    خدي بالك
    فعلا
    الاسلام اكرم المرأة فلما تهين نفسها بهذه الازياء التي لم تصنع الا لتهينها
    والغريب انها تحاول الجدال فتقول ان الايمان في القلب وليس في الزي
    لاحول ولا قوة الا بالله

  21. walaa Said:

    احسنت يا اختى فى هذا البوست وجعل هذا الكلام فى ميزان حسناتك
    بجد الناس بعدت عن دينها قوى
    وبقت بتقلد تعليمات الغرب
    الناس عايزه ترجع للاسلام من جديد علشان تقدر تغيير ده
    تحياتى اليكى ولاء

  22. ايوية Said:

    مقدرشى اقول غير ارئع بس مين يسمع

  23. Hosam Yahia حسام يحى Said:

    ربنا ينفع بيكى استاذه موناليزا

    موضوع جميل جدا بجد

  24. monaliza Said:

    محمد مارو
    أشكرك على تعليقك ونأمل من الله ان يجيب فعلا نتيجة
    نورتنى وارجو دوام التواصل
    ***********************************
    بطوط حبوب
    أشكرك على زيارتك وعذرا فلم افهم تعليقك ياريت لو توضحهولى اكون شاكرة ليك جدا
    ***********************************
    د/أجدع بنوتة
    أختى الحبيبة:ربنا يكرمك والحمد لله ان بوستاتى من وجهة نظرك حلوة
    وهتغيرى ازاى يا سمسومة وانتى ماشاء الله عليكى مواضيعك متميزة
    وده بس من ذوقك ياقمر
    ويارب دايما منورانى ومفرحانى بتعليقك
    اللهم تقبل منا ومنكم صالح الاعمال
    ***********************************
    yuki
    اختى الحبيبة:أشكرك على زيارتك الاولى وياريت متكونش اخر مرة
    نورتى مدونتى
    اللهم اجعل طاعتك احب الاشياء الى قلوبنا
    اللهم زين الايمان فى قلوبنا
    ***********************************
    whisper just for a night
    الاخ الفاضل كم يسعدنى إطالتكم المفيدة لكى تقرأ كل فتاة وجهة نظر الطرف الاخر لعلهاتدرك ماتفعله بنفسها وبدينها
    جزاكم الله خيرا وأشكرك على مشاركتك
    ***********************************
    الربان
    العرى والملابس غير المحتشمة ينافى الفطرة السليمة
    أخى الفاضل هذه الجملة جابت من الاخر واختصرت كل كلمة ممكن تقال
    أحييك عليها جدا وجعلها الله فى ميزان حسناتك واتمنى ان تنفع بها كل المسلمات
    أشكرك على مشاركتك وجوزيت خيرا
    ***********************************
    عصفور المدينة
    ربنا يبارك فيك واشكرك على مشاركتك
    ونرجو من الله مثلكم ان ينصلح حال الجميع ويهدى شباب المسلمين
    جزاكم الله خيرا واشكرك على مشاركتك
    ***********************************
    nonoymm
    اختى الحبيبة ربنا يكرمك ولعل الله يحدث بعد كلامنا هذا امرا
    جزاكم الله خيرا واشكرك على مشاركتك
    **********************************
    صوت من مصر
    لا داعى للاسف فانا أقبل واحترم جميع الاراء مهما اختلفت معى فلك مطلق الحرية فى التعبير عن رأيك واحييك على صدق كلامك
    ولكنى اخى الفاضل مش بجبر البنات على ارتداء لبس معين ولا حاجة انا بس بذكرهم بالزى الشرعى اللى ربنا فرضه ودى مفيهاش اختيار لان المراة فى الاسلام ليست مخيرة فيما ترتدى لأن الحجاب فرض وبما ان ربنا هداها ولبسته يبقى تحترمه
    نورتنى وأشكرك على مشاركتك
    **********************************
    حسام حامد
    ربنا يكرمك يارب وانا سعيدة جدا بزيارتك وهستنى التكرار وياسيدى طول براحتك انا عايزة كل البنات يقرأوا وجهة النظر الذكورية ويعرفوا ان مش الكل بيوافق ولا بيقبل ده
    وتعليقك فكرنى بواحدة كانت زميلتنا فى ثانوى وعرفنا انها مرتبطة بشاب وطبعا هى مخبية علينا كلنا ولما واجهناها برضه قالتلنا ماما عارفة وانتوا مالكم؟لكن الحمد لله هى اتجوزت الشاب ده واحنا اللى طلعنا فى الاخر وحشين هههه
    ربنا يهدى الجميع اذا كانوا كبار او صغيرين
    نورت مدونتى وأشكرك على تعليقك
    **********************************
    رئيس جمهورية نفسى
    أنا متفقة معاك جدا ياريت اللى تلبس الحجاب تكون قده وتعرف انها بقت تحت الميكرسكوب فى كل ماتفعل فلا تسئ للاسلام
    جزاكم الله خيرا واشكرك على مشاركتك
    دمت طيبا ولمدونتى زائرا
    ***********************************
    appy
    اختى الحبيبة:واللى يغيظ اكتر انها ممكن تكون فى حفلة وتقلع الحجاب وتتحزم بيه
    اللهم لاتؤاخذنا بما فعل السفهاء منا
    نورتينى واشكرك على مشاركتك
    **********************************
    liberal_egyptians
    لماذا من وجهة نظرك يجب ان نتخلى عن دور الدعاة؟وهل يوجد اهم من نشر الاسلام
    معذرة فلا اعلم ديانتك ولكن من لايهتم بامر المسلمين ليس منهم
    وفى الاسلام حجاب المرأة فرض سواء كانت فى ابتدائى او فى ثانوى او حتى مش متعلمة واذا كنت تقبل على محارمك ان يرتدين ماشئن فانا لا اقبل ان تكون فتيات المسلمين سلعة رخيصة بارتدائهن مايسئ لدينهن قبلهن
    وعايزة اقوللك ان سلوكيات المسلمين واحدة فى كل زمان ومكان
    وحرية المرأة فى ارتداء ما تريد فهذا فى الاسلام فى بيتها فقط ولكن وهى خارجة فهى مجبرة على ستر نفسها لانها غالية وكريمة
    واذا كان عندك موضوع اهم من ستر عورات محارمك ياريت تطلعنا عليه حتى تعم الاستفادة للجميع
    ***********************************
    آفاق الحرية
    ربنا يكرمك على حميتك وغيرتك على فتيات المسلمين جعله الله فى ميزان حسناتك
    نورتنى واشكرك على مشاركتك

  25. monaliza Said:

    walaa
    اختى الحبيبة:ولاء والله وحشتينى بقى لك كتير مجيتيش عندى ولا امتعتينى بتعليقك
    نورتينى واشكرك على مشاركتك وياريت ماتتاخريش عليا تانى
    ***********************************
    ايوية
    اختى الحبيبة:اشكرك على مشاركتك واحنا بنعمل اللى علينا فمن راى منكم منكرا فليغيره بيده فان لم يستطع فبلسانه فان لم يستطع فبقلبه وذلك اضعف الايمان”صدق رسول الله صلى الله عليه وسلم
    ربنا يهدينا ويزين الايمان فى قلوبنا
    نورتينى وارجو دوام التواصل
    ***********************************
    حسام يحيى
    ربنا يكرمك واشكرك على مشاركتك
    دمت طيبا ولمدونتى زائرا

  26. NOur Said:

    موناليزا

    انا بحبك اوى
    و معاكى جدا ف كل اللى بتقوليه
    و بدعى ربنا يهدينى و يهدى كل بنت مسملة و الشكل العام ف الشوارع يتحسن أكتر

  27. shaimaa elgarhy Said:

    الله عليكى بجد اصايتى الهدف

    حته موضوع جااااامد فعلا

    احيكى على مدونتك ويارب الموضوع ده يكون فى ميزان حسناتك

    تحياتى ليكى…..زائرة جديده

  28. shaimaa elgarhy Said:

    الله عليكى
    موضوع جامد بجد يارب البنات اللى بتعمل كده تشوفه وهى قاعده على النت كده وتتكلم فى الشات تروح ايديها جبياها وهى بتقلب فى الصفح لحد متوصل للمدونه عندك …وتكونى سبب فى هداتيتها

    ادعى معايا ما تبخليش عليهم
    جزاكى الله خيرا عليها ويارب تكون فى ميزان حسناتك

  29. dr_modymodak Said:

    والله العظيم يا موناليزا موضوع من الاهمية بما كان

    عندك حق في كل اللي قلتيه بجد والله حرام

    نبص يمين نبص شمال نحط دماغنا في الارض برده مفيش فايده

    مش عارف البنات بتتفنن انهم يغووا الشباب بصراحه والله منتهي قلة الادب والاسم محجبه

    توب علينا بقي يارب

  30. monaliza Said:

    nour
    اختى الحبيبة:أحبك الذى احببتنى فيه
    ربنا يسعدك يارب ويهدينا جميعا ويقربنا من طاعته ويبعد عننا المعصية
    أسعدتنى مشاركتك
    نورتى مدونتى وأرجو دوام التواصل
    **********************************
    shimaa elgarhy
    اختى الحبيبة :اهلا بيكى فى زيارتك الاولى وياريت متكونش اخر مرة
    ويسمع من بقك ربنا يارب ان كل البنات يقرأوا موضوعى واكون سبب فى هدايتهم بس برضه همتك معايا لو قدرتى تقولى لاى واحدة تعرفيها بتعمل كده هتاخدى ثواب برضه
    ربنا يكرمك وأشكرك على مشاركتك
    نورتى مدونتى وارجو دوام التواصل
    ***********************************
    dr_modymodak
    أخى الفاضل دكتور مودى رغم قسوة كلامك الا انى بحييك جدا عليه وبتمنى اى بنت تقراه يمكن تخلى عندها دم شوية وتعرف هى بتعمل ايه سواء بقصد او بدون قصد
    والشباب بجد ربنا يكون فى عونه مطالب بغص البصر فى ظل هذه الاغراءات ربنا يثبتكم يارب
    والبنات ربنا يهديهم ويحبب اليهم الستر
    أشكرك على مشاركتك
    دمت طيبا ولمدونتى زائرا

  31. الفارس الملثم Said:

    حقيقي نصائح غالية جدا , وكلامك صح تماما, وكل دي سلوكيات وتصرفات خاطئة نراها في مجتمعنا وقد يراها البعض عادية رغم خطورة نتائجها …

    بوست قيم للغاية , جزاك الله كل خير

    تحياتي وتقديري

  32. zOzO Said:

    تحياتي ليكي موناليزا
    البوست بجد هايل وكلامك حلو اوي بس مين هيسمع ؟
    للاسف الشباب دلوقتي بيقدروا يسيطروا علي البنت
    في ناس اعرفهم معايا في الدفعه
    في الدفعه ليه في الجامعه كلها بجد حاجه تكسفل لما تلاقيها ملتزمه وقاعده مع واحد
    والحاجه اللي تتضايق اكتر لما تكون لابسه اسدال
    والله امبارح بس شايفه واحده قاعده مع واحد وكانت لابسه اسدال
    وكان ….
    هقول ايه ربنا يهديهم
    ومره تانيه بقي لقيت اتنين منقبين
    قاعدين كل واحده مع واحد
    ومش لابسه جوانتي
    تخيلي
    ربنا يهدي الجميع
    تحياتي ليكي
    اختك زوزو

  33. دعاء مواجهات Said:

    بصراحة انتى اتكيتى على حاجة غيظانى بجد وفاقعة مرارتى ال عاملين فيها محجباات وعايشينها طوول وعرض مش عارفة إية منطقهم بصراحة ولا بيوهموا نفسهم ولا ميعرفووش؟؟؟

  34. monaliza Said:

    الفارس الملثم
    ماهى المشكلة فعلا فى اللى بيشوفوها عادية واللى يضايق اكتر ان اولياء الامور متقبلين مايحدث من تصرفات او لبس بناتهم ومعتقدين ان ده تمدن وتحضر وناسيين خالص ان ده حرام
    اللهم ردنا اليك ردا جميلا
    أشكرك لمشاركتك
    دمت طيبا ولمدونتى زائرا
    ***********************************
    zozo
    أختى الحبيبة:معك حق وبالنسبة للامثلة اللى انتى ذكرتيها ده بيأكد ان المرأة بما ترتدية وبما تفعله تكون معبرة عن دينها
    ياريت الكل يقرا تعليقك ويشوف قد ايه ممكن نسئ للاسلام واحنا مش واخدين بالنا
    جزاكم الله خيرا على حميتك واشكرك على مشاركتك
    نورتى مدونتى وارجو دوام التواصل
    ***********************************
    دعاء مواجهات
    أختى الحبيبة:المشكلة من وجهة نظرى تنقسم لفريقين الفريق الاول واخدين الحجاب موضة وعلى اساسه مفيش حاجة بتبقى فارقة معاهم ودول محتاجين حد يفوقهم ويعرفهم خطورة استهزائهم بالحجاب
    الفريق التانى بقى دول ممكن بجد يكونوا ميعرفوش يعنى ملقيوش توجيه والبيئة بتاعتهم مساعداهم على كده ودول محتاجين مجرد تذكرة تصحيههم وتنبههم من غفلتهم وعلى فكرة توجيههم اسهل كتير لانهم محتاجين يعرفوا فهيدوكى الفرصة ويسمعوا منك ولما يلاقوا اللى بيعملوه غلط هيبطلوا تصرفاتهم دى فورا
    ولانملك فى الفريقين سوى التوجيه والدعاء لهن بالهداية
    أشكرك لمشاركتك
    نورتى مدونتى وارجو دوام التواصل

  35. مجداوية Said:

    أختى الحبيبة
    سبحان الله لقد تناولت أختى الكريمة نفس الموضوع الذى كان أخى الكريم أحمد المسلم يريد ان يعرضه وطلب منى أن أرسم له مثل الرسومات التى أرفقتيها مع الموضوع ولكنى اعتذرت له بان مجال الرسم هذا ليس تخصصى وأرسلت اليه بضع رسومات أخرى تفيد نفس الموضوع من على النت لكن ما عرضتيه أوفى جميع الجوانب والرسومات أيضا ممتازة ولكن أختى الكريمة النداء يكون لمن ربى هؤلاء الفتيات للأم والأب وللأم خاصة فهى التى عليها مسئولية تعليم ابنتها معنى الحياء وتعلمها أن الحجاب فرض وليس حرية شخصية وأنه تميز لها عن باقى نساء الأرض وانه أيضا جهاد للنفس تدخل به الجنة لأنها تحافظ على طاعة الله رغم كل المغريات التى تشدها نحو التبرج ولهذا فهؤلاء الفتيات اللاتى يمزجن بين الحجاب وبين التبرج والموضة فعلن كمن رقص على السلم فلا هى محجبة طائعة ولا هى سافرة فتريح نفسها وتمحى الاساءة الى المحجبات الأخريات,,هداهن الله جميعا وهدى أمهاتهن وآبائهن قبلهن ,,اللهم آمين

  36. همس الاحباب Said:

    جزاكى الله خيرا
    على هذا البوست الرائع
    بما فيه من معالجة لافة انتشرت فى المجنمع بين اخواتنا وبناتنا
    ربنا يهديهم لطريق الرشاد والالتزام بالاسلام وتعاليمه
    تحياتى وبالتوفيق دائما
    خالد

  37. منة الله Said:

    سلمت و سلمت يمينك اختى الفاضلة
    معرفش ليه دايما البنى ادم بيتحايل على الدين ليوهم نفسه انه صح
    البنت اللى قررت الحجاب يا تتحجب زى الشرع ما قال يا بلاش
    الحكاية مش ايشارب و خلاص دا اسمه حجاب يعنى حجاب عن الفتن و المعاصى و فى الاخر اتحسبت علينا محجبة
    و صدق رسولنا الكريم عندما اشار الى قلبه و قال التقوى ها هنا التقوى ها هنا التقوى ها هنا
    صلاح القلوب اساس كل شئ و لا املك الا الدعاء لهم و لنا بالهداية
    خالص احترامى لك

  38. مطرح ما ترسى....دقلها Said:

    صح لسانك يا استاذة والله
    المفروض البنات يحرصوا شوية
    مش عشان حد يشوفهم
    وانما عشان كرامتهم نفسهم

    وحكاية التصوير بالموبايلات دى منتشرة جدا اليومين دول
    بس العيب مش على اللى بيصور
    العيب على اللى بتعمل حاجة تستحق التصوير

    ——————-

    مدونتك رائعة وموضوعاتك هادفة بجد
    واسمحيلى اكون من جماهيرك

    والى لقاء

  39. klmat Said:

    السلام عليكم
    الصور معبره جدا احييكى على الاستعانه بها
    فعلا الشارع فيه محجبات طريقه لبسهم مستفزه الغرض من الحجاب هو الستر والوقار
    والتصرفات تكون محترمه بينما نجد بنات
    صوتها عالى والضحكه ترن للأسف بيسيئوا
    للاسلام لامانع ابدا من الاناقه مع الالتزام
    ربنا يهدينا جميعا ونكون جديرين باسلامنا
    احييكى من قلبى
    خالص حبى وتقديرى

  40. ميندوزا المصري Said:

    ربنا يهدي وفعلا حاجه مستفزه جدا ان واحده تبقي محجبه ولابسه بنطلون برمودا مثلا
    انا بشوف الحجاب البرمودا ده كتير مش عارف ليه والغريب بقي ان في بنات مش محجبات ولابسين محترم وماشيين محترمين اكتر من بنات المفروض انها محجبه
    ربنا يرحمنا

  41. كاميليا Said:

    الله عليكى

    اسلوبك غاية فى الرقة
    والتفاهم والنصح بود ونعومة

    بارك الله فيك

    تحياتى

  42. monaliza Said:

    مجداوية
    أختى العزيزة:يسعدنى ان يتم تناول هذا الموضوع من قبل الاخ احمد لانها هتكون وجهة نظر ذكورية فانا فى انتظار ماسيكتب واتمنى من كل البنات ان يعرفوا وجهة النظر الاخرى على مايفعلن
    اما عن اولياء الامورهما اه مسئولين مسئولية كبيرة بس ده مايمنعش ان البنات برضه مسئولة يعنى تحكم عقلها شوية افرضى اهلى مش فى دماغهم ولا بيهتموا بالدين ابقى ذيهم ليه؟ ياريت يعرفوا ان محدش هيدخل قبر التانى
    ربنا يهدينا ويحبب الينا الايمان ويزينه فى قلوبنا
    نورتينى واشكرك لمشاركتك
    ***********************************
    همس الاحباب
    نورتنى يااستاذ خالد واشكرك لمشاركتك
    دمت طيبا ولمدونتى زائرا
    **********************************
    منة الله
    اختى الحبيبة:ربنا يكرمك على تعليقك
    نورتى مدونتى واشكرك على مشاركتك وارجو دوام التواصل
    ***********************************
    مطرح ماترسى دقلها
    أهلا بيك اخى الفاضل ويسعدنى زياراتك
    نورت مدونتى واشكرك على مشاركتك
    *********************************
    klmat
    وعليكم السلام ورحمة الله وبركاته
    معك كل الحق
    أشكرك لمشاركتك
    نورت مدونتى وارجو دوام التواصل

  43. monaliza Said:

    ميندوزا المصرى
    ياسلام لو يعرفوا قد ايه بيسيئوا للاسلام اكيد كانت افعالهم اتغيرت
    نورت مدونتى واشكرك على مشاركتك
    **********************************
    كاميليا
    أختى الحبيبة:قال تعالى”لو كنت فظا غليظ القلب لانفضوا من حولك”صدق الله العظيم
    فما بالك وانا اتكلم مع اخواتى فهذا من فضل ربى
    ربنا يكرمك على تعليقك
    نورتى مدونتى واشكرك على مشاركتك

  44. *سمر* Said:

    جزاك الله خيرا ..مدونة جميلة جدا …انا حاسة انها مدونة لخدمة الدعوة ..جزيت خيرا ان شاء الله
    وبالنسبة للموضوع ده ..كويس اوى انك اتكلمتى عنه..لانه فعلا فيه فهم خاطئ لمفهوم الحجاب وشروطه ..ولازم الحاجات دى توضح

    http://wa7di-ofakker-137.blogspot.com/

  45. t3ban Said:

    المفروض محجبة
    وكمان مش كل الشباب ذئاب
    فيهم كلاب سعرانة!
    و فيهم حمل وديع
    و علي فكرة
    عن الشباب
    بيحترمو الي مش محجبة عن الي محجبة حجاب توفير كوافير
    و الأهم مش الحجاب الي هو فرض
    الأحترام
    ايون الأحترام
    تقبلي مروري

  46. بنوته مصرية Said:

    الله الله عليكي
    بارك الله لكي
    بجد نصحتك جميلة واسلوبها جميل

    ربنا يهدي كل البنات يارب ويجعله في ميزان حسناتك

    لكي كل احترامي وتقديري

    اختك رودي

  47. الراقص مع الذئاب Said:

    السلام عليكم
    جزاك الله خيرا يا اختنا الكريمة علي المضوع المهم واللي لازم كل اخواتنا يشفوه
    عشان الوضع بقي غريب اوي فعلا
    الحجاب كلمة تشمل حجات كتير
    مش حتة قماشة علي الشعر وخلاص

    ————-

    والموضوع السابق برضو ممتاز
    ربنا يكرمك

    دمتي في خير

  48. مواطن مصرى نايم Said:

    موضوع من كتر انه مؤثر
    يخلى الواحد يصل الى قمة الضحك
    بجد روعة
    موضوع جااااااامد جدا

  49. dina Said:

    بارك الله فيكى اختى
    وجزاكى كل خير

  50. Rain man Said:

    لا داعي لذكر ان اسلوبك في الدعوة ممتاز
    هذا الشىء لابد انك تعرفينه
    سأكتفي فقط بعد اعجابي الشديد بطريقتك .. ان ادعو لكِ بكل الخير
    بارك الله لكِ

    تحياتي

  51. احمد الجيزاوى Said:

    المشكله ان لبس الحجاب اصبح عادات وتقليد زيه زى عيب اكلم ولد فى الشارع علشان الجران هيقوله ايه بس ممكن اكلمه فى التفون او على النت
    ونسينا الحلال والحرام والنيه فى العمل والاخلاص النيه كل دة نسينه
    عموما موضوع رائع وجزاكى الله عليه خيرا
    احمد الجيزاوى

  52. اجندا حمرا Said:

    عزيزتي موناليزا

    الألتزام بيبتدي اولا من الشخص نفسه من جواه
    يعني ممكن البنت من دول تكون لابسه نقاب او حجاب عشان اهلها اجبروها علي كده و لما بتخرج من البيت بتقلعه عشان اهلها مش شايفنها و تعمل مابدالها
    الأخلاق هي اللي تقدر تمنع البني ادم من ارتكاب المعاصي
    تحياتي لكي

  53. Dragon Said:

    PLEASE SEE THIS BLOG :
    http://shomanfarm.blogspot.com/

  54. Nostor Azzuro Said:

    حجاب ايه اللى انتى بتتكلمى عليه
    كبرى دماغك يا شيخة
    ودعى الخلق للخالق
    يعنى ماهو اللى بيعمل حاجة غلط ماهو عارف ان هى غلط بس بيعملها بمزاجه
    وكل واحد بيتعلق من عرقوبه
    والحجاب موضوع مهم ولازم نلتزم بيه
    بس لما نلتزم بدينا الأول
    يعنى يانلزم بالدين كله يا بلاش

  55. Ahmed Douma Said:

    أختاه
    رائع ما كتبت وربي
    نفعك الله ونفع بكـِ
    تحية
    …,…
    ود

  56. ammola Said:

    ربنا يبارك فيكى ويكرمك
    بوست جميل وطريقةحنونة للنصح
    بس معلش بأه..أناما ينفعش أخرج بالملابس اللى ينفع أصلى بيها خالص
    🙂

  57. مجداوية Said:

    موناليزا
    امة الله
    عندك حق اختى الكريمة فعلا انا اعرف فتيات الأم مش محجبة وبنتها ملتزمة ومحجبة بل ان فيه مسلمين والآباء على ديانة أخرى فصحيح النداء لهن لأن لكل واحد له عقل المفروض يميز بيه وطبعا بجانب مسئولية الآباء والأمهات
    جزاك الله خيرا وزى ما قولتى الأخ أحمد أكيد حيتناوله باسلوب آخر لكن طبعا المضمون والهدف واحد بارك الله لك وله ولجميع المسلمين الغيورين على دينهم

  58. monaliza Said:

    سمر
    أختى الحبيبة:ربنا يكرمك وده بس من ذوقك والحمد لله انها عجبتك
    وجميعنا نأمل ان توضح هذه المفاهيم المسيئة للاسلام
    أشكرك على مشاركتك
    نورتى مدونتى وارجو دوام التواصل
    ***********************************
    t3pan
    والاجمل اخى الفاضل ان يكون الحجاب اللى هو فرض مقترن بالاحترام
    نورت مدونتى واشكرك على مشاركتك
    **********************************
    بنوتة مصرية
    اختى الحبيبة رودى:ربنا يكرمك ويتقبل دعائك
    اشكرك على مشاركتك
    نورتى مدونتى وارجو دوام التواصل
    ***********************************
    الراقص مع الذئاب
    وعليكم السلام ورحمة الله وبركاته
    ربنا يكرمك على حميتك ويجعلها فى ميزان حسناتك
    نورتنى واشكرك على مشاركتك
    دمت طيبا ولمدونتى زائرا
    ***********************************
    مواطن مصرى نايم
    ولو انى مش فاهمة ايه اللى يضحك فى الموضوع بس الحمد لله انك انبسطت
    اشكرك على مشاركتك
    دمت طيبا ولمدونتى زائرا
    ***********************************
    dina
    أختى الحبيبة: ربنا يكرمك على تعليقك ويارب الموضوع ييجى بفايدة
    نورتى مدونتى وارجو دوام التواصل
    ***********************************
    rain man
    ربنا يكرمك وده كتير عليا جدا فانا لست بداعية ولكنى مسلمة اريد ان يردنا الله اليه مردا جميلا
    واشكرك جدا على دعائك وستؤمن الملائكة وتقول ولك بالمثل
    جزاكم الله خيرا على مشاركتك
    نورت مدونتى وارجو دوام التواصل
    ***********************************
    أحمد الجيزاوى
    معك كل الحق فالمفروض ان نعبد الله كأننا نراه فان لم نكن نراه فانه يرانا
    اشكرك على مشاركتك وارجو دوام التواصل
    *********************************
    اجندا حمرا
    أختى العزيزة:معكى حق واسمحيلى اضيف الى كلامك ان اللى بتخاف ربنا مش ممكن تعمل حاجة غلط
    نورتينى واشكرك على مشاركتك
    ***********************************
    dragon
    ياسلام اى خدمة
    بس مش كنت تقوللنا رأيك برضه
    عموما اشكرك على الزيارة
    *********************************** nostor azzuro
    أخى الفاضل:اسمحلى اعترض على تعليقك فانما الدين النصيحة
    يعنى لو شفت اختك خارجة كده او بتعمل حاجة غلط هتسيبها من غير حتى نصيحة!!؟
    وانا معاك ان فيه ناس عارفة ان اللى بتعمله غلط ومع ذلك بتعمله بس مين قاللك مايمكن غافلين ومحتاجين بس اللى ينبههم
    وبعدين مش معقول اخلى واحد مابيصليش خالص مثلا واقوله لازم تصلى الخمس فروض فى الجامع واول الوقت ومتنساش السنة
    تفتكر كده هيصلى ولا هيحلف انه مش هيركعها
    تعالى نبدأ مع الناس واحدة واحدة احنا مش عايزينهم ينفروا من الدين احنا عايزينهم يحبوه
    وبعدين متنساش حديث رسولنا الحبيب”من راى منكم منكرا فليغيره بيده فان لم يستطع فبلسانه فان لم يستطع فبقلبه وذلك اضعف الايمان” يعنى فى كل الاحوال مينفعش اقول وانا مالى
    نورتنى واشكرك لمشاركتك
    ***********************************
    ahmed douma
    ربنا يكرمك واشكرك على مشاركتك
    نورت مدونتى
    **********************************
    ammola
    أختى الحبيبة:أشكرك على مشاركتك ولكن ممكن اعرف ايه السبب؟
    أقوللك على حاجة انا واثقة منها انتى بلبس الصلاة احلى كتير ولو مش مصدقانى بصى على نفسك فى المرايا وانتى تعرفى
    ربنا يقربك منه ويرزقك فى طاعته السعادةالتى تتمنيها
    نورتينى وارجو دوام التواصل

  59. sasatifa Said:

    جزاك الله خيرا يا اختاه على الموضوع المهم وأكثر الله من أمثالك
    http://ahlammaya.blogspot.com/

  60. ammola Said:

    عليكى واحد
    هههههههههه
    انا ماينفعش اخرج بلبس الصلاة علشااااان…علشاااان
    علشان أنا منتقبة
    🙂
    جزاك الله كل خير.. مش باقولك حنونة والله

  61. Baker Said:

    موضوع هايل و الصور اجمل

  62. Desert cat Said:

    أنتى عارفة يعنى إيه محجبة؟ يعنى بقيتى رمز للإسلام بما ترتدينه وبالمقابل بما تفعلينه فبالله عليكى ماتشوهيش الاسلام بأفعالك.
    هو ده تلخيص البوست
    وده فعلا المطلوب من كل مسلمة

  63. monaliza Said:

    مجداوية
    أختى العزيزة يسعدنى دائما تواجدك ومشاركتك فلكى منى جزيل الشكر
    ***********************************
    sasatifa
    ربنا يكرمك على تعليقك
    نورت مدونتى واشكرك على مشاركتك
    ***********************************
    ammola
    أختى الحبيبة: هههههههههه والله انتى عسل
    وبجد فرحتينى ربنا يعزك ويسعدك
    دايما منورانى ربنا يثبتنا ويتقبل منا ومنكم صالح الاعمال
    **********************************
    baker
    ربنا يكرمك على تعليقك
    ويارب الموضوع يجيب نتيجة
    نورت مدونتى واشكرك على مشاركتك
    ***********************************
    desert cat
    اختى الحبيبة: ياريت فعلا كل مسلم يعرف انه مسئول عن الدين بما يفعله
    نورتينى واشكرك على مشاركتك

  64. ghoneem Said:

    اهلاااا بيكي

    سعيد بزيارة مدونتك الاولي

    بوست جميل وتناوله تم بصورة كوميدية يغير طريقة تناوله شوية وكدة كويس عشان زهقنا من الكلام التقليدي

    احنا لازم نعرف ان فتنة بني اسرائيل كانت في النساء وان الرسول حذرنا من فتنة النساء
    ربنا يهدي بناتنا ونسائنا ونلاقي بينهن حفيدات عائشة وفاطمة يحملن راية الاسلام ويقفن في أول الصف لنصرة الاسلام
    امين امين امين

    علي فكرة انا رديت علي استفسارك علي البوست بتاعي شكرااا للزيارة

    تحياتي
    بالتوفيق….

  65. FaceMoon Said:

    والله ياموناليزا انتى جيتى على الجرح عشان البنات دلوقتى حالها مش يسر حد
    كل واحدة فاهمة ان الحجاب طرحة تتحط على الراس مش فاهمة انه تصرفات وحجاب للنفس قبل ما يكون للراس فاهمين معنى غلط للدين واللى يغيظ انهم عارفين انه غلط وبيعملوا وياريت حد فيهم بيتقبل النصيحة تكلم واحدة تكشر فى وشك وتقولك انا حرة
    موضوع جميل بجد وبهنيكى على كل المدونة اكتر من رائعة والى الامام

  66. رصيف نمرة خمسة Said:

    موضوع جميل زى مدونتك بالظبط
    ربنا يبارك فيكى عشان فيه بنات بتفكر انها ادام حاطة اسبنش على دماغها لان طبعا شعرها غير لائق انها كده محجبة واتحسبت على المحجبين
    والمظهر يدل على الجوهر

  67. semsema Said:

    كلامك حلو اوى

    بس مفتكرش ان اللى بتعمل اى حاجة من الثلاث تصرفات اللى انتى عارضاهم هتسمعلك

    على فكرة انا على يقين ان مبقاش فى بنات هبلة بيضحك عليها كل اللى بتعمل حاجة بتبقى عارفة نهايتها ايه

    تحياتى

  68. إخوانى حتى النخاع Said:

    السلام عليكم

    بجد موضوع خطيييير جداااا ومهم جداااا

    نشوف كتير جداااا أكتر من واحدة محجبة وماشية من ولد ..
    بتكون حاجة تكسف خاااااالص

    شكراا لكى أختى الكريمة للبوست الحلو دا

  69. مواطن مصرى نايم Said:

    حقولك اية اللى يضحك
    اللى يضحك
    ان كل واحده من اللى بيلبسوا كده
    متخيلين انهم كده محجبات فعلا
    و انها كده
    مش بتعمل حاجة حرام
    دى مش خيبة
    انا بقى كنت بضحك على الخيبة
    و الخيبة التانية
    الشباب اللى بيهودوا
    البنات دول فى لبسهم
    و الواحد من دول يعجب بالوحدة
    عشان لبسها
    دى مش خيبة
    انا برضوا كنت بضحك على الخيبة دى كمان
    —————————
    انا من تعليقى الاول كان غرضى
    يكون ردك استفهام وتعجب كما فعلتى
    حتى ارد بهذا التعليق
    تحياتى ليكى

  70. monaliza Said:

    ghoneem
    اهلا بيك يا استاذ غنيم وياريت متكونش اخر مرة تشرفنى فيها بزيارتك
    ورغم انى مقصدتش انه يكون كوميدى بس الحمد لله انه لاقى قبول ويارب يجيب نتيجة
    اشكرك لردك على استفسارى
    نورت مدونتى واشكرك على مشاركتك
    ***********************************
    face moon
    ربنا يكرمك واشكرك على رايك فى المدونة وده من فضل ربى
    والبنات مش وحشين ولا حاجة حتى اللى مش بتقبل النصيحة هما بس محتاجين يفوقوا
    ومحتاجين حد مايزهقش من عدم تقبلهم النصيحة ومتنساش ان ضوء الشمس لايحرق الا اذا سلط على حيز ضيق يعنى واحدة واحدة معاهم وان شاء الله يجيب نتيجة
    نورت مدونتى فى زيارتك الاولى وياريت متكونش الاخيرة
    واشكرك لمشاركتك
    ***********************************
    رصيف نمرة خمسة
    اهلا بيك فى زيارتك الاولى واتمنى التكرار واشكرك جدا على رايك فى المدونة فهذا من فضل ربى
    وانا معاك فيه بنات ماشيين ورا الموضة ومش فاهمين انهم كده بيسيئوا للاسلام ربنا يهديهم ويحبب الينا جميعا الايمان ويزينه فى قلوبنا
    نورت مدونى واشكرك على مشاركتك
    ***********************************
    semsema
    أختى الحبيبة:أهلا بيكى فى زيارتك الاولى
    شوفنى بقى انا متفائلة اكتر منك هههه
    لان ممكن جدا اى بنت بتعمل حاجة غلط متكونش عارفة وتكون بتقلد وخلاص من غير وعى ونفسها حد ينصحها او يوجهها وبصراحة انا طمعانة ان موضوعى يقوم بالواجب معاها
    وتعرفى ان البنات اللى مفكرين نفسهم اذكى الناس هما دول اللى بيضحك عليهم
    لان الشيطان مخليهم مغرورين اوى فبيكون سهل اوى انها تقع وكله باسم الحب
    اشكرك لمشاركتك
    نورتى مدونتى وارجو دوام التواصل
    ***********************************
    اخوانى حتى النخاع
    وعليكم السلام ورحمة الله وبركاته
    اشكرك جدا على تعليقك وياريت فعلا البنات يعرفوا نظرة الشباب ليهم بتبقى عاملة ازاى
    نورتنى واشكرك على مشاركتك
    دمت طيبا ولمدونتى زائرا

  71. شهيدة Said:

    تعليقات مناسبة وقوية .. جزيت كل الخير

    ليت هذه الكلمات تصل لاسماعهن ويعتبرن قبل فوات الاوان

  72. monaliza Said:

    مواطن مصرى نايم
    اذن احييك على ضحكك ومش كنت تقول كده من الاول عشان تضحكنى معاك
    بس انت نسيت الخيبة اللى فى الصورة الثالثة وتستاهل الضحك اكتر منهم انت ناسى انها فى فرح
    أشكرك جدا على مشاركتك واهتمامك
    ربنا يكرمك على حميتك وغيرتك على الاسلام
    ***********************************
    شهيدة
    أختى الحبيبة:اهلا بيكى فى زيارتك الاولى وياريت متكونش الاخيرة
    ومعك حق فيليتهم يعتبرون
    نورتى مدونتى واشكرك على مشاركتك

  73. منى Said:

    امه الله
    طبعا الحجاب الشرعى ده فرض وامر مفروغ منه
    لكن تعالى نبص للموضوع من ناحيه تانيه
    اى حد بيحب ان يظهر اهم حاجه عنده من وجهه نظره
    والمحجبه بتخفى جسمها مهما كان شكله
    يعنى هى شايفه ان عندها حاجه اهم
    يمكن عقلها
    يمكن قلبها
    يمكن روحها
    بس خلاص
    تحياتى وتقديرى اختى

  74. مدحت محمد Said:

    والله عندك حق ويرحمونا شوية هههههههههه
    انا بستغرب والله من النوعيات دى
    ربنا يهديها ويهدينا

  75. pusssssy Said:

    ربنا يكرمك,

    ربنا يكرمك,

    ربنا يكرمك.

  76. شريف طلال Said:

    يا ريت فعلاً والله البنات تتعظ
    لأن انا كشاب مش هيغرينى الشعرتين الى فى راسها
    لا انا يغرينى بنطلون محزق او بادى محزق حتى لو لابسه مليون حجاب
    شكراً ليكى على الكلام المفيد جداً ده
    تحياتى

  77. monaliza Said:

    منى
    أختى الحبيبة:أنا معاكى طبعا واكبر دليل على ده ان ممكن جدا واحدة مش محجبة ومش مهتمة بمظهرها عشان كل اهتمامها لدراستها ولشغلها
    ولكن هناك من هن محجبات وناجحين برضه فى حياتهم ومع ذلك يهتتمن بمظهرهن بطريقة مستفزة
    تعرفى انا شايفة ان لو البنت رضت عن شكلها مش هتحاول تلفت الانتباه باى لبس او تصرف
    اشكرك على مشاركتك
    نورتينى وارجو دوام التواصل
    ***********************************
    مدحت محمد
    استمر بالدعاء يا استاذ مدحت وعليك بغض البصر ههههه
    نورتنى واشكرك على مشاركتك
    دمت طيبا ولمدونتى زائرا
    **********************************
    pussssy
    أختى الحبيبة:اهلا بيكى فى زيارتك الاولى وياريت متكونش الاخيرة
    ربنا يسعدك كما اسعدنى دعائك وربنا يتقبل
    نورتى مدونتى واشكرك على مشاركتك
    *********************************
    شريف طلال
    ياه يا استاذ شريف فعلا كلامك جاب الخلاصة ياريت فعلا البنات يعرفوا ده مش يجروا ورا الموضة وخلاص
    نورتنى واشكرك لمشاركتك
    دمت طيبا ولمدونتى زائرا

  78. mnoon Said:

    أمــــــــــــه الله

    بارك الله فيكى
    تعرفى البنات دى بتكون أصلاً
    مش فاهمه حاجه فى الدنيا
    ممكن تكون قلوبهم طيبه جايز
    لكن بصراحه ومن غير زعل
    البنات دى قمه الجهل
    لأنهم مش عارفين أبسط الفروض اللى عليهم
    وممكن يكونوا عارفين وبيستعبطوا
    وعموماً
    أنا شايفه إن برضه أحنا مسئولين عنهم
    كل حد يعرف واحده
    مش عارفه يعنى إيه حجاب
    فياريت بإسلوب جميل وبسيط
    يوضح لها يعنى إيه الحجاب
    وبجد مدونه جميله وهدفها أجمل
    سلااااام

  79. نبضات Said:

    الحجاب ليس تغطيه راس فقط ولكنه معانى اخرى اكثر وهو التزام اكتر واللى بنشوفه هذه الايام يعتبر تشويه للمحاجبات انا بستغرب كتير لما اشوف ناس للبسه ضيق ومتحجبه بيبقى نفسى اقول لهم هما متحجبين ليه وتعبين نفسهم او اجد بنات بتعمل تصرفات لاتليق باحترام ومعنى الحجاب اللى لبسينه واكتر حاجه بتستفزنى رقص المحجبات رغم ان فيهم ناس بتكون ملتزمه لكن فى اوقات الفرح مش عارفه ليه لازم يكون التعبير عنه بالطريقه المخالفه والمخجله ديه لدييننا والتزامنا

    3 حاجات اللى ذكرتيهم اكتر حاجات فعلا بحسها مشوهه للمحجبات واللى لما بشوفها بكون حزينه جدا وببقه عاوزه اقول
    الحجاب ليس فقط تغطيه راس ولكن معانى كتيره يجب الالتزام بيها واحترامها

    مقدرشى اقول انى ملتزمه جدا فى لبسى وتصرفاتى ولكنى فى نفس الوقت مش بعمل مايسىءلحجابى او دينى كشخصيه ملتزمه وبذكر نفسى دائما انى محجبه ومسلمه و بحاول بقدر الامكان ان اكون ملتزمه اكتر سواء فى دينى او حجابى وبحاول دايما اطور من نفسى وارتقى بعبادتى وطريقه لبسى

    تحياتى
    بوست مميز
    سعيدة بمعرفة مدونتك

  80. Abo 7anf Said:

    السلام عليكم
    الموضوع ولا اجمل
    وهقولك جمله سمعتها مره
    البنات اللبليبسوا الحاجات دى للفرجه بس
    دى جملتها سمعتها مره من واحد
    بس ساعه الارتباط فى اختيار تانى
    وفى النهايه جزاكى الله خير

  81. العاشقة Said:

    كلمات من قلب محترق يدعو إلى الجنة بلهفة وشوق

    🙂

    ثبتكِ الله وأعانكِ على الخير

  82. monaliza Said:

    mnoon
    اختى الحبيبة:ربنا يكرمك وبجد ده اللى انا بقصده مينفعش ابقى عارفة واحدة بتعمل كده واسيبها كده من غير نصيحة لانى اكيد هتسأل عنها يوم القيامة
    اشكرك لمشاركتك
    نورتينى وارجو دوام التواصل
    ***********************************
    نبضات
    أختى الحبيبة:اهلا بيكى فى زيارتك الاولى
    اسعدنى زيارتك واسعدنى اكتر تعليقك وطريقة تفكيرك ومعكى حق فالمهم ان نحاول ن نرتقى بعباداتنا والا نشوه الاسلام بما نرتديه او بما نفعله
    اشكرك لمشاركتك
    نورتى مدونى وارجو دوام التواصل
    ***********************************
    abo 7anf
    وعليكم السلام ورمة الله وبركاته
    وانا كمان سمعت الجملة دى بس مش الكل بيطبقها ويمكن ده اللى بيساعد البنات على اللى بيعملوه
    نورتنى واشكرك على مشاركتك
    دمت طيبا ولمدونتى زائرا
    **********************************
    العاشقة
    أختى الحبيبة:اهلا بيكى فى زيارتك الاولى
    ربنا يكرمك على تعليقك ويارب اكون كده فعلا
    اللهم لاتؤاخذنى بما يقولون واغفرلى مالايعلمون واجعلنى خير مما يظنون
    اشكرك على مشاركتك
    نورتى مدونتى وارجو دوام التواصل

  83. الهدهد الطائر Said:

    ” كل معروض مُهان”
    أضيف..
    أنا أرى ان الحجاب هو دليل المساواة بين الرجل و المرأة.
    فالحجاب يوجه العلاقة بين الجنسين بأن تكون على مستوى العقول لا الغرائز.

    ……….تحياتي………

  84. monaliza Said:

    الهد هد الطائر
    اهلا بيك واشكرك لمشاركتك واحترم رأيك
    مورت مدونتى وارجو دوام التواصل

  85. mostafarayan Said:

    هذا كلمات لا يقولها إلا العقلاء
    ولك المشكلة ان العقلاء في زماننا اصبحوا قلة

  86. monaliza Said:

    mostafarayan
    معك حق استاذ مصطفى ولكننا نأمل ان نرجعهم الى صوابهم ويتذكروا الهدف من وجودهم وهو عبادة الله
    نورتنى واشكرك لمشاركتك

  87. طوبة ذهب وطوبة فضة Said:

    تسلم ايدك وكل سنه وانتى ومدونتك بالف خير ويارب ديما اخوات فى الدين والدنيا ويجعله فى ميزان حسناتك

  88. موناليزا Said:

    طوبة ذهب وطوبة فضة
    ـــــــــــــــــــ
    اختى الحبيبة:وانتى طيبة وبخير وبكل السعادة اللى فى الدنيا
    مبسوطة جدا لقرائتك لهذا الموضوع لانه هدية لكل اخواتى وتقريبا انتى الوحيدة اللى قبلتى هديتى🙂
    ومبسوطة اكتر لمشاركتك
    نورتيييينى جداا حبيبتى


{ RSS feed for comments on this post} · { TrackBack URI }

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: